យុទ្ធនាការ​​ឃោសនា​​បោះឆ្នោត​​ឃុំ​សង្កាត់​​ថ្ងៃទី៣ របស់​​គណបក្ស​នយោបាយ​ហាក់​ស្ងប់​ស្ងាត់

ដោយ មាន ឫទ្ធិ
2022.05.23
Share on WhatsApp
Share on WhatsApp
យុទ្ធនាការ​​ឃោសនា​​បោះឆ្នោត​​ឃុំ​សង្កាត់​​ថ្ងៃទី៣ របស់​​គណបក្ស​នយោបាយ​ហាក់​ស្ងប់​ស្ងាត់ អ្នកស្រី ស៊ិន ចាន់​ពៅរ៉ូហ៊្សេត អតីត​​ចៅ​​សង្កាត់​​អូរចារ​ឡើង​ថ្លែង​នៅ​ចំពោះមុខ​អ្នក​គាំទ្រ​គណបក្ស​ភ្លើងទៀន​នៅ​ថ្ងៃទី៣ ​នៃ​យុទ្ធនាការ​ឃោសនា​បោះឆ្នោត​ឃុំសង្កាត់​ នៅ​ព្រឹ​ក​ថ្ងៃទី២៣ ខែឧសភា ឆ្នាំ២០២២។
រូប៖ ហ្វេសប៊ុក Sin Rozeth

យុទ្ធនា​ការ​ឃោសនា​​បោះ​​ឆ្នោត​​ថ្ងៃ​ទី៣ ​ហាក់​ស្ងប់​ស្ងាត់​ជាង​ថ្ងៃ​ទី១ ​និង​ថ្ងៃ​ទី​២ ប៉ុន្តែ​​គណបក្ស​នយោបាយ​​មួយ​​ចំនួននៅ​តែ​​បន្ត​ធ្វើ​យុទ្ធនាការ​ឃោសនា​រក​​សំឡេង​ឆ្នោត​ នៅ​​តាម​​បណ្តា​ខេត្ត​មួយ​ចំនួន​​រួម​មាន ​​ខេត្ត​​សៀមរាប ​បាត់ដំបង ​កំពត​ និង​ខេត្ត​ព្រះសីហនុ​។ រីឯ​គណបក្ស​ប្រជាជន​កម្ពុជា ​មិន​បាន​ធ្វើ​យុទ្ធនាការ​ឃោសនា​បោះ​ឆ្នោត​ក្នុង​ខេត្ត​ទាំង​នេះ​ទេ ​នៅ​ថ្ងៃ​ទី​២៣ ខែ​ឧសភា​នេះ ​ដោយ​គ្រាន់​តែ​ចាក់​មេក្រូ​ផ្សព្វផ្សាយ ​ពី​គោល​នយោបាយ​តាម​ទី​ស្នាក់​ការ​បក្ស​របស់​ខ្លួន​ នៅ​តាម​មូលដ្ឋាន ​ក្នុង​ខេត្ត​នី​មួយៗ​។

យុទ្ធនា​ការ​ឃោសនា​បោះ​ឆ្នោត​ថ្ងៃ​ទី៣​ នេះ ​គណបក្ស​ភ្លើងទៀន​ គណបក្ស​ប្រជាធិបតេយ្យ​មូលដ្ឋាន​ និង​គណបក្ស​យុវជន​កម្ពុជា ​បន្ត​ឃោសនា​រក​សំឡេង​ឆ្នោត​ នៅ​តាម​ឃុំ-សង្កាត់​នា​ខេត្ត​មួយ​ចំនួន​ ដែល​ក្នុង​នោះ ​គណបក្ស​ភ្លើង​ទៀន ​មាន​អ្នក​ចូលរួម​ច្រើន​ជាង​គេ​។

អនុប្រធាន​គណបក្ស​ភ្លើងទៀន​លោក ​ថាច់ សេដ្ឋា ​ប្រាប់​វិទ្យុអាស៊ីសេរី​នៅ​ថ្ងៃ​ទី​២៣​ ខែឧសភា​ថា​ គ្រាន់តែ​សង្កាត់​អូរចា​មួយ ​ក្នុង​ក្រុង​បាត់ដំបង ​មាន​ពលរដ្ឋ​ជិត​ ៣​.០០០​នាក់​ ចូល​រួម​ស្តាប់​គោល​យោបាយ​របស់​គណបក្ស​ភ្លើង​ទៀន​នៅ​ក្រុង​បាត់​ដំបង​។ ​លោក​សង្ឃឹម​ថា​ គណបក្ស​ភ្លើង​ទៀន ​នឹង​ទទួល​បាន​អាសនៈ​ច្រើន​ ក្នុង​សង្កាត់​នេះ​ដោយ​ពលរដ្ឋ​ចូលរួម​គាំទ្រ​ចេញ​ពី​ទឹក​ចិត្ត​ និង​បង្ហាញ​ជំហរ​គាំទ្រ ​បេក្ខភាព​ចៅ​សង្កាត់​អូរចា ​គឺ​អ្នកស្រី​ ស៊ិន ​ចាន់​ពៅរ៉ូហ៊្សេត​។

លោក​បញ្ជាក់​ថា ​ថ្នាក់​ដឹកនាំ​គណបក្ស​ភ្លើង​ទៀន ​នឹង​បន្ត​ជួប​ជាមួយ​អ្នក​គាំទ្រ​ នៅតាម​បណ្តាលខេត្ត​មួយ​ចំនួន​ទៀត ​នៅ​ថ្ងៃ​បន្ទាប់​៖ «យើង​មាន​សុទិដ្ឋិ​និយម​ថា ​ប្រាកដ​ជា​ឈ្នះ​នៅ​សង្កាត់​ហ្នឹង​ហើយ​ ព្រោះ​ពលរដ្ឋ​នៅ​សង្កាត់​ហ្នឹង​រាប់​ពាន់​នាក់​ហើយ​។ ​គេ​សម្លុត​គេ​គំរាម​គាត់​មិន​ស្តាប់​នៅ​តែ​មក​ ដូច្នេះ​គាត់​នៅ​តែ​ចង់​បោះ​ឆ្នោត​ឱ្យ​ រ៉ូហ៊្សេត​​ដដែល​»។

អតីត​ចៅ​សង្កាត់​អូរចាអ្នកស្រី ស៊ិន ចាន់​ពៅរ៉ូហ៊្សេត ដែល​បាន​បាត់បង់​តំណែង​ដោយ​សារ​តែ​រដ្ឋាភិបាល​រំលាយ​គណបក្ស​សង្គ្រោះជាតិ​កាល​ពី​ឆ្នាំ២០១៧។ អ្នកនាង​បាន​សម្រេច​ចិត្ត​ឈរ​ឈ្មោះ​ ជា​បេក្ខភាព​ចៅ​សង្កាត់​អូរចារ​ឡើងវិញ​នៅ​ឆ្នាំ២០២២ នេះ ​ជា​មួយ​គណបក្ស​ភ្លើង​ទៀន។

