មេធាវីការពារក្ដីឱ្យជនជាប់ចោទជាសកម្មជនគណបក្សប្រឆាំងប្រតិកម្ម ចំពោះមន្ត្រីពន្ធនាគារខេត្តបាត់ដំបង ដែលមិនអនុញ្ញាតឱ្យមេធាវីចូលជួបកូនក្តីនៅក្នុងពន្ធនាគារ ដោយចាត់ទុកថា ជាការអនុវត្តផ្ទុយនឹងច្បាប់។
ទន្ទឹមគ្នានេះ មេធាវីការក៏ត្អូញត្អែរដែរថា តុលាការមិនអនុញ្ញាតឱ្យថតចម្លងឯកសារពាក់ព័ន្ធសំណុំរឿងបក្សប្រឆាំងនោះឡើយ ដោយសំអាងលើហេតុផលផ្សេងៗ។
មេធាវីការពារក្ដីឱ្យសកម្មជនគណបក្សប្រឆាំងលោក សំ សុគង់ ឱ្យដឹងថា មន្ត្រីពន្ធនាគារខេត្តបាត់ដំបងមិនអនុញ្ញាតិឱ្យចូលជួបកូនក្តីនៅក្នុងពន្ធនាគារឡើយ ដោយអះអាងថា ទាល់តែមានការអនុញ្ញាតពីតុលាការ។
លោក សំ សុគង់ បន្តថា បើតាមនីតិវិធីព្រហ្មទណ្ឌ បើការមានការពឹងពាក់ពីកូនក្ដីហើយនឹងដាក់ពាក្យការពារនៅតុលាការនឹងមានការប្រថាប់ត្រាពីស្ថាប័នតុលាការផងនោះ។ មានន័យថា មេធាវីមានសិទ្ធិចូលជួបកូនក្តីគ្រប់ពេលវេលា លើកលែងតែម៉ោងក្នុងរដ្ឋបាលរបស់ពន្ធនាគារប៉ុណ្ណោះ៖ «មេធាវីជួបកូនក្តីមិនមែនគ្រាន់តែនៅក្នុងពេលដែលនៅជាប់ឃុំទេ។ គឺពេលដែលឃាត់ខ្លួនក៏មេធាវីមានសិទ្ធិជួបដែរកូនក្ដីរបស់ខ្លួនក្នុងរយៈពេល២៤ម៉ោង ក្រោយពីមានការសាកសួរពីសមត្ថកិច្ចដែរ។ប៉ុន្តែខាងពន្ធនាគារខេត្តបាត់ដំបងគាត់មិនសូវយល់ពីនីតិវិធីនៃការជួបកូនក្តីរវាងមេធាវី និងកូនក្តីនៅក្នុងរឿងព្រហ្មទណ្ឌ ហើយការអនុវត្តរបស់ពន្ធនាគារពីខេត្តមួយ ទៅខេត្តមួយ ហាក់បីដូចជាមិនរលូន ហើយក៏មិនទាន់ស្របគ្នា។ ខេត្តខ្លះអនុវត្តផ្សេង ខេត្តខ្លះអនុវត្តតាមទម្លាប់ផ្សេងដោយមិនយកច្បាប់មកអនុវត្ត»។
លោក សំ សុគង់ ជាមេធាវីការពារក្តីឱ្យសកម្មជនគណបក្សប្រឆាំងពីរនាក់ ឈ្មោះ អ៊ុក ជឿន និង លោក ស៊ឹម ឡៅ ដែលត្រូវបានអាជ្ញាធរខេត្តបាត់ដំបងចាប់ខ្លួនដាច់ដោយឡែកៗពីគ្នា កាលពីថ្ងៃទី១៩ និងថ្ងៃទី២២ តុលា កន្លងទៅនេះពីបទសង្ស័យថា បានកៀរគរកម្លាំងមហាជនចាំទទួលលោក សម រង្ស៊ី នៅថ្ងៃទី៩ វិច្ឆិកា ខាងមុខនេះ។
អាស៊ីសេរីមិនអាចទាក់ទងប្រធានពន្ធនាគារខេត្តបាត់ដំបង លោក សំអុល ធារិទ្ធ ដើម្បីពន្យល់អំពីបញ្ហានេះបានទេ នៅថ្ងៃទី២៤ តុលា។ ក៏ប៉ុន្តែទោះជាយ៉ាងណាក៏ដោយអ្នកនាំពាក្យក្រសួងយុត្តិធម៌លោក ជិន ម៉ាលីន បានថ្លែងថា៖ «ជាគោលការណ៍ច្បាប់មេធាវីមានសិទ្ធិជួបកូនក្តីរបស់ខ្លួននៅក្នុងពន្ធនាគារ។ ក៏ប៉ុន្តែ ករណីនេះយើងឮតែពីខាងក្រុមមេធាវីយើងមិនដឹងថា ជាក់ស្ដែងវាយ៉ាងម៉េចអាចជាខាងពន្ធនាគារមិនឱ្យជួប។ អាចទាក់ទងទៅខាងទៅខាងពន្ធនាគារក្រែងលោគាត់មានមូលហេតុយ៉ាងម៉េចជាក់ស្ដែងណាមួយ ប៉ុន្តែទោះជាយ៉ាងណាគាត់អាចស្នើសុំអគ្គនាយកដ្ឋានពន្ធនាគារដើម្បីសុំកិច្ចអន្តរាគមន៍ក៏បាន»។
