គណបក្សភ្លើងទៀន គ្រោងប្រមូលផ្ដុំសមាជិកបក្ស ១ម៉ឺននាក់ តស៊ូមតិនៅទីលានប្រជាធិបតេយ្យ
2023.05.30
រូប៖ ហ្វេសប៊ុកគណបក្សភ្លើងទៀន
គណៈកម្មាធិការនាយកនៃគណបក្សភ្លើងទៀនសម្រេចថា នឹងធ្វើការប្រមូលផ្ដុំសមាជិកបក្សចំនួន ១ម៉ឺន ដើម្បីតវ៉ាទាមទារឱ្យគណៈកម្មាធិការជាតិរៀបចំការបោះឆ្នោត ផ្ដល់សិទ្ធិឱ្យគណបក្សនេះអាចចូលរួមប្រកួតប្រជែងក្នុងការបោះឆ្នោតនៅខែកក្កដាខាងមុខ។
គណៈកម្មាធិការនាយកគណបក្សភ្លើងទៀនអះអាងថា គណបក្សភ្លើងទៀនមិនមានល្បិចកល មិនចង់ចូលរួមប្រកួតប្រជែងនយោបាយ នៅក្នុងការបោះឆ្នោតជ្រើសតាំងតំណាងរាស្ត្រ ក្នុងខែកក្កដាខាងមុខ ដើម្បីឱ្យបរទេសដាក់សម្ពាធមកលើរដ្ឋាភិបាលនោះទេ។ នៅក្នុងកិច្ចប្រជុំគណៈកម្មាធិការនាយករបស់គណបក្សភ្លើងទៀន កាលពីថ្ងៃទី២៨ ខែឧសភា គណបក្សនេះបានសម្រេចថា នឹងប្រមូលផ្ដុំសមាជិកប្រមាណ ១ម៉ឺននាក់ នៅឯទីលានប្រជាធិបតេយ្យ ដើម្បីតវ៉ាទាមទារឱ្យគណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប អាចចូលរួមប្រកួតប្រជែងក្នុងការបោះឆ្នោត។
អនុប្រធានគណបក្សភ្លើងទៀន លោក រ៉ុង ឈុន ប្រាប់វិទ្យុអាស៊ីសេរីនៅថ្ងៃទី៣០ ខែឧសភា ថា គណបក្សភ្លើងទៀននឹងដាក់លិខិតជូនដំណឹងទៅសាលារាជធានីភ្នំពេញ និងក្រសួងមហាផ្ទៃនៅក្នុងសប្ដាហ៍នេះ អំពីការជួបជុំសមាជិកគណបក្សភ្លើងទៀនប្រមាណ ១ម៉ឺននាក់ នៅឯទីលានប្រជាធិបតេយ្យ។ លោកបន្ថែមថា ការសម្រេចរបស់គណៈកម្មាធិការជាតិរៀបចំការបោះឆ្នោត មិនឱ្យគណបក្សភ្លើងទៀនចូលរួមប្រកួតប្រជែងនយោបាយ ធ្វើឡើងដោយសារនិន្នាការនយោបាយ ជាជាងការខ្វះខាតឯកសាររបស់គណបក្សភ្លើងទៀន ព្រោះផ្អែកតាមលិខិតបញ្ជាក់របស់ក្រសួងមហាផ្ទៃ ចេញកាលពីថ្ងៃទី៥ ខែឧសភា លិខិតនោះបានបញ្ជាក់យ៉ាងច្បាស់ថា គណបក្សភ្លើងទៀនពិតជាបានចុះបញ្ជីគណបក្សនយោបាយនៅក្រសួងមហាផ្ទៃពិតប្រាកដមែន។
លោក រ៉ុង ឈុន៖ «ប្រសិនបើលោកនាយករដ្ឋមន្ត្រីគិតបែបហ្នឹង ដើម្បីផ្ចាញ់អ្នកលាក់ឯកសារ លោកនាយករដ្ឋមន្ត្រីផ្ដល់ឱ្យគណបក្សភ្លើងទៀន ចូលរួមប្រកួតទៅ ហើយនៅពេលហ្នឹង បើគណបក្សភ្លើងទៀនមិនចូលរួមប្រកួត អាហ្នឹងគណបក្សភ្លើងទៀនមានល្បិចកលមែន ហើយបើសិនជាគណបក្សភ្លើងទៀនចូលរួមប្រកួតមានន័យថា គណបក្សភ្លើងទៀនមិនមានល្បិចកលអីទេ»។
