វៀតណាម​តាមដាន​យ៉ាង​ដិតដល់​រឿង​របប​ភ្នំពេញ​ឱ្យ​ដី ៤០​ហិកតារ​ដល់​ពលរដ្ឋ​របស់​ខ្លួន

ដោយ សេក បណ្ឌិត
2019-12-08
អ៊ីម៉ែល
មតិ
Share
បោះពុម្ព
ផ្ទះ​បណ្ដែត​ទឹក​ដែល​ភាគ​ច្រើន​ជា​ជនជាតិ​វៀតណាម នៅ​តំបន់​ផ្សារក្រោម ក្រុង​កំពង់ឆ្នាំង ខេត្ត​កំពង់ឆ្នាំង។ រូបថត​ថ្ងៃ​ទី​២៨ ខែ​មីនា ឆ្នាំ​២០១៧។
ផ្ទះ​បណ្ដែត​ទឹក​ដែល​ភាគ​ច្រើន​ជា​ជនជាតិ​វៀតណាម នៅ​តំបន់​ផ្សារក្រោម ក្រុង​កំពង់ឆ្នាំង ខេត្ត​កំពង់ឆ្នាំង។ រូបថត​ថ្ងៃ​ទី​២៨ ខែ​មីនា ឆ្នាំ​២០១៧។
Photo: RFA

ក្រុម​យុវជន និង​មន្ត្រី​អង្គការ​សង្គម​ស៊ីវិល​បង្ហាញ​ក្ដី​បារម្ភ​ជា​ថ្មី​ទៀត ពី​ការ​ហូរចូល​ជនអន្តោប្រវេសន៍​ខុសច្បាប់ មក​រស់នៅ​ក្នុង​ប្រទេស​កម្ពុជា ជាពិសេស​ជនជាតិ​វៀតណាម ដែល​កំពុង​រស់នៅ​លើ​ផ្ទះ​បណ្ដែត​ទឹក ក្នុង​ខេត្ត​ចំនួន ៦ ដោយសារតែ​អាជ្ញាធរ​របប​ក្រុងភ្នំពេញ នៅ​មិន​ទាន់​មាន​យន្តការ​គ្រប់គ្រង​ពួកគេ​ឱ្យ​បាន​ច្បាស់លាស់​នៅឡើយ​ទេ​។ ថ្មីៗ​នេះ អាជ្ញាធរ​ខេត្ត​កំពង់ឆ្នាំង បាន​កាត់​ឆ្វៀល​ដី ទំហំ ៤០​ហិកតារ ផ្ដល់​ឱ្យ​ជនជាតិ​វៀតណាម​ដែល​បន្លាស់​ទី​ពី​ផ្ទៃ​បឹង​ទន្លេសាប ឱ្យ​មក​រស់នៅ​លើគោក​វិញ ក្នុង​បំណង​សង្គ្រោះ​បរិស្ថាន​ទន្លេសាប ដែល​ករណី​នេះ​ត្រូវ​បាន​រដ្ឋាភិបាល​វៀតណាម​តាមដាន​យ៉ាង​ដិតដល់។

គម្រោង​ផ្ដល់​ដី​ទំហំ ៤០​ហិកតារ ឱ្យ​ជនជាតិ​វៀតណាម​បង្កើត​ភូមិ​ថ្មី របស់​អាជ្ញាធរ​ខេត្ត​កំពង់ឆ្នាំង គឺជា​ប្រធានបទ​ក្តៅ ដែល​ក្រុម​ពលរដ្ឋ និង​អ្នកប្រើប្រាស់​បណ្ដាញ​សង្គម​ហ្វេ​ស​បុក​មួយ​ចំនួន​បង្ហាញ​អារម្មណ៍​មិន​សប្បាយចិត្ត និង​ចាត់ទុកថា រដ្ឋាភិបាល​មិនបាន​អនុវត្ត​ច្បាប់​អន្តោប្រវេសន៍ ឱ្យ​គ្រប់​ជ្រុងជ្រោយ​នោះ​ទេ។

