សាលាឧទ្ធរណ៍​សម្រេច​តម្កល់​សាលក្រម​ផ្ដន្ទាទោស លោក ថាច់ សេដ្ឋា ៣ឆ្នាំ​ដដែល រឿង​រិះគន់​ប្រវត្តិ ៧មករា និង​ការ​សង់​ស្តូប​វៀតណាម​នៅ​កម្ពុជា

ដោយ សុជីវី
2024.02.27
សាលាឧទ្ធរណ៍​សម្រេច​តម្កល់​សាលក្រម​ផ្ដន្ទាទោស លោក ថាច់ សេដ្ឋា ៣ឆ្នាំ​ដដែល រឿង​រិះគន់​ប្រវត្តិ ៧មករា និង​ការ​សង់​ស្តូប​វៀតណាម​នៅ​កម្ពុជា (រូបឯកសារ) លោក ថាច់ សេដ្ឋា អនុប្រធាន​គណបក្ស​ភ្លើង​ទៀន ពេល​អាជ្ញាធរនាំ​មក​ចូលរួម​សវនាការ​ នៅថ្ងៃ​ទី២៨ ខែមេសា ឆ្នាំ២០២៤។​
រូបពីពលរដ្ឋ

សាលាឧទ្ធរណ៍​ភ្នំពេញ​នៅ​ព្រឹក​ថ្ងៃ​ទី២៧ ខែកុម្ភៈ បាន​សម្រេច​តម្កល់​សាលក្រម​ផ្ដន្ទាទោស​អនុប្រធាន​គណបក្ស​ភ្លើង​ទៀន​លោក ថាច់ សេដ្ឋា ឱ្យ​ជាប់​គុក ៣ឆ្នាំ​ដដែល​ពី​បទ «ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​ញុះញង់​ឱ្យ​មាន​ការ​រើសអើង​ពូជសាសន៍» រឿង​លោក​និយាយ​រិះគន់​ប្រវត្តិ ៧មករា និង​ការ​សង់​ស្តូប​វៀតណាម​នៅ​កម្ពុជា។ សាច់ញាតិ និង​មេធាវី​ការពារ​ក្ដី​លោក ថាច់ សេដ្ឋា ចាត់​ទុក​ការ​សម្រេច​នេះ​ថា ជា​រឿង​អយុត្តិធម៌។

ក្រុមប្រឹក្សា​ជំនុំជម្រះ​នៃ​សាលាឧទ្ធរណ៍​ភ្នំពេញ​សម្អាង​ហេតុផល​ដូច​តុលាការ​ជាន់​ទាប​ដែរ ដោយ​ចាត់​ទុក សកម្មភាព​លោក ថាច់ សេដ្ឋា ជួប​ពលករ​នៅ​ក្រៅ​ប្រទេស​កាល​ពី​ខែមករា ឆ្នាំ២០២៣ និយាយ​ប្រវត្តិ ៧មករា និង​និយាយ​រិះគន់​ការ​សង់​ស្តូប​វៀតណាម​នៅ​កម្ពុជា​គឺ​ជា​បទល្មើស «ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​ញុះញង់​ឱ្យ​មាន​ការ​រើសអើង​ពូជសាសន៍»

ប៉ុន្តែ លោក ថាច់ សេដ្ឋា ច្រានចោល​ចំពោះ​ការ​ចោទប្រកាន់​នេះ ដោយ​អះអាង​ប្រាប់​ក្រុមប្រឹក្សា​ជំនុំ​ជម្រះ​ថា លោក​និយាយ​តាម​ការ​សិក្សា​ស្រាវជ្រាវ​ក្នុង​សៀវភៅ​ប្រវត្តិសាស្ត្រ អំពីថ្ងៃ ៧មករា ដើម្បី​ឱ្យ​កូនខ្មែរ​ដឹង​ពី​ប្រវត្តិសាស្ត្រ​ពិត​នៃ​ល្បិច​កល​វៀតណាម​ឈ្លាន​ពាន​ទឹកដី​កម្ពុជា និង​ធ្វើ​ឱ្យ​ខ្មែរ​បែក​បាក់​សាមគ្គី។

