គណបក្សភ្លើងទៀនដែលជាគណបក្សប្រឆាំងធំជាងគេ នៅមិនទាន់បានដាក់បញ្ជីឈ្មោះ និងបេក្ខជនឈរឈ្មោះ ជូនទៅឲ្យគណៈកម្មាធិការជាតិរៀបចំការបោះឆ្នោត គ.ជ.ប. នៅឡើយទេ តាមការគ្រោងទុក នៅថ្ងៃទី៥ ខែឧសភានេះ ខណៈ គ.ជ.ប. នឹងបិទបញ្ចប់ការទទួលយកពាក្យស្នើសុំរបស់គណបក្សនយោបាយ ក្នុងការចូលរួមការបោះឆ្នោតជ្រើសតាំងតំណាងរាស្ត្រ នីតិកាលទី៧ នៅថ្ងៃចន្ទសប្ដាហ៍ក្រោយ។
ចំណែកគណបក្សកែទម្រង់កម្ពុជា (CRP) ក៏បានប្រកាសកាលពីថ្ងៃទី៤ ខែឧសភាថា នឹងមិនចូលរួមការបោះឆ្នោតជាតិនេះទេ ដោយសារតែស្ថានភាពនយោបាយ មិនមានតម្លាភាព សេរី និងយុត្តិធម៌។ ក៏ប៉ុន្តែអ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.ប. លោក ហង្ស ពុទ្ធា បញ្ជាក់ថា ការមិនចូលរួមរបស់គណបក្សកែទម្រង់កម្ពុជានេះ គឺនឹងមិនប៉ះពាល់ដល់ដំណើរការរៀបចំការបោះឆ្នោតនោះឡើយ។
អនុប្រធានគណបក្សកែទម្រង់កម្ពុជា (CRP) លោក អ៊ូ ច័ន្ទរ័ត្ន ប្រាប់កាសែតក្នុងស្រុកថា គណបក្សក៏មានបញ្ហាថវិកា និងគ្មានធនធានមនុស្សគ្រប់គ្រាន់ ដើម្បីចូលរួមការបោះឆ្នោត ហើយគណបក្សក៏គ្មានពេលវេលា ដើម្បីហ្វឹកហ្វឺនអ្នកសង្កេតការណ៍ពីជំនាញនៃដំណើរការបោះឆ្នោតនោះដែរ។
លោក អ៊ូ ច័ន្ទរ័ត្ន អះអាងបន្តថា ការសម្រេចចិត្តមិនចូលរួមការបោះឆ្នោតនេះ ត្រូវបានសមាជិក និងអ្នកគាំទ្របក្សទាំងអស់គ្នា ទទួលស្គាល់ពីស្ថានភាពលំបាករបស់គណបក្ស។ លោកថា គណបក្សក៏គ្មានគម្រោងផែនការចូលរួមជាមួយគណបក្សដទៃទៀតដែរ ប៉ុន្តែនឹងត្រៀមលក្ខណៈសម្រាប់ការចូលរួមបោះឆ្នោតលើកក្រោយៗ ទៀត ព្រមទាំងបន្តសកម្មភាពរបស់ខ្លួន ដើម្បីផ្សព្វផ្សាយពីលទ្ធិប្រជាធិបតេយ្យ។
រហូតមកដល់ពេលនេះ គ.ជ.ប. បានទទួលបញ្ជីឈ្មោះនិងបេក្ខជនឈរឈ្មោះរបស់គណបក្សនយោបាយចំនួន ១១ហើយ និងកំពុងពិនិត្យឯកសាររបស់គណបក្សទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។