តុលាការ​ចោទ​ប្រកាន់​សកម្មជន​បក្ស​ប្រឆាំង​ទី​១៨៤ ពី​បទ​រួមគំនិត​ក្បត់

ដោយ ហេង រស្មី
2019-10-18
អ៊ីម៉ែល
មតិ
Share
បោះពុម្ព
អនុប្រធាន​គណៈកម្មាធិការ​ប្រតិបត្តិ​ខេត្ត​កំពង់ឆ្នាំង ខាង​គណបក្សប្រឆាំង​លោក ដួង ចន្ទ្រា។
អនុប្រធាន​គណៈកម្មាធិការ​ប្រតិបត្តិ​ខេត្ត​កំពង់ឆ្នាំង ខាង​គណបក្សប្រឆាំង​លោក ដួង ចន្ទ្រា។
Photo courtesy

តុលាការ​ចោទ​ប្រកាន់​សកម្មជន​គណបក្ស​ប្រឆាំង​ម្នាក់​ទៀត​នៅ​ក្នុង​ខេត្ត​កំពង់ឆ្នាំង ពី​បទ​រួមគំនិត​ក្បត់ ស្រប​ពេល​តុលាការ​ហៅ​សកម្មជន​ផ្សេងទៀត មក​សាកសួរ​ពាក់​ព័ន្ធ​នឹង​សំណុំរឿង កែន​មនុស្ស​មក​ចាំ​ទទួល​លោក សម រង្ស៊ី ។ មេធាវី​ការពារ​ក្តី​ចាត់ទុកថា សំណុំ​រឿង​នេះ​មាន​លក្ខណៈ​នយោបាយ​ច្រើន​ជាង​នីតិវិធី​ច្បាប់។

តុលាការ​ខេត្ត​កំពង់ឆ្នាំង​កាលពី​ថ្ងៃ​ទី១៧ តុលា បាន​ចោទប្រកាន់​សកម្មជន​គណបក្ស​ប្រឆាំង​ម្នាក់ទៀត​ពី​បទ​រួមគំនិត​ក្បត់ ទាក់ទិន​នឹង​ការ​បំផុស​ប្រជាពលរដ្ឋ​ដោយ​ចេតនា​តាមរយៈ​បណ្ដាញ​សង្គម​ហ្វេសប៊ុក ដើម្បី​ឱ្យ​ចូលរួម​អប​ដំណើរ​លោក សម រង្ស៊ី ដែល​គ្រោង​នឹង​វិល​មក​កាន់​មាតុប្រទេស​វិញ នៅ​ថ្ងៃ​ទី៩ វិច្ឆិកា​ខាង មុខ​នេះ។

អនុប្រធាន​គណៈកម្មាធិការ​ប្រតិបត្តិ​ខេត្ត​កំពង់ឆ្នាំង ខាង​គណបក្សប្រឆាំង​លោក ដួង ចន្ទ្រា ដែល​មាន​ឈ្មោះ​ក្នុង​ដីកា​ចោទប្រកាន់​របស់​តុលាការ​បាន​ប្រាប់​អាស៊ីសេរី​ពី​កន្លែង​លាក់ខ្លួន​មក​ថា លោក​បាន​ឃើញ​ដីកា​ចោទប្រកាន់​នេះ​ហើយ ។ លោក​ចាត់​ទុក​ការ​ចោទ​ប្រកាន់​​ពី​​តុលាការ​​របប​​ក្រុង​​ភ្នំពេញ​​នេះ​​មិន​បាន​​ធ្វើ​ឱ្យ​​លោក​បាក់​ស្មារតី​ក្នុង​ការ​ចូលរួម​គាំទ្រ​លោក សម រង្ស៊ី ទេ​។ លោក​មាន​​ប្រសាសន៍​​ថា ប្រជា​ពលរដ្ឋ​នៅ​ក្នុង​ខេត្ត​កំពង់ឆ្នាំង​ត្រៀមខ្លួន​រួចជាស្រេច​ដើម្បី​អម​ដំណើរ​​លោក សម រង្ស៊ី វិល​ចូល​មក​កាន់​មាតុប្រទេស​វិញ៖ «សូម​អំពាវនាវ​ដល់​បង​ប្អូន​ប្រជាពលរដ្ឋ​យើង​ទាំងអស់ សូម​កុំ​តក់ស្លុត​ការ​ចេញ​ដីកា​របស់​តុលាការ​បែប​នេះ ពីព្រោះ​តុលាការ​នេះ​គ្រាន់តែ​ជា​តុលាការ​របស់​អាយ៉ង​តែប៉ុណ្ណោះ។ ដូច្នេះ​មានតែ​ការ​ផ្លាស់ប្ដូរ​មួយ​គត់​ ដែល​ធ្វើ​ឱ្យ​បងប្អូន​យើង​លែង​ព្រួយបារម្ភ​តទៅ​មុខ​​ទៀត ត​កូន​ត​ចៅ និង​សូម​អំពាវនាវ​ដល់​កង​កម្លាំង​ប្រដាប់​អាវុធ ប៉ូលិស​ទាហាន ទាំងអស់ រួម​ទាំង​ប្រជា​ការពារ​ភូមិ​មេត្តា​ចូលរួម​គាំទ្រ​ដំណើរ​មាតុភូមិ​និវត្តន៍​របស់​​លោក​ប្រធាន សម រង្ស៊ី នៅ​ថ្ងៃ​ទី៩ ទាំងអស់​គ្នា និង​​ចូល​រួម​​ការពារ​​ផល​​ប្រយោជន៍​​ប្រជា​ពលរដ្ឋ​​ជា​ធំ»

គិត​ត្រឹម​ថ្ងៃ​ទី១៧ តុលា នេះ​មាន​សកម្មជន​គណបក្ស​សង្គ្រោះជាតិ​ចំនួន ៤៧​នាក់ ហើយ​ត្រូវ​របប​ក្រុង​ភ្នំពេញ​ចាប់​ដាក់​ពន្ធនាគារ ក្នុង​ខណៈ​ដែល​សកម្មជន​ចំនួន ១៨៤​នាក់​ផ្សេងទៀត ត្រូវ​តុលាការ​ចោទប្រកាន់​ដូចៗ​គ្នា​ពី​បទ​«​រួមគំនិត​ក្បត់​»​ទាក់ទិន​ទៅ​នឹង​ការ​ប្រមូល​កម្លាំង​មហាជន​មក​ចាំ​ទទួល​លោក សម រង្ស៊ី។

ក្រៅ​ពី​នោះ​មាន​សកម្មជន​គណបក្ស​សង្គ្រោះជាតិ​ចំនួន ៤​នាក់​ប៉ុណ្ណោះ​បាន​ចូល​សារភាព​ក្រោយពី​មាន​ការ​បង្ខិតបង្ខំ​ពី​របប​ក្រុង​ភ្នំពេញ។ សកម្មជន​ដែល​បាន​ចូល​សារភាព​ទាំងនោះ​មកពី​ខេត្ត​កំពង់ធំ ភ្នំពេញ និង​​ខេត្ត​​បន្ទាយមានជ័យ។

ស្រប​ពេល​តុលាការ​ចេញ​ដីកា​ចោទប្រកាន់​មក​លើ​សកម្មជន​គណបក្ស​ប្រឆាំង​ខេត្ត​កំពង់ឆ្នាំង។ នៅ​ក្នុង​ទីក្រុង​ភ្នំពេញ​ឯណោះ វិញ តុលាការ​បាន​កោះហៅ​សកម្មជន ​ដែល​កំពុង​ជាប់​ពន្ធនាគារ​មក​សាក​សួរ​ជា​បន្តបន្ទាប់​លើ​សំណុំរឿង​ដូចគ្នា​នេះ។

