អង្គការមិនមែនរដ្ឋាភិបាល ចំនួន ២០ស្ថាប័ន ចេញសេចក្ដីថ្លែងការណ៍រួម ដោយស្នើសុំឲ្យតុលាការ និងរដ្ឋាភិបាល លោក ហ៊ុន សែន ដោះលែងអ្នកទោសមនសិការទាំងអស់ចេញពីពន្ធនាគារ។
សេចក្ដីថ្លែងការណ៍ចេញផ្សាយនៅថ្ងៃទី៤ មិថុនានេះ បានបង្ហាញក្ដីកង្វល់ អំពីភាពចង្អៀតណែន ក្នុងពន្ធនាគារ និងបញ្ហាការរាតត្បាតជំងឺកូវីដ១៩ ចូលពន្ធនាគារ ចេះតែមានការកើនឡើងជាបន្តបន្ទាប់។
សេចក្ដីថ្លែងការណ៍ ដដែលបង្ហាញទៀតថា ដោយសារតែហានិភ័យខ្ពស់ នៃការឆ្លងជំងឺកូវីដ១៩ អ្នកទោសទាំងអស់បានទទួលរងនូវការកើនឡើងនៃការជះឥទ្ធិពលជាវិជ្ជមានដល់សុខភាពផ្លូវចិត្ត និងផ្លូវកាយរបស់ពួកគេ។
បន្ថែមពីលើនេះទៀត ពួកគេត្រូវបាត់បង់សេរីភាពមូលដ្ឋាន ដោយប្រឈមមុខនឹងការលំបាកបន្ថែមទៀត ដោយសារតែវិធានការរឹតបន្តឹងនៃជំងឺកូវីដ១៩ ដែលធ្វើឲ្យមានការលំបាកក្នុងអនុវត្តគោលការណ៍ណែនាំរបស់ក្រសួងសុខាភិបាល ដូចជា ការថែរក្សាអនាម័យនៅក្នុងលក្ខខណ្ឌនៃការឃុំខ្លួនយ៉ាងវេទនា និងការរក្សាគម្លាតសង្គមនៅក្នុងពន្ធនាគារ ដែលមានអ្នកទោសណែនចង្អៀតគ្នា។
វិទ្យុអាស៊ីសេរី ពុំទាន់អាចទាក់ទងមន្ត្រីរដ្ឋាភិបាល ដើម្បីសុំការឆ្លើយតបចំពោះការស្នើសុំរបស់អង្គការមិនមែនរដ្ឋាភិបាល ចំនួន ២០ស្ថាប័ននេះនៅឡើយទេ រហូតដល់ម៉ោងផ្សាយនេះ។ ក៏ប៉ុន្តែកន្លងមន្រ្តីជាន់ខ្ពស់គ្រប់គ្រងពន្ធនាគារ បានបដិសេធសំណើរបស់ក្រុមគ្រួសារ អ្នកទោសមនសិការ ដែលសុំឲ្យដោះលែងពួកគេបណ្ដោះអាសន្ន ហើយថា រដ្ឋាភិបាលអាចគ្រប់គ្រងស្ថានការណ៍ជំងឺកូវីដ១៩ ឆ្លងចូលពន្ធនាគារបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។