មន្ត្រី​សម្របសម្រួល​សមាគម​អាដហុក ខេត្ត​កំពង់ឆ្នាំង លោក សំ ច័ន្ទគា ឱ្យ​ដឹង​នៅ​ថ្ងៃ​ទី៨ ខែ​ធ្នូ ថា ការ​អនុវត្ត​ច្បាប់​អន្តោប្រវេសន៍ គឺជា​រឿង​ចំ​បាច់​បំផុត​លើ​ជនបរទេស​ទាំងឡាយ​ណា ដែល​មក​រស់នៅ​ខុសច្បាប់​ក្នុង​ប្រទេស​កម្ពុជា​។ លោក​ថា ចំណុច​វិជ្ជមាន​នៃ​ការ​ផ្ដល់​ដី ៤០​ហិកតារ​នេះ អាច​ស្រោចស្រង់​បរិស្ថាន​ទន្លេសាប ក៏ប៉ុន្តែ​លោក​ថា ការអនុវត្ត​ច្បាប់​អន្តោប្រវេសន៍​របស់​អាជ្ញាធរ នៅ​តែ​មាន​ភាព​ធូររលុង​ច្រើន និង​មិន​គ្រប់​ជ្រុងជ្រោយ​៖ «នេះ​ជា​ជម្រើស​របស់​រដ្ឋាភិបាល​ខ្លួនឯង បើ​រដ្ឋាភិបាល​ចង់​ឱ្យ​មាន​ជំនឿ ទំនុក​ចិត្ត​ពី​ប្រជាពលរដ្ឋ​កម្ពុជា​ខ្លួនឯង​។ ខ្លួនឯង​ត្រូវតែ​អនុវត្ត​ច្បាប់​សញ្ជាតិ​ហ្នឹង​ឱ្យ​បាន​តឹងរ៉ឹង អត់​មាន​រើស​ជនជាតិ​ណា ជនជាតិ​ណា​ទេ ត្រូវតែ​អនុវត្ត ហើយ​កន្លងមក ឃើញ​ហើយ​ថា ការអនុវត្ត​ច្បាប់​ហាក់​ដូចជា មាន​លក្ខណៈ​មិន​ពេញលេញ​ទេ»

អាជ្ញាធរ​ខេត្ត​កំពង់ឆ្នាំង​បាន​កាត់​ដី​លិច​ទឹក ទំហំ ៤០​ហិកតារ ឋិត​នៅ​ភូមិ​ដំបូក​កកោះ ឃុំ​ស្វាយ​ជ្រុំ ស្រុក​រលាប្អៀរ ឋិត​នៅ​កៀក​បឹង​ទន្លេសាប ដើម្បី​រៀបចំ​ដី​សម្បទាន​សង្គមកិច្ច ឱ្យ​ពលរដ្ឋ​ជាង ២​ពាន់​គ្រួសារ ក្នុង​នោះ​ភាគច្រើន​ជា​ជនជាតិ​វៀតណាម ផ្លាស់​ទី​ពី​ផ្ទះ​បណ្ដែត​ទឹក​ទៅ​រស់នៅ​ទីនោះ​វិញ។រដ្ឋាភិបាល​វៀតណាម​បាន​តាមដាន​ដោយ​យកចិត្តទុកដាក់​ចំពោះ​រឿង​នេះ​។ អ្នកនាំពាក្យ​ក្រសួងការបរទេស​វៀតណាម អ្នកស្រី ឡេធី ថូហាង (Le Thi Thu Hang) បាន​ជំរុញ​ឱ្យ​ជនជាតិ​វៀតណាម ដែល​ទៅ​រស់នៅ​ក្នុង​ប្រទេស​កម្ពុ​ជា ត្រូវ​អនុវត្ត​តាមច្បាប់ របស់​ប្រទេស​កម្ពុជា​ឱ្យ​បាន​ត្រឹមត្រូវ​។ សារព័ត៌មាន​វៀតណាម Vietnam Plus (en.vietnamplus.vn) ចុះផ្សាយ​ថា អ្នកស្រី ឡេធី ថូហាង បាន​ច្រានចោល​ចំពោះ​មតិ​ដែល​ថា ការ​ផ្លាស់ប្តូរ​ទីលំនៅ ពី​ផ្ទៃ​បឹង​ទន្លេសាប មក​រស់នៅ​លើគោក គឺជា​ការ​គំរាមកំហែង​ដល់​សន្តិសុខ និង​អធិបតេយ្យភាព​របស់​កម្ពុជា​។ អ្នកស្រី​ថា នេះ​ជា​ការ​ចោទប្រកាន់ គ្មាន​មូលដ្ឋាន។