មេធាវី​ការពារ​ក្ដី​គណបក្សប្រឆាំង លោក សំ សុ​គង់ បញ្ចាក់​ថា តុលាការ​ក្រុង​ភ្នំពេញ​បាន​នាំ​យក​លោក ទុំ ប៊ុនថន មក​សាកសួរ​កាលពី​ថ្ងៃ​ទី​១៧ តុលា​ក្រោយពី​លោក​បាន​ជួប​ជាមួយ​លោក សម រង្ស៊ី នៅ​ក្នុង​ប្រទេស​ម៉ាឡេស៊ី កាលពី​ថ្ងៃ​ទី១៥ ខែ​សីហា។ លោក​បញ្ជាក់​ថា នៅ​ថ្ងៃ​ទី១៨ តុលា នេះ​តុលាការ​នឹង​សាកសួរ កញ្ញា យូ ចាន់ធានី ក្នុង​ករណី​ចោទប្រកាន់​ដូចគ្នា​នេះ​ដែរ។

លោក សំ សុគង់ បញ្ជាក់​ថា ការ​ចោទ​ប្រកាន់​របស់​តុលាការ​កន្លងមក​ទៅលើ​កូន​ក្តី​របស់​លោក ​គឺជា​ការ​រំលោភ​ទៅលើ​សិទ្ធិ សេរីភាព​ក្នុង​ការ​ចូលរួម​គណបក្ស​នយោបាយ​របស់​ប្រជាពលរដ្ឋ៖ «រឿង​ហ្នឹង​វា​ជា​សិទ្ធិ និង​សេរីភាព​របស់​ប្រជាជន​គ្រប់រូប ហើយ​សិទ្ធិ​នេះ​ត្រូវ​បាន​បញ្ញត្តិ​នៅ​ក្នុង​រដ្ឋធម្មនុញ្ញ និង​កតិកាសញ្ញា​ស្ដីពី​សិទ្ធិ​របស់​ពលរដ្ឋ និង​សិទ្ធិ​នយោបាយ​ដែល​ពលរដ្ឋ​គ្រប់រូប​ហ្នឹង​មាន​សិទ្ធិ​ក្នុង​ការ​ចូលរួម​ក្នុង​ជីវភាព​នយោបាយ មាន​សិទ្ធិ​ក្នុង​ការ​ជួប​ប្រជុំ និង​មាន​សិទ្ធិ​ក្នុង​ការ​បញ្ចេញមតិ។ អ៊ីចឹង​ការដែល​ពួកគាត់​បាន​ទៅ​ចូល​ជួប​លោក​ប្រធាន សម រង្ស៊ី ដែល​អតីត​ប្រធាន​របស់​ពួកគេ​ហ្នឹង​គឺជា​ការប្រើប្រាស់​សិទ្ធិ​ក្នុង​ការ​ជួប​ប្រជុំ​មិន​មែន​​ជា​រឿង​ខុស​ច្បាប់​​នោះ​​ទេ»

អតីត​អ្នកអាន​ព័ត៌មាន​ទូរទស្សន៍​សង្គ្រោះជាតិ​តាម​ហ្វេសប៊ុក កញ្ញា យូ ចាន់ធានី និង​លោក ទុំ ប៊ុនថន ត្រូវ​របប​ក្រុង​ភ្នំពេញ​ចាប់​​​ខ្លួន​ កាលពី​ថ្ងៃ​ទី​១៣ ខែ​កញ្ញា កន្លង​​ទៅ​​នេះ ​ជាមួយ​នឹង​សកម្មជន​ផ្សេងៗ ​ទៀត។ តុលាការ​បាន​ចោទប្រកាន់​ពួកគេ​ពី​បទ​ទៅ​ទទួលយក​ផែនការ​ពី​លោក សម រង្ស៊ី នៅ​ប្រទេស​ម៉ាឡេស៊ី​ ដើម្បី​ផ្ដួល​​​រំលំ​​​របប​​ក្រុង​ភ្នំពេញ រួច​ហើយ​​បាន​​បញ្ជូន​​ខ្លួន​​ទៅ​​ឃុំឃាំង​​នៅ​​ពន្ធនាគារ​​ព្រៃ​​ស ពន្ធនាគារ​ខេត្ត​កណ្ដាល និង​ខេត្ត​បន្ទាយមានជ័យ។

