សកម្មជន​បក្ស​ប្រឆាំង​នៅ​ប៉ៃលិន​កំពុង​លាក់ខ្លួន​នៅ​ទី​សុវត្ថិភាព​ក្រោយ​តុលាការ​ចោទ​ប្រកាន់​ពី​បទ​រួម​គំនិត​ក្បត់

ដោយ ហេង រស្មី
2019-10-02
អ៊ីម៉ែល
មតិ
Share
បោះពុម្ព
សមាជិក​ក្រុមប្រឹក្សាឃុំ​ស្ទឹងកាច់ ខេត្ត​ប៉ៃលិន  នៃ​គណបក្ស​សង្គ្រោះជាតិ លោក ឈុន សិទ្ធី។
សមាជិក​ក្រុមប្រឹក្សាឃុំ​ស្ទឹងកាច់ ខេត្ត​ប៉ៃលិន នៃ​គណបក្ស​សង្គ្រោះជាតិ លោក ឈុន សិទ្ធី។
Photo provided

សកម្មជន​គណបក្ស​សង្គ្រោះជាតិ​ចំនួន ៤​នាក់ នៅ​ក្នុង​ខេត្ត​ប៉ៃលិន​កំពុង​លាក់ខ្លួន​នៅ​កន្លែង​មាន​សុវត្ថិភាព​បន្ទាប់ពី​តុលាការ​ប៉ៃលិន​បាន​ចោទប្រកាន់​ពី​បទ​ «រួម​គំនិត​​ក្បត់» បន្ទាប់​ពី​បាន​ផ្តល់​បទសម្ភាសន៍​ជាមួយ​វិទ្យុ​អាស៊ីសេរី​ទាក់ទិន​នឹង​ការ​គាំទ្រ​លោក សម រង្ស៊ី វិល​ចូល​មាតុប្រទេស​វិញ។ មន្ត្រី​សង្គម​ស៊ីវិល​ចាត់​ទុក​ដីកា ​របស់​តុលាការ​ថា ជា​រឿង​នយោបាយ។

សមាជិក​ក្រុមប្រឹក្សា​គណបក្ស​សង្គ្រោះជាតិ​ខេត្ត​ប៉ៃលិន លោកស្រី វ៉ែន ដារ៉ា ប្រាប់​អាស៊ីសេរី​ថា លោកស្រី និង​សកម្មជន​គណបក្ស​ប្រឆាំង​បី​នាក់​ផ្សេងទៀត​ចាត់​ទុក​ថា ការ​ចោទប្រកាន់​របស់​តុលាការ​ថា ជា​រឿង​អយុត្តិធម៌ និង​ជា​ការ​បំបិទ​សិទ្ធិ​សេរីភាព​ក្នុង​ការ​ចូលរួម​គាំទ្រ​គណបក្ស​នយោបាយ។

ការ​លើកឡើង​របស់​លោកស្រី វ៉ែន ដារ៉ា បាន​កើត​មាន​ឡើង​ក្រោយ​ពី​តុលាការ​ខែត្រ​ប៉ៃលិន​បាន​ចោទ​ប្រកាន់​សកម្មជន​បក្ស​ប្រឆាំង​ចំនួន ៤​នាក់​បន្ថែម​ទៀត ពី​បទ “ រួម​គំនិត ក្បត់ជាតិ​” គាំទ្រ​ប្រធាន​គណបក្ស​សង្គ្រោះជាតិ លោក សម រង្សី ក្នុង​ការ​វិល​ចូល​ស្រុក​វិញ។

លោកស្រី វ៉ែន ដារ៉ា បញ្ជាក់​ថា លោកស្រី និង​សកម្មជន​បី​នាក់​ផ្សេងទៀត​កំពុង​លាក់ខ្លួន​នៅ​កន្លែង​មាន​សុវត្ថិភាព​បន្ទាប់ពី​ទទួល​សេចក្ដីប្រកាស​ព័ត៌មាន​របស់​តុលាការ៖ «អ្វី​ដែល​គាត់​ចោទប្រកាន់​នោះ​គឺ​ថា របប​ក្រុងភ្នំពេញ​នេះ​គឺថា អយុត្តិធម៌​ចំពោះ​អ្នក​ដែល​តស៊ូ​ដើម្បី​លទ្ធិ​ប្រជាធិបតេយ្យ​ណាស់​។​សូម​អំពាវនាវ​ដល់​បង​ប្អូន​ថ្នាក់ដឹកនាំ​នៅ​តាម​មូលដ្ឋាន​ទាំងអស់​នឹង​បន្ត​ការ​គាំទ្រ​លោក​ប្រធាន សម រង្ស៊ី ចូល​ក្នុង​ប្រទេស​វិញ​ឱ្យ​ទាល់តែ​បាន»

នៅ​ក្នុង​សេចក្ដីប្រកាស​ព័ត៌មាន​របស់​អ្នកនាំពាក្យ នៃ​អយ្យការ​អម​សាលាដំបូង​ខែត្រ​ប៉ៃលិន កាលពី​ថ្ងៃទី​១ តុលា នេះ ប្រកាស​ឈ្មោះ​មនុស្ស​ទាំង ៤​នាក់ ដែល​តាម​ចាប់ខ្លួន​នោះ រួមមាន លោកស្រី វ៉ែន ដារ៉ា លោក ឈុន សិទ្ធី ហៅ​គ្រូ​ធី លោក ឃិន ប៉ុន និង​លោក ហ៊ុយ ហួន។ អ្នក​ទាំង​៤ ត្រូវ​បាន​តុលាការ​ចោទប្រកាន់​ពី​បទ រួម​គំនិត​ក្បត់ជាតិ តាម​មាត្រា​៤៥៣ នៃ​ក្រមព្រហ្មទណ្ឌ។