ប្រធាន​ក្រុម​យុវជន ១០០​រាត្រី និង​ជា​ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ លោក មួង សូនី ថ្លែង​ថា រដ្ឋាភិបាល គ្មាន​សមត្ថភាព​គ្រប់គ្រង​ជនជាតិ​វៀតណាម​នៅ​កម្ពុជា​បាន​នៅ​ឡើយ​ទេ ព្រោះ​ជនជាតិ​វៀតណាម​ភាគច្រើន មិន​ចេះ​ច្បាប់​របស់​កម្ពុជា មិន​ចេះ​អក្សរ​ខ្មែរ ជាពិសេស​អាជ្ញាធរ​កម្ពុជា ប្រព្រឹត្ត​អំពើពុករលួយ​ជា​ប្រព័ន្ធ​ទាក់ទិន​បញ្ហា​នេះ។ លោក​ថា រដ្ឋាភិបាល​វៀតណាម​តែងតែ​រក​គ្រប់​វិធីសាស្ត្រ ដើម្បី​ជំរុញ​ឱ្យ​ជនជាតិ​របស់​គេ ចូល​មក​រស់នៅ​ក្នុង​ប្រទេស​កម្ពុជា​កាន់តែ​ច្រើន​ឡើង តាមរយៈ​ការងារ​ផ្នែក​ការទូត និង​ការ​លួច​ចូល​កម្ពុជា តាម​ច្រក​ព្រំដែន​ជាដើម​។ លើស​ពី​នេះ លោក​ថា វៀតណាម​បាន​ផ្ដល់​ការ​គាំទ្រ​ផ្នែក​ហិរញ្ញវត្ថុ តាមរយៈ​សមាគម​វៀតណាម​នៅ​កម្ពុជា ជាពិសេស​ការ​ផ្ដល់​សម្បទា​ន​សេដ្ឋកិច្ច​តាម​ព្រំដែន បង្ក​លក្ខណៈ​ងាយស្រួល​ឱ្យ​ជនជាតិ​វៀតណាម​ចូល​មក​រស់នៅ​កម្ពុជា​៖ «រដ្ឋាភិបាល​គាត់​គាត់​គ្មាន​ឆន្ទៈ​ពិតប្រាកដ ក្នុង​ការ​អនុវត្ត​ច្បាប់​អន្តោប្រវេសន៍ ច្បាប់​ដែល​ពាក់ព័ន្ធ និង​ការ​បណ្ដេញ​ជនជាតិ​វៀតណាម​ហ្នឹង​ឱ្យ​ទៅ​ប្រទេស​ពួកគាត់​វិញ​។ អានេះ​យើង​ឃើញ​ជាក់ស្ដែង​អ៊ីចឹង​ហ្មង រដ្ឋាភិបាល​វៀតណាម គាត់​តែងតែ​ជ្រៀតជ្រែក ឬក៏​ស្នើសុំ​ជានិច្ច ពី​ជនជាតិ​វៀតណាម​នៅ​ស្រុក​ខ្មែរ​។ ខ្ញុំ​ឃើញ​រដ្ឋាភិបាល​វៀតណាម​គេ​បារម្ភ​ណាស់ ខ្លាច​តែ​ខ្មែរ​យើង​ដេញ​ជនជាតិ​វៀតណាម ទៅ​ប្រទេស​គាត់​វិញ ហើយ​អា​ហ្នឹង​វា​ជា​ចំណុច​ដែល​យើង​មើល​ឃើញ​ថា វា​មាន​ពាក់ព័ន្ធ​នយោបាយ​ប្រទេស​និង​ប្រទេស»

លោក មួង សូនី បន្ថែម​ថា ការ​បន្លាស់​ទី​ជនជាតិ​វៀតណាម តាមរយៈ​កាត់​ឆ្វៀល​ដី​ទំហំ ៤០ ហិកតារ ក៏​មាន​ចំណុច​វិជ្ជមាន​មួយ​ចំនួន​ដែរ​មាន​ជាអាទិ៍ ស្ដារ​បរិស្ថាន​ទន្លេសាប កាត់បន្ថយ​ការ​បន្ទោរ​បង់​ចូល​ទន្លេ កាត់បន្ថយ​ការ​ចោល​សំរាម និង​ការ​នេសាទ​ត្រី​ខុសច្បាប់​ជាដើម​។ ក៏ប៉ុន្តែ​លោក​បារម្ភ​ថា បញ្ហា​នេះ នឹង​ប៉ះពាល់​ដល់​អធិបតេយ្យភាព​កម្ពុជា​នៅ​ថ្ងៃ​អនាគត​។ លោក​ផ្ដល់​ទស្សនៈ​ថា ដំណោះស្រាយ​សមស្រប គឺ​រដ្ឋាភិបាល​គួរ​លើកកម្ពស់​ការអនុវត្ត​ច្បាប់​អន្តោប្រវេសន៍ ឱ្យ​មាន​ប្រសិទ្ធភាព អនុវត្ត​ច្បាប់​លើ​មន្ត្រី​ណា ដែល​ប្រព្រឹត្ត​អំពើពុករលួយ និង​ត្រូវ​មាន​ប្រព័ន្ធ​គ្រប់គ្រង​ជនអន្តោប្រវេសន៍​ឱ្យ​ច្បាស់លាស់​។ លោក​បញ្ជាក់​ថា ការ​លើកឡើង​នេះ​មិនមែន​ជា​ការរើសអើង​ជាតិ​សាសន៍​នោះ​ទេ ក៏ប៉ុន្តែ​បើ​ជនបរទេស​ណា មក​រស់នៅ​ប្រទេស​កម្ពុជា​ដោយ​ខុសច្បាប់ រដ្ឋាភិបាល​ត្រូវ​អនុវត្ត​ច្បាប់ ដោយ​ត្រូវ​ចាប់​បញ្ជូន​ទៅ​ប្រទេស​របស់​គេ​វិញ​៖ «ពាក់ព័ន្ធ​ការ​ឱ្យ​ជនជាតិ​វៀតណាម​នៅ​លើ​គោក​វា​ជា​រឿង​ល្អ​ហើយ ដើម្បី​បរិស្ថាន ប៉ុន្តែ​រឿង​សំខាន់​យើង​អត់​អន្តោប្រវេសន៍ នេះ​ជា​ការ​សំខាន់ ហើយ​បើកាលណា​យើង​អត់​អនុវត្ត​ច្បាប់​ហើយ សួរ​ថា មាន​ប្រសិទ្ធភាព​អី​ទៀត ក្នុង​ការ​ទប់ស្កាត់​នយោបាយ​ឈ្លានពាន របស់​វៀតណាម​នៅ​កម្ពុជា វា​អត់​មាន​ទេ»

អាស៊ីសេរី​បាន​ព្យាយាម​ទាក់ទង អភិបាលខេត្ត​កំពង់ឆ្នាំង លោក ឈួរ ច័ន្ទឌឿន ដើម្បី​សុំ​ការ​បំភ្លឺ​រឿង​នេះ តែ​ទូរស័ព្ទ​ហៅ​ចូល​ច្រើនដង គ្មាន​អ្នកទទួល​នៅ​ថ្ងៃទី៨ ខែ​ធ្នូ។

ចំណែក​អភិបាលរង​ខេត្ត​កំពង់ឆ្នាំង ទទួលបន្ទុក​ដោះស្រាយ​បញ្ហា​នេះ លោក ស៊ុន សុវណ្ណារិទ្ធិ ក៏​មិន​អាច​ទាក់ទង​បាន​ដែរ នៅ​ថ្ងៃ​ដដែល​នេះ។

តែ​យ៉ាងណា លោក ធ្លាប់​ប្រាប់​កាសែត​ក្នុងស្រុក (RFI) ថា មកដល់ពេលនេះ ជនជាតិ​វៀតណាម​ខុសច្បាប់ រស់នៅ​លើ​ផ្ទះ​បណ្ដែត​ទឹក នៅ​ខេត្ត​កំពង់ឆ្នាំង ត្រូវ​បាន​អាជ្ញាធរ​បណ្ដេញ​ចេញ​អស់ហើយ​។ លោក​ថា អ្នក​កំពុង​រស់នៅ​បច្ចុប្បន្ន គឺជា​ជនជាតិ​វៀតណាម​ស្របច្បាប់​។ បន្ថែម​ពី​នេះ លោក​ថា ក្រោយ​ការ​ឡើង​គោក ជនជាតិ​វៀតណាម​ទាំងអស់ ត្រូវ​រស់នៅ​ក្រោម​ច្បាប់ និង​រដ្ឋបាល​របស់​អាជ្ញាធរ​កម្ពុជា​។ លោក សុវណ្ណារិទ្ធិ មិន​ចាំ​តួលេខ​ជនជាតិ​វៀតណាម​កំពុង​រស់នៅ​លើ​ផ្ទះ​បណ្ដែត​ទឹក​ជាក់លាក់​ទេ ក៏ប៉ុន្តែ​លោក​ថា អាជ្ញាធរ​តម្រូវ​ឱ្យ​ទៅ​ជួល​ដី​នៅ​លើ​គោក​ទំហំ ៤០​ហិកតារ ក្បែរ​បឹង​ទន្លេសាប ដើម្បី​រស់នៅ​វិញ៖ «អត់​មាន​ភាគី​ណា មាន​សិទ្ធិ​កាត់​ដី​ឱ្យ​យួន ដូច​អ្នក​ចោទ​ប្រកាន់​ថា ទិញ​ដី​ទិញ​អី​អត់​ទេ អត់​មាន​អាជ្ញាធរ​ណា​ហ៊ានស៊ីញ៉េ​ទេ។ ដី​ឯកជន​គេ​ជួល​យក​លុយ តែ​រដ្ឋ​អាហ្នឹង​គេ​នៅ​ពិភាក្សា​គ្នា វា​មាន​គោលដៅ​ផ្សេងៗ​គ្នា»

អាជ្ញាធរ​ខេត្ត​កំពង់ឆ្នាំង អះអាង​ថា ពលរដ្ឋ​រស់នៅ​ផ្ទះ​បណ្ដែត​ក្នុង​ខេត្ត​នេះ មាន​សរុប​ជាង ៤​ពាន់ ៣​រយ (.៣៨៥) គ្រួសារ ក្នុង​នោះ​ជន​ជាត​វៀតណាម មាន​ជាង ២​ពាន់ (.១៩៧) គ្រួសារ​។ អាជ្ញាធរ​ខេត្ត​នេះ​អះអាង​ថា ដី​ទំហំ ៤០​ហិកតារ ដែល​ត្រូវ​ផ្លាស់​ទី​អ្នក​រស់នៅ​លើ​ផ្ទះ​បណ្ដែត​ទឹក ឱ្យ​ឡើងគោក គឺជា​ដី​ជួល មិនមែន​ចែក​ឱ្យ ឬ​ផ្ដល់​ដី​សម្បទាន​សង្គមកិច្ច​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

សូមអោយអាស៊ីសេរី ឬវាគ្មិននៅក្នុងស្ថាប័ណ្ណ ឬអ្នកវិភាគ ណាមួយ ជួយវិភាគរឿងខ្មែរកម្ពុជាក្រោម ហេតុអ្វីបានជារាជរដ្ឋាភិបាល មិនដែលឈឺឆ្អើរសុខទុក្ខ ប្រជាពលរដ្ឋខ្មែរកម្ពុជាក្រោម អោយដូចនឹងជនជាតិវៀតណាមដែលរស់នៅលើដីខ្មែរដោយខុសច្បាប់?

Dec 09, 2019 03:47 AM

គេហទំព័រ​ទាំងមូល