បក្សភ្លើងទៀន​រំឭក​ខួប​២៧​ឆ្នាំ និង​កំណត់​ទិសដៅ​ប្រកួតប្រជែង​ការ​បោះឆ្នោត​ឆ្នាំ២០២៣

ដោយ សេក បណ្ឌិត
2022.11.27
Share on WhatsApp
Share on WhatsApp
បក្សភ្លើងទៀន​រំឭក​ខួប​២៧​ឆ្នាំ និង​កំណត់​ទិសដៅ​ប្រកួតប្រជែង​ការ​បោះឆ្នោត​ឆ្នាំ២០២៣ ថ្នាក់ដឹកនាំកំពូលៗរបស់​គណបក្ស​ភ្លើងទៀន​នៅក្នុង​ខួប២៧ឆ្នាំ​នៃការ​បង្កើត​គណបក្ស ដែល​ប្រារព្ធ​ធ្វើនៅ​អតីត​ទីស្នាក់ការ​គណបក្ស​សមរង្ស៊ី ក្នុង​សង្កាត់​ទន្លេបាសាក់ រាជធានីភ្នំពេញ កាលពីថ្ងៃទី២៧ ខែវិច្ឆិកា ឆ្នាំ២០២២។
រូប៖ ពលរដ្ឋ​ផ្ដល់​ឲ្យ

គណបក្ស​ភ្លើងទៀន​រំឭកខួប​២៧​ឆ្នាំ​នៃ​ការ​បង្កើត​គណបក្ស និង​កំណត់ទិសដៅ​សកម្មភាព​ឆ្ពោះ​ទៅ​រក​ការផ្លាស់ប្តូរ​ជា​វិជ្ជមាន​តាមរយៈ​ការ​បោះឆ្នោត​ឆ្នាំ២០២៣ ដើម្បីមាន​ឱកាស​ដោះស្រាយ​បញ្ហា​សេដ្ឋកិច្ច និងសង្គម​ជូន​ប្រជាពលរដ្ឋ។ ​អ្នកវិភាគ​នយោបាយ​មើលឃើញថា សកម្មភាព​បក្សនេះ​នឹង​ក្លាយ​ជា​គូប្រជែង​នយោបាយ​ដ៏ធំជាមួយ​គណបក្ស​ប្រជាជនកម្ពុជា​សម្រាប់ការ​បោះឆ្នោត​នៅ​ឆ្នាំ​២០២៣​ខាងមុខ។

IMG_2093.JPG
ថ្នាក់ដឹកនាំកំពូលរបស់គណបក្សភ្លើងទៀន (ពីស្តាំមកឆ្វេង) លោក គង់ គាំ ទីប្រឹក្សាជាន់ខ្ពស់គណបក្សភ្លើងទៀន លោក ទាវ វណ្ណុល ប្រធានគណបក្សភ្លើងទៀន និងលោក សុន ឆ័យ ។ (រូប៖ ពលរដ្ឋផ្តល់ឱ្យ)