ជាមួយគ្នាមេធាវីការពារក្តីសកម្មជនគណបក្សប្រឆាំងផ្សេងទៀតត្អូញត្អែរ ពីការពិបាកសហការជាមួយមន្ត្រីតុលាការ ក្នុងការថតចម្លងសំណុំរឿងកូនក្តីខណៈពួកគេត្រូវជាប់ចោទពីបទ«រួមគំនិតក្បត់» ដើម្បីផ្ដួលរំលំរបបក្រុងភ្នំពេញ។
មេធាវីការពារក្តីសកម្មជនគណបក្សប្រឆាំងលោក ជួង ជូងី ប្រាប់អាស៊ីសេរីថា តុលាការនៅក្នុងខេត្តកំពតឯណោះវិញ មិនអនុញ្ញាតឱ្យថតចម្លងសំណុំរឿងកូនក្តីរបស់លោកទេ ក្រោយពីតុលាការបានចោទប្រកាន់ពីបទ«រួមគំនិតក្បត់»រួចបញ្ជូនយកទៅឃុំឃាំងនៅក្នុងមន្ទីរឃុំឃាំងនោះឡើយ។
លោក ជួង ជូងី កំពុងការពារឱ្យកូនក្តី សកម្មជនគណបក្សប្រឆាំងស្រុកទឹកឈូ ខេត្តកំពត លោក នុត ពេជ្រ ដែលត្រូវអាជ្ញាធរចាប់ខ្លួនកាលពីថ្ងៃទី១៣ ខែតុលា កន្លងទៅនេះ ពីបទសង្ស័យថា បានកៀរគរអ្នកគាំទ្រគណបក្សសង្គ្រោះជាតិ មកចាំទទួលលោក សម រង្ស៊ី។
លោកបញ្ជាក់ថា តុលាការមិនបានសហការជាមួយលោកក្នុងការថតចម្លងឯកសារសំណុំរឿងកូនក្តីរបស់លោកឡើយ ។ លោកនិយាយថា ទៅពេលដែលលោក ទៅជួបក្រឡាបញ្ជី ថា សំណុំរឿងនេះនៅក្នុងដៃចៅក្រម ពេលទៅសួរចៅក្រម ចៅក្រមថា សំណុំរឿងនៅក្នុងដៃប្រធានតុលាការ។ លោកបញ្ជាក់ថា ចុងក្រោយនៅពេលទៅសាកសួរប្រធានតុលាការ បែរជានិយាយថា សំណុំរឿងនេះស្ថិតនៅក្នុងដៃចៅក្រមស៊ើបសួរទៅវិញ។
លោកបញ្ជាក់ថា ទង្វើរបស់តុលាការគឺជាការរំលោភសិទ្ធិរបស់មេធាវីមិនទទួលបានការការពារកូនក្តីដោយយុត្តិធម៌ឡើយ៖ «មន្ត្រីតុលាការដែលទទួលបន្ទុករឿងក្តីហ្នឹងគាត់មិនសហការ ឬក៏មានការខ្លាចក្នុងការផ្ដល់ឯកសារឱ្យ។ ធ្វើឱ្យខ្ញុំជាមេធាវីមានការលំបាកពីព្រោះយើងត្រូវការផ្តល់ប្រឹក្សាច្បាប់ដល់កូនក្តីនៅក្នុងពន្ធនាគារ។ អ៊ីចឹងដើម្បីយើងអាចផ្ដល់អាចផ្ដល់ផ្នែកច្បាប់បានត្រឹមត្រូវល្អ ទាល់តែយើងមានសំណុំរឿងនៅក្នុងដៃ។ ប៉ុន្តែម្សិលម្ង៉ៃហ្នឹងខ្ញុំទៅជួបមែន ហ្នឹងអត់បានថតសំណុំឯកសារទៅទេ ពីព្រោះការថតឯកសារពីតុលាការមានភាពយឺតយ៉ាវ។ ដូច្នេះខ្ញុំក៏ទៅជួបកូនក្តីដោយឥតមានសំណុំឯកសារពីតុលាការនៅឡើយ»។
សកម្មជនគណបក្សប្រឆាំងស្ទើរតែគ្រប់ខេត្តក្រុងនៅក្នុងប្រទេសកម្ពុជាត្រូវតុលាការរបបក្រុងភ្នំពេញបានចាប់ខ្លួនពីបទរួមគំនិតក្បត់ក្នុងការកៀរគរមនុស្សមកចូលរួមដំណើរនិវត្តរបស់លោក សម រង្ស៊ី។
