មន្រ្តី​បក្ស​ប្រឆាំង​និង​អ្នក​វិភាគ​ចាត់​ទុក​ការ​លក់​ស្នាក់​ការ​បក្ស​សង្គ្រោះជាតិ​យក​លុយ​ចែក​គ្នា បង្ហាញ​ពី​ទង្វើ​កំសាក​របស់​លោក ហ៊ុន សែន

ដោយ យ៉ង ចាន់តារា
2022.12.25
មន្រ្តី​បក្ស​ប្រឆាំង​និង​អ្នក​វិភាគ​ចាត់​ទុក​ការ​លក់​ស្នាក់​ការ​បក្ស​សង្គ្រោះជាតិ​យក​លុយ​ចែក​គ្នា បង្ហាញ​ពី​ទង្វើ​កំសាក​របស់​លោក ហ៊ុន សែន ទីស្នាក់ការ​កណ្ដាល​គណបក្ស​សង្គ្រោះជាតិ ដែលស្ថិត​នៅសង្កាត់​​ចាក់​អង្រែលើ​ ខណ្ឌមានជ័យ រាជធានីភ្នំពេញ កាល​ពី​​ថ្ងៃ​ទី​២៧ ខែ​ឧសភា ឆ្នាំ​២០១៦។
រូប៖ ពលរដ្ឋ​ផ្ដល់​ឲ្យ

មន្រ្តីគណបក្ស​ប្រឆាំង និង​អ្នក​វិភាគ​នយោបាយ​រិះគន់​ថា លោក ហ៊ុន សែន ដែល​លក់​ឡៃឡុង​ផ្ទះ​របស់​លោក សម រង្ស៊ី និង​ជា​ទីស្នាក់ការ​បក្ស​សង្គ្រោះជាតិ ហើយ​យក​លុយ​ចែក​គ្នា។ អ្នកវិភាគថា ​ទង្វើ​របស់​លោក ហ៊ុន សែន និង​បក្ខ​ពួក គឺជា​អំពើ​លួចប្លន់​យក​ទ្រព្យ​អ្នក​ដទៃ ព្រមទាំង​បង្ហាញ​ពី​ទង្វើ​ក៏​កំសាក​របស់​ក្រុម​មេដឹកនាំ។ ប្រតិកម្មនេះ ធ្វើឡើង​បន្ទាប់​ពី​លោកនាយករដ្ឋមន្ត្រី ហ៊ុន សែន បាន​ប្រកាស​កាល​ពី​ថ្ងៃទី២២ ខែធ្នូ ថា គេហដ្ឋាន​របស់​លោក សម រង្ស៊ី និង​ជាទីស្នាក់ការ​បក្ស​ប្រឆាំង​នៅ​សង្កាត់​ចាក់​អង្រែលើ​នោះ ត្រូវ​បាន​លក់​ក្នុង​តម្លៃ ១​លាន៦​សែន​ដុល្លារ ដើម្បី​យក​លុយ​មក​សង​ជំងឺ​ចិត្ត​លោក និង​ថ្នាក់​ដឹកនាំ​គណបក្ស​ប្រជាជនកម្ពុជា​ផ្សេង​ទៀត។

មន្រ្តី​ជាន់ខ្ពស់​គណបក្ស​ប្រឆាំង​ចាត់​ទុក​ការ​លក់​ទីស្នាក់ការ​បក្ស​សង្គ្រោះជាតិ​ ដែល​ជា​ទ្រព្យ​សម្បត្តិ​របស់​លោក សម រង្ស៊ី ពី​សំណាក់​ក្រុម​លោក ហ៊ុន សែន នេះថា ជា​ការ​សងសឹក​ផ្នែក​នយោបាយ​លើ​លោក សម រង្ស៊ី ជាពិសេស​ក្នុងទិសដៅ​គាស់រម្លើង​ក្រុម​អ្នក​ប្រជាធិបតេយ្យ​ដែលមាន​ឥទ្ធិពល​ក្នុង​ឆាក​នយបាយ​កម្ពុជា។ អតីត​តំណាងរាស្ត្រ​គណបក្ស​សង្គ្រោះជាតិ​លោក អ៊ំ សំអាន ប្រៀបធៀប​ទង្វើ​របស់​លោក ហ៊ុន សែន និង​បក្ខពួក​ថា ជា​ចោរ​លួច​ប្លន់​ទ្រព្យ​សម្បត្តិ​គេ៖

«គាត់ (ហ៊ុន សែន)លក់​ស្នាក់ការ​គណបក្ស​សង្គ្រោះជាតិ​ដូច​ដុតផ្ទះ​គេ​អ៊ឹចឹង​ ប្រកួត​ប្រជែង​មិន​ឈ្នះគេ​ទៅ​ដុត​ផ្ទះ​គេ​ចោល​អាហ្នឹង រំលាយ​គណបក្ស​គេ​ហើយ​មក​ប្លន់​ផ្ទះ​គេ​ទៀត នេះ​គឺ​ជា​អ្នក​នយោបាយ​កំសាកញី​ដែល​មិន​ហ៊ាន​ប្រកួត​ប្រជែង​តាម​រយៈការ​បោះឆ្នោត​ដោយ​សេរី ត្រឹមត្រូវ និង​យុត្តិធម៌​នៅ​កម្ពុជា»