ថ្នាក់​ដឹក និងសមាជិក​គណបក្ស​ភ្លើងទៀន​ជាង ៣.០០០(ប្រាំមួយពាន់)​នាក់ ដែល​ជាក្រុម​ការងារ​រាជធានី ខេត្ត ក្រុម​ប្រឹក្សាឃុំ សង្កាត់ជាប់ឆ្នោត តំណាងចលនាស្រ្តី​និង​យុវជន​នៅទូទាំង​ប្រទេស​បាន​ចូលរួម ប្រារព្ធពិធី​រំឭក​ខួប​២៧​ឆ្នាំ​នៃ​ការ​បង្កើត​គណបក្ស​ស្ថិត​នៅសង្កាត់​ទន្លេបាក់សាក់ ​ខណ្ឌ​ចំការមន​ រាជធានី​ភ្នំពេញ នៅព្រឹកថ្ងៃទី២៧ ខែវិច្ឆិកា។ ថ្លែងសារ​ក្នុងពិធីនោះ​ពួកគេ​បាន​រំឭក​ពី​ស្នាដៃ​ និង​ប្រវត្តិ​តស៊ូ​លះបង់​របស់​លោក សម រង្ស៊ី ដែលបាន​បង្កើត​គណបក្ស​ជាតិ​ខ្មែរ​ដំបូងបន្ទាប់​មក​មន្រ្តីគណបក្សភ្លើងទៀន​បង្ហាញ​របាយការណ៍​របស់ខ្លួន​ដោយថា ក្នុងរយៈពេល​មួយ​ឆ្នាំ​ចាប់​ផ្តើមពី​ធ្វើ​សកម្មភាព​នយោបាយ​ឡើងវិញ​ក្រោយ​តុលាការ​កំពូល​រំលាយ​គណបក្ស​សង្គ្រោះជាតិ ហើយ​ស្ថានភាព​ប្រជាធិបតេយ្យ និងការ​គោរព​សិទ្ធិមនុស្ស​នៅកម្ពុជា​ធ្លាក់ចុះ​បាន​ធ្វើ​ឱ្យ​សកម្មជន និង​មន្រ្តីបក្សនេះ​មួយចំនួន​រងនូវការ​ធ្វើទុក្ខបុកម្នេញ​ស្ទើរគ្រប់រូបភាព​ពី​អាជ្ញាធរ​របស់​គណបក្ស​កាន់ណាច ដូចជា​ការប្ដឹង​ទៅ​តុលាការ ការចាប់ឃុំខ្លួន​ដាក់​ពន្ធនាគារ ការ​គំរាម​កំហែង​ជា​ដើម

ការឆ្លើយតប​ស្ថានភាព​បែបនេះ គណបក្ស​ភ្លើងទៀន​បានកំណត់​គោលដៅ​ពង្រីក​សកម្មភាព​របស់​ខ្លួន​ឆ្ពោះទៅរកការ​ផ្តាស់ប្តូរ​ជាវិជ្ជមាន​សម្រាប់ការ​បោះឆ្នោត​ជ្រើសតាំង​តំណាងរាស្រ្ត​ឱ្យ​ទទួល​បាន​ជោគជ័យ​ខាងមុខ ដើម្បី​ដោះស្រាយ​បញ្ហានានា​ក្នុង​សង្គម ដូចជា​ បញ្ហា​អំពើពុករលួយ កែលម្អ​ប្រព័ន្ធយុត្តិធម៌ លើក​កម្ពស់​ជីវភាព​រស់នៅ​របស់​ពលរដ្ឋ ជាពិសេស​ស្តារ​ប្រជាធិបតេយ្យ ការគោរព​សិទ្ធិ​មនុស្ស​ឡើង​វិញ។

IMG_2008.JPG
លោក សុន ឆ័យ អនុគណបក្សភ្លើងទៀន។ (រូប៖ ពលរដ្ឋផ្តល់ឱ្យ)

ថ្លែងក្នុង​ពិធីរំឭកខួប​នោះ អនុប្រធាន​គណបក្សភ្លើងទៀន​ដែលតុលាការ​សម្រេច​ឱ្យចាញ់ក្តី​គណបក្ស​ប្រជាជន​ក្នុង​សំណុំរឿង​បរិហារកេរ្តិ៍ លោក សុន ឆ័យ ថ្លែងថា ការតស៊ូ​របស់​គណបក្ស​ភ្លើងទៀន​រយៈពេល២៧ឆ្នាំ​មក​នេះតែងតែ​រងការ​បំភិតបំភ័យ​ឥតស្រាកស្រាន្ត ប៉ុន្តែពួកលោក​មិន​ដែល​រាថយ​នោះ​ទេ។ លោកបញ្ជាក់ថា បក្សភ្លើងទៀន បានដាក់ទិសដៅ​ធ្វើសកម្មភាព​ឱ្យខ្លាំងក្លា​ឆ្ពោះទៅរក​ការ​បោះឆ្នោត​ក្នុងការ​ផ្លាស់ប្ដូរ​តាមគោលការណ៍​លទ្ធិប្រជាធិបតេយ្យ ស្របតាម​រដ្ឋធម្មនុញ្ញ។ ​លោកអំពាវនាវ​ដល់​គណបក្ស​នយោបាយ និង​អ្នកស្រឡាញ់​ប្រជាធិបតេយ្យ​មកចូលរួម​កម្លាំង​ជាមួយ​គណបក្សភ្លើងទៀន ដើម្បីឈានទៅ​រកជ័យជំនះ​ក្នុងការ​បោះឆ្នោត​ជ្រើសតាំង​តំណាងរាស្ត្រ​ឆ្នាំ២០២៣​ខាងមុខ៖

«ម្នាក់ត្រូវ​មាន​សកម្មភាព​បម្រើពលរដ្ឋ​នៅតាម​មូលដ្ឋាន​ឱ្យបាន​ត្រឹមត្រូវ ចូលរួម​ផ្តល់​សេវា​ត្រឹមត្រូវ​ជូន​ពលរដ្ឋគណបក្សភ្លើងទៀន​គ្មានបំណង​អ្វី​ក្រៅពី​មាន​បំណង​ធ្វើយ៉ាងណា​ឱ្យប្រទេសជាតិ​យើង​គ្រប់គ្រង​ឱ្យបាន​ត្រឹមត្រូវ​ឱ្យមាន​យន្តការ​បម្រើ​ប្រជាពលរដ្ឋ​ឱ្យ​មាន​ប្រសិទ្ធភាព ពង្រឹង​ស្ថាប័នជាតិ​ទាំងអស់​រួមទាំង​តុលាការ​សព្វថ្ងៃ ដើម្បីឱ្យ​ផ្តល់​យុត្តិធម៌​ជូន​ប្រជារាស្រ្ត​យើងឱ្យ​បាន​គ្រប់ៗគ្នា ដើម្បី​សេចក្តីសុខ​ក្នុង​សង្គម​យើង»

IMG_2188.JPG
លោកបណ្ឌិត ឡៅ ម៉ុងហៃ (កណ្តាល) ចូលរួមខួប២៧ឆ្នាំនៃការបង្កើតគណបក្សភ្លើងទៀន ក្នុងនាមជាភ្ញៀវពិសេស កាលពីថ្ងៃទី២៧ ខែវិច្ឆិកា ឆ្នាំ២០២២។ (រូប៖ ពលរដ្ឋផ្តល់ឱ្យ)

ចំណែកអ្នកវិភាគ​នយោបាយ​ដែល​អញ្ជើញ​ធ្វើ​ជា​វាគ្មិន​ក្នុង​ពិធី​នោះ គឺ​លោក​បណ្ឌិត ឡៅ ម៉ុងហៃ មើល​ឃើញថា ស្មារតី​ដើម និង​សន្ទុះ​គាំទ្រ ជាពិសេស​រចនាសម្ព័ន្ធ និង​ក្រុម​ប្រឹក្សាឃុំ សង្កាត់​ជាប់​ឆ្នោត​ជាង​២ពាក់នាក់​នឹង​ធ្វើ​ឱ្យ​គណបក្ស​ភ្លើងទៀន​កាន់​តែ​រឹងមាំ និង​ក្លាយជា​គូប្រជែង​យោបាយ​ដ៏ធំ​របស់​គណបក្ស​ប្រជាជនកម្ពុជា​សម្រាប់​ការ​បោឆ្នោត​នៅឆ្នាំ២០២៣។ លោកបណ្ឌិត​ផ្តល់យោបល់ថា សកម្មជន​គណបក្ស​ភ្លើងទៀន​ត្រូវ​យក​លោក សម រង្ស៊ី ជាគម្រូទាក់ទង​សកម្មភាព​យកចិត្តទុកដាក់​ដោះស្រាយ​បញ្ហា​ទុក្ខលំបាក​ជូន​កសិករ អាជីវករ និង​កម្មករ​ជាដើម ទើបពួកគេ​ទទួល​បាន​ការ​គាំទ្រ​ពី​ពលរដ្ឋ​ម្ចាស់​ឆ្នោត​ផុលផុស៖