មេធាវីការពារក្ដីសកម្មជនគណបក្សសង្គ្រោះជាតិម្នាក់ទៀត លោក សំ សុគង់ បញ្ជាក់ថា លោកបានស្នើសុំថតចម្លងឯកសារសំណុំរឿងនៅក្នុងតុលាការខេត្តបន្ទាយមានជ័យ បាត់ដំបង កំពត កំពង់ចាម និងក្នុងទីក្រុងភ្នំពេញ តុលាការតាមបណ្ដាខេត្តក្រុងទាំងនោះមិនបានសហការជាមួយលោក ជាមេធាវីទេ។ លោកបញ្ជាក់ថា ទង្វើរបស់តុលាការនេះគឺផ្ទុយទៅនឹងច្បាប់ជាតិ និងអន្តរជាតិ៖ «ជាគោលការណ៍របស់អន្តរជាតិហ្នឹងគឺមានគោលការណ៍មួយថា ការតទល់ជាមួយស្នើគ្នាចំពោះច្បាប់គឺមេធាវីការពារហើយនឹងតុលាការ បើសិនជាតុលាការមានឯកសារអ្វី ឬក៏មានភស្តុតាងអ្វីមេធាវីការពារត្រូវតែមានភស្តុតាងដូចតុលាការដើម្បីដឹងពីបទចោទ ដឹងពីអង្គហេតុដើម្បីមេធាវីការពារហ្នឹងអាចមានឱកាសនិងពេលវេលាជួបពិគ្រោះយោបល់ជាមួយកូនក្តីអំពីផ្លូវច្បាប់ និងសិទ្ធិរបស់កូនក្ដី»។បើទោះបីជាមានការចោទប្រកាន់ពីមេធាវីយ៉ាងដូច្នេះក៏ដោយ ក៏មន្ត្រីក្រសួងយុត្តិធម៌ចាត់ទុកថា ជាការលើកឡើងគ្មានការពិត គឺធ្វើឡើងដើម្បីការពារផលប្រយោជន៍ដល់កូនក្ដីប៉ុណ្ណោះ។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា ជាគោលការណ៍ច្បាប់មេធាវីមានសិទ្ធិថតសំណុំរឿងកូនក្តីរបស់ខ្លួន ក៏ប៉ុន្តែក្នុងករណីនេះលោកមិនទាន់ដឹងនៅឡើយទេ ហើយជួនកាលការលើកឡើងរបស់ក្រុមមេធាវីមិនអាចជឿទុកចិត្តបានទេ តែទោះជាយ៉ាងណាលោក នឹងធ្វើការស៊ើបអង្កេតបន្តទៀត៖ «អ៊ីចឹងបើរឿងហ្នឹងវាពិតដូចមេធាវីលើកមែន សុំឱ្យមេធាវីបង្ហាញឱ្យច្បាស់ តើចៅក្រមណា តុលាការណាហើយប្រធានតុលាការណាដែលបង្កការលំបាកហ្នឹងបាទ។គ្រាន់ចេះតែលើកអ៊ីចឹង វាអាចប៉ះពាល់ដល់កិត្តិយសរបស់គេដោយគ្មានមូលដ្ឋាន»។
ប្រធានគណៈមេធាវីកម្ពុជាលោក សួន វិសាល មានប្រសាសន៍ថា លោកមិនទាន់ទទួលបានសេចក្ដីរាយការណ៍ពីក្រុមមេធាវីការពារក្តីគណបក្សប្រឆាំងនៅឡើយទេ។ លោកបញ្ជាក់ថា តាមផ្លូវច្បាប់គ្រប់ចៅក្រមទាំងអស់ត្រូវថតចម្លងគ្រប់សំណុំរឿងទាំងអស់តាមការស្នើសុំពីមេធាវីការពារក្តីមិនត្រូវរារាំងទេ៖ «កន្លងទៅយើងមានបញ្ហាបន្តិចបន្តួចដែរធម្មតាគេឱ្យកូពី។ ជួនកាលតុលាការអាចរវល់ អញ្ចឹងទៅ មានការយឺតគឺមានការរាំងស្ទះ។ អ៊ីចឹងមេធាវីអាចសរសេរព័ត៌មានហ្នឹង ឬក៏ស្នើសុំកិច្ចអន្តរាគមន៍ពីគណៈមេធាវី ប្រសិនបើអត់មានអត់មានព័ត៌មានណាមួយទេ យើងអត់ដឹងថា ធ្វើយ៉ាងម៉េចទេ»។
គិតត្រឹមថ្ងៃទី២៤ តុលា នេះរបបក្រុងភ្នំពេញបានចាប់ខ្លួនសកម្មជនគណបក្សសង្គ្រោះជាតិចំនួន៥៣នាក់ដាក់ក្នុងមន្ទីរឃុំឃាំង ក្នុងខណៈមានសកម្មជនចំនួន១៨៦នាក់ផ្សេងទៀតតុលាការបានចេញដីកាចោទប្រកាន់នឹងកោះហៅពីបទ «រួមគំនិតក្បត់»។ មានសកម្មជនគណបក្សជាច្រើននាក់បានភៀសខ្លួនរកកន្លែងមានសុវត្ថិភាពដើម្បីគេចចេញពីការធ្វើទុក្ខបុកម្នេញពីអាជ្ញាធរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។