ទីប្រឹក្សា​​លោក ហ៊ុន សែន ដើរ​គំរាម​កំហែង​សកម្មជន​​បក្ស​​ភ្លើង​​ទៀន ដើម្បី​អូសទាញ​​ឱ្យ​ចុះចូល​បក្ស​កាន់​អំណាច

ដោយ ខែ សុណង
2022.05.03
ទីប្រឹក្សា​​លោក ហ៊ុន សែន ដើរ​គំរាម​កំហែង​សកម្មជន​​បក្ស​​ភ្លើង​​ទៀន ដើម្បី​អូសទាញ​​ឱ្យ​ចុះចូល​បក្ស​កាន់​អំណាច អ្នកគាំទ្រគណបក្សភ្លើងទៀន ខេត្តត្បូងឃ្មុំ។
រូប៖ គណបក្សភ្លើងទៀន ខេត្តត្បូងឃ្មុំ

សកម្មជន​គណបក្ស​ភ្លើងទៀន ចោទ​ប្រកាន់​ទីប្រឹក្សា​របស់​លោក​នាយករដ្ឋមន្រ្តី ហ៊ុន សែន ថា​ បាន​ប្រើ​លុយ​ទិញ​ទឹក​ចិត្ត និង​គំរាមកំហែង​សកម្មជន​មូលដ្ឋាន​របស់​​បក្ស​​​ភ្លើង​​ទៀន​ខេត្តត្បូងឃ្មុំ ដើម្បី​អូស​ទាញ​​ឱ្យចុះគណបក្ស​កាន់​អំណាច។ មន្រ្តីសង្គមស៊ីវិល​ថា ទង្វើ​បែប​នេះ ជាការ​ជំរុញ​រំលោភ​សិទ្ធិ​របស់​ពលរដ្ឋ និង​ប៉ះពាល់​ដល់ដំណើរ​បោះឆ្នោត​ខាងមុខ

បេក្ខជន​មេឃុំ ​គណបក្ស​ភ្លើង​ទៀន​ដែល​រង​ការ​អូសទាញ​ពី​សំណាក់​​ទីប្រឹក្សា​របស់​លោក ហ៊ុន សែន ម្តង​ហើយ​ម្តង​ទៀត ស្នើ​ឱ្យ​សមត្ថកិច្ចពាក់ព័ន្ធ​អន្តរាគមន៍​ទប់ស្កាត់​អំពើ​គំរាមកំហែង ​ទាំង​នោះ​ឱ្យ​ទាន់​ពេល​វេលា ដើម្បី​ឱ្យ​ពួកគេ​អាច​ធ្វើ​សកម្មភាព​នយោបាយ​ដោយ​សេរី សម្រាប់​បោះឆ្នោត​ជ្រើស​រើស​ក្រុម​ប្រឹក្សា​ឃុំ​សង្កាត់ អាណត្តិទី៥នេះ។

បេក្ខជន​មេឃុំ​កណ្តោលជ្រុំ ស្រុកពញាក្រែក ខេត្តត្បូងឃ្មុំ នៃ​​គណបក្ស​​ភ្លើង​​ទៀនលោក ​ណែម សឿន ប្រាប់​វិទ្យុ​អាស៊ីសេរី​នៅថ្ងៃទី៣ ខែឧសភាថា ការបោះឆ្នោត​ឃុំ សង្កាត់​ខិតជិត​មក​ដល់​បេក្ខជន និង​ភ្នាក់ ងារ​របស់​​លោកបា​ន​ទទួល​ការធ្វើទុក្ខ​បុក​ម្នេញ​ជាបន្តបន្ទាប់ ក្រោម​រូបភាព​សន្យា​ផ្តល់​លុយ​ទិញ​ទឹក​ចិត្ត គំរាម​ដក​ប័ណ្ណក្រីក្រ​ពី​សំណាក់​មន្រ្តី​បក្ស​កាន់​អំណាច។

បេក្ខជន​រូប​នេះ​បន្ថែម​ថា មន្រ្តី​រដ្ឋាភិបាល​ឈ្មោះ ខាត់ កុសល្យ បាន​នាំគ្នា​ព្យាយាម​ជួប​រូប​លោក​នៅ​ផ្ទះ​ជា​ច្រើន​លើក ដើម្បីឱ្យ​ចុះ​ចូល​ជាមួយ​គណបក្ស​កាន់​អំណាច ដោយ​សន្យា​នឹង​ផ្តល់​លុយ​២០​លាន​រៀល ឬ​ស្មើ​៥​ពាន់​ដុល្លារ ប៉ុន្តែ​លោក​បដិសេធ។ លោក​ចាត់​ទុក​ទង្វើ​រ​បែប​នេះ​ថា ជារូប​ភាព​គំរាម​កំហែង​ផ្នែក​នយោ​បាយ​ដែល​មិន​អាច​ទទួល​យក​បាន និង​ធ្វើ​ឱ្យសកម្មជនរបស់លោក​មិន​អាច​ធ្វើ​សកម្មភាព​នយោបាយ៖ «​ទិញ​ខ្ញុំមួយ​ហ្នឹង​ដើម្បី​បាត់​ខ្ញុំ​ឱ្យ​អស់​មួយ​ស្រុក​ពញា​ក្រែក ខ្ញុំប្រាប់​រួច​ហើយ​កុំ​ឱ្យ​បង្ហោះ​រូប​ខ្ញុំ ទំនាក់​ទំនង​មក​ម្សិល​មិញ​ទៀត ខ្ញុំ​ថា​កុំ​មក​ចាំ​ជួបអី​ទៀត​ទេ ខ្ញុំ​ឈប់​ហើយ​ ឈប់​ឱ្យ​ខ្ញុំ​ចុះ​ចូល​ទៀត ព្រោះ​ដើរ​ទិញ​សកម្មជន​ខ្ញុំ​ឆ្អែតហើយ ខ្ញុំ​លែង​ធ្វើ​អ្វី​តាម​អ្នក​ឯង​ទៀត​ហើយ»

ស្រដៀង​គ្នា​នេះ​ដែរ បេក្ខជន​មេឃុំ​កណ្តោល​ជ្រុំ ស្រុក​ពញាក្រែក ខេត្តត្បូងឃ្មុំ នៃ​​គណបក្ស​​ភ្លើង​​ទៀន​ម្នាក់​ទៀត​ លោក ​ហ៊ួ ចាន់ ប្រាប់ថា បុគ្គល​ឈ្មោះ ខាត់ កុសល្យ ដែល​អះអាងថា ជា​មន្រ្តី​គណបក្ស​ប្រជាជន​កម្ពុជា និង​ជា​ទីប្រឹក្សា​របស់​លោក​នាយក​រដ្ឋមន្រ្តី ហ៊ុន សែន បាន​ទំនាក់​ទំនង​មក​លោក​តាម​ទូរស័ព្ទ ដើម្បី​ណាត់​ជួបជជែក​ស្ងាត់ៗ ប៉ុន្តែ​បដិសេធ។ លោកយល់ថា បុគ្គលនោះ​មាន​បំណង​មិន​ល្អ ឬ​ដើរ​អូស​ទាញ​សកម្មជន​បក្សភ្លើងទៀន ដើម្បី​ចុះចូល​បក្ស​កាន់​អំណាចបេក្ខជន​បក្ស​​ភ្លើង​​ទៀន​​រូបនេះថា ​លោក និង​សកម្មជន​ផ្សេង​ទៀតប្តេជ្ញា​ចិត្ត​បន្ត​មិនចុះ​ចូល​តាម​ការ​អូស​ទាញ​នោះ​ឡើយ៖ «​ខ្ញុំ​យល់​ថា​ប្រហែល​គេ​មិន​ចង់​ឱ្យ​ខ្ញុំ​បន្ត​សកម្មភាព​ការ​ងារ​ក្រុមប្រឹក្សា​ឃុំ​សង្កាត់​ទីមួយ ទីពីរ​ចង់​ទិញ​ទឹក​ចិត្ត​របស់​ខ្ញុំ ប៉ុន្តែ​ឆន្ទៈ​របស់​ខ្ញុំ​មិន​លក់ឧត្តម​គតិ​ទេ ព្រោះ​ខ្ញុំ​ធ្លាប់​ធ្វើ​ការ​ជូន​ប្រជា​ពលរដ្ឋ ខ្ញុំ​អត់​ដែល​ចាញ់​ការ​គំរាមកំហែង​របស់​អ្នក​ណា​ទេ បើ​​ខ្ញុំ​ធ្វើ​តាម​ច្បាប់»

វិទ្យុអាស៊ីសេរី​មិន​អាច​ទាក់​លោក ខាន់ កុសល្យ ដើម្បី​បញ្ជាក់​ជុំវិញ​រឿង​នេះបាន​ទេ​ នៅថ្ងៃទី៣ ខែឧសភាប៉ុន្តែ​បើ​តាម​សារ​សំឡេង​របស់​លោកទំនាក់ទំនង​ជា​មួយ​សកម្មជន​បក្សភ្លើងទៀន​អះអាង​លោក​ជាទីប្រឹក្សារបស់​លោក​នាយករដ្ឋមន្រ្តី ហ៊ុន សែន៖ «ហេឡូ​មាន​ការ​អី​ដែរខ្ញុំ​សុំ​ជួប​បង​ឯង​តិច​​បាន​ទេចុះ​បង​បានលេខ​ខ្ញុំ​មក​ពី​ខាង​ណា​ដែរខ្ញុំ​សួរ​មេ​ឃុំ ខ្ញុំជា​​​ទី​ប្រឹក្សា​សម្តេច ខ្ញុំ​​សួរ​ពួក​ហ្នឹង​មិនបាន​មិច ចឹង​បាន​ថា​​ហ្នឹង»

ឆ្លើយ​​តប​​រឿង​​នេះ អភិបាល​​​រង​​ខេត្ត​ត្បូង​ឃ្មុំ​លោក កេង ប៊ុនណា ប្រាប់​វិទ្យុអាស៊ីសេរី​ថា​ រហូត​មក​ដល់​ពេល​នេះ​ ខាង​លោក​ពុំទាន់មាន​រូបភាព​គំរាមកំហែង រារាំង ឬរើស​អើងលើគណបក្សនយោបាយ​​​​ណាមួយ​នៅ​ឡើយ​ទេ។ យ៉ាងណាក្តី លោកអះអាង​ថា អាជ្ញាធរ​មិន​មាន​សមត្ថកិច្ច​គ្រប់គ្រង ឬ​ចាត់​វិធានការ​ទប់​ស្កាត់​ចំពោះ​ជន​ទាំងឡាយ​ណា​ដែល​ធ្វើ​សកម្មភាព​ប្រើលុយ​ទិញ​ដូរ​សកម្មជន​​ភ្លើងទៀន​នោះ​ទេ ព្រោះ​ករណី​នេះ គឺ​ជា​សិទ្ធិ​របស់​ឯកជន និងមិន​មែន​ជា​អំពើ​ខុស​ច្បាប់៖ «​ការ​ដែល​ជួយ​សម្រួល​ទៅ​លើ​ការ​ទិញ​សមាជិក​អី​នោះ មិនមាន​អ្វី​ធ្វើ​ការ​ណែ​នាំ​ទេ ព្រោះ​ជា​រឿង​ឯក​ជន​របស់​គេ ប៉ុន្តែ​ការ​អនុញ្ញាត​ច្បាប់ ឬនិយាយ​ជា​រួម​សម្រួល​ក្នុង​ការ​ធ្វើ​នយោ​បាយ​របស់​គណបក្ស​ទាំង​អស់​ដែល​ចុះបញ្ជី​នៅ គ..ប យើង​អាច​ធ្វើ​បាន ហើយ​មាន​តែ​ធានា​សុវត្ថិភាព​ជូន​ពួក​គាត់»

ចំណែក អ្នក​នាំ​ពាក្យ​គណៈកម្មាធិការជាតិ​រៀបចំការ​បោះឆ្នោត ​(គ.ជ.ប) លោក ហង្ស ពុទ្ធា ថ្លែងថា កន្លង​មក​គណបក្ស​នយោបាយ​តែងតែ​លើក​ឡើង​អំពី​ករណី​គំរាមកំហែង និង​ការ​ទិញ​ដូរ​បេក្ខជន​ ភ្នាក់​ងារ​​សង្កេតការណ៍​របស់​ខ្លួន ប៉ុន្តែ​រហូតមកដល់​ពេល​នេះ គ.ជ.មិន​ធ្លាប់​ទទួល​បាន​ភស្តុតាង​បញ្ជាក់​ពី​អំពើ​ទាំង​នោះ​ទេ។ លោកឱ្យ​ដឹងថា គ.ជ.មាន​សមត្ថកិច្ច​ទទួល​ខុស​ត្រូវ​អំឡុង​ពេល​យុទ្ធនាការ​ឃោសនា​បោះឆ្នោត​តែ​ប៉ុណ្ណោះ ហើយ​ក្រៅពី​នេះ គឺជា​តួនាទី​របស់​អាជ្ញាធរ​ដែនដី។ ប៉ុន្តែ លោក ហង្ស ពុទ្ធា បញ្ជាក់ថា បើ​សិន​បេក្ខជន និង​ភ្នាក់ងារ​របស់​គណបក្សនយោបាយ​ទទួល​រងការ​គំរាមកំហែង បំភិត​បំភ័យ ពួកគេ​អាច​ដាក់​ពាក្យ​ប្ដឹង​ជា​លាយ​លក្ខណ៍​​អក្សរមក គ.ជ.ប បាន៖ «​ការ​ស្នើ​ជា​លាយ​លក្ខណ៍​អក្សរ គ..ប នឹង​ពិចារ​ណា​ ប៉ុន្តែ​ខ្ញុំមិន​បាន​ដឹង​ប្តឹង​ជា​លាយ​លក្ខណ៍​អក្សរ​ឬ​អត់​ទេ ព្រោះ​ការ​ប្រើ​ប្រាស់​ភាសា​របស់អ្នក​នយោ​បាយ ពេល​ខ្លះ​គ្រាន់​តែ​បំប៉ោង​ដើម្បី​បង្កើត​បញ្ហា​ផ្សេងៗ យ៉ាង​ណា គ..ប ស្វាគមន៍​រាល់​បញ្ហា​ទាំង​ឡាយ​ណា​លើក​ឡើង​ជា​លាយ​លក្ខណ៍​អក្សរ»

ជុំវិញ​រឿង​នេះអនុប្រធានគណបក្សភ្លើងទៀន​លោក ថាច់ សេដ្ឋា លើកឡើងថា ករណី​បែបនេះ​តែងតែ​កើត​លើ​សកម្មជន​របស់​លោក ដោយសារ​អាជ្ញាធរ​គ្មាន​ឆន្ទៈទប់ស្កាត់ ដើម្បី​ធានា​បរិយាកាស​បោះឆ្នោត​សេរី ត្រឹមត្រូវ និង​យុត្តិធម៌ ខណៈលោកសង្ស័យ​ថា​ទង្វើ​គំរាម​កំហែង​ឱ្យ​ភ្នាក់​ងារ​សង្កេត​ការណ៍​ដក​ឈ្មោះ​ចេញ​ពី​បក្សភ្លើង​ទៀន ជា​បន្ត​បន្ទាប់ ទំនង​ជា​សញ្ញា​មិន​ប្រក្រតី​នៅពេល​នៅ​តាមការិយាល័យ​បោះឆ្នោត​ខាង​មុខ​នេះ។ លោកឱ្យដឹង​ថា គណបក្ស​នឹង​រៀបចំ​ពាក្យ​បណ្តឹង​ និង​ភស្តុតាង​ដាក់​ទៅ​ក្រសួង​មហាផ្ទៃ និង​គណៈកម្មាធិការជាតិ​រៀបចំការ​បោះឆ្នោត​ឆាប់ៗ​នេះ ដើម្បី​ចាត់​វិធានការ​ឱ្យ​ទាន់​ពេល៖ «​ទង្វើ​អស់​ហ្នឹង យើង​ឃើញ​ហើយ​ថា​វា​ផ្ទុយ​ទៅ​នឹង​ច្បាប់ និងបំពាន​ទៅ​នឹង​ការ​អំពាវនាវ​របស់​លោក​នាយក​រដ្ឋ​មន្រ្តី និង​លោក​ឧប​នាយក​រដ្ឋមន្រ្តី​ដែល​ធ្វើ​ឱ្យ​ប៉ះ​ពាល់​ដល់​បរិយា​កាស​នៃ​ការ​បោះ​ឆ្នោត»

ក្រៅ​​ពី​​អាជ្ញាធរ​តាម​ហាម​ឃាត់​មិន​ឱ្យ​លើក​ស្លាក​សញ្ញា​គណបក្ស​ភ្លើង​ទៀន​​ខេត្តត្បូង​ឃ្មុំ កាល​ពី​ថ្មីៗ​នេះ​អាជ្ញាធរ​ខេត្ត​សៀម​រាប​ក៏​បាន​ចុះ​គាស់​រំលើង ហើយ​​ចុះ​​រុះ​រើស​​ស្លាក​​បក្ស​នេះ​ទាំង​យប់​ដែរ។ ចំណែក​សមត្ថ​កិច្ច​​​ខេត្ត​​​ឧត្តរ​​​មាន​ជ័យ​​​បាន​ចាប់​​ខ្លួន​​​សមាជិក​​​បក្ស​​សង្គ្រោះ​​​ជាតិ​​​​លោក សុខ វិល ​ដែល​​​​ត្រៀម​​​​ចូល​​រួម​​​​ជា​​មួយ​​​គណ​បក្ស​​​ភ្លើង​​​ទៀន​ផង​ដែរ។​

ជុំវិញ​រឿង​នេះ មន្រ្តី​​សម្រប​​សម្រួល​​​ផ្នែក​​​អង្កេត​​​របស់​​​អង្គការ​​​ឃ្លាំ​​មើល​​​​ការ​​បោះ​​ឆ្នោត​ហៅ​កាត់​ថា ខុមហ្វែ្រល (COMFREL) លោក កន សាវាង្ស ​មាន​ប្រសាសន៍ថា ការអូសទាញ​ទឹកចិត្ត​ដោយ​សន្យា​ផ្តល់​ប្រាក់ និង​អំពើគំរាម​កំហែង​លើ​ពលរដ្ឋ ឬ​សកម្មជន​នយោបាយ គឺជា​អំពើ​ខុសច្បាប់​ហើយ​ប៉ះពាល់​ដំណើរការ​នៃ​ការ​បោះឆ្នោត។ ដូច្នេះលោកយល់ថាសកម្មជន ឬតំណាងគណបក្ស​ភ្លើងទៀន​ត្រូវ​ប្រមូល​ភស្តុតាង រៀបចំ​រាយការណ៍​ច្បាស់លាស់​ដាក់​ទៅក្រសួងមហាផ្ទៃ និង គ.ជ.ប ដើម្បីជំរុញឱ្យចាត់វិធានការ​តាម​គោលការណ៍​ច្បាប់លើជនប្រព្រឹត្ត៖ «​ត្រូវ​តែ​ធ្វើ​ការ​កត់​ត្រា​ឱ្យ​បាន​ច្បាស់​លាស់ ហើយ​ធ្វើ​ការ​រាយការណ៍​ទៅ​ស្ថាប័ន គ.. និង​ទៅ​កាន់​រដ្ឋា​ភិបាល ជា​ពិសេស​ក្រសួង​មហា​ផ្ទៃ ដើម្បី​ពិនិត្យ​មើល តើ​យល់​ឃើញ​មិច​ដែរ ព្រោះ​កន្លង​មក​លោក​តែង​តែ​លើក​ឡើងអំពី​ភស្តុ​តាង និង​ការ​ពិត​នៃ​ការ​ប្តឹង​របស់​ជន​រង​គ្រោះ ប៉ុន្តែ​ករណី​នេះត្រូវ​បានបដិសេធ​ការ​ថា​មិន​មាន​ពាក​បណ្តឹង​ច្បាស់​លាស់»។  

នៅ​ពេល​ការ​បោះ​ឆ្នោត​ជ្រើស​រើស​ក្រុម​ប្រឹ​ក្សា​ឃុំ​សង្កាត់​ខិត​ជិត​មក​ដល់​ទាំងលោក​នាយក​រដ្ឋ​មន្រ្តី ហ៊ុន សែន និង​រដ្ឋ​មន្រ្តី​ក្រសួង​មហា​ផ្ទៃ​​លោក ស ខេង បានណែ​នាំ​ឱ្យ​​អាជ្ញាធរ​​មាន​​សមត្ថ​កិច្ច​​ថ្នាក់​ក្រោម​​​​ត្រូវ​​ការ​ពារ​សុវត្ថិភាព​បេក្ខជន​ឈរឈ្មោះ និង​បង្ក​​បរិយា​​កាស​​ល្អ​ ​ជៀស​វាង​អំពើ​ហិង្សាទាំង​រាង​កាយនិងពាក្យ​សម្តី ដើម្បី​ធានា​ឲ្យ​ការ​​បោះ​ឆ្នោត​​ខាង​​មុខ​​ប្រព្រឹត្ត​​ទៅ​ដោយ​ សេរី ត្រឹម​ត្រូវ និង​យុត្តិធម៌។