«កាលណា​យើង​រៀបចំ​ដោះស្រាយ​បញ្ហា មាន​គំនិត​ដោះស្រាយ​បញ្ហា អាហ្នឹងហើយ​យើង​ពង្រឹង​សមត្ថភាព​របស់​យើង​នៅពេល​ផ្លាស់ប្តូរ​គេនឹង​ឃើញ​ហើយ ហើយខ្លួន​យើងក៏ឃើញថា យើង​មាន​សមត្ថភាព មាន​គំនិត​ដោះស្រាយ​បញ្ហា​ជូន​ប្រជាពលរដ្ឋ»

ទាក់ទង​នឹង​បញ្ហានេះ អ្នកនាំពាក្យ​គណបក្ស​កាន់អំណាច​លោក សុខ ឥសាន ​ប្រាប់​វិទ្យុអាស៊ីសេរី​ដោយ​ខ្លី​ថា ការ​ថ្លែងសារ​របស់​មេដឹកនាំ​គណបក្ស​ភ្លើងទៀន​នោះ គឺ​ជា​សិទ្ធិ​របស់​ពួកគេ​ ប៉ុន្តែ​លោក​ច្រាន​ចោល​ចំពោះ​មតិរិះគន់​ចោទ​ប្រកាន់​លើ​គណបក្ស​ប្រជាជន​ធ្វើ​ទុក្ខបុកម្នេញ​លើ​សកម្មជន​នយោបាយ​កន្លង​មក៖

«ចោទថា​ធ្វើទុក្ខបុកម្នេញ​ពី​គណបក្ស​ប្រជាជន​កម្ពុជា ខ្ញុំយល់ថា​មិន​ត្រូវ​តាម​ការ​ពិត​ជាក់​ស្តែង​ទេ ហើយ​អ្វីដែល​កើតឡើង​ពាក់ព័ន្ធ​នឹង​សកម្មជន​គណបក្ស​ប្រឆាំង​កើតឡើង​ដោយសារ​ទង្វើ​ប្រព្រឹត្ត​ល្មើស​ច្បាប់​របស់​សកម្មជន​ទាំងឡាយ​នោះដែល​ជាប់​ផ្លូវ​ច្បាប់​បាទ»

IMG_2048.JPG
ថ្នាក់ដឹកនាំកំពូលៗរបស់គណបក្សភ្លើងទៀន។

ទោះយ៉ាងណា អតីត​មន្រ្តីជាន់ខ្ពស់​គណបក្ស​សង្គ្រោះជាតិ​មួយចំនួន​ដែល​រួចផុត​ពី​បម្រាម​សិទ្ធិ​នយោបាយ​កាល​ពី​ពេលថ្មី​នេះ​បាន​ប្រកាស ចូលរួម​ធ្វើសកម្មភាព​នយោបាយ​ជាមួយ​បក្ស​ភ្លើង​ទៀន។

អតីត​តំណាងរាស្រ្ត​គណបក្ស​សង្គ្រោះជាតិ​មណ្ឌល​កំពង់ចាម​លោក គឹមសួរ ភិរិទ្ធិ ថ្លែងថា សាល​ដីកា​របស់​តុលាការ​កំពូល​បំបិទ​សិទ្ធិ​មិន​ឱ្យ​លោក​ធ្វើសកម្មភាព​យោបាយរយៈពេល​៥​ឆ្នាំ​នោះ គឺ​ជា​រឿង​អយុត្តិធម៌ និង​ឈឺចាប់​សម្រាប់​អ្នកប្រជាធិបតេយ្យ។ ប៉ុន្តែលោកបញ្ជាក់ថា​ចំណាត់ការ​លើអ្នក​នយោបាយ​ប្រឆាំង​មិន​បាន​ធ្វើ​ឱ្យ​លោក​បោះបង់​ចោល​ការ​តស៊ូ និង​ក្តីសង្ឃឹម​ម្តង​ណា​ឡើយ៖

«គេហាម (សិទ្ធិនយោបាយ) ខ្ញុំ​ប្រាំ​ឆ្នាំ ខ្ញុំ​អត់​ខុស​អ្វីសោះ​រហូត​មក​ដល់​ពេល​ហ្នឹង ដីកា​តុលាការ​ក៏មិន​ដែល​យក​មក​ដល់​ខ្ញុំ ហើយ​អ្នក​ដែល​គេ​ចោទ ឬចុងចោទ​ដែលគេ​ត្រូវកាត់ទោស​មកដល់​ពេល​នេះក៏​មិន​ទាន់​មាន​ទោស​អ្វី។ ខ្ញុំសួរថា ឈឺចាប់​ឬ​ទេ ខ្ញុំឈឺ​ចាប់ តូចចិត្ត មុនការ​បោះឆ្នោត​ឃុំហ្នឹង​ខ្ញុំសុំសិទ្ធិ (ធ្វើ​នយោបាយ​ឡើង​វិញ) ដែរ​តើ ដាក់​ពាក្យ​សុំចេះ​តែ​បាត់​ទៅៗ»

IMG_2057.JPG
ថ្នាក់ដឹកនាំរបស់គណបក្សភ្លើងទៀន ក្នុងខួប២៧ឆ្នាំនៃការបង្កើតគណបក្ស។ (រូប៖ ពលរដ្ឋផ្តល់ឱ្យ)

គណបក្ស​ភ្លើងទៀន មាន​ឈ្មោះដើម​មក​ពី​គណបក្ស​ជាតិខ្មែរ​ត្រូវបាន​បង្កើត​ដោយ​លោក សម រង្ស៊ី នៅ​ឆ្នាំ១៩៩៥ក្រោយមក​រដ្ឋាភិបាល​បាន​កែប្រែ​ច្បាប់​ចាប់​បង្ខំ​ឲ្យ​បក្ស​នេះ​ប្ដូរ​ឈ្មោះ​ជា​គណបក្ស សម រង្ស៊ី នៅ​ឆ្នាំ១៩៩៨នៅ​ឆ្នាំ២០១៧ រដ្ឋាភិបាលបាន​កែប្រែច្បាប់​នយោបាយ​ម្ដងទៀត​ ដែល​បង្ខំ​ឲ្យ​គណបក្ស​នេះសម្រេចប្ដូរ​ឈ្មោះ​ទៅ​តាមរូប​សញ្ញា​គឺ​គណបក្សភ្លើងទៀន​រហូត​ដល់​សព្វថ្ងៃ។ គណបក្សភ្លើងទៀន ចាប់ផ្ដើម​ធ្វើសកម្មភាព​នយោបាយ​ឡើងវិញ​កាល​ពី​ខែវិច្ឆិកា ឆ្នាំ២០២១ ក្រោយ​ពេល​គណបក្ស​សង្គ្រោះជាតិ​ត្រូវ​តុលាការ​កំពូល​រំលាយ​ជិត​៥​ឆ្នាំ។ ចំណែក​លទ្ធផល​បោះឆ្នោត​ឃុំសង្កាត់​អាណត្តិទី៥​ កាលពី​ពេលថ្មីៗ បក្សនេះទទួល​សំឡេង​ឆ្នោត​លំដាប់ទី២​ បន្ទាប់ពី​គណបក្ស​កាន់​អំណាច៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។