មន្ត្រីគណបក្សភ្លើងទៀនចោទអាជ្ញាធរខេត្តប៉ៃលិន បាត់ដំបង និងខេត្តមួយចំនួនទៀតថា កំពុងដើរអូសទាញសកម្មជនខ្លួនឲ្យចុះចូលបក្សកាន់អំណាច ក្រោយពេលបោះឆ្នោតឃុំសង្កាត់រួច។ ការលើកឡើងនេះ បន្ទាប់ពីសកម្មជនរបស់គណបក្សភ្លើងទៀនមួយចំនួន រងការគំរាមកំហែង និងគាបសង្កត់ពីសំណាក់អាជ្ញាធរបក្សកាន់អំណាចនៅតាមបណ្តារាជធានីខេត្តជាបន្តបន្ទាប់។ មន្ត្រីគណបក្សកាន់អំណាចច្រានចោលចំពោះការចោទប្រកាន់នេះ។
មន្ត្រីគណបក្សភ្លើងទៀនចោទអាជ្ញាធរគណបក្សកាន់អំណាចថាបានគំរាមកំហែងគាបសង្កត់ដល់សកម្មជនរបស់ខ្លួនដើម្បីឲ្យចូលរួមជាមួយគណបក្សកាន់អំណាចជាថ្នូរនឹងការទទួលបានផលប្រយោជន៍ផ្សេងៗ។
អនុប្រធានគណបក្សភ្លើងទៀនលោក ថាច់ សេដ្ឋា ប្រាប់វិទ្យុអាស៊ីសេរីថ្ងៃ១២ខែមិថុនា ថាតាំងពីមុនបោះឆ្នោតនិងក្រោយបោះឆ្នោតឃុំសង្កាត់រួចមកគណបក្សកាន់អំណាចនៅតែប្រើយុទ្ធសាស្ត្រដើរអូទាញសកម្មជនគណបក្សភ្លើងទៀន តាមរយៈប្រើរូបភាពគំរាមកំហែងការផ្ដល់ថវិកាតួនាទី និងការផ្តល់ការពន្លឿនសេវាសាធារណៈដែលជាប្រយោជន៍ផ្សេងៗដល់សកម្មជនរបស់បក្សខ្លួន៖ «យើងអត់មានអីក្រៅពីយើង ពង្រឹងគ្នាយើងនោះទេ ក្នុងការស្មារតី ហើយពង្រឹងនិងការតស៊ូរបស់យើង ហើយយើងឃើញហើយ បើទោះបីសំឡុតទោះអីក៏ដោយ ក៏ប្រជាពលរដ្ឋលោក អឺទៅមែន ខ្លះទៅតែខ្លួន ទេ ប៉ុន្តែនៅតែបោះឆ្នោតអោយយើងដដែលទេ ការគំរាមកំហែងមិនមានប្រសិទ្ធភាពអីខ្លាំងខ្លាអីទេ វាគ្រាន់តែជាការបំភ័យបំភិតអោយឃើញជារូបភាពហ្នឹង ហើយអូសទាញបានតែរូបរាងការគេហ្នឹង ចំពោះបេះដូងរបស់គេវិញ ប្រជាពលរដ្ឋឡូវមិនអាចអោយយកបានទេ»។
លោក ថាច់ សេដ្ឋា បន្ថែមថា ក្នុងនាមគណបក្សនយោបាយជាអ្នកនយោបាយប្រសិនបើពួកគេចង់បានលទ្ធិប្រជាធិតេយ្យពិតប្រាកដគណបក្សនយោបាយមិនត្រូវមានឧបាយកលទុច្ចរិតនោះទេ។ លោកថាគណបក្សកាន់អំណាចគួរតែប្រកួតប្រជែងដោយត្រឹមត្រូវ និងយុត្តិធម៏ដើម្បី៝៝ឱ្យ ប្រជាពលរដ្ឋជ្រើសរើសតំណាងមូលដ្ឋានរបស់ពួកគេចេញពីឆន្ទៈពិតប្រាកដ។
