មន្រ្តីគណបក្សសង្រ្គោះជាតិចោទប្រកាន់បក្សកាន់អំណាចថា កំពុងរៀបចំបន្តកាន់អំណាចផ្តាច់ការ ដោយផាត់ចោលសម្លេងប្រជាពលរដ្ឋដែលចង់ឱ្យមានការផ្លាស់ប្តូរតាមការបោះឆ្នោតដោយសេរី ត្រឹមត្រូវ និងយុត្តិធម៌។
តំណាងរាស្រ្តគណបក្សសង្រ្គោះជាតិ កំពុងរស់នៅសហរដ្ឋអាមេរិកលោក អ៊ំ សំអាន ថ្លែងថា គណបក្សប្រឆាំងតស៊ូអហិង្សា និងជំរុញឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌ ស្របតាមឆន្ទៈម្ចាស់ឆ្នោត ដើម្បីកុំឱ្យលោក ហ៊ុន សែន ងាកចេញពីគន្លងប្រជាធិបតេយ្យ និងគោរពសិទ្ធិមនុស្ស។ លោកបន្តថា ការលើកឡើងរបស់លោក ហ៊ុន សែន នេះគឺមានបំណងរៀបចំការបោះឆ្នោតបង្រ្គប់កិច្ច ដើម្បីបន្តកាន់អំណាចផ្តាច់ការតវង្សត្រកូល ព្រោះលោក ហ៊ុន សែន ដឹងថាពលរដ្ឋមិនបោះឆ្នោតគាំទ្រ។
មន្រ្តីគណបក្សប្រឆាំងរូបនេះមើលឃើញថា មេដឹកនាំនគរបាលជាតិមួយចំនួនបានចូលដៃនឹងលោក ហ៊ុន សែន បំផ្លាញប្រជាធិបតេយ្យ និងរំលោភសិទ្ធិមនុស្ស ដែលធ្វើឱ្យសហរដ្ឋអាមេរិក និងសហគមន៍អឺរ៉ុប បានដាក់ទណ្ឌកម្មជាបន្តបន្ទាប់មកលើរបបនេះ។ ប៉ុន្តែលោកថា មន្រ្តីគរបាលមួយចំនួនក៏មិនពេញចិត្តចំពោះការដឹកនាំរបស់លោក ហ៊ុន សែន ព្រោះពួកគាត់ក៏យល់អំពីទុក្ខលំបាករបស់ប្រជាពលរដ្ឋខ្មែរដែរ៖ «កងនគរបាលជាតិមួយចំនួនជាពិសេសមេៗមួយចំនួនគឺ ដើម្បីរក្សាអំណាច បុណ្យស័ក្តិរបស់គាត់ហ្នឹងផ្គាប់ចិត្តលោក ហ៊ុន សែន បានរំលោភសិទ្ធិមនុស្ស បានចូលរួមបំផ្លាញប្រជាធិបតេយ្យ ចឹងបានជាមានការដាក់ទណ្ឌកម្ម ប៉ុន្តែយើងឃើញកន្លងមកនេះខាងកងកម្លាំងប្រដាប់អាវុធថ្នាក់ក្រោមហ្នឹង គឺថានគរបាលមានការគាំទ្រគណបក្សសង្គ្រោះជាតិយ៉ាងច្រើនថ្វីត្បិតគាត់មិនបានចេញឈ្មោះក៏ដោយ » ។
ការលើកឡើងនេះបន្ទាប់ពីលោក ហ៊ុន សែន បញ្ជាក់ក្នុងសារជូនពរកងកម្លាំងនគរបាលជាតិក្នុងឱកាសរំឭកខួបអនុស្សាវរីយ៍ ៧៦ ថ្ងៃកំណើតនគរបាលជាតិកម្ពុជា។ កម្ពុជាត្រូវត្រៀមរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណាត្តិទី៥ ឆ្នាំ២០២២។ លោកចោទថា ក្រុមឧទ្ទាមក្បត់ជាតិចង់វាយប្រហារ ការរៀបចំបោះឆ្នោតនេះ។ លោកថា ស្ថានការណ៍ទោះបីតិចឬច្រើន ផ្ទាល់ឬប្រយោល សុទ្ធតែមានផលប៉ះពាល់ដល់សន្តិសុខផ្ទៃក្នុង ដែលបញ្ហាទាំងអស់នេះ តម្រូវឱ្យកងកម្លាំងនគរបាលជាតិ ទប់ស្កាត់ និងបង្រ្កាបឱ្យទាន់ពេលវេលា។
អាស៊ីសេរីមិនអាចទាក់ទងអ្នកនាំពាក្យអគ្គស្នងការនគរបាលជាតិលោក ឆាយ គឹមខឿន ដើម្បីសុំការបញ្ជាក់រឿងនេះ បានទេ នៅថ្ងៃទី១៥ ខែឧសភា។
របបលោក ហ៊ុន សែន បានរំលាយគណបក្សសង្គ្រោះជាតិដែលមានអ្នកគាំទ្រជិតពាក់កណ្តាលប្រទេស កាលពីចុងឆ្នាំ២០១៧ រួចរៀបចំការបោះឆ្នោតដោយប្រមូលយកអាសនៈសភាទាំងស្រុងមកកាន់កាប់តែម្នាក់ឯង។ របបនេះបានបំបិទសិទ្ធិថ្នាក់ដឹកនាំគណបក្សប្រឆាំងចំនួន ១១៨ នាក់ មិនឱ្យធ្វើនយោបាយរយៈពេល៥ ឆ្នាំ និងដកហូតយកអាសនៈពីថ្នាក់មូលដ្ឋានរហូតដល់ថ្នាក់ជាតិរបស់បក្សសង្គ្រោះជាតិទៅចែកគ្នាកាន់កាប់។ មកដល់ពេលនេះ ថ្នាក់ដឹកនាំ និងសកម្មជនបក្សប្រឆាំងជាច្រើនរូប កំពុងជាប់បណ្តឹងនៅតុលាការ ក្រោមបទចោទញុះញង់ និងរួមគំនិតក្បត់ ក្នុងនោះមួយចំនួនកំពុងជាប់ឃុំក្នុងពន្ធនាគារ រត់ភៀសខ្លួននៅក្រៅប្រទេសជាដើម។
ជុំវិញរឿងនេះ នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា កងកម្លាំងនគរបាលជាតិ ដើរតួនាទីរក្សាសន្តិសុខសុវត្ថិភាពជូនសង្គមជាតិដោយមិនរើសអើងគណបក្សនយោបាយ ប៉ុន្តែមន្រ្តីមួយចំនួនរងការរិះគន់ពីប្រជាពលរដ្ឋផងដែរ។ លោកបន្តថាមន្រ្តីដែលប្រព្រឹត្តខុស គួរយកមកផ្តន្ទាទោសតាមច្បាប់ ដើម្បីប្រជាពលរដ្ឋទទួលបានយុត្តិធម៌ និងសិទ្ធិស្មើគ្នា ដោយគ្មានការរើសអើងនិន្នាការនយោបាយ៖ «ជាបុគ្គលជាកងកម្លាំងណាដែលធ្វើខុសច្បាប់រំលោភបំពានទៅលើប្រជាពលរដ្ឋហ្នឹង អនុវត្តតាមផ្លូវច្បាប់ដូចពលរដ្ឋទៅ កងកម្លាំងនគរបាលហ្នឹងត្រូវតែអនុវត្តតួនាទីរបស់ខ្លួនការពារផលប្រយោជន៍របស់ប្រជាពលរដ្ឋឱ្យស្មើគ្នាគ្រប់រូប ដោយមិនមានការរើសអើងនិន្នាការនយោបាយទេ ប្រសិនជាពួកគាត់មានបញ្ហា ឬក៏មានបទល្មើសកើតឡើង ត្រូវអនុវត្តឱ្យស្មើគ្នាចំពោះពួកគាត់ហើយទទួលភាពយុត្តិធម៌ក៏ដូចជាសិទ្ធិស្មើគ្នា » ។
លោក អំ សំអាត បញ្ជាក់ថា រដ្ឋាភិបាលរងការរិះគន់ពីសហគន៍អន្តរជាតិ ពិសេសក្រុមប្រឹក្សាសិទ្ធិមនុស្សអង្គការសហប្រជាជាតិ ទាក់នឹងការបង្រ្កាប និងការចោទប្រកាន់លើគណបក្សប្រឆាំងជាបន្តបន្ទាប់។ លោកក៏បានជំរុញឱ្យអ្នកនយោបាយគ្រប់ភាគីគួររកដំណោះស្រាយវិបត្តិនយោបាយ ដើម្បីឈានទៅរកការបោះឆ្នោតដោយសេរី ត្រឹមត្រូវ និងយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។