ប្រពន្ធ​លោក ថាច់ សេដ្ឋា គឺ​លោកស្រី ថាច់ សុខបូរ៉ានី ប្រាប់​វិទ្យុ​អាស៊ី​សេរី​នៅ​ថ្ងៃ​ទី២៧ ខែកុម្ភៈ​ថា បើ​ទោះ​បី​ជា​ប្ដី​លោកស្រី​បង្ហាញ​ភស្តុតាង​ចេញ​ពី​សៀវភៅ​ប្រវត្តិសាស្ត្រ​ពាក់ព័ន្ធ​ថ្ងៃ ៧មករា​ក្ដី ក៏​សាលាឧទ្ធរណ៍​ភ្នំពេញ​នៅ​តែ​កាត់​ក្ដី​ប្ដី​លោកស្រី​ដោយ​អយុត្តិធម៌។ លោកស្រី​បញ្ជាក់​ថា ការ​សម្រេច​របស់​សាលាឧទ្ធរណ៍​តម្កល់​សាលក្រម​ផ្ដន្ទាទោស​ប្ដី​នឹង​ធ្វើ​ឱ្យ​ក្រុម​គ្រួសារ ជាពិសេស​កូន​កំពុង​សិក្សា​កាន់​តែ​រង​សម្ពាធ​ផ្លូវ​ចិត្ត និង​បារម្ភ​ពី​ជំងឺ​បេះដូង​ប្ដី​កាន់​តែ​ធ្ងន់ធ្ងរ​ក្នុង​ពន្ធនាគារ​បន្ថែម​ទៀត។

លោកស្រី ថាច់ សុខបូរ៉ានី៖ «គាត់ [លោក ថាច់ សេដ្ឋា] និយាយ​តាំង​ពី​អើយ​មក​ពាក្យ​ដដែល​ហ្នឹង ប៉ុន្តែ​នៅតែ​ដាក់​ទុក្ខ​លើ​គាត់ ហើយ​គាត់​បាន​និយាយ​ថា ប្អូន​គាត់​បាន​លះបង់​ឈាម​មួយ​ដុំ ប្អូន​គាត់​បង្កើន​មក​ជួយ​ខ្មែរ ទីបំផុត​ចាប់​បង​បង្កើត​ដាក់​គុក គាត់​និយាយ​ហេតុផល​ម៉េច​ក៏​ដោយ​រក្សា​ទុក្ខ​ដដែល។ គាត់ [លោក ថាច់ សេដ្ឋា] ថា និយាយ​ក៏​គ្មាន​ន័យ​អី​ដែរ តុលាការ​សុទ្ធ​តែ​តេឡេ​ហ្មង​មើល​ទៅ គេ​នៅ​តែ​និយាយ​ថា ប្ដី​ខ្ញុំ​ញុះញង់​ផុស​សំឡេង​អ៊ីចឹង តែ​ប្ដី​ខ្ញុំ​គាត់​និយាយ​ថា គាត់​និយាយ​តាម​តែ​ប្រវត្តិសាស្ត្រ មាន​សៀវភៅ​គ្រប់សព្វ​មាន​ជា​ភស្តុតាង នៅ​តែ​គេ​មិន​យក ជា​បាន​ការ​រក្សា​ទុក​ដដែល»

សវនាការ​នេះ មន្ត្រី​អង្គ​ទូត​នៃ​ឧត្ដម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ប្រចាំ​កម្ពុជា (UN) តំណាង​សហភាព​អឺរ៉ុប (EU) និង​មន្ត្រី​អង្គការ​សង្គម​ស៊ីវិល ព្រម​ទាំង​គ្រួសារ​លោក ថាច់ សេដ្ឋា ក៏​ចូលរួម​ឃ្លាំ​មើល និង​ចូល​ស្ដាប់​នៅ​ក្នុង​សវនាការ​ផង​ដែរ។ ចំណែក នៅ​ក្រៅ​តុលាការ​វិញ​ក៏​មាន​សកម្មជន​ប្រមាណ ១០នាក់ រង់ចាំ​គាំទ្រ​លើក​ទឹកចិត្ត​ដល់​លោក ថាច់ សេដ្ឋា ដែរ។