ជុំវិញរឿងនេះអ្នកនាំពាក្យគណបក្សកាន់អំណាចលោក សុខ ឥសាន ច្រានចោលការលើកឡើងរបស់គណបក្សភ្លើងទៀនដោយលោកថាគណបក្សប្រជាជនលកម្ពុជាមិនបានទៅគាបសង្កត់ទៅលើប្រជាពលរដ្ឋនិងសកម្មជនគណបក្សនយោបាយណាមួយឱ្យមកចុះចូលជាមួយគណបក្សខ្លួននោះឡើយ។ លោកបន្តថា ការណ៍ដែលសកម្មជនគណបក្សភ្លើងទៀនមកចូលរួមនយោបាយជាមួយគណបក្ស កាន់អំណាច គឺជាការធ្វើឡើងដោយស្ម័គ្រចិត្តហើយគ្មានការបង្ខិតបង្ខំនោះទេ៖ « មានប្រជាជនណាភ័យខ្លាច បើប្រជាជនភ័យខ្លាចម៉េចក៏បាន៧លាននាក់ទៅបោះឆ្នោត ឥឡូវយើងគិតតែប៉ុនហ្នឹងទៅដឹងហើយ ប្រជាជន៧លានផ្លាយនាក់ទៅបោះឆ្នោត សួរថាទាំងអស់ ៧លាននាក់ហ្នឹងសុទ្ធខ្លាចអី ហើយគេទៅតម្រង់ជួរហូហែរ ខ្ញុំក៏ទៅបោះឆ្នោតដូចគ្នា គ្រួសារខ្ញុំក៏ទៅបោះឆ្នោតដូចគ្នា សួរថាមានបញ្ហាអីត្រូវភ័យខ្លាច វាអត់ទេ សន្តិសុខគេទៅ គេទៅដើម្បីរៀបចំសណ្តាប់ធ្នាប់ ព្រោះបងប្អូនវាទៅមួយពេលចឹង វាច្រើនណាស់ មានឡាន មានម៉ូតូអី គេជួយសម្រួលក្នុងការចតម៉ូតូ ចតឡានអីអោយមានសណ្តាប់ធ្នាប់ ដើម្បីបើកផ្លូវអោយបងប្អូនទៅបោះឆ្នោតបានដោយស្រួល អាហ្នឹងតែប៉ុនហ្នឹងទេ»។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ (LICADO) លោក អំ សំអាត លើកឡើងថាពលរដ្ឋមានសិទ្ធិជ្រើសរើសគណបក្សនយោបាយដែលពួកគេពេញចិត្តស្របតាមរដ្ឋធម្មនុញ្ញ។ លោកសង្កេតឃើញមានភាពមិនប្រក្រតីមួយចំនួននៅថ្ងៃបោះឆ្នោតពាក់ព័ន្ធនឹងអាជ្ញាធរមូលដ្ឋានដែលជាមន្ត្រីរបស់បក្សកាន់អំណាច៖ «ការបោះឆ្នោតហ្នឹង គឺយើងសង្កេតឃើញមានអាជ្ញាធរមូលដ្ឋាននៅចាំកត់ឈ្មោះ ចាំអឺ មើលមនុស្សអីជាដើម ហើយមានអាជ្ញាធរដែលគាត់មិនមានសិទ្ធិ នៅក្នុងការការពារបោះឆ្នោតក៏មានវត្តមាននៅទីនោះ រហូតទៅដល់មានការសុំអនុញ្ញាតអោយចេញពីកន្លែងហ្នឹង ហើយក៏យើងឃើញមានមនុស្សមួយចំនួន ដែលបានសួរថាមានបោះឆ្នោតអោយពីណា គណបក្សណាអីជាដើម ។ អាចំនុចទាំងអស់ហ្នឹងគឺវាជាការប៉ះពាល់ទៅដល់សេរីភាព ទៅដល់សិទ្ធិដែលធ្វើអោយជះឥទ្ធិពលទៅដល់ផ្លូវអារម្មណ៍ ផ្លូវចិត្តរបស់ម្ចាស់ឆ្នោត»។
មន្ត្រីគណបក្សភ្លើងទៀន និងមន្ត្រីសង្គមស៊ីវិលនៅតែបង្ហាញថាដំណើរការបោះឆ្នោតនេះពិតជាមានអាជ្ញាធរ ភូមិ ឃុំ ស្រុក រហូតដល់ថ្នាក់ក្រុងនិងខេត្ត មានវត្តមាននៅការិយាល័យបោះឆ្នោតពិតប្រាកដមែន ។ បើទោះបីជាអ្នកនាំពាក្យគណបក្សកាន់អំណាចបានបដិសេធថាគ្មានការរំលោភសិទ្ធិមនុស្សហើយពលរដ្ឋបោះឆ្នោតដោយសប្បាយចិត្ត គ្មានការភ័យខ្លាច ប៉ុន្តែសង្គមស៊ីវិល និងសហគមន៍អន្តរជាតិនៅតែមើលឃើញថាការបោះឆ្នោតឃុំសង្កាត់កន្លងទៅថ្មីៗនេះមិនមានតម្លាភាព មិនសេរី និងមិនយុត្តិធម៌នោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។