សហគមន៍ខ្មែរនៅអូស្ត្រាលីអះអាងថា បាតុកម្មរបស់ពួកគេទទួល បានជោគជ័យព្រោះរដ្ឋាភិបាលអូស្ត្រាលីសម្រេចមិនបញ្ជូនអគ្គរដ្ឋទូត ឬតំណាងទូតទៅចូលរួមក្នុងកិច្ចប្រជុំថ្ងៃដំបូងនោះទេ។ ការសម្រេចរបស់រដ្ឋាភិបាលអូស្រ្តាលីបែបនេះ ស្របពេលដែលសហគមន៍ខ្មែរនៅអូស្ត្រាលីធ្វើបាតុកម្មស្នើសុំមិនឲ្យរដ្ឋាភិបាលអូស្ត្រាលីបញ្ជូនអគ្គរដ្ឋទូតរបស់ខ្លួនចូលរួមកិច្ចប្រជុំសភាថ្ងៃដំបូងនៃរបបក្រុងភ្នំពេញ។
ក្រុមបាតុករខ្មែរអូស្រ្តាលីឲ្យដឹងថា ខណៈក្រុមបាតុករជួបជុំធ្វើបាតុកម្មនៅមុខរដ្ឋសភាថ្ងៃទី៤ ខែកញ្ញា ក្រសួងការបរទេសអូស្ត្រាលីបានផ្តល់ដំណឹងមកក្រុមបាតុករថា រដ្ឋាភិបាលអូស្ត្រាលីសម្រេចមិនបញ្ជូនអគ្គរដ្ឋទូត ឬតំណាងទូតទៅចូលរួមក្នុងកិច្ចប្រជុំថ្ងៃដំបូងនោះទេ។
តំណាងរាស្ត្រខ្មែរ-អូស្ត្រាលីប្រចាំរដ្ឋវ៉ិកតូរីយ៉ា (Victoria) លោក ហុង លីម ជាអ្នកផ្តួចផ្តើមការធ្វើបាតុកម្មនេះ ឲ្យអាស៊ីសេរីដឹងថា បាតុករជាង ២០០នាក់បានចូលរួមក្នុងការធ្វើបាតុកម្មនេះ។ លោកយល់ថា ចំនួនបាតុករ គឺមានច្រើនព្រោះការទាមទារនេះធ្វើឡើងចំថ្ងៃធ្វើការ ហើយកន្លែងបាតុកម្មក៏នៅឆ្ងាយពីមូលដ្ឋានពលរដ្ឋខ្មែរអូស្ត្រាលីរស់នៅ។ លោកឲ្យដឹងទៀតថា តំណាងរាស្រ្ត រដ្ឋមន្រ្តី និងមន្រ្តីក្រសួងការបទេសអូស្រ្តាលីបានចេញមកទទួលញត្តិរបស់បាតុករ៖ «»
ការធ្វើបាតុកម្មរបស់ពលរដ្ឋខ្មែរនៅអូស្រ្តាលីនៅពេលនេះ ក្រៅពីស្នើមិនឲ្យរដ្ឋាភិបាលអូស្ត្រា លីបញ្ជូនអគ្គរដ្ឋទូតរបស់ខ្លួនចូលរួមកិច្ចប្រជុំសភាថ្ងៃដំបូងនៃរបបក្រុងភ្នំពេញហើយ វាក៏ជាការទាមទារទៅរដ្ឋាភិបាលអូស្ត្រាលីមិនឲ្យទទួលស្គាល់របបថ្មីរបស់លោក ហ៊ុន សែន ដែលគណៈ រដ្ឋមន្រ្តីថ្មីនឹងកើតឡើងក្រោយមួយថ្ងៃនៃការប្រជុំសភាលើកដំបូងថ្ងៃទី៥ ខែកញ្ញា។ បាតុកម្មនេះដែរ ក្រុមបាតុករក៏បានផ្ញើសារទៅរបបក្រុងភ្នំពេញអនុញ្ញាតឲ្យមានប្រជាធិបតេយ្យនៅកម្ពុជាឡើងវិញ និងត្រូវដោះលែងប្រធានគណបក្សសង្រ្គោះជាតិ គឺលោក កឹម សុខា។
បាតុករម្នាក់និយាយក្នុងពេលធ្វើបាតុកម្មនោះថា លោករំពឹងថា ការទាមទាររបស់លោកនៅថ្ងៃ នេះនឹងជំរុញទៅរដ្ឋាភិបាលអូស្ត្រាលីធ្វើយ៉ាងណាឲ្យប្រទេសកម្ពុជាមានលទ្ធិប្រជាធិបតេយ្យឡើងវិញ។ លោកថា ក្នុងនាមលោកជាកូនខ្មែរម្នាក់ លោកនៅតែចូលរួមទាមទារបន្តទៀត រហូតដល់របបលោក ហ៊ុន សែន ដើរមកផ្លូវត្រឹមត្រូវឡើងវិញ៖ «»
ខណៈរបបក្រុងភ្នំពេញរៀបចំបើកកិច្ចប្រជុំរដ្ឋសភានីតិកាលទី៦ ថ្ងៃដំបូងរបស់ខ្លួននៅព្រឹកថ្ងៃទី៥ ខែកញ្ញា ក្រោមព្រះរាជវត្តមាន ព្រះបាទសម្តេចព្រះ នរោត្តម សីហមុនី ដែលទ្រង់គង់ជារាជាធិបតី។ ក្រុមប្រទេសមហាអំណាច និងប្រធិបតេយ្យធំៗ រួមមាន ស្ថានទូតអាមេរិក និងអឺរ៉ុបប្រចាំនៅកម្ពុជា បានប្រកាសខ្លួនថា មិនចូលរួមក្នុងកិច្ចប្រជុំនេះទេ។
អ្នកនាំពាក្យទីស្តីការគណៈរដ្ឋមន្ត្រីនៃរបបក្រុងភ្នំពេញ លោក ផៃ ស៊ីផាន និយាយថា ការសម្រេចមិនចូលរួមប្រជុំរបស់ស្ថានទូតណាមួយ គឺជាការសម្រេចចិត្តរបស់ភ្ញៀវប៉ុណ្ណោះ ព្រោះសភាកម្ពុជានៅតែបន្តកិច្ចប្រជុំ និងភាពស្របច្បាប់របស់ខ្លួនដដែល។
ទោះបែបនេះក្តី លោក ហុង លីម តំណាងរាស្ត្រខ្មែរ-អូស្ត្រាលីប្រចាំរដ្ឋវិកតូរីយ៉ា (Victoria) លោក ហុង លីម យល់ថា អវត្តមានរបស់តំណាងទូតនៃក្រុមប្រទេសអូស្រ្តាលី និងប្រទេស ប្រជាធិបតេយ្យក្នុងពិធីបើករដ្ឋសភាក្លែងក្លាយរបស់លោក ហ៊ុន សែន នេះ គឺជាការទះកំផ្លៀង មុននឹងលោក ហ៊ុន សែន ស្រាតខោដើរទៅចូលរួមក្នុងកិច្ចប្រជុំនៅអង្គការសហប្រជាជាតិ និងសហគមន៍អឺរ៉ុបនាចុងខែកញ្ញាខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។