អគ្គមេបញ្ជាការកងទ័ពជើងគោក លោក ហ៊ុន ម៉ាណែត បានបញ្ចូលសាស្ត្រាចារ្យ បុគ្គលិកអប់រំ និងនិស្សិតចំនួនជិត៣ពាន់នាក់ (២.៨០៣នាក់) បន្ថែមទៀត ទៅជាសមាជិកគណបក្សប្រជាជនកម្ពុជា។ មន្ត្រីអង្គការសង្គមស៊ីវិលយល់ថា ការបញ្ចូលសមាជិកថ្មីនេះ អាចធ្វើឡើងដោយការបង្ខិតបង្ខំ ហើយការដែលលោក ហ៊ុន ម៉ាណែត ជាមន្ត្រីជាន់ខ្ពស់ចេញមុខ គៀងគរមនុស្សឱ្យគាំទ្រគណបក្សនយោបាយនេះ គឺជារឿងដែលមិនត្រូវតាមច្បាប់។
គណបក្សប្រជាជនកម្ពុជា ដែលមានកូនប្រុសច្បងរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត ធ្វើជាអធិបតីបានបញ្ចូលសាស្ត្រាចារ្យ បុគ្គលិកអប់រំ និងនិស្សិតចំនួនជិត៣ពាន់នាក់ (២.៨០៣នាក់) ទៀត ទៅជាសមាជិកគណបក្សប្រជាជនកម្ពុជា នៅការិយាល័យកណ្ដាលគណបក្សនេះ នៅថ្ងៃទី១៩ ខែកុម្ភៈ។ នៅក្នុងកម្មវិធីនេះ គេក៏សង្កេតឃើញមានវត្តមានលោក គឹម សន្តិភាព លោក ហេង សួរ និងមន្ត្រីជាន់ខ្ពស់គណបក្សប្រជាជនកម្ពុជាជាច្រើនរូបទៀត។
ជុំវិញរឿងនេះ អ្នកនាំពាក្យគណបក្សភ្លើងទៀន លោក គឹមសួរ ភីរិទ្ធ យល់ឃើញថា មន្ត្រីរាជការមួយចំនួនដែលបានចូលរួមជីវភាពនយោបាយជាមួយគណបក្សប្រជាជនកម្ពុជា មិនបានធ្វើឡើងដោយឆន្ទៈផ្ទាល់ខ្លួននោះឡើយ។ លោកបន្ថែមថា ដោយសារតែគណបក្សប្រជាជនកម្ពុជា ដើរតួនាទីជាគណបក្សនយោបាយផង និងជារដ្ឋាភិបាលផង ដូច្នេះហើយគ្រូបង្រៀនមួយចំនួន ត្រូវបង្ខំចិត្តចូលជាសមាជិកគណបក្សប្រជាជនកម្ពុជា ដើម្បីរួចផុតពីការគំរាមកំហែង និងការដកហូតក្របខ័ណ្ឌរដ្ឋ៖
«គណបក្សភ្លើងទៀនអត់មានទេ អត់មាននរណាហ៊ានចេញមុខថា ខ្លួននៅគណបក្សភ្លើងទៀនទេ បើមានក៏មានតិចតួចបំផុត។ ជារូបភាព ជាសម្បកកាយ ប៉ុន្តែនៅក្នុងសម្បកចិត្ត នៅក្នុងផ្លូវចិត្ត ខ្ញុំគិតថា វាមិនខ្វះទេ រងសម្ពាធតែផ្លូវកាយ ប៉ុន្តែផ្លូវចិត្តនៅតែមានការស្រលាញ់ នឹកឃើញចង់បានឱ្យមានការផ្លាស់ប្ដូរ គាំទ្រគណបក្សណាដែលគិតផលប្រយោជន៍ជាតិ ផលប្រយោជន៍ប្រជាពលរដ្ឋ»។
វិទ្យុអាស៊ីសេរីមិនអាចទាក់ទងអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីសុំការបកស្រាយជុំវិញរឿងនេះបាននៅឡើយទេ នៅថ្ងៃទី១៩ ខែកុម្ភៈ។
ក្រៅពីការគំរាមកំហែង និងការរើសអើងនៅតាមសាលារៀនរដ្ឋ គ្រូបង្រៀនដែលមាននិន្នាការនយោបាយផ្ទុយពីរដ្ឋាភិបាលមួយចំនួន ក៏ត្រូវបានរដ្ឋាភិបាលដកចេញពីក្របខ័ណ្ឌគ្រូបង្រៀនផងដែរ កាលពីពេលកន្លងមក។ លើសពីនេះ គ្រូបង្រៀនដែលជាសមាជិកគណបក្សសង្គ្រោះជាតិចំនួន៣នាក់ រួមមាន លោក ស៊ុន ធន់ លោក ពៀច ម៉ាប់ និងលោក កែវ ថៃ ជាដើម ក៏កំពុងជាប់ឃុំនៅពន្ធនាគារយ៉ាងអយុត្តិធម៌ ក្រោមបទចោទញុះញង់ និងរួមគំនិតក្បត់។
