សាច់ញាតិសកម្មជនបក្សប្រឆាំងលោក ចៅ វាសនា ដែលកំពុងជាប់ពន្ធនាគារត្រពាំងផ្លុងព្រួយបារម្ភពីសុខភាពរបស់ឪពុក។ ក្ដីបារម្ភកើតមានក្រោយពេលជនជាប់ឃុំ បានធ្លាក់ខ្លួនឈឺនៅក្នុងមន្ទីរឃុំឃាំងជាច្រើនថ្ងៃហើយ ដោយពុំមានថ្នាំព្យាបាលជំងឺឡើយ។ មន្ត្រីសង្គមស៊ីវិលនៅតែយល់ថា រឿងនេះជាការធ្វើទុក្ខបុកម្នេញផ្នែកនយោបាយ។
សាច់ញាតិសកម្មជនបក្សសង្គ្រោះជាតិនៅក្រុងប៉ោយប៉ែតដែលកំពុងជាប់ឃុំអះអាងថា នៅក្នុងពន្ធនាគារត្រពាំងផ្លុង ខេត្តត្បូងឃ្មុំគ្មានថ្នាំព្យាបាលជំងឺឪពុករបស់ខ្លួននោះទេ។
កូនស្រីលោក ចៅ វាសនា គឺលោកស្រី ចៅ រតនៈ ប្រាប់វិទ្យុអាស៊ីសេរីនៅព្រឹកថ្ងៃទី៣ ខែតុលាថា ឪពុករបស់លោកស្រីឈឺធ្មេញធ្ងន់ធ្ងរបណ្ដាលឱ្យពិសារបាយមិនសូវបាន សម្រាន្តមិនលក់ជាង១សប្ដាហ៍ហើយមិនទាន់បានធូរស្រាលនៅឡើយទេ។ លោកស្រីបញ្ជាក់ថា លោក ចៅ វាសនា បានទូរស័ព្ទមកប្រាប់គ្រួសារកាលពីថ្ងៃទី២៨ ខែកញ្ញា ឱ្យផ្ញើប្រាក់ទៅឱ្យលោក ដើម្បីទិញថ្នាំលេបព្យាបាលជំងឺ ពីព្រោះនៅក្នុងពន្ធនាគារគ្មានថ្នាំព្យាបាលនោះទេ។ លោកស្រីព្រួយបារម្ភខ្លាចស្ថានភាពជំងឺរបស់លោក ចៅ វាសនា ប៉ះពាល់ដល់សុខភាពធ្ងន់ធ្ងរ ព្រោះលោកមានវ័យកាន់តែចាស់ និងមានជំងឺប្រចាំកាយជាច្រើនមុខទៀត៖ «អត់បានដេកហើយកម្លាំងគាត់ចាស់គាត់ខ្សោយដែរ ព្រោះអីវ័យគាត់ហ្នឹង គឺវ័យសម្រាន្តឱ្យបានច្រើន ហូបឱ្យបានច្រើន។ ដល់ពេលគាត់ហូបអត់បាន សម្រាន្តក៏អត់បាន ដូចថាវាកាន់តែស្ដាប់ទៅវាពិបាកចិត្ត ប៉ុន្តែមិនដឹងជួយគាត់តាមផ្លូវណា។ ព្រោះយើងចាំបាច់ត្រូវដឹងសុខទុក្ខគាត់តាមទូរស័ព្ទផង ហើយយើងអត់បានទៅជួបគាត់វាកាន់តែឃ្លាតកាន់តែច្រើនហើយ សុខទុក្ខគាត់យ៉ាងណាគាត់និយាយអត់បានអស់ទេ »។
បន្ថែមពីនេះលោកស្រីស្នើសុំដល់អគ្គនាយកដ្ឋានពន្ធនាគារនៃក្រសួងមហាផ្ទៃឱ្យជនជាប់ឃុំបានទូរស័ព្ទមកគ្រួសារមួយសប្ដាហ៍២ដង និងស្នើឱ្យបញ្ជូនលោកទៅឃុំខ្លួននៅពន្ធនាគារខេត្តបន្ទាយមានជ័យវិញ ដើម្បីងាយស្រួលដល់ក្រុមគ្រួសារជួបសួរសុខទុក្ខ និងឧបត្ថម្ភស្បៀងអាហារ។
ទាក់ទងនឹងបញ្ហានេះ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក នុត សវនា ប្រាប់វិទ្យុអាស៊ីសេរីថា នៅពន្ធនាគារត្រពាំងថ្លុងពុំមានជនជាប់ឃុំណាធ្លាក់ខ្លួនឈឺធ្ងន់ដែលត្រូវបញ្ជូនទៅព្យាបាលនៅមន្ទីរពេទ្យខាងក្រៅមន្ទីរឃុំឃាំងនោះទេ។ តែទោះជាយ៉ាងណា លោកបញ្ជាក់ថា នៅក្នុងពន្ធនាគារ ប្រភេទជំងឺខ្លះគ្មានថ្នាំព្យាបាលទេ ដូច្នេះជនជាប់ឃុំត្រូវទិញថ្នាំពីខាងក្រៅមន្ទីរឃុំឃាំងដោយខ្លួនឯង។ ចំណែកការដែលស្នើសុំបញ្ជូនលោក ចៅ វាសនាត្រឡប់ទៅពន្ធនាគារដើមវិញនោះ លោកថា រឿងនេះសាច់ញាតិត្រូវដាក់ពាក្យស្នើសុំទៅអគ្គនាយកដ្ឋានពន្ធនាគារជាមុនសិន៖ «តែបញ្ជូនទៅអាហ្នឹងទាល់តែមានការស្នើសុំជាផ្លូវការ។ បើថាគាត់កាត់ទោសហើយគេបញ្ជូនទៅមណ្ឌលអប់រំកែប្រែហ្នឹងឯង ពន្ធនាគារខេត្តគ្រាន់តែជាពន្ធនាគារឃុំបណ្ដោះអាសន្នទេ ក្នុងផ្លូវច្បាប់»។
លោក ចៅ វាសនា គឺជាចៅសង្កាត់ប៉ោយប៉ែតជាប់ឆ្នោតគណបក្សសង្គ្រោះជាតិ ដែលមានដើមកំណើតជាខ្មែរក្រោម។ ក្នុងវ័យ ៥៧ ឆ្នាំ លោកគឺមន្ត្រីបក្សប្រឆាំងទី១ដែលជាប់ពន្ធនាគារយូរជាងគេ ដោយសាលាដំបូងខេត្តបន្ទាយមានជ័យ បានផ្ដន្ទាទោសលោកឱ្យជាប់ពន្ធនាគាររយៈពេល ៥ឆ្នាំ ក្រោមបទចោទប្រកាន់ញុះញង់ឲ្យប្រើអំពើហិង្សា មានស្ថានទម្ងន់ទោសពាក់ព័ន្ធនឹងរឿងចុះឃ្លាំមើលកម្មករអូសរទេះតវ៉ានៅក្រុងប៉ោយប៉ែត។ លោកបានជាប់ឃុំក្នុងពន្ធនាគារខេត្តបន្ទាយមានជ័យតាំងពីដើមឆ្នាំ២០១៧ ប៉ុន្តែនៅចុងខែវិច្ឆិកា ឆ្នាំ២០២០ អាជ្ញាធរបានបញ្ជូនលោក ចៅ វាសនា ទៅឃុំខ្លួននៅពន្ធនាគារត្រពាំងផ្លុងវិញ រហូតមកទល់ពេលនេះមិនទាន់បញ្ជូនលោកត្រឡប់ទៅខេត្តបន្ទាយមានជ័យវិញនៅឡើយ។ ចៅសង្កាត់ប៉ោយប៉ែតគណបក្សសង្គ្រោះជាតិជាប់ឆ្នោតរូបនេះបានអនុវត្តទោសជិត ៥ ឆ្នាំហើយ នឹងគ្រប់កំណត់ទោសនៅថ្ងៃទី១៦ ខែកុម្ភៈ ឆ្នាំ២០២២។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា តុលាការគួរតែដោះលែងលោក ចៅ វាសនា ឱ្យមានសេរីភាពវិញ ព្រោះសកម្មជនបក្សប្រឆាំងរូបនេះមិនបានប្រព្រឹត្តខុសច្បាប់ដូចការចោទប្រកាន់របស់តុលាការឡើយ។ លោកបញ្ជាក់ថា កន្លងមកលោកនិងអង្គការសង្គមស៊ីវិលជាច្រើនស្ថាប័នបានស្នើជាញឹកញាប់ឱ្យតុលាការពិចារណាដោះលែងជនជាប់ឃុំរូបនេះ ក៏ប៉ុន្តែមិនទទួលបានលទ្ធផលទេ៖ «អានេះជារឿងមួយយើងគួរឱ្យសោកស្ដាយ ដែលយើងមើលការឃុំខ្លួនទៅលើគាត់ ហាក់បីដូចជាការដាក់កម្រិតនៃទណ្ឌកម្មមួយដែលធ្វើបាប ធ្វើទុក្ខបុកម្នេញទៅលើរូបគាត់ហ្នឹងធ្ងន់ធ្ងរណាស់ យើងឃើញ។ មកដល់ពេលនេះទៀតសោតយើងដឹងហើយថា គាត់ជាប់ពន្ធនាគារហ្នឹងជិតដល់ពេលកំណត់ដែលត្រូវចេញហើយ។ ក្នុងនីតិវិធីយើងដឹងហើយ បើសិនជាអាចជាប់បានពន្ធនាគាររហូតដល់ពីរភាគបីនៃកម្រិតការជាប់យើងអាចស្នើសុំឱ្យមានការបន្ធូរបន្ថយទោសក្នុងកម្រិតបន្ធូរបន្ថយទោស ដើម្បីឱ្យមានការដោះលែងគាត់ »។
លោក នី សុខា បន្តថា តុលាការធ្វើបែបនេះ គឺជាការអនុវត្តច្បាប់ស្តង់ដារ២ ដែលខុសពីជនជាប់ឃុំមានលុយនិងមានអំណាចមួយចំនួនដែលឈឺដូចគ្នា តែអាចស្នាក់នៅព្យាបាលជំងឺនៅក្រៅពន្ធនាគារបានយ៉ាងងាយស្រួល និងត្រូវបានតុលាការដោះលែងមុនកាលកំណត់ទោសទៀតផង។ ឧទាហរណ៍៖ ឧកញ៉ា គិត ធាង ដែលត្រូវបានសាលាដំបូងរាជធានីភ្នំពេញ សម្រេចផ្ដន្ទាទោសឲ្យលោកជាប់ពន្ធនាគាររយៈពេល ៤ឆ្នាំពីបទចាត់ចែងសម្របសម្រួលឲ្យប្រើប្រាស់សារធាតុញៀនខុសច្បាប់ និងសមគំនិតពាក់ព័ន្ធករណីគ្រឿងញៀនជិត៥០ (៤៩,៤៤) គីឡូក្រាម នៅក្នុងក្លឹបកម្សាន្តរ៉ក(Rock)របស់ខ្លួននោះ ត្រូវបានតុលាការជាន់ខ្ពស់ ដោះលែងដោយស្ងាត់ៗកាលពីឧសភាកន្លងទៅ។ ការដោះលែងដោយព្យួរទោសដែលនៅសេសសល់នេះ ក្រោយពីឧកញ៉ារូបនេះជាប់ពន្ធនាគារមានតែឈ្មោះរយៈពេលតែ២ឆ្នាំប៉ុណ្ណោះ ពីព្រោះលោកត្រូវបានអនុញ្ញាតឱ្យរស់នៅក្នុងបន្ទប់ពិសេស វីអាយ.ភី (VIP) នៅមន្ទីរពេទ្យរុស្ស៊ីរហូត។ លោក គិត ធាង គឺជាបងប្រុសបង្កើតរបស់ឧកញ៉ា គិត ម៉េង ដែលជាអ្នកជំនួញដ៏មានឥទ្ធិពលមួយរូបនៅកម្ពុជា និងមានទំនាក់ទំនងជិតស្និទ្ធជាមួយក្រុមគ្រួសាររបស់លោកនាយករដ្ឋមន្ត្រី ហ៊ុន សែន។
ចំពោះលោក ចៅ វាសនា វិញ កន្លងទៅមេធាវីការពារក្ដីឱ្យលោកបានប្ដឹងទៅតុលាការឧទ្ធរណ៍និងកំពូលប្រឆាំងនឹងសេចក្ដីសម្រេចរបស់តុលាការថ្នាក់ក្រោមជាបន្តបន្ទាប់ ប៉ុន្តែមិនទទួលបានលទ្ធផលដូចការរំពឹងទុកនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។