យោធាចិនផ្ដល់ជំនួយទីលានហ្វឹកហាត់ដល់កងទ័ពជើងគោកកម្ពុជា

ហេង រស្មី
2021-02-01

យោធាចិនផ្ដល់ជំនួយទីលានហ្វឹកហាត់ដល់កងទ័ពជើងគោកកម្ពុជា

ទីលានហ្វឹកហាត់ចម្រុះនៅខេត្តកំពង់ស្ពឺ ដែលជាជំនួយយោធាចិនផ្ដល់ដល់កងទ័ពជើងគោកកម្ពុជា។

រូប៖ ហ្វេសប៊ុកនាយសេនាធិការចម្រុះ នៃកងយោធពលខេមរភូមិន្ទ

ប្រទេសចិនបានផ្ដល់ជំនួយដល់ការសាងសង់ទីលានហ្វឹកហាត់ចម្រុះ ដល់នាយទាហានកងទ័ពជើងគោកកម្ពុជា ដើម្បីជួយបង្កើនសមត្ថភាពកងទ័ពកម្ពុជា និងដើម្បីកិច្ចសហប្រតិបត្តិការរវាងកងទ័ពនៃប្រទេសទាំងពីរឱ្យកាន់តែស៊ីជម្រៅបន្ថែមទៀត។

រដ្ឋមន្ត្រីក្រសួងការពារជាតិ លោក ទៀ បាញ់ បានបញ្ជាក់នៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវទីលានហ្វឹកហាត់ចម្រុះ ដែលមានទីតាំងនៅក្នុងខេត្តកំពង់ស្ពឺ នៅថ្ងៃចន្ទ ទី១ កុម្ភៈថា អនុព័ន្ធយោធាចិននៅក្នុងស្ថានទូតចិនប្រចាំកម្ពុជា និងទីប្រឹក្សាយោធាចិនប្រចាំវិទ្យាស្ថានកងទ័ពជើងគោក បានជួយសាងសង់ទីលានហ្វឹកហាត់នេះ តាំងពីឆ្នាំ២០០២ ហើយទើបនឹងបញ្ចប់នៅពេលនេះ។

លោកបន្តថា ក្នុងរយៈពេលជាង ២ទសវត្សចុងក្រោយនេះ ប្រទេសចិន និងកម្ពុជាបានឈានទៅរកកិច្ចសហប្រតិបត្តិការជាដៃគូ យុទ្ធសាស្ត្រគ្រប់ជ្រុងជ្រោយ ដោយឈរលើគោលការណ៍ជឿជាក់គ្នា យោគយល់គ្នា គោរពគ្នា និងឱ្យតម្លៃគ្នាទៅវិញទៅមក។

លោកបន្ថែមថា សកម្មភាពទាំងអស់នេះ បានឆ្លុះបញ្ចាំងអំពីឆន្ទៈនយោបាយ ការប្ដេជ្ញាចិត្តដ៏មោះមុត ក្នុងការលើកស្ទួយចំណងទាក់ទងទ្វេភាគីឱ្យកាន់តែខ្លាំងក្លាថែមទៀត។

ទោះជាយ៉ាងណា អ្នកវិភាគនយោបាយលោក គឹម សុខ មានប្រសាសន៍ថា ការលើកឡើងរបស់លោក ទៀ បាញ់ មិនបានបង្ហាញការពិតជាក់ស្ដែងទេ។ លោកអះអាងថា ទំនាក់ទំនងកងទ័ពរវាងចិន និងកម្ពុជា គឺជាការជួយពង្រឹងអំណាច និងផលប្រយោជន៍របស់លោក ហ៊ុន សែន និងបក្សពួករបស់គាត់ច្រើនជាង៖ «សំដីក្អេងក្អាងរបស់លោក ទៀ បាញ់ មិនខុសពី ឆ្កឹះបង្ហាញភស្តុតាងអំពីភាពសម្ងាត់របស់លោក ហ៊ុន សែន និងចិន ឱ្យមហាជនខ្មែរ និងសហគមន៍អន្តរជាតិ ដឹងកាន់តែច្បាស់ នៅល្បែងយោធា ហ៊ុន សែន និងចិន នៅលើទឹកដីនៃប្រទេសកម្ពុជា និងក៏ដូចជាការហួចហៅខ្យល់នៃចរន្តកាន់តែធំលើទំនាក់ទំនង ហ៊ុន សែន ចិន ពីសំណាក់សហរដ្ឋអាមេរិក សហគមន៍អន្តរជាតិ ដែលកំពុងតែប្រុងប្រយ័ត្នស្រាប់ និងក៏ពីពលរដ្ឋខ្មែរ ដែលមិនពេញចិត្តកាន់តែខ្លាំង»។

ទីក្រុងប៉េកាំងបានផ្ដល់ជំនួយឥតសំណង និងកម្ចីឥណទាន ព្រមទាំងសម្ភារៈបរិក្ខារផ្សេងៗ។ ក្នុងបរិបទបែបនេះ កិច្ចសហប្រតិបត្តិការជាច្រើនរវាងរបបក្រុងភ្នំពេញ និងទីក្រុងប៉េកាំង ត្រូវបានរៀបចំឡើងជាបន្តបន្ទាប់។ កិច្ចការរវាងប្រទេសទាំងពីរនេះ មានមួយចំនួន ត្រូវបានប្រកាសឱ្យដឹងជាសាធារណៈ ប៉ុន្តែខ្លះទៀតត្រូវគេមើលឃើញថា រក្សាជាសម្ងាត់ ដូចជា ការចុះហត្ថលេខាជាមួយចិន ដែលរងការចោទប្រកាន់ថា ប្រទេសចិនកំពុងបង្កើតមូលដ្ឋានកងទ័ពនៅរាម។

សហរដ្ឋអាមេរិក កាលពីខែកក្កដា ឆ្នាំ២០១៩ ធ្លាប់បានចោទប្រកាន់ថា កម្ពុជាបានចុះហត្ថលេខាដោយសម្ងាត់ជាមួយប្រទេសចិន ដែលនឹងអនុញ្ញាតឱ្យយោធាចិនប្រើប្រាស់មូលដ្ឋានកងទ័ពជើងទឹកនៅរាមរយៈពេល ៣០ឆ្នាំ ហើយកិច្ចសន្យានោះ ត្រូវបន្តដោយស្វ័យប្រវត្តិសម្រាប់រយៈពេល ១០ឆ្នាំ ក្រោយពីកិច្ចសន្យា ៣០ឆ្នាំ បានបញ្ចប់។

ទោះជាយ៉ាងណា លោកនាយករដ្ឋមន្ត្រី ហ៊ុន សែន ធ្លាប់បានអះអាងថា រដ្ឋធម្មនុញ្ញកម្ពុជា មិនអនុញ្ញាតឱ្យមានវត្តមានកងទ័ពបរទេសនៅលើទឹកដីកម្ពុជា ហើយក៏មិនអនុញ្ញាតឱ្យកងទ័ពកម្ពុជា នៅលើទឹកដីប្រទេសដទៃផងដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។