ព្រះរាជអាជ្ញា​ខេត្ត​ប៉ៃលិន​លោក តូច ភក្តី អះអាងថា តុលាការ​មាន​អង្គហេតុ​គ្រប់គ្រាន់​សម្រាប់​ចោទប្រកាន់។ ប៉ុន្តែ​លោក​មិន​បាន​ពន្យល់​ពិស្ដារ​ពី​ហេតុផល​ដែល​នាំ​ឱ្យ​មានការ​ចោទប្រកាន់​មក​លើ​សកម្មជន​គណបក្ស​សង្គ្រោះ​ជាតិ​ទេ៖ «មិន​អាច​ពន្យល់​បានទេ ដោយសារតែ​អង្គហេតុ​ហ្នឹង​វា​ពាក់ព័ន្ធ​ក្នុង​រឿង​ប៉ុណ្ណឹង។ ដោយសារតែ​គាត់​ពាក់ព័ន្ធ​នឹង​ការងារ​ហ្នឹង»

នៅ​ក្នុង​សេចក្ដី​ប្រកាស​ព័ត៌មាន​របស់​អ្នកនាំពាក្យ នៃ​អយ្យការ​អម​សាលាដំបូង​ខែត្រ​ប៉ៃលិន បញ្ជាក់​ចោទ​ថា សកម្មជន​គណបក្ស​សង្គ្រោះជាតិ​ទាំង​៤​នាក់ ពាក់ព័ន្ធ​នឹង​ការ​ផ្ដល់​ទីកន្លែង​សម្រាប់​ជួប​ប្រជុំ និង​ការ​ផ្សព្វផ្សាយ​តាម​បណ្ដាញ​សង្គម​ហ្វេសប៊ុក និង​ចោទ​ថា សកម្មជន​បក្ស​ប្រឆាំង​ទាំងនេះ បាន​កៀរគរ បំផុស​ឱ្យ​មហាជន ទៅ​ចូលរួម ក្នុង​ផែនការ​ផ្ដួល​រំលំ​រដ្ឋាភិបាល ជាមួយ​ក្រុម​ឧទ្ទាម​ក្រៅច្បាប់ ក្រោម​ឧបាយកល ផែនការ​នៃ​ការ​វិល​ត្រលប់​ទៅ​កម្ពុជា​វិញ របស់​លោក សម រង្ស៊ី។

ប្រធាន​ផ្នែក​សិទ្ធិមនុស្ស​នៃ​សមាគម​អាដហុក​លោក នី សុខា បញ្ជាក់​ថា មាន​សកម្មជន​គណបក្ស​សង្គ្រោះជាតិ​ជាច្រើន​នាក់​ហើយ បាន​ទទួលរង​នូវ​ការ​ចោទ​ប្រកាន់​​ពី​បទ​រួមគំនិត​ក្បត់ ក្រោយ​ពី​ពួកគេ​ប្រកាស​ជំហរ​គាំទ្រ​លោក សម រង្ស៊ី។ លោក​ចាត់ទុកថា ការ​ចោទប្រកាន់​កន្លង​មក​របស់​តុលាការ​ថា ជា​រឿង​នយោបាយ​​ច្រើនជាង​ការអនុវត្ត​គោលការណ៍​ច្បាប់​ប្រកបដោយ​គតិយុត្តិ៖ «មន្ត្រី​នៃ​តុលាការ​ជាពិសេស​ចៅក្រម​នៃ​តុលាការ​មួយ​ចំនួន​ធំ​ឃើញ​ថា គាត់​ជា​មន្ត្រី​នៃ​​សមាជិក​គណបក្ស​នយោបាយ។ អ៊ីចឹង​យើង​ឃើញ​ថា នៅ​ពេល​ដែល​គាត់​ធ្វើ​អាជ្ញាកណ្ដាល​ផង ហើយ​យើង​ទៅ​កាត់​សេចក្ដី​ផង អ៊ីចឹង​មានការ​លំបាក​ណាស់​​​ទោះបី​គាត់​ថា ធ្វើ​ឱ្យ​រឿង​ហ្នឹង​វា​អព្យាក្រិត្យ ក៏​គេ​ពិបាក​នឹង​ជឿ»

គិត​មក​ដល់​ថ្ងៃ​ទី២ តុលា នេះ មាន​សកម្មជន​បក្ស​ប្រឆាំង​មាន​ចំនួន ៣០​នាក់​ហើយ កំពុង​ឃុំខ្លួន​នៅ​ក្នុង​ពន្ធនាគារ និង​ចំនួន​១៦៥​នាក់​ផ្សេងទៀត កំពុង​ត្រូវ​តុលាការ និង​ប៉ូលិស​របប​ក្រុងភ្នំពេញ កោះហៅ ចោទ​ប្រកាន់ និង​តាម​ចាប់ខ្លួន ពី​បទ​មិន​គោរព​សាលដីកា តុលាការ​រំលាយ​គណបក្ស​សង្គ្រោះ​ជាតិ ពី​បទ​រួម​គំនិត​​ក្បត់ ជាដើម​។ ការចោទប្រកាន់​ទាំងនេះ ត្រូវ​បាន​មន្ត្រី​សិទ្ធិ​មនុស្សជាតិ និង​អន្តរជាតិ រិះគន់​ថា ជា ការ​ចោទប្រកាន់​ក្រោម​ហេតុផល​នយោបាយ ដែល​ផ្ទុយ​ពី​រដ្ឋធម្មនុញ្ញ​ដែល​ចែង​ថា ពលរដ្ឋ​គ្រប់​រួប​មាន​សិទ្ធិ​សេរីភាព​បញ្ចេញមតិ និង​ចូលរួម​ក្នុង​ជីវភាព​នយោបាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល