សមាជិក​ក្រុមប្រឹក្សា​បក្ស​សង្គ្រោះ​ជាតិ​ខេត្ត​កំពង់ឆ្នាំង​ហែ​ញត្តិ​ដាក់​ជូន​តំណាងរាស្ត្រ

ដោយ ជិន ជេដ្ឋា
2014.09.30
Share on WhatsApp
Share on WhatsApp
ការិយាល័យ​តំណាង​រាស្ត្រ​កំពង់ឆ្នាំង ៦២០ មន្ត្រី​ការិយាល័យ​តំណាង​រាស្ត្រ​មណ្ឌល​កំពង់ឆ្នាំង ទទួល​ញត្តិ​ពី​សមាជិក​ក្រុម​ប្រឹក្សា​របស់​គណបក្ស​សង្គ្រោះ​ជាតិ នា​ការិយាល័យ​តំណាង​រាស្ត្រ ក្រុង​កំពង់ឆ្នាំង ខេត្ត​កំពង់ឆ្នាំង នៅ​ថ្ងៃ​ទី​៣០ ខែ​កញ្ញា ឆ្នាំ​២០១៤។
RFA/Chin Chetha

សមាជិក​ក្រុមប្រឹក្សា​ឃុំ ស្រុក និង​ខេត្ត​របស់​គណបក្ស​សង្គ្រោះ​ជាតិ​ប្រមាណ ៥០​នាក់ នាំ​គ្នា​ដង្ហែ​ញត្តិ​ដាក់​ជូន​អ្នក​តំណាងរាស្ត្រ​មណ្ឌល​ខេត្ត​កំពង់ឆ្នាំង នៅ​ថ្ងៃ​ទី​៣០ កញ្ញា។ គោលបំណង​នៃ​ការ​ដាក់​ញត្តិ​នេះ គឺ​ចង់​ឲ្យ​អ្នក​តំណាងរាស្ត្រ​បញ្ជូន​ញត្តិ​បន្ត​ទៅ​ប្រធាន​រដ្ឋ​សភា និង​ព្រឹទ្ធ​សភា ដើម្បី​ជួយ​អន្តរាគមន៍​ទៅ​ក្រសួង​មហាផ្ទៃ ក្នុង​ការ​ធ្វើ​សេចក្ដី​ណែនាំ និង​កំណត់​អំពី​នីតិវិធី​ឲ្យ​បាន​ច្បាស់លាស់​ឡើង​វិញ​ ចំពោះ​ការ​បង្កើត​គណៈកម្មាធិការ​ថ្នាក់​ក្រោម​ជាតិ​ចំនួន​បី​ដែល​ខ្លួន​ចោទ​ថា មាន​ភាព​មិន​ប្រក្រតី​ក្នុង​ដំណើរ​​អភិវឌ្ឍន៍។

គណៈកម្មាធិការ​ទាំង​បី រួម​មាន គណៈកម្មាធិការ​ពិគ្រោះ​យោបល់​កិច្ចការ​ស្ត្រី និង​កុមារ គណៈកម្មាធិការ​សម្របសម្រួល​បច្ចេកទេស និង​គណៈកម្មាធិការ​លទ្ធកម្ម និង​អង្គភាព​លទ្ធកម្ម​របស់​រដ្ឋបាល រាជធានី ខេត្ត​ក្រុង ស្រុក​ខណ្ឌ។ គណៈកម្មាធិការ​ទាំង​នេះ​ត្រូវ​បាន​គណបក្ស​ប្រឆាំង​ចោទ​ថា ធ្វើ​ការ​ពុំ​មាន​តម្លាភាព និង​ប្រសិទ្ធភាព​ក្នុង​ដំណើរ​ការ​អនុវត្ត​ការងារ​នានា ​កន្លង​ទៅ។

សមាជិក​ក្រុម​ប្រឹក្សា​ខេត្ត​កំពង់ឆ្នាំង​ នៃ​គណបក្ស​សង្គ្រោះ​ជាតិ លោក កែវ ថៃ មាន​ប្រសាសន៍​ថា តំណាង​សមាជិក​ក្រុម​ប្រឹក្សា​ស្រុក និង​ខេត្ត​ចំនួន ៣៥​រូប ដែល​មាន​ឈ្មោះ​នៅ​ក្នុង​ញត្តិ​ថ្ងៃ​នេះ​សង្ឃឹម​ថា ស្ថាប័ន​រដ្ឋសភា និង​ព្រឹទ្ធសភា​​ពិចារណា​ចំពោះ​សំណើសុំ​របស់​ខ្លួន​ រួច​ជំរុញ​ទៅ​ក្រសួង​មហាផ្ទៃ ឲ្យ​រៀបចំ​ឡើង​វិញ​នូវ​គណៈកម្មាធិការ​ទាំង​បី ដើម្បី​ឲ្យ​មាន​សមាសភាព​មក​ពី​គ្រប់​គណបក្ស​នយោបាយ​ដែល​មាន​អាសនៈ​នៅ​ក្រុម​ប្រឹក្សា​បាន​ចូល​ក្នុង​ជួរ​គណៈកម្មាធិការ។

លោក​បន្ដ​ថា ប្រសិន​បើ​សំណើ​នេះ​ទៅ​រួច គឺ​អាច​ធានា​ឲ្យ​បាន​នូវ​គណនេយភាព តម្លាភាព ប្រសិទ្ធភាព និង​ការ​អភិវឌ្ឍ​តាម​បែប​លទ្ធិប្រជាធិបតេយ្យ​ពិត​ប្រាកដ​នៅ​ថ្នាក់​ក្រោម​ជាតិ៖ «ទាមទារ​ឲ្យ​សមាជិក​ក្រុម​ប្រឹក្សា​មក​ពី​គណបក្ស​ដែល​អាសនៈ​ក្នុង​ក្រុមប្រឹក្សា​ត្រូវ​តែ​មាន​មួយ​រូប​នៅ​ក្នុង​គណៈកម្មាធិការ​នីមួយៗ ដើម្បី​ទៅ​តាមដាន​មើល ដឹង​ឮ​ក្នុង​រឿង​អ្វី​សព្វ​បែប​យ៉ាង​ទាំង​អស់​ដែល​បង្កើត ឬ​ធ្វើ​អ្វី​មួយ​នៅ​ក្នុង​គណៈកម្មាធិការ​ហ្នឹង។ ហើយ​មក​ដល់​ពេល​នេះ​សមាជិក​ក្រុម​ប្រឹក្សា​គ្រប់​រូប​អត់​ដឹង​អី​ទេ​ក្រៅ​ពី​ទទួល​ព័ត៌មាន​តិចតួច​បំផុត​នៅ​ក្នុង​កិច្ច​ប្រជុំ​ក្រុមប្រឹក្សា»

ទាក់ទង​បញ្ហា​នេះ ប្រធាន​ក្រុមប្រឹក្សា​ខេត្ត​កំពង់ឆ្នាំង អ្នកស្រី ដោក សុទ្ធា ធ្លាប់​បញ្ជាក់​ថា សម្រាប់​ខេត្ដ​កំពង់ឆ្នាំង គណៈកម្មាធិការ​ទាំង​បី​ត្រូវ​បាន​បង្កើត​ឡើង​រួច​ហើយ​តាំង​ពី​ថ្ងៃ​ទី​២៦ ខែ​សីហា ឆ្នាំ​២០១៤ ដូច្នេះ​ការ​តវ៉ា​ទាមទារ​ណា​មួយ​ឲ្យ​មាន​ការ​រុះរើ​ឡើង​វិញ​នោះ នឹង​មិន​អាច​ធ្វើ​ទៅ​រួច​ឡើយ។ ចំណែក​មន្ត្រី​នាំ​ពាក្យ​ក្រសួង​មហាផ្ទៃ​លោក ខៀវ សុភ័គ ថ្លែង​ថា ក្រសួង​នឹង​ធ្វើ​ការ​ពិចារណា​លើ​ចំណុច​ទាមទារ​នៅ​ក្នុង​ញត្តិ​របស់​មន្ត្រី​គណបក្ស​ប្រឆាំង​នោះ ប្រសិន​បើ​មាន​កិច្ច​អន្តរាគមន៍​ណា​មួយ​ពី​ខាង​រដ្ឋ​សភា ប៉ុន្តែ​ក្រសួង​ក៏​មាន​សិទ្ធិ​ឆ្លើយ​តប ឬ​បដិសេធ​ចំពោះ​សំណើ​នេះ ដោយ​ផ្អែក​លើ​ច្បាប់​គ្រប់គ្រង​រាជធានី ខេត្ត ក្រុង ស្រុក​ខណ្ឌ ដែល​មាន​ស្រាប់។

លោក ខៀវ សុភ័គ៖ «គាត់​មាន​សិទ្ធិ​ទាមទារ ក្រសួង​មហាផ្ទៃ មាន​សិទ្ធិ​សម្រេច​តាម​ច្បាប់។ ជា​ធម្មតា​ការ​ទាមទារ​របស់​គាត់​ភាគ​ច្រើន គឺ​តាម​តម្រូវ​ចិត្ត​គាត់​ចង់​បាន ជួន​កាល​វា​ខុស​ច្បាប់ ច្បាប់​មិន​ចែង​អ៊ីចឹង​ផង»

លោក​បន្ថែម​ថា គណៈកម្មាធិការ​មាន​សមាសភាព​ពី​៥ ទៅ ៧​រូប ទៅ​តាម​ទំហំ​នៃ​ចំនួន​ការងារ​របស់​គណៈកម្មាធិការ​នីមួយៗ។ ប្រធាន​និង​អនុប្រធាន ឬ​សមាជិក​នៃ​គណៈកម្មាធិការ​ទាំង​នោះ​មិន​បាន​កំណត់​កូតា​ថា ត្រូវ​តែ​បញ្ចូល​សមាជិក​ក្រុមប្រឹក្សា​ពី​ខាង​គណបក្ស​កាន់​អំណាច​ប៉ុន្មាន ឬ​គណបក្ស​ប្រឆាំង​ប៉ុន្មាន​នោះ​ទេ គឺ​អាស្រ័យ​ទៅ​លើ​ការ​បោះ​ឆ្នោត​រៀបចំ​គណៈកម្មាធិការ​ទាំង​នោះ។

នាយក​ប្រតិបត្តិ​នៃ​គណៈកម្មាធិការ​ដើម្បី​ការ​បោះឆ្នោត​ដោយ​សេរី និង​យុត្តិធម៌​នៅ​កម្ពុជា ហៅ​កាត់​ថា ខុមហ្វ្រែល (comfrel) លោក គល់ បញ្ញា ធ្លាប់​ប្រាប់​វិទ្យុ​អាស៊ីសេរី​ថា ការ​ជ្រើសរើស​សមាសភាព​ចូល​ក្នុង​ជួ​គណៈកម្មាធិការ​ដោយ​ផ្អែក​លើ​ការ​បោះ​ឆ្នោត គឺ​នាំ​ឲ្យ​គណបក្ស​មាន​សំឡេង​ភាគ​ច្រើន​ក្នុង​ក្រុម​ប្រឹក្សា​រារាំង​គណបក្ស​ផ្សេងៗ​ទៀត​ដែល​មាន​សំឡេង​ភាគ​តិច មិន​ឲ្យ​មាន​ឱកាស​បាន​ចូល​ក្នុង​គណៈកម្មាធិការ​ទាំង​បី​នេះ​ឡើយ។ ប៉ុន្តែ​លោក​ថា បញ្ហា​នេះ​គេ​អាច​ជជែក​គ្នា និង​រៀបចំ​គណៈកម្មាធិការ​ឡើង​វិញ​បាន។

លោក គល់ បញ្ញា៖ «ធ្វើ​ម៉េច​យើង​យក​ស្មារតី នៃ​គោលការណ៍​មួយ​ឲ្យ​មាន​ការ​ចូល​រួម​ពេញលេញ​ពី​គណបក្ស​ផ្សេង​ៗ​នៅ​គ្រប់​គណៈកម្មាធិការ​ហ្នឹង អា​ហ្នឹង​ជា​ការ​មួយ​ល្អ​ណាស់ ដើម្បី​ធានា​នូវ​ដំណើរ​ការ​នៅ​ថ្នាក់​ក្រោម​ជាតិ​មួយ​ដែល​មាន​តម្លាភាព មាន​អភិបាល​កិច្ច​ល្អ»

ក្រុម​សមាជិក​ក្រុម​ប្រឹក្សា​គណបក្ស​ប្រឆាំង​នាំ​គ្នា​ដង្ហែ​ញត្តិ​ចេញ​ពី​ស្នាក់​ការ​បក្ស​របស់​ខ្លួន​នៅ​ម្ដុំ​សង្កាត់​ប្អេរ ក្រុង​កំពង់ឆ្នាំង ចម្ងាយ​ប្រមាណ​ជា ៥០០​ម៉ែត្រ ឆ្ពោះ​មក​ការិយាល័យ​តំណាងរាស្ត្រ ឋិត​នៅ​ក្បែរ​សាលា​ខេត្ត​កំពង់ឆ្នាំង។ ក្រុម​អ្នក​ដង្ហែ​ញត្តិ​ប្រដាប់​ដោយ​ទង់​ជាតិ​ជា​ច្រើន​ផ្ទាំង បាន​រំសាយ​ទៅ​វិញ បន្ទាប់​ពី​មន្ត្រី​ប្រចាំ​ការិយាល័យ​តំណាងរាស្ត្រ​មណ្ឌល​ខេត្ត​កំពង់ឆ្នាំង លោក វង្ស វិបុល ចេញ​មក​ទទួល​យក​ញត្តិ​នោះ និង​ហៅ​តំណាង​ពួកគេ​ចំនួន ៤​នាក់​ទៅ​ពិភាក្សា​ដោយ​សន្យា​ថា នឹង​បញ្ជូន​ញត្តិ​ពួកគេ​ឲ្យ​ដល់​រដ្ឋ​សភា​ក្នុង​រយៈ​ពេល​យ៉ាង​យូរ​បី​ថ្ងៃ​ក្រោយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
រឿង​ដែល​គេ​អាន​​ច្រើន​បំផុត
នយោបាយ
គណបក្ស​ចំនួន​៣ ចូលរួម​ប្រកួត​ដណ្ដើម​កៅអី​ក្រុមប្រឹក្សា​ស្រុក​ក្រុង​ទើប​បំបែក​ថ្មី
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។