ទោះបី​ជា​លោក ហ៊ុន សែន ប្រកាស​បែប​នេះ​ក្តី ប៉ុន្តែ​មក​​​ទល់​​​ពេល​​​នេះ មាន​​សកម្ម​​ជន​​​គណបក្ស​​​ភ្លើង​​ទៀន​​​ចំនួន ៦នាក់​​​ហើយ ក្នុង​​នោះ​​​​រួម​​ទាំង​​សាច់​​ញាតិ​​របស់​​​ពួក​​គេ​​​ផង ត្រូវ​​​បាន​​​អាជ្ញាធរ​​រដ្ឋា​​ភិបាល​​​​លោក ហ៊ុន សែន ចាប់​​ខ្លួន​​​ដាក់​​​ពន្ធនា​គារ ហើយ​សកម្មជន​ជិត​១០​នាក់​ទៀត​តុលាការ​កោះ​ហៅ​ទៅ​បំភ្លឺ​ពី​បទញុះ​ញង់ និង​ក្លែង​ឯក​សារ​ដាក់​ពាក្យ​បេក្ខជន​​ឈរ​ឈ្មោះ​បោះ​ឆ្នោត។ ទន្ទឹម​នឹង​នេះ អនុ​​ប្រធាន​​​​ប្រតិ​បត្តិ​​​​គណបក្ស​​​​​ភ្លើង​​​​ទៀន​​​នៅ​​​ខណ្ឌ​​​ច្បារ​​​​អំពៅ រាជ​​​ធានី​​​​ភ្នំពេញ លោក ជឿន សារឹម បាន​​​​​ស្លាប់​​​​ដោយ​​​​សារ​​​គ្រោះ​​​​ថ្នាក់​​​ចរា​ចរណ៍​​​ ប៉ុន្តែ​​​គ្រួសារ​​​​ជន​​​រង​​គ្រោះ​​​​​សង្ស័យ​​​​​ជាប់​​​​ពាក់​​​​ព័ន្ធ​​​​រឿង​​​​នយោ​បាយ។  ក្រៅ​ពី​​នេះ​​សកម្ម​ជន​ និង​​បេក្ខ​​ជន​​បក្ស​នេះ​​​ជា​ច្រើន​​​នាក់​​ត្រូវ​​​បាន​អាជ្ញា​ធរ និង​​​ជន​​មិន​​​ស្គាល់​​មុខ​​​ប៉ុន​ប៉ង​​ធ្វើ​​បាប​​ដោយ​​​គប់​ដុំ​​ថ្ម​​ចូល​​ក្នុង​​ផ្ទះ និង​​​ដេញ​ធាក់​​ផ្ដួល​​ម៉ូតូ​ ​​គំរាម​​កំហែង ​និង​​​​រារាំង​​​​​បេក្ខ​​ជន​​បក្ស​​​ភ្លើង​​ទៀន​​គ្រប់​​​រូប​​​ភាព​​​ដែរ ខណៈ​​​ដែល​​​គណបក្ស​​​មួយ​​​នេះ​ ​មាន​​​លទ្ធ​ភាព​​​ដាក់​​​បេក្ខ​​ជន​​ស្ទើរ​​គ្រប់​​​ឃុំ សង្កាត់ ​ទូទាំង​​​ប្រទេស​​​ ដូច​​​គណបក្ស​​​កាន់​​​អំណាច​ និង​​​កំពុង​​​ធ្វើ​​​សកម្ម​ភាព​​លេច​​ធ្លោ​​​នៅ​​​តាម​​​មូល​​ដ្ឋាន។ 

ក្រុម​​អង្គ​ការ​​សង្គម​​ស៊ីវិល និង​​​អ្នក​​​សង្កេត​​ការណ៍​បោះ​​ឆ្នោត​​វាយ​​តម្លៃ​​​ថា​​បើ​​បរិយា​កាស​​ន​យោ​​បាយ​ ​​នៅ​​តែ​​​ស្ថិត​​​ក្នុង​​​ភាព​​​អាប់​​អួ​​បែប​​នេះ​ នឹង​​​មិន​​​អាច​​​ធានា​​​ថា ការ​​បោះ​​ឆ្នោត​​​នៅ​​​ពេល​​​ខាង​​​មុខ ​ប្រកប​​​ដោយ​​សេរី ​ត្រឹម​ត្រូវ ​និង​​​យុត្តិ​ធម៌​​​នោះ​​​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។