បក្សសង្គ្រោះជាតិគ្រោងជ្រើសរើសចៅហ្វាយក្រុងភ្នំពេញចេញពីការបោះឆ្នោត
2015.05.24
អនុប្រធានគណបក្សសង្គ្រោះជាតិ លោក កឹម សុខា (ឆ្វេង) និងមន្ត្រីគណបក្ស ក្នុងពិធីប្រកាសសុពលភាពក្រុមការងារគណបក្សប្រចាំមណ្ឌលភ្នំពេញ កាលពីព្រឹកថ្ងៃទី២៤ ឧសភា ឆ្នាំ២០១៥។
សាលារាជធានីភ្នំពេញ នៅបន្តភាពស្ងប់ស្ងាត់នៅឡើយជុំវិញសារនយោបាយរបស់ប្រធានស្ដីទីគណបក្សសង្គ្រោះជាតិ ដែលអះអាងថា សម្រាប់សមាជគណបក្សដែលគ្រោងនឹងរៀបចំក្នុងរយៈពេលប្រហែល ២ឆ្នាំខាងមុខទៀតនេះ គឺថា ការតែងតាំងអភិបាលក្រុងភ្នំពេញ ឈប់ធ្វើតាមរយៈគណបក្សទៀតហើយ គឺត្រូវបោះឆ្នោតជ្រើសរើសដោយប្រជាពលរដ្ឋវិញ។ អង្គការសង្គមស៊ីវិលយល់ឃើញថា ការកែទម្រង់ដូចនេះអាចជារឿងមួយល្អ។ ក៏ប៉ុន្តែ ប្រសិនបើបេក្ខភាពនោះយកចេញមកពីក្នុងជួរគណបក្សដដែលទេ វានឹងពុំមានការកែប្រែអ្វីធំដុំឡើយ។
ប្រធានស្ដីទីគណបក្សសង្គ្រោះជាតិ ប្រកាសថា នៅក្នុងសមាជគណបក្សដែលគ្រោងនឹងរៀបចំនៅឆ្នាំ២០១៧ ខាងមុខទៀតនេះ គឺចៅហ្វាយក្រុងភ្នំពេញ នឹងលែងតែងតាំងចេញពីគណបក្សនយោបាយ ដូចដែលរដ្ឋាភិបាលធ្លាប់អនុវត្តនៅពេលបច្ចុប្បន្ននេះទៀតហើយ។
ការថ្លែងដូចនេះ របស់លោក កឹម សុខា ធ្វើឡើងនៅក្នុងពិធីប្រកាសសុពលភាពក្រុមការងារគណបក្សប្រចាំមណ្ឌលភ្នំពេញ កាលពីព្រឹកថ្ងៃទី២៤ ខែឧសភា នៅខណ្ឌសែនសុខ រាជធានីភ្នំពេញ។ លោកបន្តថា សម្រាប់សមាជគណបក្សដែលគ្រោងធ្វើនៅឆ្នាំ២០១៧ ខាងមុខនេះ លោកនឹងស្នើឲ្យអង្គសមាជបក្សធ្វើសេចក្ដីសម្រេចចំពោះការតែងតាំងអភិបាលក្រុងភ្នំពេញ ជ្រើសចេញពីការបោះឆ្នោតពីប្រជាពលរដ្ឋវិញ៖ «គេធុញអ្នកចាញមកដឹកនាំម៉េច? វាមិនសម មែនទេបងប្អូន? ដូចឯកឧត្តម យឹម សុវណ្ណ និយាយមិញ ភ្នំពេញគណបក្សសង្រ្គោះជាតិឈ្នះ ប៉ុន្តែចៅហ្វាយក្រុងទៅណាណីណោះវិញ»។
បើទោះជាបែបណា លោក កឹម សុខា ដែលធ្លាប់តែងប្រើវោហារសាស្ត្រសារនយោបាយ រិះគន់រដ្ឋាភិបាល ជាពិសេស ភាពអសកម្មលើគោលការណ៍ និងកំណែទម្រង់រដ្ឋរបស់លោកនាយករដ្ឋមន្ត្រី ហ៊ុន សែន នោះ គឺពេលនេះ លោកហាក់មិនក្លាហាននិយាយចំៗ ដូចមុនទៀតឡើយ។
នៅចំពោះមុខអ្នកគាំទ្រជាង ១ពាន់នាក់ កាលពីព្រឹកថ្ងៃទី២៤ ខែឧសភា លោក កឹម សុខា ដែលតែងត្រូវបានលោក ហ៊ុន សែន ព្រមានដកកៅអីពីអនុប្រធានរដ្ឋសភា ហាក់បន្ថយកម្ដៅនៃការវាយបក និងរិះគន់ជាសាធារណៈមកលើគណបក្សប្រជាជនកម្ពុជា។ នេះជាលើកទីមួយហើយ ដែលប្រធានស្ដីទីគណបក្សប្រឆាំង ថ្លែងសារនយោបាយភាគច្រើនផ្ដោតតែទៅលើគោលការណ៍ និងពីរបៀបយកឈ្នះដៃគូសម្រាប់អាណត្តិបន្ទាប់ទៀតវិញ។ យ៉ាងណា លោក កឹម សុខា តែងអះអាងថា លោកមិនដែលខ្វល់រឿងបាត់មុខតំណែង និងតួនាទីជាអនុប្រធានរដ្ឋសភានេះ ម្តងណាទេ។
ភាពស្ងប់ស្ងាត់នេះ ទំនងជាលោក កឹម សុខា ចង់រក្សាវប្បធម៌សន្ទនាដែលគណបក្សនយោបាយទាំងពីរបានព្រមព្រៀង ថានឹងបញ្ចប់ការរិះគន់ជាសាធារណៈ ហើយមើលទៅ។ ក៏ប៉ុន្តែ ភាពកម្រនេះ ប្រហែលជាការបញ្ចៀស ការប្រតិកម្មណាមួយពីលោកនាយករដ្ឋមន្ត្រី ហ៊ុន សែន វិញក៏អាចថា បានដែរ ព្រោះលោក ហ៊ុន សែន តែងព្រមានលោក កឹម សុខា ម្តងជាពីរដងមកហើយ អំពីកៅអីសភានេះថា អាចប្រឈមបាត់បង់មិនខាន បើនៅតែមិនគោរពគ្នាទៀតនោះ។
ក្រៅពីនេះ លោក យឹម សុវណ្ណ មន្រ្តីនាំពាក្យគណបក្សសង្គ្រោះជាតិ និងជាប្រធានក្រុមការងារបក្សមណ្ឌលភ្នំពេញ ដែលទើបត្រូវបានប្រកាសកាលពីព្រឹកថ្ងៃទី២៤ ឧសភា និយាយថា វាជារឿងដ៏ចម្លែកដែលមណ្ឌលភ្នំពេញ គណបក្សសង្គ្រោះជាតិ ឈ្នះហើយ ប៉ុន្តែបែរជាអភិបាលក្រុងភ្នំពេញ ត្រូវបានទៅលើគណបក្សប្រជាជនកម្ពុជាវិញ។ ការបោះឆ្នោតសាកលកាលពីឆ្នាំ២០១៣ កន្លងទៅ គណបក្សសង្គ្រោះជាតិ ទទួលបានចំនួន ៧អាសនៈ សម្រាប់មណ្ឌលភ្នំពេញ។ ដោយឡែកគណបក្សប្រជាជនកម្ពុជា វិញ បាន ៥អាសនៈ។
ពាក់ព័ន្ធរឿងនេះ លោក ឡុង ឌីម៉ង មន្ត្រីនាំពាក្យសាលារាជធានីភ្នំពេញ បដិសេធថា លោកនឹងមិនធ្វើអត្ថាធិប្បាយអ្វីវែងឆ្ងាយអំពីសារនយោបាយរបស់ដឹកនាំគណបក្សប្រឆាំងទេ។ លោកអះអាងថា តួនាទីដែលគណបក្សប្រជាជនកម្ពុជា ទទួលបាននៅពេលនេះ គឺពុំមែនចេះតែធ្វើឲ្យរួចពីដៃឡើយ ។ ក៏ប៉ុន្តែជាការអនុវត្តទៅតាមច្បាប់ និងមានអនុក្រឹត្យតែងតាំងត្រឹមត្រូវរបស់រដ្ឋាភិបាល ថែមទៀតផង៖ «យើងអនុវត្តទៅតាមច្បាប់ដែលមានចែងជាធរមាន ព្រោះថា ការតែងតាំងអភិបាលរាជធានី ខេត្តគឺដោយអនុក្រឹត្យ។ ចុះហត្ថលេខាដោយលោកនាយករដ្ឋមន្រ្តី។ យើងខ្ញុំអនុវត្តទៅតាមច្បាប់ដែលមានជាធរមាន»។
ជុំវិញរឿងរ៉ាងនេះ អង្គការមិនមែនរដ្ឋាភិបាលចាត់ទុកថា យន្តការដែលលោក កឹម សុខា គ្រោងនឹងដាក់បញ្ចូលក្នុងកម្មវិធីនយោបាយជាតិរបស់ខ្លួនអំពីវិមជ្ឈការអំណាចនេះ គឺជាយុទ្ធសាស្ត្រដ៏ប្រសើរក្នុងការកែទម្រង់រដ្ឋ។
លោក អ៊ូ វីរៈ ប្រធានអង្គការនៃវេទិកាអនាគតចាត់ទុកថា ប្រសិនបើការផ្ដល់ប្រតិភូអំណាចតាមរយៈការបោះឆ្នោតផ្ដល់សេចក្ដីទុកចិត្តដោយប្រជាពលរដ្ឋ ពិតមែនវាគឺជារឿងល្អ។ ក៏ប៉ុន្តែ វានៅតែអាក្រក់ ប្រសិនបើបេក្ខភាពនោះ ត្រូវជ្រើសរើសចេញពីកូតាគណបក្សនយោបាយ។ ហេតុនេះការកែទម្រង់តាមរយៈយន្តការនេះ នឹងមិនប្រសើរឡើយ៖ «ការពិតប្រសិនបើ នៅតែឈរឈ្មោះក្នុងបញ្ជីបក្សដដែល គឺយើងមើលឃើញ ឃុំ សង្កាត់ហើយ គឺឥតមានជាងគ្នាប៉ុន្មានទេ។ ប៉ុន្តែយ៉ាងហោចណាស់ គ្រាន់បើជាងមុនបន្តិច ប៉ុន្តែមិនមានប្រសិទ្ធភាពទាំងស្រុងទេ»។
បើទោះបែបណា លោក កឹម សុខា នៅតែមានជំនឿថា ការកែទម្រង់នេះ អាចនឹងធ្វើឲ្យកម្ពុជា ធ្វើដំណើរក្នុងគោលការណ៍នៃរបបប្រជាធិបតេយ្យច្រើនជាងការអនុវត្តគោលនយោបាយបច្ចុប្បន្ននេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
អត្ថបទពេញនិយម
នយោបាយ
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន