ពលរដ្ឋអ្នកប្រើប្រាស់បណ្ដាញសង្គមជាច្រើនរួមគ្នាឧទ្ទេសនាមស្ត្រីវ័យ១០២ឆ្នាំ ដែល មានឈ្មោះថា សួង ខិន ថា ជាព្រះម៉ែជាតិខ្មែរពិតប្រាកដ។
ពួកគាត់បានសរសេរសារបង្ហោះព្រោងព្រាតកោតសរសើរផង លើកទឹកចិត្តផង ដោយថា អ្នកម៉ែរូបនេះ ក្លាហានមានមនសិការខ្ពស់ចំពោះជាតិមាតុភូមិ ការពារទឹកដីរបស់ខ្មែរ។ ជាពិសេសទៀតនោះ អ្នកម្តាយរូបនេះអប់រំកូន កុំឲ្យរត់ចោលប្រទេសជាតិ កុំគេចចេញពីបញ្ហា ហើយតស៊ូការពារនូវអ្វីដែលជាសេចក្តីល្អស្មោះត្រង់ចំពោះជាតិខ្មែរ ការពារទឹកដីខ្មែរ បើទោះជាត្រូវប្រឈមនឹងគុកច្រវាក់ ឬសេចក្តីស្លាប់ នៅចំពោះមុខក៏ដោយ។
សារជាសំឡេងអំពាវនាវរកយុត្តិធម៌ពីប្រមុខថ្នាក់ដឹកនាំប្រទេសចំពោះកូនប្រុស គឺ លោក កង សារ៉ន មុនពេលសមត្ថកិច្ចចាប់ខ្លួនយកទៅដាក់គុកដោយសាររិះគន់គណបក្សកាន់អំណាច ជាពិសេសលំហូរពលរដ្ឋវៀតណាមចូលមករស់នៅកម្ពុជាខុសច្បាប់នោះ បានឆក់យកបេះដូងពលរដ្ឋអ្នកប្រើប្រាស់បណ្ដាញសង្គមជាច្រើន។
ពួកគេឧទ្ទេសនាមស្ត្រីវ័យ១០២ឆ្នាំ សួង ខិន ថា ជាព្រះម៉ែជាតិខ្មែរ ព្រះម៉ែការពារដី ទេវតាការពារដី និងមាតាគំរូ ក្លាហាន ជាដើម...!
ម្ចាស់គណនីហ្វេសប៊ុកមួយដែលដាក់ឈ្មោះថា Hanks Sankream (ហែង សានគ្រាម) បានផុសនូវរូបភាពដូនចាស់អាយុ១០២ឆ្នាំ ឈ្មោះ សួង ខិន សម្រង់សម្ដីដែលផ្តាំទៅកូនគាត់តាមន័យដើមថា៖ «ម៉ែផ្តាំឱ្យកូនកុំខ្លាចគេអីគ្រាន់តែនិយាយ ពាក្យយួនមួយឃ្លារឿងអីមានទោស ខុសច្បាប់ឪវាអីកូនកុំខ្លាចវា ការពារជាតិយើង»។
ម្ចាស់គណនីហ្វេសប៊ុកដែលនេះក៏បានចាត់ទុកគាត់ ជា វីរៈមាតាស្រលាញ់ទឹកដីហើយថា កូនខ្មែរប្រុសស្រីគួរយកគំរូ ទោះចាស់យ៉ាងណា ក៏ប្ដេជ្ញាតស៊ូទោះបីត្រូវប្តូរជីវិតក៏ដោយ។
ចំណែកម្ចាស់គណនីហ្វេសប៊ុកដទៃទៀតក៏បានComments ឬបញ្ចេញទស្សនៈស្រដៀងៗគ្នានេះច្រើនទៀតដែរ។
ម្ចាស់គណនីហ្វេសប៊ុក ឈ្មោះ ស៊ីណាត លីម (Sinath Lim) បានបញ្ចេញទស្សនៈ ជុំវិញបញ្ហានេះដែរថា «លោកយាយស្រឡាញ់ជាតិពិតប្រាកដ លះបង់ជីវិតដើម្បីជាតិ»។
ដោយឡែកម្ចាស់គណនីហ្វេសប៊ុកមួយផ្សេងទៀត ឈ្មោះ ផន លុន (Phon Lon) ក៏បានសរសេរសារឈ្លើយតបដែរថា៖ «នាំគ្នាជួយគាត់ផងទៅ នាំប្រយោជន៍ឲ្យជាតិសាសន៍យើង ឲ្យខ្មែរចេះឈឺចាប់ការពារជាតិខ្លួនឯង កុំភ្លេចខ្លួនយើងជាម្ចាស់ប្រទេសជាតិ»។
រីឯម្ចាស់គណនីហ្វេសប៊ុក ឈ្មោះ លី វ៉ាន់ (Lee Vann) ក៏បានចូលមតិលើទឹកចិត្ត ដល់ដូនចាស់អាយុ១០២ឆ្នាំ ដោយកោតសរសើរដល់វីរភាព សេចក្តីក្លាហានរបស់គាត់ដែលហានប្រឈមនឹងបញ្ហាគ្រប់បែបយ៉ាង ដោយមិនរាថយក្នុងការស្វែងរកយុត្តិធម៌ការពារភាពស្មោះត្រង់និងសេចក្តីថ្លៃថ្នូរក្នុងនាមជាពូជខ្មែរ។ លី វ៉ាន់ បានសរសេរសារសូមព្រះអង្គទ្រង់ប្រទានពរដល់លោកយាយមានអាយុវែង ចូលកូនខ្មែរក្រោកឡើងដូចលោកយាយ គាត់បានក្រោកឡើង តតាំងឱ្យកូនរបស់គាត់ជាមនុស្សក្លាហាន គាត់ជាស្ត្រីមានអំណាច ជាម្ចាស់ប្រទេសកម្ពុជា។
ទាក់ទងនឹងជំហរដូនចាស់ សួង ខិន ចំពោះប្រទេសជាតិនេះដែរ ម្ចាស់គណនីហ្វេសប៊ុក ឈ្មោះ ហែម សុជាតា (Socheata Hem) បានបង្ហោះសារ និងរូបភាពបង្ហាញទស្សនរបស់ខ្លួនដែរថា៖ អ្នកចង់បានឋានៈយសស័ក្ដិតពូជធ្វើអី? បើពីមួយជំនាន់ទៅមួយជំនាន់ពួកអ្នកគ្មានសមត្ថភាពធ្វើឲ្យពលរដ្ឋរស់នៅបានសមរម្យផងហ្នឹង? «បារមីកិត្តិយស និងគុណតម្លៃរបស់គ្រួសារពួកអ្នកមិនបានស្មើបាតជើងដូនចាស់ម្នាក់នេះផងទេ ...!! រីឯស្មារតីស្នេហាជាតិរបស់ពួកអ្នកវិញក៏គ្មានតម្លៃត្រឹមជាយសារ៉ុង ដូនចាស់ផង! ណ្ហើយ ! បើមានតែកិត្តិយសហើយរស់ថោកទាបម្ល៉ឹងៗអីក៏ប្រឹងត្រដរម្ល៉េះអ៊ំសួរឯង ...»?
ចំណែក ម្ចាស់គណនីហ្វេសប៊ុក ឈ្មោះ កសិករ ជាយដែនវិញ ក៏ចាប់អារម្មណ៍លើរឿងនេះដែរ។ គាត់បានសរសេរថា៖ អាយុលោកយាយ 102ឆ្នាំ គាត់នៅខ្លឹមហើយរឹងមាំ គាត់ជាតិនិយម ខុសពីមនុស្សខ្លះអាត្មានិយម។
ក្រោយពីគ្រប់គ្នាស្តាប់ឮ និងមើលឃើញជំហររបស់លោកយាយ សួង ខិន មានស្មារតីរឹងមាំចំពោះជាតិ មាតុភូមិបែបនេះ ពួកគេរំជួលចិត្ត និងចង់ទៅជួបលោកយាយផ្ទាល់ ដើម្បីសួរសុខទុក្ខ ហើយអ្នកខ្លះមានសន្តានចិត្តចង់ឧបត្ថម្ភ លោកនិយាយនូវអ្វីដែលខ្លួនអាចធ្វើបានសម្រាប់លោកយាយអស់មួយជីវិត។
សមត្ថកិច្ចខេត្តបន្ទាយមានជ័យបានចាប់វាយខ្នោះលោក កង សារ៉ន ដែលជាកូនប្រុស លោកយាយ សួង ខិន វ័យ ១០២ឆ្នាំ កាលពីល្ងាចថ្ងៃទី២៥ វិច្ឆិកា ក្រោយពេលតុលាការផ្ដន្ទាទោសឱ្យលោកជាប់ពន្ធនាគារ ៣ឆ្នាំពីបទ «ជេរប្រមាថតាមទីសាធារណៈ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទប្រមាថអង្គព្រះមហាក្សត្រ»។ ការចោទប្រកាន់នេះ បន្ទាប់ពីលោក កង សារ៉ន បានផ្សាយផ្ទាល់នៅលើបណ្តាញសង្គមហ្វេសប៊ុក (Facebook) និយាយរិះគន់ការដឹកនាំប្រទេសរបស់គណបក្សប្រជាជនកម្ពុជា ក្នុងអំឡុងពេលឃោសនារកសំឡេងឆ្នោត កាលពីថ្ងៃទី២ ខែកក្កដា ឆ្នាំ២០២៣។
លោកយាយ សួន ខិន ដែលមហាជននៅលើបណ្ដាញសង្គមប្រសិទ្ធនាមឲ្យថា ជាព្រះម៉ែជាតិខ្មែរ ស្នេហាជាតិ និងទឹកដីខ្មែរបានហៅទង្វើរបស់សមត្ថកិច្ចមកលើគ្រួសារគាត់នេះថា ជារឿងអយុត្តិធម៌បំផុត ហើយលោកនិយាយមិនខ្លាចតទល់ដើម្បីស្វែងយុត្តិធម៌ក្នុងរឿងនេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។