ប្រជាពលរដ្ឋនៅក្រៅប្រទេស រិះគន់រដ្ឋាភិបាលលោក ហ៊ុន សែន ថា មិនចេះទទួលខុសត្រូវលើអាយុជីវិតរបស់ប្រជាពលរដ្ឋ ហើយគិតតែរកវិធីការពារអំណាចរបស់ខ្លួន។ ការលើកឡើងនេះ បន្ទាប់ពីពលរដ្ឋទាំងនោះ មើលឃើញថា ក្នុងពេលវីរុសកូរ៉ូណា កំពុងរាតត្បាតខ្លាំងជុំវិញពិភពលោក បែរជារដ្ឋាភិបាលរបស់លោក ហ៊ុន សែន មិនព្រមបិទជើងហោះហើរ និងជម្លៀសពលរដ្ឋរបស់ខ្លួនចេញពីប្រទេសចិន ដូចដែលរដ្ឋាភិបាលប្រទេសនានា កំពុងធ្វើនោះទេ។
ប្រជាពលរដ្ឋខ្មែរដែលកំពុងធ្វើការ និងរស់នៅឯក្រៅប្រទេស លើកឡើងថា ពួកគេហួសចិត្ត ដែលរដ្ឋាភិបាលលោក ហ៊ុន សែន មិនយកចិត្តទុកដាក់ការពារ ហើយថែមទាំងប្រមាថអាយុជីវិតប្រជាពលរដ្ឋខ្មែរខ្លួនឯងទៀត ទាក់ទងនឹងការរីករាលដាលនៃវីរុសកូរ៉ូណាពីប្រទេសចិន។
សកម្មជនបក្សប្រឆាំងមួយរូប ដែលកំពុងភៀសខ្លួននៅប្រទេសថៃ លោក រិន រដ្ឋ បានបន្ទោសធ្ងន់ៗ ទៅលើរដ្ឋាភិបាលកម្ពុជា ដែលសម្រេចចិត្ត ដោយមិនគិតគូរអំពីអាយុជីវិតរបស់ប្រជា ពលរដ្ឋជាសំខាន់ ដូចរដ្ឋាភិបាលប្រទេសថៃ។ លោកបន្តថា ការមិនផ្អាកជើងហោះហើរ និងមិនជម្លៀសនិស្សិតខ្មែរដែលកំពុងជាប់នៅតំបន់រីករាលដាលនៃវីរុសកូរ៉ូណាក្នុងប្រទេសចិននោះ គឺកាន់តែបង្ហាញយ៉ាងច្បាស់ថា លោក ហ៊ុន សែន សុខចិត្តឲ្យប្រជាពលរដ្ឋខ្មែរស្លាប់ ដោយសារវីរុសកូរ៉ូណា ប៉ុន្តែមេដឹកនាំក្រាញអំណាចរូបនេះ មិនព្រមបាត់បង់ទំនាក់ទំនងជាមួយចិននោះទេ ដើម្បីឲ្យប្រទេសមហាអំណាចកុម្មុយនិស្តមួយនេះ ធ្វើជាខ្នងបង្អែកការពារអំណាចរបស់ខ្លួន៖«រដ្ឋាភិបាលថៃ គេមានផែនការច្បាស់លាស់ គេយកពលរដ្ឋគេជាធំ ហើយគេទប់ស្កាត់វីរុសកូរ៉ូណាដូចជាបិទជើងយន្តហោះជាមួយចិន ហើយយកយន្តហោះទៅ ដឹកជនជាតិគេពីចិនមកវិញ ដូច្នេះរដ្ឋាភិបាលគេទទួលខុសត្រូវណាស់ ប៉ុន្តែយើងក្រឡេកមើលកម្ពុជាយើងវិញ គឺខុសគ្នា។ ខុសគ្នាត្រង់ថា ពិភពលោក ព្រួយបារម្ភជាមួយវីរុសកូរ៉ូណា ប៉ុន្តែលោក ហ៊ុន សែន អត់មានព្រួយបារម្ភទេ អត់មានបិទជើងយន្តហោះ ហើយលើកទឹកចិត្តឲ្យជនជាតិចិនចូលស្រុកខ្មែរទៀត។ ខ្ញុំមានការសោកស្ដាយណាស់ ចំពោះវិធានការរបស់លោក ហ៊ុន សែន មិនគិត អំពីសុខទុក្ខប្រជាពលរដ្ឋ»។