មេធាវី​ការពារ​ក្ដី​លោក ថាច់ សេដ្ឋា គឺ​លោក ជូង ជូងី ចាត់​ទុក​ការ​សម្រេច​របស់​សាលាឧទ្ធរណ៍​ភ្នំពេញ​ជា​រឿង​អយុត្តិធម៌​សម្រាប់​កូន​ក្ដី​របស់​លោក ព្រោះ​លោក​មេធាវី​យល់​ថា អ្វី​ដែល​កូន​ក្ដី​របស់​លោក បាន​លើកឡើង​ក្នុង​សវនាការ​សុទ្ធ​​តែ​ជា​រឿង​ប្រវត្តិសាស្ត្រ។

លោក ជូង ជូងី៖ «សាលាឧទ្ធរណ៍​គេ​យល់ឃើញ ដូច​សាលាដំបូង​ដែរ។ សាលាឧទ្ធរណ៍​គេ​យល់ឃើញ​ថា ឯកឧត្ដម ថាច់ សេដ្ឋា ពិត​ជា​ញុះញង់​ឱ្យ​វឹកវរ​ដល់​សន្តិសុខ​សង្គម​មែន។ គាត់​អះអាង​ថា អ្វី​ដែល​គាត់​លើកឡើង​គឺជា​រឿង​ប្រវត្តិសាស្ត្រ ជា​ការ​ពិត គាត់​អត់​បាន​ញុះញង់​អី​ទេ គាត់​លើក​ពាក់ព័ន្ធ​ប្រវត្តិសាស្ត្រ​ខ្មែរក្រហម ប្រវត្តិ ៧មករា ប្រវត្តិ​នៃ​ការ​បង្កើត​គណបក្ស គាត់​បង្ហាញ​ពី​ការ​មិន​ពេញចិត្ត​រូប​ស្តូប​មាន​មនុស្ស ៣នាក់​ដាក់​ទូទាំង ២៥រាជធានី​ខេត្ត​ហ្នឹង គាត់​ផ្ដោត​ទៅ​លើ​អ្វី​ដែល​គាត់​និយាយ​ហ្នឹង​សុទ្ធ​តែ​ជា​រឿង​ប្រវត្តិសាស្ត្រ គឺ​ពាក់ព័ន្ធ​រឿង​នយោបាយ​វា​មិនមែន​ជា​បទល្មើស ដូច​ជា​ការ​ចោទ​ប្រកាន់​ទេ»

វិទ្យុអាស៊ីសេរី​មិន​អាច​ទាក់ទង​អ្នកនាំពាក្យ​សាលាឧទ្ធរណ៍​ភ្នំពេញ​លោក ឃុន លាងម៉េង ដើម្បី​សាកសួរ​បន្ថែម​ជុំវិញ​រឿង​នេះ​បាន​ទេ​នៅ​ថ្ងៃ​ទី២៧ ខែកុម្ភៈ។