ដោយសារតែគណបក្សភ្លើងទៀន បានបាត់លិខិតចុះបញ្ជីគណបក្សនយោបាយច្បាប់ដើម ដែលចេញដោយក្រសួងមហាផ្ទៃ ក្រោយពីរដ្ឋាភិបាលបិទការិយាល័យគណបក្សភ្លើងទៀន ដែលនៅជាមួយគណបក្សសង្គ្រោះជាតិ នៅសង្កាត់ចាក់អង្រែក្រោម រាជធានីភ្នំពេញ។ គណបក្សភ្លើងទៀនបានធ្វើលិខិតស្នើសុំក្រសួងមហាផ្ទៃ ឱ្យបញ្ជាក់លិខិតចុះបញ្ជីគណបក្សពីក្រសួងមហាផ្ទៃ ដើម្បីយកទៅចុះឈ្មោះចូលរួមប្រកួតប្រជែងការបោះឆ្នោត នៅគណៈកម្មាធិការជាតិរៀបចំការបោះឆ្នោត ក៏ប៉ុន្តែក្រសួងមហាផ្ទៃមិនបានផ្ដល់លិខិតទុតិយតា អំពីការចុះបញ្ជីគណបក្សនយោបាយ របស់គណបក្សភ្លើងទៀននោះទេ ដោយគ្រាន់តែចេញលិខិតបញ្ជាក់ ទទួលស្គាល់ថាគណបក្សភ្លើងទៀនពិតជាបានចុះបញ្ជីគណបក្សនយោបាយនៅក្រសួងមហាផ្ទៃពិតប្រាកដមែន។ បន្ទាប់ពីទទួលបានការដាក់ពាក្យពីគណបក្សភ្លើងទៀន គណៈកម្មាធិការជាតិរៀបចំការបោះឆ្នោតបានសម្រេច នៅថ្ងៃទី១៥ ខែឧសភា បដិសេធការចុះបញ្ជីគណបក្សភ្លើងទៀនឱ្យចូលរួមប្រកួតប្រជែងនយោបាយនោះឡើយ។ គ.ជ.ប បានបញ្ជាក់ថា ការបដិសេធការចុះបញ្ជីរបស់គណបក្សភ្លើងទៀន គឺដោយសារគណបក្សនេះ មិនបានភ្ជាប់ប្រកាសស្ដីពីការចុះឈ្មោះ នៅក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យានុកូលកម្ម ដោយរដ្ឋបាលរាជធានី ខេត្ត ក្រុង ស្រុក ខណ្ឌ នៅការិយាល័យច្រកចេញចូលតែមួយ ឱ្យបានត្រឹមត្រូវស្របតាមកថាខណ្ឌទី២ និងចំណុចទី១ នៅក្នុងមាត្រា២៧ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ។
ក៏ប៉ុន្តែជាក់ស្ដែង ច្បាប់ស្ដីពីការបោះឆ្នោតជ្រើសតាំងតំណាងរាស្ត្រឆ្នាំ២០១៥ មាត្រា២៧ ត្រង់កថាខណ្ឌទី២ និងចំណុចទី១ ដែល គ.ជ.ប លើកយកមកអះអាងនេះ ពុំបានតម្រូវឱ្យគណបក្សនយោបាយយកសេចក្ដីចម្លងលិខិតបញ្ជាក់ការចុះបញ្ជីគណបក្សនៅក្រសួងមហាផ្ទៃ ទៅបញ្ជាក់នីត្យានុកូលកម្មដោយរដ្ឋបាលរាជធានី ខេត្ត ក្រុង ស្រុក ខណ្ឌនោះឡើយ។ បន្ថែមពីលើនេះ ក្រុមប្រឹក្សាធម្មនុញ្ញក៏បានបដិសេធបណ្ដឹងរបស់គណបក្សភ្លើងទៀនកាលពីថ្ងៃទី២៥ ខែឧសភា។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ ដើម្បីបកស្រាយជុំវិញផែនការប្រមូលផ្ដុំរបស់សមាជិកគណបក្សភ្លើងទៀន បាននៅឡើយទេ នៅថ្ងៃទី៣០ ខែឧសភា។ ទោះជាយ៉ាងណា លោក ខៀវ សុភ័គ បានឆ្លើយតបជាមួយសារព័ត៌មាន វីអូអេ (VOA) ថា ក្រសួងមហាផ្ទៃនឹងមិនអនុញ្ញាតឱ្យមានការប្រមូលផ្ដុំរបស់សមាជិកគណបក្សភ្លើងទៀននោះទេ។
ជុំវិញរឿងនេះ អ្នកវិភាគនយោបាយ លោក គឹម សុខ គាំទ្រចំពោះការប្រមូលផ្ដុំតវ៉ារបស់សមាជិកគណបក្សភ្លើងទៀន។ លោកបន្ថែមថា ដើម្បីកុំឱ្យមតិមហាជនជាតិ អន្តរជាតិ និងប្រវត្តិសាស្ត្រចារថា លោក ហ៊ុន សែន គឺជាអ្នកនយោបាយកំសាក លោក ហ៊ុន សែន គួរតែផ្ដល់ឱកាសឱ្យគណបក្សភ្លើងទៀន ចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រនៅថ្ងៃទី២៣ ខែកក្កដា ខាងមុខនេះ។
