ក្រុមមេដឹកនាំគណបក្សភ្លើងទៀនអំពាវនាវទៅមន្ត្រី និងសកម្មជនរបស់ខ្លួន មិនត្រូវចាញ់ការគំរាមកំហែង និងការបំភិតបំភ័យឡើយ ហើយត្រូវផ្សព្វផ្សាយសារនយោបាយណាដែលមានប្រយោជន៍ ចៀសវាងការជេរប្រមាថ។ ការអំពាវនាវនេះបានធ្វើឡើង ខណៈមន្ត្រីគណបក្សនេះ ត្រូវបានអាជ្ញាធរចាប់ខ្លួនដាក់ពន្ធនាគារជាបន្តបន្ទាប់ ស្របពេលការបោះឆ្នោតជាតិកាន់តែខិតជិតមកដល់។
ក្រុមមេដឹកនាំគណបក្សភ្លើងទៀនស្នើឱ្យមន្ត្រី និងសកម្មជនរបស់ខ្លួន ត្រូវចេះសាមគ្គីគ្នា អត់ធ្មត់ និងស៊ូទ្រាំ មិនថាទទួលរងសម្ពាធពីខាងក្រៅ ឬសម្ពាធផ្ទាល់ខ្លួនលំបាកយ៉ាងណាឡើយ ដើម្បីបន្តធ្វើដំណើរឆ្ពោះទៅរកការសម្រេចគោលដៅដែលខ្លួនចង់បាននៅពេលខាងមុខ គឺជួយឱ្យជីវភាពពលរដ្ឋកាន់តែរីកចម្រើន និងប្រទេសជាតិមានការអភិវឌ្ឍដ៏ត្រឹមត្រូវ។
អគ្គលេខាធិការគណបក្សភ្លើងទៀន លោក លី សុធារ៉ាយុត្តិ ស្នើឱ្យមន្ត្រី និងសកម្មជនត្រូវពង្រឹងស្មារតីឱ្យរឹងមាំ អំឡុងពេលកំពុងប្រឈមកាន់តែខ្លាំងឡើងពីការបំភិតបំភ័យតាមគ្រប់រូបភាព នៅមុខរដូវកាលបោះឆ្នោតនេះ។ លោក សុធារ៉ាយុត្តិ បានផ្ដាំផ្ញើទៅមន្ត្រីគណបក្សភ្លើងទៀនថា មិនត្រូវឱ្យជំងឺសង្ស័យចូលវាយលុករចនាសម្ព័ន្ធរបស់គណបក្ស ដែលនាំឱ្យគណបក្សបែកបាក់សាមគ្គីគ្នាឡើយ។
លោក លី សុធារ៉ាយុត្តិ៖ «ការបំភ័យយើង គេបំភិតយើង គេបន្លាចយើង ជារឿងរបស់គេ។ ក៏ប៉ុន្តែអ្វីដែលសំខាន់ យើងកុំបំភ័យគ្នាយើង យើងកុំបន្លាចគ្នាយើង យើងត្រូវតែរឹងមាំ រឹងមាំរហូតដល់សម្រេចបានគោលដៅរួមរបស់យើង គឺការផ្លាស់ប្ដូរក្នុងសង្គមនេះ ប្រកបដោយវិជ្ជមាននិងអហិង្សា តាមរយៈការបោះឆ្នោតមួយ ដោយសេរី ត្រឹមត្រូវ និងយុត្តិធម៌»។
ការលើកឡើងរបស់អគ្គលេខាធិការគណបក្សភ្លើងទៀននេះ បានធ្វើឡើងនៅក្នុងពិធីប្រកាសសុពលភាពក្រុមការងារ និងគណៈកម្មាធិការប្រតិបត្តិគណបក្សរាជធានីភ្នំពេញ នៅថ្ងៃទី២៦ មីនា។ ចំណែកលោក សុន ឆ័យ អនុប្រធានគណបក្សភ្លើងទៀន ក៏បានអំពាវនាវទៅមន្ត្រីនិងសកម្មជននៅទូទាំងប្រទេស ជាពិសេសសមាជិកក្រុមប្រឹក្សាឃុំសង្កាត់ជិត ២ពាន់នាក់របស់គណបក្ស ត្រូវប្រុងប្រយ័ត្នកុំឱ្យមានការប្រើប្រាស់ពាក្យជេរប្រមាថ និងដៀលត្មះទៅគណបក្សដទៃ។ លោកបន្តថា ត្រូវប្រើប្រាស់បណ្ដាញសង្គមហ្វេសប៊ុកឱ្យបានប្រយោជន៍ដើម្បីបម្រើពលរដ្ឋ កាបង្រួបបង្រួមជាតិ និងត្រូវផ្សព្វផ្សាយពីភាពមិនប្រក្រតីនិងអំពើអយុត្តិធម៌នៅក្នុងសង្គម ដើម្បីឱ្យអ្នកដឹកនាំអនុវត្តឱ្យបានត្រឹមត្រូវជាដើម។