សាលាដំបូង​រាជធានី​ភ្នំពេញ​កាល​ពី ខែតុលា ឆ្នាំ២០២៣ បាន​ផ្ដន្ទាទោស លោក ថាច់ សេដ្ឋា ដាក់​ពន្ធនាគារ ៣ឆ្នាំ​ពី​បទ «ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​ញុះញង់​ឱ្យ​មាន​ការ​រើសអើង​ពូជ​សាសន៍» បន្ថែម​ទៅ​លើ​ទោស​ចំនួន ១ឆ្នាំ​កន្លះ​ទៀត ដែល​តុលាការ​ចោទ​ប្រកាន់​លោក​ពី​បទ​ចេញ​សែក​ស្អុយ ឬ​សែក​អត់​ប្រាក់។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​សិទ្ធិមនុស្ស​លីកាដូ (LICADHO) លោក អំ សំអាត មិន​ភ្ញាក់ផ្អើល​ចំពោះ​សាលាឧទ្ធរណ៍​សម្រេច​តម្កល់​សាលក្រម​ផ្ដន្ទាទោស​លើ​សំណុំ​រឿង​អនុប្រធាន​គណបក្ស​ភ្លើង​ទៀន លោក ថាច់ សេដ្ឋា នោះ​ទេ​ព្រោះ​លោក​កត់សម្គាល់​ថា រាល់​អ្នក​ជាប់​ឃុំ​នយោបាយ សកម្មជន​សង្គម សហជីព ដែល​សម្រេច​ផ្ដន្ទាទោស​ពី​សាលាដំបូង​ហើយ​កន្លង​មក សាលាឧទ្ធរណ៍​តែងតែ​តម្កល់​សាលក្រម​ទុក​ជា​បាន​ការ​ដដែល។

លោក អំ សំអាត៖ «ប៉ុន្តែ​បញ្ហា​ទាំងអស់​ហ្នឹង​វា​នាំ​ឱ្យ​មាន​ការ​រិះគន់​ច្រើន​ដែរ​ទាក់ទង​ជាមួយ​រឿង​សកម្មជន​សិទ្ធិមនុស្ស សកម្មជន​បរិស្ថាន ឬ​អ្នកនយោបាយ ឬ​សកម្មជន​នយោបាយ អ៊ីចឹង​ទៅ​វា​នាំ​ឱ្យ​មាន​ការ​រិះគន់​ផ្សេងៗ​គ្នា​កើត​ឡើង ព្រោះ​ការ​ផ្ដន្ទាទោស​លើ​អ្នក​ទាំង​អស់​ហ្នឹង។ ទោះ​យ៉ាង​ណា លោក ថាច់ សេដ្ឋា ក៏​មាន​សិទ្ធ​ក្នុង​ការ​ប្ដឹង​សារទុក្ខ ទៅ​តុលាការ​កំពូល​ទាក់ទង​ការ​កើត​ទុក្ខ​មិន​សុខចិត្ត​នឹង​សាលដីកា​របស់​សាលាឧទ្ធរណ៍​នេះ»

មេធាវី​ការពារ​ក្ដី​លោក ថាច់ សេដ្ឋា គឺ​មេធាវី ជូង ជូងី បញ្ជាក់​ថា លោក​នឹង​ពិភាក្សា​ជាមួយ​កូនក្ដី ដើម្បី​រៀបចំ​នីតិវិធី​បន្ត​ប្ដឹង​ទៅ​តុលាការ​កំពូល ដើម្បី​ធ្វើ​ការ​សម្រេច​ចុងក្រោយ​ក្នុង​ការ​ផ្ដល់​យុត្តិធម៌​ឱ្យ​កូន​ក្ដី។ សាច់​ញាតិ និង​មេធាវី​លោក ថាច់ សេដ្ឋា រំពឹង​ថា តុលាការ​កំពូល​មាន​សុភវិនិច្ឆ័យ​ខ្ពស់​ក្នុង​សម្រេច​សាលក្រម​ឱ្យ​លោក ថាច់ សេដ្ឋា ទទួល​បាន​យុត្តិធម៌ ពីព្រោះ​ស្ថានភាព​ជំងឺ​លើស​ឈាម និង​បេះដូង​កំពុង​ធ្វើ​ឱ្យ​សុខភាព​លោក ថាច់ សេដ្ឋា កាន់​តែ​ចុះ​ខ្សោយ ខណៈ​សាច់ញាតិ​វិញ​រស់នៅ​បែកបាក់​គ្រួសារ និង​រង​ទុក្ខវេទនា​ទាំង​ផ្លូវកាយ និង​ផ្លូវ​ចិត្ត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។