ភាគីប្រទេសចិនចាត់ទុកលោកនាយករដ្ឋមន្ត្រី ហ៊ុន សែន ជាមិត្តល្អរបស់ប្រជាជាតិចិន ហើយចិនក៏ជំរុញឱ្យមានការកសាងសហគមន៍ចិនកម្ពុជាអនាគតរួមគ្នា និងបន្តទំនាក់ទំនងមិត្តភាពចិនកម្ពុជាពីមួយជំនាន់ទៅមួយជំនាន់។ ការលើកឡើងរបស់ភាគីចិនបែបនេះ ស្របពេលលោក ហ៊ុន សែន គ្រោងទៅទស្សនកិច្ចប្រទេសចិននៅឆាប់ៗនេះ។ អ្នកឃ្លាំមើលរិះគន់ថា គម្រោងទស្សនកិច្ចរបស់លោក ហ៊ុន សែន ទៅប្រទេសចិនដើម្បីពង្រឹងអំណាច ច្រើនជាងផលប្រយោជន៍ជាតិ។
លោក ហ៊ុន សែន ដឹកនាំគណៈប្រតិភូកម្ពុជាទៅបំពេញទស្សនកិច្ចក្នុងប្រទេសចិននៅថ្ងៃនេះ ដើម្បីពង្រឹងចំណងមិត្តភាពដែកថែបកម្ពុជាចិនបន្ថែមទៀត។ ទស្សនកិច្ចរយៈពេលបីថ្ងៃ ដែលចាប់ពីថ្ងៃទី៩ដល់ថ្ងៃទី១១កុម្ភៈ ក្នុងប្រទេសចិនកុម្មុយនីស្តនេះ គឺតបនឹងសំណើរបស់នាយករដ្ឋមន្ត្រីចិន លី ខឺឈាង (Li Keqiang)។
អ្នកនាំពាក្យក្រសួងការបរទេសចិនអ្នកស្រី ម៉ៅ នីង (Mao Ning) ប្រាប់កាសែតគ្រប់គ្រងដោយរដ្ឋាភិបាលក្រុងប៉េកាំង (Beijing) កាលពីថ្ងៃទី៦ ខែកុម្ភៈថា ការមកបំពេញទស្សនកិច្ចរបស់លោក ហ៊ុន សែន ក្នុងប្រទេសចិនលើកនេះជាឱកាសជំរុញឱ្យមានវឌ្ឍនភាពកាន់តែច្រើនក្នុងការកសាងសហគមន៍អនាគតចិនកម្ពុជារួមគ្នា។ លើសពីនេះ អ្នកស្រីឱ្យដឹងថា ប្រធានាធិបតីចិនលោក ស៊ី ជីនពីង (Xi Jinping) នឹងពិភាក្សាជាមួយលោក ហ៊ុន សែន ផ្លាស់ប្ដូរទស្សនៈស៊ីជម្រៅលើទំនាក់ទំនងទ្វេភាគី បញ្ហាតំបន់ និងអន្តរជាតិ។
ប្រភពដដែលអះអាងថា យុទ្ធសាស្ត្ររបស់មេដឹកនាំនៃប្រទេសចិនកុម្មុយនីស្ត និងមេដឹកនាំឯកបក្ស ក្នុងការកសាងសហគមន៍ចិនកម្ពុជាអនាគតរួមគ្នា បានផ្តល់លទ្ធផលជាផ្លែផ្កាក្នុងរយៈពេលប៉ុន្មានឆ្នាំចុងក្រោយនេះ និងនាំមកនូវផលប្រយោជន៍ដល់ប្រជាជនទាំងពីរ ព្រមទាំងរួមចំណែកសន្តិភាព វិបុលភាពក្នុងតំបន់ និងក្រៅប្រទេស។
ទាក់ទងនឹងគម្រោងទស្សនៈរបស់មេដឹកនាំឯកបក្សទៅប្រទេសចិននេះ អ្នកឃ្លាំមើលស្ថានការណ៍នយោបាយកម្ពុជាអះអាងថា លោក ហ៊ុន សែន ទៅប្រទេសចិនពុំមានអ្វីក្រៅពីទៅបន្តខ្ចីបុលពីចិន និងបង្កើនទំនាក់ទំនងល្អដើម្បីពង្រឹងអំណាចខ្លួនឡើយ។