ពលរដ្ឋខ្មែរម្នាក់ទៀតរស់នៅក្នុងប្រទេសជប៉ុន គឺលោកស្រី ម៉ូរី ប៉ូរ៉ា សង្កេតឃើញថា វិធានការការទប់ស្កាត់វីរុសកូរ៉ូណារបស់រដ្ឋាភិបាលជប៉ុន ខុសគ្នាឆ្ងាយដូចមេឃ និងដី បើប្រៀបធៀបជាមួយរដ្ឋាភិបាលលោក ហ៊ុន សែន។ លោកស្រី ពន្យល់ថា ក្រោយប្រទេសចិនផ្ទុះវីរុសកូរ៉ូណាភ្លាម គឺរដ្ឋាភិបាលជប៉ុន បានបញ្ជូនយន្តហោះទៅដឹកពលរដ្ឋរបស់ខ្លួនមកប្រទេសជប៉ុនវិញ ហើយពិនិត្យថែទាំពលរដ្ឋទាំងនោះយ៉ាងយកចិត្តទុកដាក់បំផុត ។ លើសពីនេះ លោកស្រីថា រដ្ឋាភិបាលជប៉ុន បានចាត់វិធានការតឹងរ៉ឹងនានា ដូចជា ផ្អាកជើងហោះហើរជាមួយចិនបណ្ដោះអាសន្ន ដើម្បីកុំឲ្យជនជាតិចិន នាំមេរោគដ៏កាចសាហាវមួយនេះ ចូលប្រទេសជប៉ុន និង ចម្លងដល់ប្រជាពលរដ្ឋរបស់ខ្លួន ព្រមទាំងណែនាំឲ្យប្រជាពលរដ្ឋជប៉ុនឲ្យចេះប្រុងប្រយ័ត្នផងដែរ។ ផ្ទុយទៅវិញលោកស្រីថា រដ្ឋាភិបាលកម្ពុជាហាក់ បានចាត់ទុកអាយុជីវិតរបស់ពលរដ្ឋខ្មែរជារឿងលេងសើច ដោយមិនព្រមផ្អាកជើងហោះហើរជាមួយចិនហើយ ថែមទាំងបង្គាប់ឲ្យនិស្សិតខ្មែរ កុំចាកចេញពីប្រទេសចិន ដើម្បីរួមសុខរួមទុក្ខជាមួយប្រជាជនចិន ដែលកំពុងមានជំងឺឆ្លងទៅវិញ ដែលនេះជារឿងដ៏គួរឱ្យខកចិត្ត៖ «ខ្ញុំមើលទៅគាត់ (លោក ហ៊ុន សែន) អត់ដែលយកចិត្តទុកដាក់អំពីសុខភាព សុខទុក្ខ និងអាយុជីវិតរបស់ប្រជាពលរដ្ឋខ្មែរទេ ។បើគាត់ជាមេដឹកនាំ ដែលស្រលាញ់ប្រជាពលរដ្ឋខ្លួន គាត់មិនប្រើពាក្យសម្តីចឹងទេ ត្រូវមានវិធានការដូចប្រទេសគេផ្សេងៗ។ ខ្ញុំហួសចិត្តមិនដឹងថា រកពាក្យអីនិយាយមិនឃើញ ។បើគាត់ចង់រួមសុខរួមទុក្ខ គឺឲ្យគ្រួសាររបស់ គាត់ទៅរួមសុខរួមទុក្ខទៅ កុំរុញឲ្យពលរដ្ឋដែលគ្នាភ័យខ្លាច»។
ស្រដៀងគ្នានេះ ពលករខ្មែរនៅប្រទេសកូរ៉េខាងត្បូង គឺយុវជន ឡេង វណ្ណៈ រៀបរាប់ថា លោកសោកស្ដាយដែលកម្ពុជាមានមេដឹកនាំដូចលោក ហ៊ុន សែន ដែលលោកចាត់ទុកថា ជាមនុស្សអសមត្ថភាព និងមិនដែលយកចិត្តទុកដាក់អំពីសុខទុក្ខប្រជាពលរដ្ឋតាំងពីដើមមក។ ពលកររូបនេះ ឲ្យដឹងថា នៅពេលមានករណីផ្ទុះវីរុសកូរ៉ូណាពីប្រទេសចិន