លោក គឹម សុខ៖ «ឪកំសាក មិនហ៊ានប្រកួតដោយការបោះឆ្នោត សូម្បីតែការបោះឆ្នោតហ្នឹងខ្លួនគ្រប់គ្រង ១០០ភាគរយហើយ មកកំសាកមិនចង់ឃើញប្រជាពលរដ្ឋខ្មែរទាមទារយុត្តិធម៌តាមរយៈកម្លាំងគណបក្សភ្លើងទៀនមួយម៉ឺននាក់ ហើយមកកំសាកមិនហ៊ានស្ដាប់សូម្បីតែសម្ដីសម្របសម្រួលរបស់អ្នកការទូត កំសាកហើយកំសាកទៀត ដូច្នេះទ្រឹស្ដីបទកំសាកនេះ ត្រូវប្រជាពលរដ្ឋខ្មែរទូទាំងពិភពលោកសូត្រដាក់លោក ហ៊ុន សែន និងគ្រួសារហ៊ុនរហូត»។
ច្បាប់ស្ដីពីការធ្វើបាតុកម្មដោយសន្តិវិធី មិនបានចែងតម្រូវឱ្យស្ថាប័នណាមួយទទួលបានការអនុញ្ញាតជាមុនពីអាជ្ញាធរដែនដី មុនធ្វើបាតុកម្មនោះឡើយ។ មាត្រា៥ នៃច្បាប់នេះគ្រាន់តែចែងថា ក្រុមបុគ្គលណាមួយដែលមានបំណងចង់ធ្វើបាតុកម្មដោយសន្តិវិធី នៅកន្លែងសាធារណៈណាមួយ ត្រូវជូនដំណឹងទៅអាជ្ញាធរដែនដីរាជធានី ឬខេត្តតែប៉ុណ្ណោះ។
ទោះជាយ៉ាងណាក្ដី លោក រ៉ុង ឈុន បញ្ជាក់ថា គណបក្សភ្លើងទៀននឹងនៅតែដាក់លិខិតជូនដំណឹងទៅក្រសួងមហាផ្ទៃ និងសាលារាជធានីភ្នំពេញនៅក្នុងសប្ដាហ៍នេះ ហើយប្រសិនបើអាជ្ញាធរមិនអនុញ្ញាតឱ្យប្រមូលផ្ដុំការតវ៉ា នោះគណៈកម្មាធិការនាយកគណបក្សភ្លើងទៀននឹងបើកការប្រជុំពិភាក្សាជាថ្មីម្ដងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សុន្ទរកថា លោក ហ៊ុន ម៉ាណែត គ្រោងថ្លែងនៅអ.ស.ប គ្មានទេការលើកកម្ពស់សិទ្ធិមនុស្ស និងប្រជាធិបតេយ្យ
- ពលរដ្ឋខ្មែរ ធ្វើបាតុកម្មប្រឆាំងវត្តមានលោក ហ៊ុន ម៉ាណែត នៅទីស្នាក់ការអង្គការសហប្រជាជាតិ
- កម្ពុជាស្វាគមន៍បច្ចេកវិទ្យាក្រុមហ៊ុន Huawei ខណៈប្រទេសមួយចំនួនបារម្ភពីការជ្រៀតជ្រែក
- អ្នករិះគន់ថា លោក ហ៊ុន ម៉ាណែត គួរឆក់ឱកាសស្ដារប្រជាធិបតេយ្យ និងសិទ្ធិមនុស្សតាមសំណើរបស់ប្រមុខការទូតអូស្ត្រាលី
- លោក ហ៊ុន ម៉ាណែត អះអាងប្រាប់អគ្គលេខាធិការអ.ស.ប ពីសុឆន្ទៈកែលម្អស្ថានភាពសិទ្ធិមនុស្ស
អត្ថបទពេញនិយម
នយោបាយ
- កម្ពុជាគួរបង្ហាញតម្លាភាពនៅកំពង់ផែរាមជាជាងប្រកាសប្រាប់អន្តរជាតិថា កម្ពុជាគ្មានវត្តមានមូលដ្ឋានយោធាបរទេស
- សម្ភាសមន្ត្រីជាន់ខ្ពស់បក្សសង្រ្គោះជាតិជុំវិញបាតុកម្មប្រឆាំងលោក ហ៊ុន ម៉ាណែត នៅអាមេរិក
- លោក ហ៊ុន សែន បង្ហោះវីដេអូពលរដ្ឋក្រៅស្រុកគាំទ្រកូនខ្លួនទៅអាមេរិកដើម្បី «បន្លំភ្នែកអន្តរជាតិ»
- លោក ហ៊ុន ម៉ាណែត អួតអាងថា លោកប្រឹងដើរទាក់ម៉ូយឱ្យមករកស៊ីនៅកម្ពុជាតែមិននិយាយពីការចង់បានប្រព័ន្ធអនុគ្រោះពន្ធ EBAនិងGSP
- គ្រួសារដង្ហោយហៅរកយុត្តិធម៌ក្រោយតុលាការផ្ដន្ទាទោសលោក ថាច់ សេដ្ឋា ឱ្យជាប់ពន្ធនាគារ ១៨ខែ ក្នុងសំណុំរឿងចេញសែកស្អុយ