ព្រះអង្គ បូរ បេត បាននិមន្តចាកចេញពីប្រទេសថៃដោយសុវត្ថិភាពហើយកាលពីយប់រំលងអធ្រាត្រថ្ងៃទី១២ ខែធ្នូ។ ពេលនេះ ព្រះអង្គកំពុងគង់នៅលើយន្តហោះធ្វើដំណើរឆ្ពោះទៅកាន់ប្រទេសស៊្វីស (Switzerland) ជាទឹកដីសេរីភាពដែលព្រះអង្គទទួលបានសិទ្ធិជ្រកកោនផ្នែកនយោបាយ។
ព្រះអង្គមានសង្ឃដីកាប្រាប់វិទ្យុអាស៊ីសេរី នៅមុនពេលនិមន្តឡើងយន្តហោះថា ពេលនេះព្រះអង្គមានសុវត្ថិភាពស្ទើរតែ ១០០ភាគរយ។ ព្រះអង្គបញ្ជាក់ថា អាជ្ញាធរអន្តោប្រវេសន៍ថៃ បានអនុញ្ញាតឱ្យព្រះអង្គចាកចេញពីប្រទេសថៃ ក្រោយពីមានកិច្ចសម្របសម្រួល និងការឃ្លាំមើលពីតំណាងស្ថានទូតស៊្វីសប្រចាំប្រទេសថៃ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិជនភៀសខ្លួន (UNHCR) និងអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃស៍ វ៉ច្ឆ (Human Rights Watch)។
ព្រះអង្គ បូរ បេត មានសង្ឃដីកាថា នៅពេលដែលព្រះអង្គទៅដល់ទឹកដីនៃប្រទេសស៊្វីស ព្រះអង្គនឹងនិមន្តទៅគង់នៅវត្តជាមួយព្រះតេជព្រះគុណ លួន សុវ៉ាត។ ព្រះអង្គប្តេជ្ញាថា ព្រះអង្គនឹងនៅតែបន្តធ្វើសកម្មភាពចូលរួមជួយសង្គមកម្ពុជាដដែល បើទោះបីជាព្រះអង្គទៅដល់ប្រទេសស៊្វីសហើយក៏ដោយ៖ « ចំណាប់អារម្មណ៍អាត្មាពេលនេះ និយាយទៅ អាត្មានៅតែរឹងមាំដដែល ហើយសប្បាយចិត្តដែរ ដោយសារបើសិនជាយើងរស់នៅលើទឹកដីថៃទៀត គេនឹងចាប់បញ្ជូនយើងទៅស្រុកខ្មែរវិញ។ គេទុកឱ្យអាត្មានៅបានយ៉ាងយូរត្រឹមមួយខែ ដាច់ខែនេះអ៊ីចឹង។ ដល់ពេលខាងទូត ខាងអង្គការគេជំរុញអាត្មាភ្លាមមានន័យថា ចំណាប់អារម្មណ៍ពេលនេះសប្បាយចិត្ត តែការងារដែលយើងធ្លាប់ធ្វើកន្លងមក ការតស៊ូមតិ ការពារព្រៃឈើ ហើយនឹងបញ្ហាដីធ្លីនៅស្រុកខ្មែរជាដើម ជាពិសេស គឺបញ្ហាស្ថានការណ៍នយោបាយ គឺអាត្មានៅតែចូលរួម នៅតែតាមដាន នៅតែនិយាយ នៅតែសរសេរផុសតាមបណ្តាញសង្គមហ្វេសប៊ុក តិចឬច្រើនយ៉ាងណា តែអាត្មានៅតែបញ្ចេញមតិពីហ្នុងមក »។
ព្រះអង្គ បូរ បេត ថ្លែងអំណរគុណដល់ប្រទេសស៊្វីស ដែលបានយល់ព្រមទទួលយកព្រះអង្គទៅជ្រកកោននៅលើទឹកដីរបស់ខ្លួន។ ព្រះអង្គក៏បានថ្លែងអំណរគុណដល់អង្គការជាតិ និងអន្តរជាតិ ព្រមទាំងពលរដ្ឋខ្មែរទាំងអស់ដែលបានតាមដាន និងឃ្លាំមើលករណីព្រះអង្គកាលពីពេលកន្លងមក។ ទន្ទឹមនឹងនេះ ព្រះអង្គស្នើឱ្យប្រទេសថៃ និងអាជ្ញាធរនៃប្រទេសនេះ ធ្វើយ៉ាងណាត្រូវតែគោរពសិទ្ធិមនុស្ស ជាពិសេស សិទ្ធិរបស់ជនភៀសខ្លួន និងត្រូវបញ្ឈប់រាល់ការធ្វើទុក្ខបុកម្នេញណាមួយមកលើជនភៀសខ្លួន ដែលគួរតែទទួលបាននូវកិច្ចគាំពារជាពិសេស ដោយមិនត្រូវចាប់បញ្ជូនពួកគេទៅប្រទេសដើមវិញឡើយ។ បើពុំនោះទេ ព្រះអង្គមានសង្ឃដីកាថា ប្រទេសថៃនឹងរងនូវការរិះគន់ពីសហគមន៍អន្តរជាតិ។
ព្រះអង្គ បូរ បេត ត្រូវបានអាជ្ញាធរថៃចាប់ព្រះកាយ និងផ្សឹកកាលពីថ្ងៃទី១ ខែធ្នូ ទាំងដែលព្រះអង្គទទួលបានសិទ្ធិជាជនភៀសខ្លួនពីឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន។ ព្រះអង្គត្រូវបានដោះលែងឱ្យមានសេរីភាពវិញ កាលពីថ្ងៃទី៣ ខែធ្នូ ក្រោយពីមានប្រតិកម្ម និងអន្តរាគមន៍ជាច្រើនពីអង្គការអន្តរជាតិ និងតំណាងរាស្ត្រប្រទេសថៃផង។ ព្រះអង្គបានភៀសព្រះកាយមកគង់នៅប្រទេសថៃ កាលពីខែវិច្ឆិកា ឆ្នាំ២០២០ ដើម្បីគេចពីការតាមចាប់របស់អាជ្ញាធរកម្ពុជា ក្រោយពេលព្រះអង្គបានចូលរួមតវ៉ាដោយសន្តិវិធីទាមទារឱ្យដោះលែងមេដឹកនាំសហជីពលោក រ៉ុង ឈុន។ ក្នុងពេលគង់នៅប្រទេសថៃ ព្រះអង្គតែងតែបង្ហោះសាររិះគន់រដ្ឋាភិបាលលោក ហ៊ុន សែន ក្នុងរឿងរំលោភសិទ្ធិមនុស្ស និងបំផ្លាញប្រជាធិបតេយ្យ ព្រមទាំងបំផ្លិចបំផ្លាញធនធានធម្មជាតិជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។