ជុំវិញរឿងនេះ ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី យល់ឃើញថា គ្រូបង្រៀន និងនិស្សិត ដែលបានចូលរួមជីវភាពនយោបាយជាមួយគណបក្សប្រជាជនកម្ពុជា មិនមែនចូលរួមដោយការស្ម័គ្រចិត្តទាំងអស់នោះឡើយ។ អ្នកស្រីបន្ថែមថា ទាំងសាស្ត្រាចារ្យ ទាំងសិស្សានុសិស្ស ភាគច្រើនត្រូវបានថ្នាក់ដឹកនាំក្នុងស្ថាប័នរបស់ខ្លួនបង្ខំឱ្យចូលជាសមាជិកគណបក្សកាន់អំណាច ដើម្បីកុំឱ្យអ្នកមានអំណាចចោទប្រកាន់ថាជាក្រុមប្រឆាំង ឬរងនូវការរើសអើងនៅសាលារៀន៖
«ការរើសអើង សួរដេញដោលមូលហេតុអីបានមិនចូល បានមិនអីអ៊ីចឹងទៅណា ហ្នឹងហើយជារូបភាពនៃការរើសអើងរបស់ពួកគាត់ ហើយនិងការភ័យខ្លាចហើយ អ៊ីចឹងទោះបីចង់ឬមិនចង់ពួកគាត់បង្ខំចិត្តត្រូវតែចូល»។
ដោយឡែក នាយកប្រតិបត្តិអង្គការឃ្លាំមើលការបោះឆ្នោតនៅកម្ពុជា និចហ្វិក លោក សំ គន្ធាមី យល់ឃើញថា ការយកមេបញ្ជាការកងទ័ពជើងគោក លោក ហ៊ុន ម៉ាណែត ធ្វើជាគណអធិបតីនៅក្នុងការបញ្ចូលសមាជិកគណបក្សប្រជាជនកម្ពុជា គឺជារឿងមិនត្រឹមត្រូវនោះទេ។ លោកបន្ថែមថា បើទោះបីជាថ្ងៃអាទិត្យក្ដី ឬម៉ោងក្រៅការងារក្ដី លោក ហ៊ុន ម៉ាណែត ត្រូវលាលែងមុខតំណែងពីកងយោធពលខេមរភូមិន្ទសិន ទើបអាចធ្វើជាសកម្មជនគណបក្សនយោបាយណាមួយបាន៖
«ព្រោះអីច្បាប់លក្ខន្តិកៈ មន្ត្រីរាជការ កងកម្លាំងប្រដាប់អាវុធ គេតម្រូវឱ្យអព្យាក្រឹត ដូច្នេះតួនាទីហ្នឹង គឺតួនាទីរបស់រដ្ឋ មិនមែនតួនាទីគណបក្សទេ។ ខ្ញុំគ្រាន់តែសំណូមថា យើងចង់ប្រើប្រាស់យន្តការអ្នកចូលរួមអីហ្នឹង ប្រើតំណាងឱ្យគណបក្សតែម្ដងទៅ កុំឱ្យប៉ះពាល់ដល់កងកម្លាំងប្រដាប់អាវុធ ច្បាប់លក្ខន្តិកៈ មន្ត្រីរាជការអីហ្នឹង»។
មាត្រា៨៣ នៃច្បាប់ស្ដីពី ការបោះឆ្នោតជ្រើសតាំងតំណាងរាស្ត្រ អនុញ្ញាតឱ្យកងយោធពលខេមរភូមិន្ទ នគរបាលជាតិ និងមន្ត្រីតុលាការ អាចចូលរួមនៅក្នុងសកម្មភាពឃោសនាគាំទ្រចំពោះគណបក្សណាមួយ ក្រៅម៉ោងការងារ តែនៅក្នុងរដូវការឃោសនាបោះឆ្នោត ដែលមានរយៈពេលត្រឹមតែមួយខែតែប៉ុណ្ណោះ។
អ្នកវិភាគនយោបាយ តែងតែលើកឡើងថា គណបក្សប្រជាជនកម្ពុជា បានដើរតួនាទីហួសពីគណបក្សនយោបាយ ដោយបានយកប្រៀបក្នុងនាមជាគណបក្សកាន់អំណាច គំរាមកំហែងឱ្យមន្ត្រីរាជការតាមស្ថាប័នរដ្ឋនានា ចូលជាសមាជិកគណបក្សនេះ។ គណបក្សនេះ ក៏បានបង្ខំឱ្យក្រុមនិស្សិត និងសិស្ស ចូលជាសមាជិកគណបក្សប្រជាជនកម្ពុជាដែរ តាមរយៈការបង្កើតសហភាពសហព័ន្ធយុវជនកម្ពុជានៅតាមសាលា និងស្ថាប័នរដ្ឋផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។