ស្រដៀង​គ្នានេះ​ដែរ អ្នក​វិភាគ​នយោបាយ​នៅ​ប្រទេស​ហ្វាំងឡង់ លោក គឹម សុខ រិះគន់​ថា ការ​ដែល​លោក ហ៊ុន សែន ប្លន់​យក​អំណាច និង​សិទ្ធិ​សេរីភាព​ប្រកួត​ប្រជែង​ ហើយ​ថែម​ទាំង​ប្លន់​ផ្ទះ​គេ​លក់​យក​លុយ​ស្រស់ៗ​បែប​នេះ គឺ​ជា​អំពើ​អសីលធម៌​ផ្នែក​នយោបាយលោក​សង្កត់ធ្ងន់​ថា លោក ហ៊ុន សែន កំពុង​សាង​កំហុស​ដ៏ធំ​ទុក​ឱ្យ​កូន​របស់​គាត់​ដោះស្រាយ​មិន​រួច​នៅ​ថ្ងៃ​ក្រោយ៖ « ចំណាត់ការ​លោក ហ៊ុន សែន លើ​លោក សម រង្ស៊ី គឺ​ជា​អំពើ​អសីលធម៌​នយោបាយ​ដ៏កម្រ​មួយ​ ពីព្រោះ​កម្រ​មេដឹកនាំ​ប្រទេស​ណា​ធ្វើ​អំពើ​ធ្ងន់ធ្ងរ​បែបនេះ​ចំពោះ​គូប្រជែង​ខ្លាំង​ណាស់​ គ្រាន់​តែ​ប្រើ​លេស​ជម្លោះ​នយោបាយ ​រួច​ហើយ​ទៅ​ប្រមូល​ប្លន់​យក​ទ្រព្យ​សម្បត្តិ​របស់​គេ​ស្រស់ៗ​ណាស់»

ប្រតិកម្មរបស់​មន្ត្រីបក្ស​ប្រឆាំង និង​អ្នក​វិភាគ​នេះ កើតមាន​ឡើង​ក្រោយ​ពី​លោកនាយករដ្ឋមន្ត្រី ហ៊ុន សែន បាន​ប្រកាស​កាលពី​ថ្ងៃទី២២ ខែធ្នូថា គេហដ្ឋាន​របស់​លោក សម រង្ស៊ី និងជាទីស្នាក់ការ​គណបក្ស​សង្គ្រោះជាតិ​នៅ​សង្កាត់​ចាក់​អង្រែលើ រាជធានី​ភ្នំពេញ​នោះ ត្រូវ​បាន​លក់​ដូរ​ក្នុង​តម្លៃ​១​លាន​៦​សែន​ដុល្លារ ដើម្បី​យក​លុយ​មក​សង​ជំងឺចិត្ត​លោក និង​ថ្នាក់ដឹកនាំ​គណបក្ស​ប្រជាជន​កម្ពុជា

«ហ្អែង​ត្រូវ​ចាំ​នេះ​មិន​មែន​ជា​នយោបាយ​របស់ ហ៊ុន សែន ទេ ប៉ុន្តែអ្នកឯង​បាន​ប្រកាស​នៅ​សៀមរាប​កាល​ពី​ឆ្នាំ២០០៣ មាន​ស៊ីអត់សែន មាន​សែន​អត់​ស៊ី តែ​ឥឡូវ​កំពុង​មាន​សែន​លើ​ទឹក​ដី​ខ្មែរ​តែ​វា​អត់​ស៊ី ឱ្យ​ហ្អែង​អត់​រហូត​ទៅ ហើយ​ស្នាក់ការ​របស់​ហ្អែង​លក់​បាត់​ហើយ មិនមែន​ស្នាក់ការ​ទេ​ដី​របស់​ហ្អែង​លក់ ហ្អែង​ខ្វះ​ទៀត លក់​បាត់​ហ្អែង​ពូកែ​ទៅ តាម​មើល​ទៀត​អាណា​ត្រូវ​សង​ជំងឺ​ចិត្ត​យ៉ាង​មិច​ត្រូវ​សង»

ប្រព័ន្ធ​ឃោសនា​របស់​លោក ហ៊ុន សែន បាន​ចុះផ្សាយ​ថា អចលនទ្រព្យ​របស់​លោក សម រង្ស៊ី នេះ លក់​បាន​ជាង ១ លាន ៦សែនដុល្លារ (១.៦៥២.០០០) ក្នុងនោះ លោក ហ៊ុន សែន ទទួល​បាន​ជាង សែន​ដុល្លារ (៧៧៥.១៨២) ប្រធាន​រដ្ឋសភា​លោក ហេង សំរិន ទទួល​បាន​ជិត ៥ ម៉ឺនដុល្លារ​ ​(៤៨.៤៤៨)​រដ្ឋមន្ត្រី​ក្រសួង​មហាផ្ទៃ​លោក ស ខេង ទទួល​បាន​ជិត៤ សែនដុល្លារ(៣៨៧.៥៨៦) ​រដ្ឋាភិបាល​ទទួល​បាន​ជាងសែន​ដុល្លារ (៣៨៧.៥៨៦) និងជាង ៥ ពាន់ដុល្លារ​ទៀត (៥.៧៩៩)​ ចូល​ក្នុង​រតនាគារ​ជាតិ។

លោក ហ៊ុន សែន អះអាងថា សំណងនេះ​នៅមិនទាន់​គ្រប់​នៅ​ឡើយ​ទេ ព្រោះ​លោក សម រង្ស៊ី ត្រូវ​បង់​សំណង​សរុប​ជាងលាន​ដុល្លារ​តាម​សាលក្រម​របស់​តុលាការ ក្នុង​សំណុំរឿង​ដែល​ត្រូវ​បាន​ប្ដឹង​ដោយ​រូប​លោក លោក ស ខេង និង​លោក ហេង សំរិន កាលពី​ពេល​កន្លង​ទៅ

ចៅក្រម​តុលាការ​ក្រុង​ភ្នំពេញ លោក អ៊ឹម វណ្ណៈ បានចេញ​ដីកា​លក់​អចលនទ្រព្យ​របស់​លោក សម រង្ស៊ី នេះ កាល​ពី​ខែវិច្ឆិកា ឆ្នាំ២០២១ ទៅតាម​ការ​ចង់​បាន​របស់​លោក ហ៊ុន សែន និង​ក្រុម​មេដឹកនាំ​គណបក្ស​ប្រជាជន​កម្ពុជា

ជុំវិញ​រឿង​នេះ ប្រធាន​សមាគម​ការពារ​សិទ្ធិ​មនុស្ស​អាដហុក (Adhoc) លោក នី សុខា យល់ថា តុលាការ​រឹបអូស​ទ្រព្យ​មេបក្ស​ប្រឆាំង​លក់​យក​លុយ​ឱ្យ​មេបក្ស​កាន់​អំណាច​នេះ កើត​ឡើង​ដោយ​សារ​វិវាទ​នយោបាយ​ដើម្បី​ផ្ចាញ់ផ្ចាល​គ្នា មិនមែន​ជា​រឿង​ទោស​កំហុស​ឡើយ។ លោកបន្តថា ការរឹប​អូស​ផ្ទះ​សម្បែង​របស់​លោក សម រង្ស៊ី នេះកាន់​តែធ្វើឱ្យបែកបាក់ជាតិ​ដែល​ផ្ទុយ​ពី​ស្មារតី​បង្រួបបង្រួមជាតិ​ដែល​មាន​ចែង​ក្នុង​រដ្ឋធម្មនុញ្ញ និង​ស្មារតី​នៃ​កិច្ចព្រមព្រៀង​សន្តិភាព​ទីក្រុង​ប៉ារីស៖

«បើ​យើង​ជាអ្នក​នយោបាយ​នៅ​តែ​ក្តីក្តាំ​គ្នា ហើយ​យក​បញ្ហា​ហ្នឹង​ទៅ​ផ្ចាញ់ផ្ចាល​គ្នា មួល​បង្កាច់​ ចង់​ឈ្នះ​ចង់​ចាញ់​ដោយ​ប្រើ​រៀប​ក្តី​ក្តាំង​រៀបបែប​នេះ ខ្ញុំ​គិតថា ទីមួយ​មិន​បាន​ផ្តល់​ជា​ប្រយោជន៍​ជាតិ ​ហើយ​វា​ឃើញ​ថា ស្ថានភាព​នយោបាយ បរិយាកាស​នយោបាយ​កាន់តែ​តឹង​តែង​ទៅ វា​ធ្វើ​ឱ្យ​អន្តរជាតិ​ដាក់​សម្ពាធ​លើ​រដ្ឋាភិបាល​ដែរ»

ទាក់ទង​នឹង​ការ​រឹបអូស​យក​ស្នាក់ការ​បក្ស​សង្គ្រោះជាតិ​ដែល​ជា​ទ្រព្យ​សម្បត្តិ​ផ្ទាល់​ខ្លួន​របស់​លោក សម រង្ស៊ី យក​ទៅ​លក់​ដូរ​នេះ លោក សម រង្ស៊ី ធ្លាប់​បញ្ជាក់​ប្រាប់​វិទ្យុ​អាស៊ីសេរី​ថា លោកមិន​ខ្វល់​រឿង​នេះ​ទេ ព្រោះ​លោក​មិនមែន​ជា​មនុស្ស​សម្ភារៈ​និយមប៉ុន្តែលោក​ចាត់​ទុក​ករណី​នេះ​ថា ជាការ​តាម​ធ្វើ​ទុក្ខ​បុក​ម្នេញ និង​សកសឹក​រូប​លោក ទាំង​ផ្នែក​នយោបាយ​ និង​ហិរញ្ញវត្ថុ​ពី​សំណាក់​លោកនាយករដ្ឋមន្ត្រី ហ៊ុន សែន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។