ឆ្លងរីករាលដាលពេញពិភពលោកបែបនេះ គឺរដ្ឋាភិបាលកូរ៉េ បានយកចិត្តទុក្ខខ្លាំងបំផុត ដើម្បីការពារសុខុមាលភាព និងអាយុជីវិតរបស់មនុស្សគ្រប់រូប ដែលរស់នៅក្នុងប្រទេសកូរ៉េ៖ « រដ្ឋាភិបាលខ្មែរ សព្វថ្ងៃនេះ អសមត្ថភាព ឬក៏ម៉េចមិនដឹងទេ ព្រោះខ្ញុំយល់ឃើញថា គាត់យកជីវិតរបស់ប្រជាពលរដ្ឋទៅលេងសើចជាមួយជំងឺ ដែលពិភពលោក គេខ្លាចព្រួយបារម្ភ។ យើងដឹងទាំងអស់គ្នា ហើយគួរតែស្តីបន្ទោសទៅរដ្ឋាភិបាល ដែលយកជីវិតពលរដ្ឋទៅលេងសើចអ៊ីចឹង។ មិនដឹងថា គាត់ ( លោក ហ៊ុន សែន ) ជាមនុស្សល្ងង់ ឬធ្វើល្ងង់នោះទេ » ។
ពលករខ្មែររូបនេះ មានមន្ទិលសង្ស័យថា នៅកម្ពុជាអាចមានអ្នកជំងឺរលាកផ្លូវដង្ហើម បង្កដោយវីរុស កូរ៉ូណាលើសពីម្នាក់ ព្រោះកម្ពុជាមានភ្ញៀវទេសចរជនជាតិច្រើនបូករួមទាំងអ្នកដែលមករកស៊ី និងរស់នៅកម្ពុជាទៀតផង ប៉ុន្តែរដ្ឋាភិបាលកម្ពុជាទំនងជាលាក់បាំងព័ត៌មាន ឬអាចមកពីប្រព័ន្ធសុខាភិបាលកម្ពុជាខ្សោយពុំមានសមត្ថភាពគ្រប់គ្រាន់ក្នុងពិនិត្យរកឃើញរោគសញ្ញា នៃជំងឺឆ្លងដ៏កាចសាហាវនេះ៖ «ប្រទេសថៃ ប្រទេសផ្សេងៗ គេរកឃើញមេរោគកូរ៉ូណាជាបន្តបន្ទាប់ ចម្លែកអីតែស្រុកខ្មែរ នៅតែមានមួយករណី ទាំងដែលមានជនជាតិចិនចេញចូលនឹងគេដែរ ហើយមានជនជាតិចិនមកពីវូហាន ៣ពាន់នាក់ទៀត។ ខ្ញុំគិតថា គេបិទព័ត៌មានកុំឲ្យយើងដឹង កុំឲ្យពលរដ្ឋភ័យខ្លាច»។
អាស៊ីសេរី បានព្យាយាមទាក់ទងសុំការឆ្លើយតបការចោទប្រកាន់នេះពីប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន និងអ្នកនាំពាក្យក្រសួងសុខាភិបាលពីររូប គឺ អ្នកស្រី ឱ វណ្ណឌីន និងលោក លី សូវ៉ាន់ ព្រមទាំងអ្នកនាំពាក្យក្រសួងការបរទេស លោក កុយ គួង ប៉ុន្តែពុំមានអ្នកទទួលទូរស័ព្ទនោះទេ នៅថ្ងៃទី៣ ខែកុម្ភៈ។
ជំងឺរលាកប្រព័ន្ធដង្ហើម ដែលបង្កដោយវីរុសកូរ៉ូណាថ្មីនេះ បានផ្ទុះឡើងនៅទីក្រុងវូហាន ខេត្តហ៊ូបេ (Hubei) ប្រទេសចិន ចាប់តាំងពីចុងខែធ្នូ ឆ្នាំ២០១៩ ។ គិតត្រឹមថ្ងៃទី៣ ខែកុម្ភៈ វីរុសកូរ៉ូណា បានសម្លាប់មនុស្ស ៣៦០នាក់ក្នុងប្រទេសចិន និងម្នាក់ទៀតនៅប្រទេសហ្វីលីពីន ហើយអ្នកឆ្លងវីរុសនេះ បានកើនដល់ជិត ២ម៉ឺននាក់ហើយ ។ ករណីឆ្លងមេរោគនេះ បានរីករាលដាល ដល់ប្រទេសចំនួន ២៦ នៅលើពិភពលោក រួមទាំងប្រទេសចិនផងដែរ ។ អង្គការសុខភាពពិភពលោក ប្រកាសដាក់ករណីផ្ទុះរីករាលដាលនៃវីរុសកូរ៉ូណាប្រភេទថ្មីជាបញ្ហាអាសន្នសាកលផ្នែកសុខភាព។
ទោះជាយ៉ាងណា រដ្ឋាភិបាលលោក ហ៊ុន សែន ប្រកាសថា អាជ្ញាធរកម្ពុជាពុំមានវិធានការបិទជើងហោះហើរ និងជម្លៀសនិស្សិតខ្មែរពីប្រទេសចិននោះទេ ក្រោមហេតុផលថា ដើម្បីរក្សាកំណើនសេដ្ឋកិច្ច និងទំនាក់ទំនងល្អជាមួយចិន ហើយលោកពុំខ្វល់ចំពោះអ្វីដែលរដ្ឋាភិបាលប្រទេសនានាកំពុងតែធ្វើនោះទេ ។ លោក ហ៊ុន សែន ថែមទាំង បង្គាប់កុំឱ្យនិស្សិតខ្មែរវិលមកកម្ពុជាវិញដោយខ្លួនឯង ដោយត្រូវនៅរួមសុខរួមទុក្ខជាមួយប្រជាជនចិន ហើយលោកថែមទាំងអំពាវនាវកុំឱ្យប្រជាពលរដ្ឋក្នុងប្រទេសកម្ពុជា ភ័យជ្រុលហួសហេតុពេកផងដែរ៖ «អត់មានតម្រូវការនៃការជម្លៀសនិស្សិតខ្មែរ មកកាន់កម្ពុជាទេ ដោយយើងទុកនៅទីនោះ ដែលជាការរួមសុខរួមទុក្ខជាមួយគ្នា ក្នុងការដោះស្រាយបញ្ហានេះ។ បើជម្លៀសនិស្សិត មិនចាំបាច់សុំអាហារូបករណ៍ចិនទៅទៀតទេ ច្បាស់ជាចិននឹងមិនឱ្យទេ។ អាហ្នឹងខ្ញុំប៉ាន់ស្មានទុក ខ្ញុំមិនដឹងថាចិនគាត់គិតយ៉ាងម៉េចទេ។ ក៏ប៉ុន្តែសម្រាប់ខ្ញុំ បើខ្ញុំជាចិន ខ្ញុំអត់ឱ្យ ( អាហារូបករណ៍ ) អ្នកឯងទៀតទេ ព្រោះពេលស្រួលអ្នកឯងមករកខ្ញុំ ពេលលំបាកអ្នកឯងរត់ចោលខ្ញុំ។ បើខ្ញុំជា ស៊ី ជីនពីង ឬ លី ឃើឈាង គឺខ្ញុំអត់ឱ្យទេ !»។
ឆ្លើយតបនឹងការប្រកាសបែបនេះ ប្រធានស្ដីទីគណបក្សសង្គ្រោះជាតិ លោក សម រង្ស៊ី បានរិះគន់លោក ហ៊ុន សែន ថា ជាមេដឹកនាំដែលគិតតែពីរឿងរណបចិន ដើម្បីការពារអំណាចផ្ដាច់ការ និងពុករលួយ ហើយសុខចិត្តទទួលយកហានិភ័យឱ្យប្រជាពលរដ្ឋខ្មែរស្លាប់ដោយសារជំងឺមកពីប្រទេសចិន។ លោកថា សូម្បីតែប្រទេសវៀតណាម រុស្ស៊ី និងប្រទេសមួយចំនួន ដែលមានទំនាក់ទំនងយ៉ាងជិតស្និតជាមួយប្រទេសចិន ក៏ពួកគេបានសម្រេចបិទព្រំដែន មិនឲ្យអ្នកធ្វើដំណើរពីប្រទេសចិន ចូលមកក្នុងប្រទេសគេដែរ ដើម្បីជៀសវាងការឆ្លងជំងឺថ្មីនេះ។ លោក សម រង្ស៊ី ស្ដីបន្ទោសរបបដឹកនាំសព្វថ្ងៃដែលនៅតែអនុញ្ញាតឱ្យអ្នកទេសចរណ៍ និងអ្នកដំណើរពីប្រទេសចិន អាចចេញចូលកម្ពុជាបានតាមចិត្ត ទោះជាពិភពលោកទាំងមូលបានប្រកាសភាពអាសន្ន ទប់ស្កាត់ការរីករាលដាលនៃវីរុសកូរ៉ូណាពីប្រទេសចិនក៏ដោយ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) លោក មឿន តុលា មានប្រសាសន៍ថា អាយុជីវិតរបស់ប្រជាពលរដ្ឋ គឺជារឿងសំខាន់បំផុត ឬជាអាទិភាពទីមួយ ដូច ដែលមានចែងក្នុងរដ្ឋធម្មនុញ្ញ ដូច្នេះលោកថា រដ្ឋាភិបាល ត្រូវតែយកចិត្តទុកដាក់ការពារ និងដោះស្រាយភ្លាមៗ ដោយមិនអាចរង់ចាំទាល់តែមានអ្នកឈឺច្រើន ឬមានអ្នកស្លាប់នោះទេ។ លោកមើលឃើញថា រដ្ឋាភិបាលប្រទេសនានា ដូចជា នៅវៀតណាម ថៃ សិង្ហបុរី កូរ៉េ និងជប៉ុនជាដើម ពិតជាបានយកចិត្តទុកដាក់ខ្លាំងបំផុត ក្នុងការទប់ស្កាត់វីរុសកូរ៉ូណា កុំឲ្យប៉ះពាល់ដល់អាយុជីវិតរបស់ពលរដ្ឋគេ ស្របពេលប្រទេសខ្លះ មិនត្រឹមតែ ហាមជនជាតិចិន មិនឲ្យចូលប្រទេសគេនោះទេ ប៉ុន្តែថែមទាំងហាមជនបរទេសណាក៏ដោយ ឲ្យតែមានប្រវត្តិធ្លាប់នៅប្រទេសចិនក្នុងអំឡុងពេល ផ្ទុះវីរុសកូរ៉ូណា ក៏មិនអនុញ្ញាតឱ្យចេញចូលប្រទេសគេដោយសេរីដែរ។ លោក មឿន តុលា ថ្លែងបន្តថា ប្រទេសណាក៏បារម្ភពីសេដ្ឋកិច្ចដែរ ប៉ុន្តែរដ្ឋាភិបាល ត្រូវថ្លឹងថ្លែងថា អាយុជីវិតពលរដ្ឋម្នាក់ៗ គឺសំខាន់ជាងលុយ ហើយត្រូវតែការពារដាច់ខាត៖«គួរតែផ្អាកជើងយន្តហោះពីចិនសិនទៅ វាមិនមែនជាការរើសអើងជនជាតិចិនទេ សុំយករឿងចែកគ្នាឲ្យដាច់ សូម្បីតែអង្គការសុខភាពពិភពលោក គេក៏បញ្ជាក់ដែរថា វាមិនមែនជារឿងមួយ ដែលប្រឆាំងចិនទេ ប៉ុន្តែត្រូវតែពួតដៃគ្នាទប់ស្កាត់វីរុសនេះ ព្រោះកាលណាជំងឺឆ្លងកាន់តែច្រើនទៅៗ វាធ្វើឲ្យប៉ះពាល់សេដ្ឋកិច្ចពិភពលោកដែរ។ ជាពិសេស ត្រូវតាមដានមើលចំណាត់ការប្រទេសនានា ជាពិសេស ប្រទេសសិង្ហបុរី គេមានចំណាត់ការល្អណាស់»។
ជាមួយគ្នានេះ លោក មឿន តុលា ក៏សម្ដែងការសោកស្ដាយដែរ ដែលកាលពីសប្ដាហ៍មុន លោកនាយករដ្ឋមន្ត្រី ហ៊ុន សែន បានថ្លែងថា នឹងពុំមានការជម្លៀសនិស្សិតខ្មែរពីប្រទេសចិន និងមិនឲ្យអ្នកកាសែតពាក់ម៉ាស់ការពារក្នុងពេលលោកធ្វើសន្និសីទកាសែតជាដើម។ លោក យល់ថា វិធានការជម្លៀសនិស្សិតខ្មែរចេញពីប្រទេសចិន គឺជាកាតព្វកិច្ចដែលរដ្ឋាភិបាលត្រូវតែធ្វើ ដើម្បី ជួយពលរដ្ឋរបស់ខ្លួនពីគ្រោះថ្នាក់ និងថែមទាំងជួយសម្រាលបន្ទុករបស់រដ្ឋាភិបាលចិនផងដែរ។ ចំណែករឿងពាក់ម៉ាស់វិញ លោកថា គឺជាសិទ្ធិ និងជារឿងអាយុជីវិតរបស់គេ ម្នាក់ៗ ហើយ ជាពិសេស រដ្ឋាភិបាលគួរតែលើកទឹកចិត្តឲ្យពលរដ្ឋគ្រប់រូបពាក់ម៉ាស់ការពារថែមទៀត៖«ខ្ញុំឃើញសម្ដេចនាយករដ្ឋមន្ត្រី ថា មិនមានការជម្លៀសពលរដ្ឋខ្មែរចេញពីវូហាន ហើយបើសិនជាលោក ស៊ី ជិនពីង វិញ នឹងមិនឲ្យអាហារូបករណ៍ និងថា គេកំពុងមានទុក្ខ យើងមិនគួរចេញ ខ្ញុំគិតថា យើងគួរកែទម្លាប់មួយ រឿងគុណជារឿងផ្សេងរឿងអាយុជីវិតមនុស្សជារឿងផ្សិង ដូចខ្ញុំបានលើកឡើងអ៊ីចឹងថា អាយុជីវិតមនុស្សចាត់ទុកជាអាទិភាពទី១។ អារឿងគុណស្រ័យយើងអាចសងគុណគេ យើងអាចជួយគេ ដូចជា វៀតណាម គេបានប្រកាសផ្ដល់ថវិកាមួយចំនួនដល់ចិន ដើម្បីជួយកម្ចាត់វីរុសនេះ ដូច្នេះយើងអាចជួយតាមរយៈនេះ ប៉ុន្តែ យើងកុំយកអាយុជីវិតរបស់ប្រជាពលរដ្ឋយើង ទៅដោះដូរជាមួយអាគុណស្រ័យអស់ហ្នឹង ឬអាហារូបករណ៍អីប៉ុណ្ណឹង។កាលណាយកអាយុជីវិតរបស់ប្រជាពលរដ្ឋយើងទៅដោះដូរជាមួយអាគុណស្រ័យអស់ហ្នឹង ដូចជា អសីលធម៌ណាស់ អត់មានការទទួលខុសត្រូវចំពោះពលរដ្ឋ»។
រដ្ឋធម្មនុញ្ញមាត្រា៣៣ ចែងថា ប្រជាពលរដ្ឋខ្មែរដែលកំពុងរស់នៅនៅឯបរទេស ត្រូវបានរដ្ឋគាំពារ ហើយមាត្រា ៣៥ ចែងទៀតថា សេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយដោយហ្មត់ចត់ដោយអង្គការរដ្ឋ។ ស្របតាមន័យនេះ សង្គមស៊ីវិលអះអាងថា រដ្ឋាភិបាលលោក ហ៊ុន សែន មានកាតព្វកិច្ចជម្លៀសក្រុមនិស្សិតខ្មែរចំនួន២៣ នាក់ ដែលកំពុងជាប់នៅក្រុងវូហាន (Wuhan) ទីដែលកំពុងមានការរីករាលដាលខ្លាំងនៃវីរុសកូរ៉ូណា ដោយសារតែពួកគេបានដង្ហោយរកអន្តរាគមន៍នេះពីរដ្ឋាភិបាលកម្ពុជាម្ដងហើយម្ដងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។