លោក សុន ឆ័យ៖ «ខ្ញុំសង្ឃឹមថា បងប្អូននឹងមិននិយាយស្ដី ដៀលត្មះ ដៀមដាម ដែលជារឿងឥតប្រយោជន៍ គណបក្សភ្លើងទៀនយល់ថា រឿងឥតប្រយោជន៍ យើងអត់យកមកប្រើទេ។ យើងប្រើគោលនយោបាយរបស់គណបក្សភ្លើងទៀន ដែលមាននៅក្នុងសៀវភៅរបស់យើង...។ មានច្រើនណាស់!បងប្អូន មានគ្រប់សព្វទាំងអស់»។
ការលើកឡើងរបស់ថ្នាក់ដឹកនាំគណបក្សភ្លើងទៀននេះ បានធ្វើឡើង ខណៈមន្ត្រីនិងសកម្មជនគណបក្សនេះជាច្រើននាក់ ត្រូវបានចាប់ដាក់ពន្ធនាគារជាបន្តបន្ទាប់ ក្នុងនោះរួមមានលោក ថាច់ សេដ្ឋា អនុប្រធានគណបក្សភ្លើងទៀន ដែលត្រូវចាប់ឃុំខ្លួនតាំងពីពាក់កណ្ដាលខែមករា និងការចាប់ខ្លួនសកម្មជនបីរូបទៀត កាលពីថ្ងៃទី២៤ មីនា នេះ រួមមានលោក តូច ថឹង ប្រធានគណៈកម្មាធិការប្រតិបត្តិគណបក្សប្រចាំខេត្តកំពង់ចាម លោក ខឿន វីរ៉ាត់ ប្រធានចលនាយុវជនគណបក្សថ្នាក់ជាតិ និងលោកស្រី នូ សិទ្ធារី អនុប្រធានចលនាស្ត្រីគណបក្សថ្នាក់ជាតិ។
លោក សុន ឆ័យ បន្តទៀតថា គណបក្សភ្លើងទៀន ចូលរួមអនុវត្តនិងគាំទ្រទាំងស្រុងចំពោះគោលនយោបាយការពារសន្តិភាពរបស់រដ្ឋាភិបាល ប៉ុន្តែដើម្បីធានាសុខសន្តិភាពឱ្យបានយូរអង្វែងជាអចិន្ត្រៃយ៍ រដ្ឋាភិបាលត្រូវតែធ្វើឱ្យមានយុត្តិធម៌សង្គម ការគោរពសិទ្ធិមនុស្ស និងត្រូវអនុវត្តលទ្ធិប្រជាធិបតេយ្យឱ្យបានត្រឹមត្រូវ។ លោក សុន ឆ័យ លើកឡើងថា ប្រសិនបើគ្មានយុត្តិធម៌សង្គម ហើយសង្គមមានការជិះជាន់គ្នា ពុករលួយ ធ្វើបាបប្រជារាស្ដ្រ បំផ្លិចបំផ្លាញទ្រព្យសម្បត្តិជាតិ នោះមិនអាចធ្វើឱ្យកម្ពុជាមានសុខសាន្តត្រាណយូរអង្វែងឡើយ។
ទាក់ទងនឹងបញ្ហានេះមន្ត្រីនាំពាក្យគណបក្សប្រជាជនកម្ពុជាដែលកំពុងកាន់អំណាចលោក សុខ ឥសាន្ត ឆ្លើយតបថា ការលើកឡើងរបស់ក្រុមថ្នាក់ដឹកនាំគណបក្សភ្លើងទៀននេះ ជាការបង្កើតឱ្យមានបញ្ហាពីមួយទៅមួយ ក្នុងចេតនាដើម្បីធ្វើឱ្យសហគមន៍អន្តរជាតិមើលមកបរិយាកាសមុនការបោះឆ្នោតថា មិនល្អ។ លោកអះអាងថា គ្រប់គណបក្សនយោបាយទាំងអស់ អាចធ្វើសកម្មភាពសព្វគ្រប់បែបយ៉ាងស្មើៗគ្នា ស្របតាមគោលការណ៍ច្បាប់ស្ដីពីការរៀបចំបោះឆ្នោត។ លោកបន្តថា មិនត្រូវលើកយករឿងនយោបាយ មកនិយាយពាក់ព័ន្ធនឹងការអនុវត្តច្បាប់ទៅលើអ្នកប្រព្រឹត្តខុសច្បាប់ឡើយ។
លោក ថា៖ «ទោះបីយើងកំពុងឆ្ពោះទៅរកការបោះឆ្នោត ឬមួយការបោះឆ្នោតកំពុងប្រព្រឹត្តទៅយ៉ាងណាក៏ដោយ ការអនុវត្តផ្លូវច្បាប់ អត់មានព្យួរទេ ប្រទេសណាដូចប្រទេសណាអ៊ីចឹង។ ផ្ទុយទៅវិញ សមត្ថកិច្ចខិតខំ ដើម្បីពង្រឹងសន្តិសុខសណ្ដាប់ធ្នាប់សាធារណសង្គម មិនឱ្យកើតមានឡើងទេ»។
ទោះជាយ៉ាងណា គណបក្សភ្លើងទៀន សង្គមស៊ីវិលខាងសិទ្ធិមនុស្ស និងអ្នកតាមដាននយោបាយ បានចាត់ទុកការប្រើប្រាស់ប្រព័ន្ធតុលាការចាប់ខ្លួនមន្ត្រីនិងសកម្មជនទាំងនោះ ថាជារឿងនយោបាយ និងជាការគំរាមកំហែងនៅមុនការបោះឆ្នោតជ្រើសតាំងតំណាងរាស្ត្រអាណត្តិទី៧ នៅថ្ងៃទី២៣ ខែកក្កដា ខាងមុខនេះ។
អ្នកវិភាគនយោបាយបណ្ឌិត សេង សារី មើលឃើញថា សកម្មជនគណបក្សភ្លើងទៀននៅតាមមូលដ្ឋាន ដែលសុទ្ធសឹងជាអ្នកគាំទ្រគណបក្សសង្គ្រោះជាតិ ហាក់មានភាពរឹងមាំជាងក្បាលម៉ាស៊ីនដឹកនាំនៅថ្នាក់លើទៅទៀត។ លោកបន្តថា នៅក្រោយឆ្នាំ២០១៧មក ទោះក្បាលម៉ាស៊ីននៅថ្នាក់លើមានភាពរប៉ាត់រប៉ាយ ដោយមួយក្រុមរត់ភៀសខ្លួនទៅនៅក្រៅប្រទេស និងមួយក្រុមទៀតនៅក្នុងប្រទេសមិនអាចធ្វើសកម្មភាពអ្វីបានយ៉ាងណាក្ដី ក៏សកម្មជននៅមូលដ្ឋានភាគច្រើន មិនព្រមចាញ់ការគំរាមកំហែងចុះចូលជាមួយគណបក្សកាន់អំណាចឡើយ ដោយពួកគេសុខចិត្តធ្វើស្រែ ធ្វើជាជាងកាត់សក់ និងអ្នករត់ម៉ូតូឌុបជាដើម។
បណ្ឌិត សេង សារី៖ «ភស្តុតាងទាំងនេះហើយ ដែលខ្ញុំសន្និដ្ឋានថា ចលនាប្រជាធិបតេយ្យបច្ចុប្បន្ន ឬក៏ចលនាប្រឆាំងនឹងរដ្ឋាភិបាលបច្ចុប្បន្ននេះ គឺកម្លាំងរឹងមាំបំផុត គឺនៅមូលដ្ឋាន ហើយជាព្រឹត្តិការណ៍ ឬក៏ជាប្រវត្តិសាស្ត្រ នៅក្នុងនយោបាយកម្ពុជា ដែលបង្ហាញថា មូលដ្ឋានមានភាពរឹងមាំជាងក្បាលម៉ាស៊ីនថ្នាក់ដឹកនាំគណបក្ស»។
លោកបណ្ឌិត សេង សារី យល់ឃើញថា ថ្នាក់ដឹកនាំគណបក្សភ្លើងទៀនទៅវិញ ដែលគួរតែពង្រឹងជំហរខ្លួនឯងឱ្យបានរឹងមាំ និងព្យាយាមកុំប្រព្រឹត្តកំហុសផ្នែកសីលធម៌ និងនយោបាយ ដើម្បីទប់ទល់នឹងយុទ្ធសាស្ត្របំបែកបំបាក់របស់គណបក្សកាន់អំណាចដែលប្រើប្រាស់តាំងពីឆ្នាំ១៩៩៣មក។
ថ្នាក់ដឹកនាំគណបក្សភ្លើងទៀន លើកឡើងថា ប្រសិនបើខ្លួនឈ្នះការបោះឆ្នោតដឹកនាំរដ្ឋាភិបាលខាងមុខនេះ នឹងមិនយកអ្នកនយោបាយ ឬគណបក្សនយោបាយណាមួយធ្វើជាសត្រូវដើម្បីគុំកួនសងសឹកឡើយ រួមទាំងគោលនយោបាយគ្រប់គ្រងជនអន្តោប្រវេសន៍ឱ្យបានត្រឹមត្រូវ ការពារវប្បធម៌ឱ្យកាន់តែរឹងមាំ ការពារបរិស្ថាន ជួយដល់កសិករ ផ្ដល់ឱកាសឱ្យយុវជនទទួលបានការអប់រំនៅឧត្តមសិក្សាស្មើៗគ្នា ជាពិសេសនឹងធ្វើឱ្យតុលាការបំពេញការងារដោយវិជ្ជាជីវៈត្រឹមត្រូវ និងឈរលើគោលការណ៍យុត្តិធម៌សម្រាប់បម្រើឱ្យពលរដ្ឋទូទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។