អ្នកវិភាគនយោបាយលោក គឹម សុខ មានប្រសាសន៍ថា លោក ហ៊ុន សែន ទៅប្រទេសចិននាពេលខាងមុខនេះអាចមានផែនការពីរយ៉ាង នោះគឺការស្នើសុំជំនួយតាមរយៈកម្ចីបន្ថែម និងស្នើឱ្យចិនជួយគាំទ្រកិច្ចការទូត ដើម្បីផ្ទេរអំណាចឱ្យលោក ហ៊ុន ម៉ាណែត។ លោកអះអាងទៀតថា ស្របពេលកម្ពុជាបង្កើនទំនាក់ទំនងជាមួយចិនកាន់តែស្អិតល្មួត លោក ហ៊ុន សែន ក៏មិនអាចប្រលែងមិត្តម៉ឺនឆ្នាំគឺវៀតណាមដែលមានទំនាក់ទំនងស៊ីជម្រៅនោះដែរ។
លោក គឹម សុខ ពន្យល់ថា វៀតណាមទំនងមិនសប្បាយចិត្តស្របពេលចិនពង្រីកឥទ្ធិពល និងចង់បានភូមិសាស្ត្រនយោបាយកម្ពុជា ប៉ុន្តែលោកថា វៀតណាមក៏មានមហិច្ឆតាមកលើកម្ពុជាផងដែរ។
លោក គឹម សុខ៖ «បំណងរបស់វៀតណាមមកលើកម្ពុជាវិញកាន់តែអាក្រក់ជាងចិនទៅទៀត គឺវៀតណាមចង់ត្រួតត្រាកម្ពុជា ដើម្បីអនុវត្តមហិច្ឆតាលេបយកកម្ពុជា។ អំណាចក្រុមគ្រួសារ ហ៊ុន នៅមិនទាន់មានស្ថិរភាពនោះទេ ពីព្រោះវាហាក់ដូចជាកំពុងតែដើរនៅក្នុងយុទ្ធសាស្ត្រមួយនៅចន្លោះមាត់ក្រពើវៀតណាម និងនាគចិន។ ងាកទៅណាក៏អាចប៉ះភ្លើងរលាក ឬត្រូវភាគីណាមួយស៊ីឱ្យខ្ទេចដែរ ប្រសិនបើបោះជំហានខុស»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេសកម្ពុជា និងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ដើម្បីសុំអត្ថាធិប្បាយឆ្លើយតបនឹងការលើកឡើងនេះបានទេ។
ចំណែក អ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យដឹងថា គម្រោងទស្សនកិច្ចរបស់លោក ហ៊ុន សែន ទៅប្រទេសចិនគឺជាការពង្រឹងទំនាក់ទំនងទ្វេភាគី។ បន្ថែមពីនេះ លោក សុខ ឥសាន ថាមជ្ឈដ្ឋានមួយចំនួនលើកឡើងថា លោក ហ៊ុន សែន ទៅពឹងពាក់ចិនឱ្យជួយគាំទ្រផែនការផ្ទេរអំណាចឱ្យលោក ហ៊ុន ម៉ាណែត គឺពួកគេមិនយល់ច្បាប់កម្ពុជា។
លោក ផៃ ស៊ីផាន៖ «អ្នកដែលថា ចេះតែថា អត់ដឹងអំពីគោលការណ៍លាក់ការណ៍ផ្ទៃក្នុងរបស់គណបក្សនីមួយៗ ហើយអត់យល់ពីច្បាប់កម្ពុជាទៅទៀត។ គណបក្សនីមួយៗសុទ្ធតែមានសិទ្ធក្នុងការជ្រើសរើសបេក្ខភាពនាយករដ្ឋមន្ត្រីរបស់ខ្លួន ដូច្នេះហើយអ្នកថាហ្នឹងអត់យល់គេផង ដូច្នេះការនិយាយថា សម្ដេចអញ្ជើញទៅចិន ដើម្បីចេះដើម្បីចុះអាហ្នឹងគ្រាន់ជាការប៉ាន់ស្មានទេ»។
ទោះបីជាយ៉ាងណា អ្នកឃ្លាំមើលលើកឡើងថា ប្រសិនគ្មានប្រទេសអន្តរជាតិគាំទ្រលើផែនការផ្ទេរអំណាច លោក ហ៊ុន សែន ក៏ទំនងជាអាចនឹងពិបាកក្នុងការសម្រេចផែនការផ្ទេរអំណាចឱ្យកូនប្រុសច្បងរបស់លោកគឺលោក ហ៊ុន ម៉ាណែត នាថ្ងៃអនាគត។
អគ្គលេខាធិការសហព័ន្ធនិស្សិតបញ្ញវន្តកម្ពុជាលោក គៀន ពន្លក ថ្លែងថា ការលើកឡើងរបស់អ្នកនាំពាក្យក្រសួងការបរទេសចិនថា ចិននិងកម្ពុជាមានទំនាក់ទំនងល្អ និងសម្រេចបាននូវផលប្រយោជន៍ដល់ប្រជាជននោះមិនឆ្លុះបញ្ចាំងពីការពិតទាំងស្រុងនោះទេ ខណៈក្រុមហ៊ុនចិនខ្លះមកវិនិយោគនៅកម្ពុជាបានជញ្ជក់ធនធានធម្មជាតិកម្ពុជាជាបន្តបន្ទាប់។ ក្រៅពីនេះ លោកព្រួយបារម្ភថា បើកម្ពុជាបន្តទៅខ្ចីបុលពីប្រទេសចិន និងប្រើលុយកម្ចីបរទេសនោះយកមកអភិវឌ្ឍជាតិគ្មានតម្លាភាព និងគណនេយ្យភាព នោះកម្ពុជាក៏អាចជាប់អន្ទាក់បំណុលចិនវ័ណ្ឌកដកខ្លួនមិនរួចនោះដែរ។
លោក គៀន ពន្លក៖ «នៅពេលណាមួយដែលប្រទេសកម្ពុជា មិនមានលទ្ធភាពក្នុងការសងទៅកាន់ប្រទេសចិនទេ កម្ពុជាអាចដូចជាប្រទេសស្រីលង្កា(Sri Lanka)ជាប់អន្ទាក់បំណុលចិនកាន់តែច្រើនទៅៗហើយស្រីលង្កាមិនមានលទ្ធភាពសងប្រទេសចិន នៅពេលនោះស្រីលង្កាកាត់កំពង់ផែឱ្យប្រទេសចិនគ្រប់គ្រង។ អ៊ីចឹងប្រសិនបើ កម្ចីរបស់ចិននេះ ជាកម្ចីមួយដែរជាមិត្តមួយដែលមិនមានភាពស្មោះត្រង់ ហើយជាពិសេស គឺរដ្ឋាភិបាលចេះតែខ្ចីច្រើនទៅៗ នៅថ្ងៃណាមួយប្រទេសកម្ពុជាគឺនឹងរងគ្រោះដោយសារប្រទេសចិន»។
កាលពីខែមករា កន្លងទៅលោក ហ៊ុន សែន បានឱ្យដឹងថា គម្រោងទៅបំពេញទស្សនកិច្ចនៅប្រទេសចិនរបស់លោកគឺដើម្បីស្នើប្រាក់កម្ចីបន្ថែមពីមិត្តដែកថែបរបស់លោកសម្រាប់យកមកកសាងផ្លូវ និងស្ពាននៅកម្ពុជា។
ក្រសួងសេដ្ឋកិច្ច និងហិរញ្ញវត្ថុ បង្ហាញថា គិតត្រឹមដំណាច់ត្រីមាសទីពីរឆ្នាំ២០២២ កម្ពុជាជំពាក់បំណុលបរទេសជិត១ម៉ឺនលានដុល្លារ (៩.៧៤០,៥៨លានដុល្លារ)។ ក្នុងនោះបំណុលរដ្ឋស្ទើរតែពាក់កណ្តាល គឺកម្ពុជាជំពាក់ «មិត្តដែកថែប»ចិន ដែលចំនួនប្រមាណ៤ពាន់លានដុល្លារអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។