លោកស្រី យូ ចាន់ សុគន្ធ បងស្រី កញ្ញា យូ ចាន់ធានី បាន​ទទូច​ឱ្យ​តុលាការ​ដោះលែង​ប្អូនស្រី​ឱ្យ​មាន​សេរីភាព​វិញ៖ «ចា​នាង​ខ្ញុំ​បងស្រី​កញ្ញា យូ ចាន់ធានី។ នាង​​ខ្ញុំ​​ស្នើសុំ​ឱ្យ​តុលាការ​ជួយ​ដោះលែង​ប្អូនស្រី​នាង​ខ្ញុំ កញ្ញា យូ ចាន់ធានី មកវិញ​ផង សុំ​អាណិត​គ្រួសារ​នាង​ខ្ញុំ​ផង។ ឪពុក​ម្តាយ​ចាស់ជរា​អស់ហើយ មាន​ជំងឺ​ប្រចាំ​​កាយ​​ទៀត ហើយ​ត្រូវ​ព្រួយបារម្ភ​ពី​កូន​ដែល​នៅ​ក្នុង​ពន្ធនាគារ។ អ៊ីចឹង​នាង​ខ្ញុំ​ជា​បងស្រី នាង​ខ្ញុំ​សុំ​​ឱ្យ​តុលាការ​ដោះលែង​ប្អូនស្រី​នាង​ខ្ញុំ​មកវិញ​មក»

នៅ​សល់​តែ​២៣ ថ្ងៃ​ទៀត​តែប៉ុណ្ណោះ​ដល់​ថ្ងៃ​កំណត់​ប្រធាន​ស្តីទី​គណបក្ស​សង្គ្រោះ​ជាតិ លោក សម រង្ស៊ី វិល​ចូល​មាតុប្រទេស​វិញ​តាម​ការកំណត់។ ស្រប​ពេល​ជាមួយ​គ្នា​នេះ​ដែរ អាជ្ញាធរ​បាន​បង្កើន​ការ​ចាប់ខ្លួន​សកម្មជន​គណបក្សប្រឆាំង​ជា​បន្តបន្ទាប់។ មាន​សកម្មជន​គណបក្ស​មួយ​ចំនួន​ចាប់ខ្លួន​យក​ទៅ​ឃុំ​ក្នុង​ពន្ធនាគារ​​ហើយ​ ទើប​បង្ហាញ​​ដីកា​បង្គាប់​ឱ្យ​ចាប់ខ្លួន​ជា​សាធារណៈ​តាម​ក្រោយ។

អនុប្រធាន​អង្គការ​ លីកាដូ​ ទទួល​បន្ទុក​ឃ្លាំមើល​ការរំលោភ​សិទ្ធិមនុស្ស លោក អំ សំអាត បញ្ជាក់​ថា ការ​ចាប់ខ្លួន​ទៅលើ​សកម្មជន​គណបក្ស​ប្រឆាំង​ជា​បន្ត​បន្ទាប់​​នេះ​ដោយសារតែ​មានការ​តានតឹង​ផ្នែក​នយោបាយ​ ជា​ពិសេស​ សង្គ្រាម​ពាក្យ​សំដី​​រវាង​​គណបក្ស​​កាន់​អំណាច និង​​គណបក្ស​ប្រឆាំង។

លោក​ចាត់​ទុក​ការ​ចាប់ និង​ការ​ឃុំខ្លួន​​គណបក្សប្រឆាំង​នេះ ​គឺជា​រឿង​មួយ​ដើម្បី​បំបាក់ ឬ​ក៏​​គំរាម​កំហែង​​ទៅ​លើ​​សកម្មជន​​គណបក្ស​​ប្រឆាំង៖ «អ៊ីចឹង​ខ្ញុំ​គិត​ថា លទ្ធផល ឬក៏​មធ្យោបាយ​ឬ​យន្តការ​ទាំងអស់​នេះ វា​មិន​ជា​ការ​ល្អ​ទេ សម្រាប់​ប្រទេស​កម្ពុជា​យើង​ហើយ យើង​ឃើញ​ថា បើសិនជា​អ្នកដឹកនាំ​នយោបាយ​ទាំង​អស់ នៅតែ​បន្ត​យន្តការ​ឬក៏​នយោបាយ​របៀប​នេះ​ ដើម្បី​តទល់​គ្នា​នោះ​ប្រជាពលរដ្ឋ​ស្លូតត្រង់​ហ្នឹង នឹង​អាច​រង​គ្រោះជា​បន្តបន្ទាប់​។ ​អ៊ីចឹង​​មធ្យោបាយ​ដែល​ល្អ​គួរតែ​អ្នកនយោបាយ​ទាំងអស់​ហ្នឹង​វិល​រក​ការចរចា​ណាមួយ​ ដើម្បី​បញ្ចប់​នៅ​វិបត្តិ​នយោបាយ​នេះ ហើយ​​គិត​​ពី​​ឧត្តម​​ប្រយោជន៍​​ជាតិ ឧត្តម​ប្រយោជន៍​ជាធំ»

អ្នកនាំពាក្យ​របប​ក្រុងភ្នំពេញ លោក ផៃ ស៊ីផាន មាន​​ប្រសាសន៍​​ថា ការ​​ចាប់​ខ្លួន​​​​សកម្មជន​​គណបក្ស​​ប្រឆាំង​​កន្លង​មក​​ មិន​មែន​​​ជា​​​រឿង​​នយោបាយ​​​ទេ គឺ​​ជា​​ការ​អនុវត្ត​​ច្បាប់​​ក្នុង​​ប្រទេស​កម្ពុជា​ដោយសារតែ​អ្នក​ទាំងនោះ​មានបំណង​ផ្ដួល​រំលំ​រដ្ឋាភិបាល៖ «មូលហេតុ​​ទាំង​​សម្ដេច​​ក្រឡាហោម ទាំង​​សម្ដេច​​ពិជ័យ និង​​ក្រសួង​យុត្តិធម៌​​បាន​​ជម្រាបជូន​ជា​សាធារណៈ​ជា​ច្រើនដង​រួច​មក​ហើយ​ថា​ការ​ត្រៀម​លក្ខណៈ ឬ​ក៏​កៀរគរ បំផុស​បំផុល​​មនុស្ស​​មក​​ចូល​រួម​​អំពើ​​ក្បត់​​របស់​​លោក សម រង្ស៊ី គឺ​ជា​​ការ​ទទួល​ខុស​ត្រូវ​ចំពោះ​មុខ​​ច្បាប់ ហើយ​​ច្បាប់​​បាន​​ចែង​​ច្បាស់​​ជន​​ណា​ ដែល​​​បាន​​​ចូល​រួម​​​នឹង​​​ត្រូវ​​​ឃាត់​​ខ្លួន»

ទោះបីជា​ការ​ចាប់ខ្លួន​ពី​របប​ក្រុងភ្នំពេញ​ជា​បន្តបន្ទាប់​ក្តី ក៏​ផែនការ​វិលត្រឡប់​ ដើម្បី​ស្ដារ​លទ្ធិ​ប្រជាធិបតេយ្យ​នៅ​កម្ពុជា គ្មាន​ការ​ផ្លាស់ប្ដូរ​ទេ។ កាលពី​ថ្ងៃ​១៥ ខែ​តុលា​កន្លង​ទៅ​នេះ​ មន្ត្រី​ជាន់ខ្ពស់​គណបក្ស​សង្គ្រោះជាតិ​ បាន​ទៅដល់​ប្រទេស​មួយ​ចំនួន​​ក្នុង​តំបន់​អាស៊ាន​ហើយ ដើម្បី​​ត្រៀម​រៀបចំ​ទទួល​លោក សម រង្ស៊ី វិល​ចូល​​មាតុប្រទេស​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល