មន្រ្តីជាន់ខ្ពស់របស់អង្គការឃ្លាំមើលការបោះឆ្នោតអះអាងថា ការប្រើប្រាស់សម្ដីធ្វើយុទ្ធនាការឃោសនាបោះឆ្នោតជាជម្រើសល្អមួយក្នុងការដណ្តើមអំណាចដោយអហិង្សា។ ការអះអាងនេះធ្វើឡើង ក្រោយពេលលោក ហ៊ុន សែន ព្រមានដល់គណបក្សតូចតាច ដែលទើបនឹងបង្កើតដទៃទៀត កុំឲ្យបន្ទោសបង្អាប់គោលនយោយបាយ បក្សកាន់អំណាចរបស់លោក។
អ្នកសម្របសម្រួលផ្នែកអង្កេតរបស់អង្គការឃ្លាំមើលការបោះឆ្នោត ខុមហ្វែ្រល (COMFREL) លោក កន សាវាង្ស មានប្រសាសន៍ថា ការរិះគន់គោលនយោបាយគណបក្សប្រកួតប្រជែង ការប្រើប្រាស់គោលនយោបាយរបស់គណបក្សនីមួយៗ ក្នុងការប្រកួតប្រជែង ឬវែកញែកនោះ វាជាយុទ្ធសាស្រ្តដ៏ល្អបំផុត និងដោយសន្តិវិធី ដើម្បីជៀសវាងការប្រើកំលាំងប្រដាប់អាវុធ សំរាប់ប្រទេសមួយដែលប្រកាន់របបប្រជាធិបតេយ្យ៖ « គេអត់យកកំលាំងទាហាន ឬកំលាំងអំណាចរបស់ខ្លួនយកទៅប្រកួតប្រជែងនោះទេ គេយកគោលនយោបាយរបស់ខ្លួនទៅប្រកួតប្រជែង។ នៅប្រទេសប្រជាធិបតេយ្យ គឺគេប្រកួតប្រជែងគ្នាតែខាងគោលនយោបាយហ្នឹង។ »
ការអះអាងរបស់មន្រ្តីឃ្លាំមើលការបោះឆ្នោតរូបនេះធ្វើឡើងក្រោយពេលលោក ហ៊ុន សែន បានព្រមានគណបក្សនយោបាយទាំងអស់ថា គួធ្វើខ្លួនឲ្យដូចជាពាណិជ្ជករប្រឹងប្រែងផ្សព្វផ្សាយពីគោលនយោបាយរបស់ខ្លួន ជាជាងការបង្អាប់គោលនយោបាយរបស់បក្សអ្នកដទៃនោះ។
លោក ហ៊ុន សែន គំរាមថាប្រសិនបើគណបក្សទាំងឡាយចង់សុខខ្លួន មិនត្រូវវាយប្រហារគណបក្សដទៃនោះទេ ជាពិសេស គឺគណបក្សកាន់អំណាចតែម្តង៖ « ខ្ញុំសូមឲ្យអ្នកនយោបាយនានា តាំងខ្លួនជាអ្នកលក់ទំនិញ ឃោសនាតែពីទំនិញល្អៗ របស់ខ្លួនបានហើយ កុំបង្អាប់ទំនិញអ្នកដទៃ ព្រោះអ្នកនឹងបង្កើតរឿងជាមួយអ្នកដទៃហើយ។ យកល្អយើងលើកតែពីគោលនយោបាយរបស់យើងបានហើយ កុំបង្អាប់អ្នកដទៃ »។
ការគំរាមរបស់លោក ហ៊ុន សែន ធ្វើឡើងនៅព្រឹកថ្ងៃទី២២ ខែមិថុនា ខណៈលោកប្រគល់សញ្ញាប័ត្រដល់និស្សិតសាកលវិទ្យាល័យភូមិន្ទភ្នំពេញចំនួនជាងបីពាន់នាក់ ដោយខឹងសម្បារជាខ្លាំង ចំពោះមន្រ្តីរបស់គណបក្សនយោបាយមួយ ដែលបានចូល Comment នៅក្នុង Facebook របស់លោកកាលពីយប់ថ្ងៃទី២១ ខែមិថុនា ដែលលោកមិនបានបញ្ចេញឈ្មោះនោះ បានរិះគន់គោលនយោបាយរបស់គណបក្សប្រជាជនកម្ពុជាថា ប្រសិនបើគណបក្សមួយនោះឈ្នះឆ្នោត គណបក្សនោះនឹងធ្វើឲ្យតម្លៃប្រេងសាំងថ្លាក់ថៃ្លចំនួន ១ពាន់ ៥រយរៀល។
ប៉ុន្តែ លោក បណ្ឌិត ឡៅ ម៉ុងហៃ អ្នកវិភាគឯករាស្យ និងជាអតីតទីប្រឹក្សារបស់ប្រធានគណបក្សសង្គ្រោះជាតិ លោក កឹម សុខា នោះ អះអាងថា ការព្រមានរបស់លោក ហ៊ុន សែន ទៅលើគណបក្សដទៃ មិនឲ្យរិះគន់គោលនយោបាយបក្សរបស់លោកនោះ គឺមិនមានអ្វីថ្មីនោះទេ លោកបានប្រើភាសាបែបនេះសឹងគ្រប់អាណត្តិ នៃការបោះឆ្នោតទៅហើយ។ លោកបន្តថា ការសំឡុតគំរាមកំហែង និងការបំភិតបំភ័យផ្នែកនយោបាយទៅលើគណបក្សទាំងឡាយ ដែលណាមាននិន្នាការផ្ទុយ គឺផ្ទុយទៅនឹងស្តង់ដារប្រជាធិបតេយ្យ។
បណ្ឌិត ឡៅ ម៉ុងហៃ ទទួលស្គាល់គណបក្សកាន់អំណាចសព្វថ្ងៃថា ជាគណបក្សដែលមានភាពចាស់ទុំខាងការដឹកនាំបែបកុម្មុយនីស្ត ប៉ុន្តែក្មេងខ្ចីខាងលទ្ធិប្រជាធិបតេយ្យនៅឡើយ៖ « ភាពចាស់ទុំមាន គឺយើងត្រូវទទួលស្គាល់។ គាត់មានភាពចាស់ទុំយូរណាស់ហើយ។ ប៉ុន្តែចាស់ទុំហ្នឹងក្នុងរបបអី ? បើចាស់ទុំក្នុងរបបកុម្មុយនីស្តផ្តាច់ការហ្នឹង គឺម្យ៉ាងទៅ ហើយអាចាស់ទុំក្នុងរបបប្រជាធិបតេយ្យសេរី ពហុបក្សហ្នឹង វាម៉្យាងទៅ។ ប្រសិនបើក្នុងប្រព័ន្ធកុម្មុយនីស្តហ្នឹង គឺគាត់មានភាពចាស់ទុំជាងគេ ជាងឯងហើយ។ ប៉ុន្តែ ក្នុងប្រព័ន្ធប្រជាធិបតេយ្យសេរី ពហុបក្ស ហ្នឹង គឺនៅក្មេងខ្ចី បាទ »។
ការបោះឆ្នោតជាតិនៅកម្ពុជា នឹងចូលមកដល់នៅសល់តែជាង ១ខែទៀតប៉ុណ្ណោះ។ រហូតមកទល់ពេលនេះ យ៉ាងហោចណាស់មានគណបក្សចំនួន ២០ ចូលរួមប្រកួតប្រជែងការបោះឆ្នោត ខណៈអាជ្ញាកណ្តាលនៃបោះឆ្នោតក្នុងអាណត្តិនេះ បានរងការរិះគន់ជាខ្លាំងថា គ្រប់គ្រងទៅដោយក្រុមមន្រ្តីរបស់កាន់អំណាច ហើយរីឯច្បាប់ស្តីពីការបោះឆ្នោតត្រូវបានរបបលោក ហ៊ុន សែន កែក្រឡៃដែលអាចរម្លាយគណបក្សមួយណាក៏បាន ប្រសិនបើខ្លួនចង់លាបពណ៌ថា បក្សនោះ បានប្រព្រឹត្តអំពើល្មើសច្បាប់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។