គណបក្សភ្លើងទៀន នឹងដាក់ឯកសារពាក់ព័ន្ធបំពេញបន្ថែម ទៅ គ . ជ . ប នៅថ្ងៃសៅរ៍ ទី១៣ ឧសភានេះ ក្នុងដំណើរការដាក់ពាក្យសុំចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះរបស់គណបក្ស ដែលកំពុងមានភាពស្មុគស្មាញនិងចម្រូងចម្រាស។
ការដាក់ឯកសារពាក់ព័ន្ធបំពេញបន្ថែមនេះ គណបក្សភ្លើងទៀន នៅមិនទាន់មានភាពប្រាកដប្រជានៅឡើយ រហូតមកដល់ពេលនេះ ថាគណបក្សប្រឆាំងដ៏ធំមួយនេះ នឹងមានសិទ្ធិចូលរួមសម្រាប់ការបោះឆ្នោតជ្រើសតាំងតំណាងរាស្រ្ត នៅខែកក្កដាខាងមុខនេះ ឬក៏យ៉ាងណានោះទេ។
គណបក្សភ្លើងទៀនព្រមានថា នឹងប្រមូលផ្តុំថ្នាក់ដឹកនាំ សមាជិក សមាជិកា សកម្មជន និងអ្នកគាំទ្រគណបក្សនៅទូទាំងប្រទេស ធ្វើបាតុកម្មតស៊ូមតិដោយសន្តិវិធី នៅក្រោយថ្ងៃទី១៣ ឧសភា ក្នុងករណីគណៈកម្មាធិការជាតិរៀបចំការបោះឆ្នោត(គ.ជ.ប)បដិសេធមិនព្រមចុះបញ្ជីគណបក្សភ្លើងទៀនឲ្យមានសិទ្ធិចូលរួមសម្រាប់ការបោះឆ្នោតជ្រើសតាំងតំណាងរាស្រ្តនៅខែកក្កដាខាងមុខ។
អ្នកនាំពាក្យគណបក្សភ្លើង លោក គីមសួរ ភីរិទ្ធ បញ្ជាក់យ៉ាងខ្លីបន្ថែមលើសេចក្ដីប្រកាសព័ត៌មានរបស់គណបក្សថា មកដល់ពេលនេះគណបក្សមិនទាន់បានជជែកពិភាក្សាលម្អិតអំពីរឿងនេះ និងមិនទាន់កំណត់ទីតាំង ព្រមទាំងពេលវេលាច្បាស់លាស់នៅឡើយទេ។
សេចក្ដីប្រកាសព័ត៌មានរបស់គណបក្សភ្លើងទៀន ចេញផ្សាយកាលពីថ្ងៃទី១២ ឧសភា ក៏បានបញ្ជាក់ដែរថា គណបក្សនឹងដាក់បំពេញបន្ថែមនូវឯកសារពាក់ព័ន្ធ ក្នុងដំណើរការដាក់ពាក្យសុំចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងតំណាងរាស្រ្តរបស់គណបក្សភ្លើងទៀន នៅទីស្ដីការគ. ជ. ប នៅថ្ងៃទី១៣ ឧសភា វេលាម៉ោង៣រសៀល។
ការសម្រេចនេះ ធ្វើឡើងភ្លាមៗក្រោយថ្នាក់ដឹកនាំគណបក្សភ្លើងទៀន៦នាក់ ដែលដឹកនាំដោយលោក ទាវ វណ្ណុល ប្រធានគណបក្ស បានទៅជួបពិភាក្សាជាលើកទី២ ជាមួយមន្ត្រីក្រសួងមហាផ្ទៃ នៅថ្ងៃទី១២ ឧសភា ដើម្បីរកដំណោះស្រាយជុំវិញបញ្ហារាំងស្ទះ នៃការស្នើសុំចុះបញ្ជីចូលរួមការបោះឆ្នោតជ្រើសតាំងតំណាងរាស្ត្រអាណត្តិទី៧ របស់គណបក្សប្រឆាំងនៅស្ថាប័នគ.ជ.ប។
ទោះយ៉ាងណាក្តី លោក គីមសួរ ភីរិទ្ធ ថ្លែងប្រាប់វិទ្យុអាស៊ីសេរី នៅយប់ថ្ងៃទី១២ ឧសភា ក្រោយមានជំនួបលើកទី២នេះថា លទ្ធផលនៃជំនួបនោះគឺមិនមានអ្វីថ្មីប្លែកលើសពីជំនួបទី១ឡើយ ហើយលោកមានក្តីសង្ឃឹមតិចតួចណាស់ ដែលគណបក្សលោកអាចចុះបញ្ជីបានសម្រេចនោះ។
លោក គីមសួរ ភីរិទ្ធ៖«ភាគរយមិនបានច្រើនជាង ហើយយើងនៅសល់តែច្រកមួយទៀតទេ គឺក្រុមប្រឹក្សាធម្មនុញ្ញ អ៊ីចឹងយើងមិនដឹងថាត្រូវតតាំងយ៉ាងម៉េចទេ ព្រោះកន្លងមកតតាំងមិនដែលឈ្នះផង...»។
គណបក្សភ្លើងទៀន មុននឹងសម្រេចប្រកាសពីគម្រោងថា នឹងប្រមូលផ្តុំថ្នាក់ដឹកនាំ សមាជិព សមាជិកា សកម្មជន និងអ្នកគាំទ្រគណបក្សនៅទូទាំងប្រទេស ធ្វើបាតុកម្ម តស៊ូមតិដោយសន្តិវិធីនេះ ពួកគេបានព្យាយាមដោះស្រាយតាមផ្លូវច្បាប់គ្រប់មធ្យោបាយជាបន្តបន្ទាប់។
ជាមួយគ្នានេះក្រសួងមហាផ្ទៃ កាលថ្ងៃទី៥ ឧសភា ក៏ប្រកាសទទួលស្គាល់ថា គណបក្សភ្លើងទៀនបានចុះបញ្ជីស្របច្បាប់ ហើយគណបក្សនេះ អាចចុះបញ្ជីចូលរួមការបោះឆ្នោតនៅថ្ងៃទី២៣ កក្កដា ខាងមុខបាន ប៉ុន្តែស្ថាប័នគ.ជ.បបញ្ជាក់ថា សេចក្ដីប្រកាសរបស់ក្រសួងមហាផ្ទៃនោះ មិនអាចប្រើប្រាស់បានឡើយ។
គ.ជ.បនៅតែទាមទារឱ្យគណបក្សភ្លើងទៀន បំពេញតាមលក្ខខណ្ឌរបស់ខ្លួន គឺត្រូវ ដាក់នូវសេចក្ដីចម្លងលិខិតបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃ កាលពីឆ្នាំ១៩៩៨ ដោយមានបញ្ជាក់នីត្យានុកូលកម្មដោយរដ្ឋបាលរាជធានី ខេត្ត ក្រុង ស្រុក និងខណ្ឌ ប៉ុន្តែគណបក្សភ្លើងទៀន បានបាត់ច្បាប់ដើមនៃសេចក្ដីប្រកាសទទួលស្គាល់ពីក្រសួងផ្ទៃនោះ បន្ទាប់ពីមានការវាយឆ្មក់ចូលបិទទីស្នាក់ការរួមគ្នារវាងគណបក្សសង្គ្រោះជាតិ និងគណបក្សភ្លើងទៀនកាលពីឆ្នាំ២០១៧។
នាយកប្រតិបត្តិអង្គការនិចហ្វិក (NICFEC) លោក សំ គន្ធាមី យល់ឃើញថា ស្ថាប័នគ.ជ.បគួរយោគយល់ចំពោះការសុំចុះបញ្ជីចូលរួមការបោះឆ្នោត ពីគណបក្សភ្លើងទៀន នៅពេលមានសេចក្ដីប្រកាសទទួលស្គាល់ពីក្រសួងមហាផ្ទៃទៅហើយនោះ។
លោក សំ គន្ធាមី៖«ខ្ញុំគិតថា គ.ជ.ប គួរយល់យោគហើយ អាហ្នឹងក្រសួងមហាផ្ទៃ គាត់បានទទួលស្គាល់ហើយ ចុះបញ្ជីផ្លូវការរួចហើយ។ ដូច្នេះ!ក្រសួងមហាផ្ទៃបញ្ជាក់បន្ថែមទៀត ក៏បានដែរ»។
ជុំវិញបញ្ហានេះ វិទ្យុអាស៊ីសេរី មិនអាចសុំការបំភ្លឺពីអ្នកនាំពាក្យគ.ជ.ប លោក ហង្ស ពុទ្ធា បានទេនៅថ្ងៃទី១២ ឧសភា។
ប៉ុន្តែមន្ត្រីគ.ជ.ប រូបនេះធ្លាប់ព្រមានថា ប្រសិននៅត្រឹមថ្ងៃទី១៤ ឧសភា គណបក្សភ្លើងទៀនមិនអាចបំពេញតាមលក្ខខណ្ឌខ្វះខាត នោះគ.ជ.បនឹងបដិសេធការស្នើសុំចុះបញ្ជីរបស់គណបក្សនេះ។
គណបក្សភ្លើងទៀន ចាត់ទុកការតម្រូវឱ្យបំពេញតាមបែបបទរដ្ឋបាលក្នុងលិខិតស្នាមថា ជារឿងតូចតាចប៉ុណ្ណោះ ប៉ុន្តែ គ.ជ.ប ហាក់កំពុងព្យាយាមធ្វើរឿងនេះឱ្យក្លាយជាបញ្ហាធំ ដើម្បីរារាំងដល់ការចុះបញ្ជីចូលរួមការបោះឆ្នោតរបស់គណបក្សខ្លួន។
គណបក្សភ្លើងទៀនជាគណបក្សដែលទទួលសំឡេងឆ្នោតច្រើនបំផុត បន្ទាប់ពីគណបក្សប្រជាជនកម្ពុជា នៅក្នុងការបោះឆ្នោតក្រុមប្រឹក្សាឃុំសង្កាត់កាលពីឆ្នាំ២០២២។ គណបក្សនេះ ទទួលបានសំឡេងឆ្នោត២២% និងបច្ចុប្បន្ន ក្លាយជាគណបក្សប្រឆាំងដ៏សំខាន់ថ្មីមួយ ក្រោយពីគណបក្សសង្គ្រោះជាតិ ដែលធ្លាប់ទទួលសំឡេងឆ្នោតគាំទ្រ៤៤% នៅក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៣ ហើយ ត្រូវលោក ហ៊ុន សែន រំលាយ កាលពីឆ្នាំ២០១៧កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។