ថ្លែង​នៅ​ចំពោះ​មុខ​អ្នក​គាំទ្រ​រាប់​ពាន់​នាក់​ នៅ​ព្រឹក​ថ្ងៃ​ទី២៣ ខែ​ឧសភា ​អ្នកស្រី​ ស៊ិន ចាន់​ពៅរ៉ូហ៊្សេត​ សង្ឃឹម​យ៉ាង​មុតមាំ​ថា ​អ្នកស្រី​នឹង​ដណ្តើម​តំណែង​ចៅ​សង្កាត់​អូរចា​ឱ្យ​ត្រឡប់​មក​វិញ ​ព្រោះ​កន្លងទៅ​ អ្នកស្រី ​និង​ពលរដ្ឋ​ទូទាំង​ប្រទេស ​បាន​ទទួល​រង​ភាព​អយុត្តិធម៌​ដោយ​សារ​ការ​រំលាយ​គណបក្ស​ប្រឆាំង​ដ៏​ធំ​នៅ​កម្ពុជា​៖ «ខ្ញុំ​រ៉ូហ៊្សេត​ សូម​ប្តេជ្ញាចិត្ត​ចំពោះ​ពលរដ្ឋ​អូរចា ​ខ្ញុំ​នឹង​ដណ្តើម​តំណែង​ចៅ​សង្កាត់​អូរចា ​ត្រឡប់​មក​វិញ ​ពួកខ្ញុំ​រងគ្រោះ​យូរ​ហើយ​ មិន​មែន​តែ​ពួក​ខ្ញុំ​ទេ ​ដែល​ជាប់​ឆ្នោត​រងគ្រោះ ​អ្នក​ដែល​រងគ្រោះ​ច្រើន​ជាង​គេ ​ដែល​អត់​មាន​បក្ស​ប្រឆាំង​ តែ​ឥលូវ​នេះ ​បក្ស​ប្រឆាំង​ គឺ​បក្ស​ភ្លើង​ទៀន​ត្រឡប់​មក​វិញ​ហើយ​។

រីឯ​នៅ​ខេត្តសៀមរាប​ឯណោះ​វិញ ​ថ្នាក់​ដឹកនាំ​គណបក្ស​ប្រជាធិបតេយ្យ​មូលដ្ឋាន​ បន្ត​ធ្វើ​សកម្មភាព​ហែក្បួន​ឃោសនា​រក​សំឡេង​ឆ្នោត ក្នុង​ឃុំល្វាក្រាំង ​ស្រុកវ៉ារិន​ ខេត្ត​សៀមរាប ដោយ​មាន​អ្នក​ចូល​រួម​ជិត​ ១០០​នាក់​។

មន្ត្រី​ជាន់​ខ្ពស់​នៃ​គណបក្ស​ប្រជាធិបតយ្យ​មូលដ្ឋាន​លោក ​យ៉ង ​សាំង​កុមារ​ ដែល​ចូលរូម​ដឹកនាំ​ឃោសនា​រក​សំឡេង​ឆ្នោត ​បាន​ថ្លែង​សារ​នយោបាយ ​តាម​មេក្រូ ​ពី​គោលនយោបាយ ​៥​ចំណុច​ និង​លក្ខណៈ​សម្បត្តិ​បេក្ខភាព​មេឃុំ​របស់​គណបក្ស​ប្រជាធិបតេយ្យ​មូលដ្ឋាន​ ពោរពេញ​ដោយ​សមត្ថភាព​ និង​សុចរិតភាព ​បម្រើ​ពលរដ្ឋ​គ្រប់ៗ ​គ្នា​៖ «ធានា​​ឱ្យ​ពលរដ្ឋ​យើង​នឹង​ទទួល​បាន​សេវា​រដ្ឋបាល​ទាន់​ចិត្ត​ និង​មិន​មាន​ភាព​រើស​អើង​នយោបាយ ​មាន​គោល​នយោបាយ​ឧបត្ថម្ភ​ជូន​ចាស់​ជរា​គ្រប់​រូប​។ រៀបចំ​ឱ្យ​មាន​សាលា​មត្តេយ្យ​ល្អ​គ្រប់​ភូមិ​ ដោះស្រាយ​បញ្ហា​ទឹក​ជូន​កសិករ​របស់​យើង​»។

