សាលាឧទ្ធរណ៍ត្បូងឃ្មុំនឹងប្រកាសសាលដីកាសុំនៅក្រៅឃុំរបស់មន្ត្រីបក្សភ្លើងទៀនខេត្តកំពង់ចាមលោក គង់ ថារ៉េត នៅថ្ងៃទី២៤ ខែកក្កដា ប៉ុន្តែមន្ត្រីបក្សជំទាស់ម្នាក់ទៀត គឺលោក ឆេង សារិន ត្រូវបានតុលាការជាន់ខ្ពស់មួយនេះបដិសេធសំណើសុំនៅក្រៅឃុំ។ សាច់ញាតិនៅតែច្រានចោលការចោទប្រកាន់ និងស្នើឱ្យតុលាការជាន់ខ្ពស់ពិចារណាដោះលែងសមាជិកគ្រួសាររបស់ពួកគាត់ ឱ្យមានសេរីភាពជួបជុំគ្រួសារឡើងវិញ។
សាលាឧទ្ធរណ៍ត្បូងឃ្មុំនៅរសៀលថ្ងៃទី២២ ខែកក្កដា បានបើកសវនាការលើបណ្ដឹងសុំនៅក្រៅឃុំរបស់មន្ត្រីគណបក្សភ្លើងទៀនខេត្តកំពង់ចាមលោក គង់ ថារ៉េត ពាក់ព័ន្ធការចោទប្រកាន់ថាលោកក្លែងស្នាមមេដៃលើឯកសាររៀបចំបញ្ជីបេក្ខជនឈរឈ្មោះសម្រាប់បោះឆ្នោតក្រុមប្រឹក្សាក្រុងកំពង់ចាម សម្រាប់អាណត្តិទី៤ ឆ្នាំ២០២៤ កន្លងទៅ។
លោក គង់ ថារ៉េត ស្លៀកពាក់ខោអាវអ្នកជាប់ឃុំពណ៌ទឹកក្រូច ដែលមានសុខភាពទ្រុឌទ្រោមខ្លាំងត្រូវបានសមត្ថកិច្ច និងគ្រួសារគ្រាចេញពីឡានចូលទៅក្នុងបន្ទប់សវនាការ បានព្យាយាមបកស្រាយនៅមុខតុលាការថា លោកមិនបានក្លែងបន្លំឯកសារ ដូចការចោទប្រកាន់ឡើយ ហើយលោកស្នើសុំតុលាការអនុញ្ញាតឱ្យបាននៅក្រៅឃុំ ដើម្បីព្យាបាលជំងឺពីគ្រូពេទ្យ និងការមើលថែពីគ្រួសារជាចាំបាច់។ ក្រោយសួរដេញដោលជាង ២ម៉ោងមក ប្រធានក្រុមប្រឹក្សាជំនុំជម្រះសម្រេចលើកពេលប្រកាសសាលដីកា ទៅថ្ងៃទី២៤ ខែកក្កដា។
មេធាវីការពារក្ដីឱ្យសកម្មជនបក្សជំទាស់លោក អែម ចន្ថា ប្រាប់វិទ្យុអាស៊ីសេរីក្រោយចេញពីបន្ទប់សវនាការថា អង្គហេតុដែលតុលាការយកមកចោទប្រកាន់លើលោក គង់ ថារ៉េត មានវិមតិសង្ស័យ ដែលនេះជាប្រយោជន៍សម្រាប់កូនក្ដីរបស់លោក។ លោក អែម ចន្ថា បញ្ជាក់ថា បើតាមច្បាប់ គោលការណ៍សេរីភាព និងស្ថានភាពកូនក្ដីរបស់លោកកំពុងមានជំងឺជាច្រើន ដូចជា ជំងឺស្ទះសរសៃឈាមខួរក្បាលធ្ងន់ធ្ងរ ដែលបញ្ជាក់ពីគ្រូពេទ្យនោះ លោកសង្ឃឹមថា សាលាឧទ្ធរណ៍ពិចារណាក្នុងការដោះលែងកូនក្ដីរបស់លោកឱ្យមានសេរីភាព នៅថ្ងៃប្រកាសសាលដីកាខាងមុខ។
លោក អែម ចន្ថា៖ «បទល្មើសនិងអង្គហេតុនេះ បើមើលទៅលើព្យសនកម្មមិនមានអ្វីត្រូវឃុំខ្លួនទេកូនក្ដីខ្ញុំទេ ការដាក់ក្រោមការត្រួតពិនិត្យរបស់តុលាការគ្រប់គ្រាន់ហើយបាទ។ មេធាវីតែងតែសង្ឃឹមថា កូនក្ដីទទួលបានការដោះលែងឱ្យនៅក្រៅឃុំ តែលទ្ធផលជាក់ស្ដែងយើងរង់ចាំមើលការប្រកាសសាលដីកា»។
ប្រពន្ធចៅសង្កាត់រងទី២ នៅសង្កាត់វាលវង់ ខេត្តកំពង់ចាម របស់គណបក្សភ្លើងទៀន លោក គង់ ថារ៉េត គឺលោកស្រី មុំ សុខឃាង ប្រាប់ថា លោកស្រីឈឺចាប់ពេលឃើញប្ដីជាមនុស្សស្អាតស្អំ តស៊ូលះបង់ ដើម្បីជាតិត្រូវជាប់គុកទាំងអយុត្តិធម៌។ លោកស្រីឱ្យដឹងថាអ្វីដែលលោកស្រីព្រួយបារម្ភ គឺស្ថានភាពសុខភាពប្ដីធ្លាក់ខ្លួនឈឺធ្ងន់នៅក្នុងពន្ធនាគារ ពីព្រោះគាត់មានវ័យកាន់តែចាស់ និងមានជំងឺប្រចាំកាយច្រើនមុខ ដូចជា ជំងឺទឹកនោមផ្អែម ជំងឺបេះដូង និងជំងឺលើសឈាមដែលត្រូវថែទាំឱ្យបានដិតដល់ពីកូនចៅ។ លោកស្រីស្នើដល់តុលាការដោះលែងប្តីឱ្យមានសេរីភាពឡើងវិញ។
លោកស្រី មុំ សុខឃាង៖ «ជំងឺគាត់មិនដឹងទប់ទល់នឹងស្ថានភាពនៅក្នុងពន្ធនាគារបាន ឬមិនបានទេ ខ្ញុំភ័យបារម្ភ សូមឱ្យតុលាការដោះលែងប្ដីរបស់ខ្ញុំបាននៅក្រៅឃុំមកឱ្យបាននៅជិតពេទ្យ ហើយដល់ពេលនៅពន្ធនាគារនោះ ទម្រាំបានចេញមកពេទ្យសន្លប់ដូចថ្ងៃមុនអ៊ីចឹង សូមឱ្យតុលាការដោះលែងប្ដីរបស់ខ្ញុំមក ពីព្រោះគាត់អត់មានកំហុសអ្វីធ្ងន់ធ្ងរទេ ដោះលែងឱ្យមកជួបជុំគ្រួសាររបស់ខ្ញុំវិញមក»។
ក្នុងថ្ងៃជាមួយគ្នានេះដែរ សាលាឧទ្ធរណ៍ត្បូងឃ្មុំនៅថ្ងៃទី២២ ខែកក្កដា ក៏បានប្រកាសសាលដីកា សម្រេចបដិសេធសំណើសុំនៅក្រៅឃុំ របស់ក្រុមប្រឹក្សាមកពីបក្សប្រឆាំងនៅឃុំស្ពឺ ស្រុកចំការលើ ខេត្តកំពង់ចាម លោក ឆេង សារិន ពាក់ព័ន្ធរឿងលោកជីកដីទប់ប្រឡាយយកទឹក សម្រាប់ស្រោចដំណាំនៅក្នុងចម្ការ។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាឧទ្ធរណ៍ត្បូងឃ្មុំ លោក ទុំ សោភ័ណ ដើម្បីសាកសួរជុំវិញរឿងនេះបានទេ នៅថ្ងៃទី២២ ខែកក្កដា។
មកដល់ពេលនេះ អាជ្ញាធរខេត្តកំពង់ចាមបានចាប់ខ្លួនសកម្មជនរបស់គណបក្សជំទាស់ចំនួន ៥នាក់ ដាក់ពន្ធនាគារជាបន្តបន្ទាប់ រួមមានលោកសាន សឿង លោក ស្រ៊ី មាន លោក យិន ភាន លោក គង់ ថារ៉េត និងលោក ឆេង សារិន។ ករណីចោទប្រកាន់ និងចាប់ខ្លួនក្រុមប្រឹក្សាឃុំ-សង្កាត់ជាអង្គបោះឆ្នោត និងជាបេក្ខជនមកពីបក្សប្រឆាំងទាំងនោះ បានធ្វើឡើងនៅមុនការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ កាលពីថ្ងៃទី២៦ ខែឧសភា ដោយសារពួកគេមិនព្រមចុះចូល ឬបោះឆ្នោតឱ្យបក្សកាន់អំណាចជាថ្នូរដោះលែងឱ្យមានសេរីភាព។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី មានប្រសាសន៍ថា ការចាប់ខ្លួនសកម្មជនគណបក្សប្រឆាំងបានធ្វើឱ្យស្ថានភាពនយោបាយតានតឹងនៅមុនការបោះឆ្នោត ខណៈបញ្ហានេះសហគមន៍អន្តរជាតិរិះគន់ និងចាត់ទុកក្ដីក្ដាំនេះថា ជារឿងនយោបាយ។ លោក យិន ម៉េងលី ចង់ឃើញអ្នកកាន់អំណាចដោះស្រាយបញ្ចប់វិវាទនយោបាយ ហើយតុលាការដោះលែងសកម្មជនទាំងអស់ឱ្យមានសេរីភាពឡើងវិញ។
លោក យិន ម៉េងលី៖«មានប្រទេសប្រជាធិបតេយ្យជាច្រើនទាមទារឱ្យបើកលំហសេរីភាព លំហផ្នែកនយោបាយឡើងវិញ វាអាចប៉ះពាល់ដល់មុខមាត់រដ្ឋាភិបាលទៅដល់ទីណា គេលើកឡើងបញ្ហារបស់ប្រទេសកម្ពុជាដែរបាទ»។
មកទល់ពេលនេះ ការចាប់ខ្លួនសកម្មជនបរិស្ថាន និងមន្ត្រីគណបក្សប្រឆាំងបានកើនឡើងជាង ៤០នាក់ហើយ។ គណបក្សប្រឆាំង និងមន្ត្រីសិទ្ធិមនុស្សទាមទាររដ្ឋាភិបាលលោក ហ៊ុន ម៉ាណែត ឱ្យឈប់យកប្រព័ន្ធតុលាការមកគាបសង្កត់លើសំឡេងប្រឆាំង ហើយទាមទារឱ្យដោះលែងពួកគេវិញជាបន្ទាន់ និងឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។