ចំណែក​ឯគណបក្ស​យុវជន​កម្ពុជា ​បាន​ហែក្បួន​ឃោសនា​រក​សំឡេង​ឆ្នោត ​ក្នុង​ឃុំ​មួយ​ចំនួន ​ក្នុង​ខេត្តកំពត ​និង​ខេត្តព្រះសីហនុ។​ មន្ត្រី​ជាន់​ខ្ពស់​នៃ​គណបក្ស​យុវជន​កម្ពុជា ​ឱ្យ​ដឹង​ថា​ គណបក្ស​នេះ បាន​ហែក្បូន​ឃោសនា​រក​សំឡេង​ឆ្នោត ​ក្នុង​ឃុំ​ស្វាយ​ទង​ខាង​ត្បូង ​ស្រុក​កំពង់​ត្រឡាច​ ខេត្ត​កំពត ​ដោយ​មាន​មនុស្ស​ចូលរួម​ជាង ​៥០​នាក់ ​ប្រើប្រាស់​រថយន្ត​ ៥​គ្រឿង ​និង​​ម៉ូតូ ​១៥​គ្រឿង។​

រីឯ​នៅ​ខេត្ត​ព្រះសីហនុ ​គណបក្ស​នេះ ​បាន​ហែក្បូន​ឃោសនា​រក​សំឡេង​ឆ្នោត​ចំនួន​ ៤​សង្កាត់​ ក្នុង​ក្រុង​ព្រះសីហនុ ​ដោយ​មាន​មនុស្ស​ចូល​រួម​ជាង​ ៦០​នាក់​ រថយន្ត​ ៦​គ្រឿង ​និង ​ម៉ូតូ​កង់បី ​ជិត​ ១០​គ្រឿង​។

ប្រធាន​នាយកដ្ឋាន​កិច្ចការ​នយោបាយ​នៃ​គណបក្ស​យុវជន​កម្ពុជាលោក ​ឯម សុខសុវណ្ណ​ ប្រាប់​វិទ្យុអាស៊ីសេរី​ថា ​គណបក្ស​របស់​លោកបាន​ដាក់​បេក្ខភាព​ប្រកួត​ប្រជែង​បោះឆ្នោត​ឃុំ-សង្កាត់​ ក្នុង​អាណត្តិទី​៥ ​នេះ ​ចំនួន ​១១៤ឃុំ-សង្កាត់​ ក្នុង​ចំណោម​ឃុំ-សង្កាត់​សរុប​ជាង​ ១​ពាន់ ៦រយ (១.៦៥២នៅ​ទូទាំង​ប្រទេស​។ ​

លោក​ថា ​គណបក្ស​យុវជន​កម្ពុជា​ បាន​ដាក់​ចេញ​គោល​នយោបាយ ​៧ចំណុច ​ដោយ​មាន​ចំណុច​ខ្លះ​ផ្តោត​សំខាន់​ លុប​បំបាត់​គ្រឿង​ញៀន​នៅ​មូលដ្ឋាន​ ពង្រឹង​ការ​ប្រើប្រាស់​ថវិកា​ឃុំ-សង្កាត់​ឱ្យ​មាន​តម្លាភាព ​សុចរិតភាព ​និង​ បើក​វេទិកា​សាធារណៈ​រាល់​មួយ​ខែ​ម្តង​ជួប​មួយ​ពលរដ្ឋ​៖ «​​ចំពោះ​មតិ​ទៅ​ គ.ជ.ប​ សូម​មាន​អព្យាក្រឹត​ភាព ​និង​តម្លាភាព​ សូម​លទ្ធផល​បោះឆ្នោត​អាច​ទទួល​យក​បាន​ទាំង​អស់​គ្នា ​រវាង​អ្នក​ឈ្នះ ​និង​អ្នក​ចាញ់»។​

ដោយឡែក ​អ្នក​នាំពាក្យ​គណបក្ស​ប្រជាជន​កម្ពុជា​លោក ​សុខ ឥសាន ​មាន​ប្រសាសន៍​ថា​ គណបក្ស​កាន់​អំណាច ​មិន​បាន​ហែក្បូន​ឃោសនា​រក​សំឡេង​ឆ្នោត​នៅ​ខេត្ត​ទាំង​នេះ​ទេ​ នៅ​ថ្ងៃ​ទី​២៣​ ខែឧសភា​នេះ ​ដោយ​នៅ​តាម​មូលដ្ឋាន​មួយ​ចំនួន ​គ្រាន់តែ​ចែក​ខិតប័ណ្ណ ​និង​ផ្សព្វផ្សាយ​ពី​គោល​នយោបាយ ​ចាក់​មេក្រូ ​ឬ​ឧបករណ៍​បំពង​សំឡេង ​តាម​ទី​ស្នាក់​ការ​គណបក្ស​ ក្នុង​ខេត្ត​នីមួយៗ ​តែ​ប៉ុណ្ណោះ​។

ជុំវិញការបោះឆ្នោតឃុំ-សង្កាត់នេះ កូនស្រីច្បង ​លោក កឹម សុខា និងជា​អគ្គនាយិការរងផ្នែកកិច្ចការសាធារណៈ​នៃ​គណបក្សសង្គ្រោះជាតិ កញ្ញា កឹម មនោវិទ្យា បាន​សរសេរសារ​នៅលើ​ទំព័រទី្វតធ័រ (Twitter) ​របស់​កញ្ញា នៅថ្ងៃទី២៣ ខែឧសភា​ថា ការបោះឆ្នោត​ឃុំ-សង្កាត់ឆ្នាំ២០២២ នេះ ខ្វះភាពស្របច្បាប់ ដោយសារតែ​លោក កឹម សុខា ត្រូវបាន​ហាមប្រាម និង​ពុំមានវត្តមាន​គណបក្សសង្គ្រោះជាតិ​ដែល​ដឹកនាំដោយ​ក្រុមមេដឹកនាំគណបក្សនេះនៅកម្ពុជា។

អ្នក​សម្រប​សម្រួល​ផ្នែក​អង្កេត​ និង​តស៊ូមតិ​ នៃអង្គការ​ខុមហ្រ្វែល​ (Comfrel) លោក កន សាវាង្ស ​ សង្កេតឃើញ​ថា ​យុទ្ធនាការ​ឃោសនា​រក​សំឡេង​ឆ្នោត​ រយៈ​ពេល​ ៣ថ្ងៃ​កន្លង​មក​នេះ​ មិន​ទាន់​ឃើញ​មាន​ភាព​មិន​ប្រក្រតី​ណាមួយ ​ដូចជា ​ការ​គំរាម​កំហែង ​និង​រារាំង​ធ្ងន់ធ្ងរ​នៅ​ឡើយ​ទេ​។​ លោក​ថា​ យុទ្ធនាការ​ឃោសនា​រក​សំឡេង​ឆ្នោត ​របស់​គណបក្ស​នយោបាយ​មួយ​ចំនួន ​ក្នុង​ថ្ងៃ​ទី​៣ នេះ​ ធ្វើ​ឡើង​ទ្រង់ទ្រាយ​តូចៗ ​តាម​បណ្តា​ខេត្ត​មួយ​ចំនួន​ប៉ុណ្ណោះ​។

យុទ្ធនាការ​រក​សំឡេងឆ្នោត​របស់​គណបក្ស​នយោបាយ​ទាំង​១៧​ ដែល​ចូលរួម​ការបោះឆ្នោត​ថ្នាក់ក្រោម​ជាតិ​ថ្ងៃទី​៥ ខែមិថុនាខាងមុខ មាន​រយៈ​ ១៤​ថ្ងៃ​ចាប់ផ្ដើម​ពី​ថ្ងៃ​ទី​២១ ​ខែ​ឧសភា ដល់​ថ្ងៃទី​៣​ ខែមិថុនា​ខាងមុខ។ ច្បាប់​បោះឆ្នោត​អនុញ្ញាត​ឱ្យ​គណបក្ស​នយោបាយ​ហែ​ក្បួន​ទ្រង់ទ្រាយ​ធំ​នៅ​តាម​មូលដ្ឋាន​របស់​ខ្លួន​ត្រឹម​ពីរ​ថ្ងៃ​ប៉ុណ្ណោះ គឺ​ថ្ងៃ​ចាប់ផ្ដើម និង​ថ្ងៃ​ចុងបញ្ចប់​នៃ​យុទ្ធនាការ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល