ក្រុមសាច់ញាតិអ្នកជាប់ឃុំដោយសាររឿងនយោបាយ បាននាំយកចំណីអាហារ និងលុយកាកទៅសួរសុខទុក្ខឪពុក និងប្ដីរបស់ខ្លួនក្នុងពន្ធនាគារ អំឡុងប្រារព្ធពិធីបុណ្យចូលឆ្នាំថ្មីរយៈពេល ៣ថ្ងៃនេះ ដោយក្រៀមក្រំ និងការឈឺចាប់ ខុសប្លែកពីពលរដ្ឋទូទៅ។ មន្ត្រីសិទ្ធិមនុស្សលើកឡើងថា ដោយសារកម្ពុជាពុំបានដើរតាមគន្លងរបបលទ្ធិប្រជាធិបតេយ្យ ទើបធ្វើឱ្យសកម្មជននយោបាយ ត្រូវបែកបាក់ព្រាត់ប្រាសនិរាសគ្រួសារទាំងអយុត្តិធម៌បែបនេះ។
ស្របពេលពលរដ្ឋខ្មែរទូទៅ ជួបជុំក្រុមគ្រួសារសប្បាយរីករាយ និងដើរលេងកម្សាន្តសើចក្អាកក្អាយ ប៉ុន្តែក្រុមសាច់ញាតិនៃអ្នកជាប់ឃុំឃាំងដោយសាររឿងនយោបាយពីការដឹកនាំតាមបែបតវង្សត្រកូលរបស់លោក ហ៊ុន សែន បែរជាបន្តរងការឈឺចាប់ និងសម្រក់ទឹកភ្នែក នៅពេលពួកគេបាននាំយកចំណីអាហារ និងលុយកាកទៅសួរសុខទុក្ខអ្នកជាប់ឃុំនយោបាយទាំងនោះ ដែលត្រូវជាជីតា ឪពុក និងប្ដី ដល់ពន្ធនាគារនៅក្នុងពិធីបុណ្យចូលឆ្នាំថ្មី។
ប្រពន្ធរបស់លោក ស៊ុន ធន់ មន្ត្រីគណបក្សសង្គ្រោះជាតិដែលបានជាប់ឃុំឃាំងអស់ជិត ៣ឆ្នាំមកនេះ គឺលោកស្រី សេង ចាន់ថន ប្រាប់អាស៊ីសេរីនៅថ្ងៃទី១៦ មេសាថា នៅថ្ងៃទី២ នៃពិធីបុណ្យចូលឆ្នាំ លោកស្រីបាននាំកូនប្រុសទាំង ៤នាក់ និងចៅៗ ពីរនាក់ ទៅសួរសុខទុក្ខប្ដីដល់ពន្ធនាគារត្រពាំងថ្លុង ដើម្បីឱ្យកូនៗ និងចៅៗ បានជូនលុយកាក និងអាហារបន្តិចបន្តួចទៅឪពុក និងជីតាដោយផ្ទាល់។ លោកស្រីបន្តថា គ្រួសារលោកស្រី ខុសប្លែកឆ្ងាយពីគ្រួសារខ្មែរទូទៅដែលសប្បាយរីករាយ នៅពេលយកបាយសម្ល និងលុយកាក់ជូនអ្នកមានគុណនៅស្រុកកំណើត ប៉ុន្តែកូនៗ របស់លោកស្រីបែរជាឈឺចាប់ និងសម្រក់ទឹកភ្នែកនៅពេលបានជួបមុខឪពុកផ្ទាល់នៅក្នុងពន្ធនាគារ។
លោកស្រី សេង ចាន់ថន៖«កូនទាំងអស់ហ្នឹង ស្រក់ទឹកភ្នែក យំទាំងអស់គ្នាតែម្ដង ពេលដែលឃើញប៉ានៅក្នុងពន្ធនាគារអ៊ីចឹង។ ពួកគាត់យំ ខ្ញុំមានអារម្មណ៍ថាក្ដុកក្ដួល ខ្លោចផ្សាណាស់ ខ្លោចផ្សាមែនទែន នៅពេលឃើញពួកគាត់បែបហ្នឹង។ ពួកគាត់យំ ពួកគាត់សំពះប៉ារបស់គាត់ ពួកគាត់លុតជង្គង់នៅនឹងដី សំពះបាទជើងប៉ារបស់គាត់ ហើយគាត់នាំគ្នាយំតែម្ដង កូនៗ ប្រុសទាំង៤របស់ខ្ញុំ គាត់ស្រក់ទឹកភ្នែក គាត់ឈឺចាប់ គាត់ក្ដុកក្ដួលនៅពេលឃើញប៉ាគាត់អ៊ីចឹង។ ហើយប៉ាគាត់បានផ្ដែផ្ដាំ បាននិយាយប្រាប់សព្វបែបសព្វយ៉ាង ពីការរៀនសូត្រ ការធ្វើដំណើរ និងប្រឹងប្រែងប្រកបមុខរបរខ្លះដើម្បីចិញ្ចឹមជីវិតបណ្ដើររៀនបណ្ដើរ»។
លោកស្រីបន្ថែមថា នេះជាលើកទី១ ដែលកូនប្រុសទាំង ៤នាក់បានទៅជួបឪពុក តាំងពីឪពុកបានជាប់ពន្ធនាគារអស់ជាច្រើនឆ្នាំមកនេះ ដែលកន្លងមានតែកូនប្រុសច្បងម្នាក់ប៉ុណ្ណោះ ដែលឆ្លៀតចូលទៅសួរសុខទុក្ខឪពុក។ លោក ស៊ុន ធន់ គឺជាគ្រូបង្រៀន និងជាសមាជិកក្រុមប្រឹក្សាខេត្តកំពង់ធំជាប់ឆ្នោតគណបក្សសង្គ្រោះជាតិ ត្រូវបានអាជ្ញាធរចាប់ខ្លួនដាក់ពន្ធនាគារតាំងពីខែមិថុនា ឆ្នាំ២០២០ និងត្រូវបានតុលាការកាត់ទោសពីបទរួមគំនិតក្បត់ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់មិនឲ្យយោធាស្តាប់បង្គាប់ កាលពីខែមីនា ឆ្នាំ២០២២។ លោក និងសមាជិកបក្សប្រឆាំង ១២នាក់ទៀត ត្រូវតុលាការសម្រេចឱ្យជាប់ពន្ធនាគារម្នាក់ៗ ៥ឆ្នាំ ប៉ុន្តែតម្រូវឲ្យអនុវត្តទោសក្នុងពន្ធនាគារ ៣ឆ្នាំ ៨ខែ។
លោកស្រី សេង ចាន់ថន លើកឡើងទៀតថា មន្ត្រីពន្ធនាគារអនុញ្ញាតឱ្យលោកស្រី កូន និងចៅបានជួបសួរសុខទុក្ខលោក ស៊ុន ធន់ បានរយៈពេលខ្លីត្រឹម ១៥នាទីប៉ុណ្ណោះ ខណៈកូនប្រសារលោកស្រី មិនត្រូវបានអាជ្ញាធរអនុញ្ញាតឱ្យចូលទៅក្នុងពន្ធនាគារឡើយ ដោយសារមិនមានកាតចាក់វ៉ាក់សាំងកូវីដ១៩។
លោកស្រី សេង ចាន់ថន៖«គាត់មានអារម្មណ៍ថា រំភើបបានជួបកូន ពេលណឹងហើយ គាត់ផ្ដាំថា កូនទាំងអស់គ្នា ពីថ្ងៃហ្នឹងទៅ ប្រសិនបើកូនរវល់ មិនបាច់ទៅជួបប៉ាញយពេកទេ គ្រាន់តែផ្ញើថវិកាតិចតួចទៅបានហើយ មិនបាច់ចាំទៅទៀតទេ ព្រោះផ្លូវឆ្ងាយអស់សោហ៊ុយឡានច្រើន»។
ចំណែកសាច់ញាតិរបស់អ្នកទោសនយោបាយម្នាក់ទៀត គឺលោក អ៊ុក សៅសុធារ៉ា បេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់គណបក្សភ្លើងទៀន នៅខេត្តពោធិ៍សាត់ ដែលត្រូវអាជ្ញាធរឃុំឃាំង តាំងពីខែមីនាឆ្នាំ២០២២ ពីបទក្លែងបន្លំឯកសារ ក៏មានកូនទៅសួរសុខទុក្ខលោកដល់ពន្ធនាគារខេត្តពោធិ៍សាត់ដែរ នាឱកាសពិធីបុណ្យចូលឆ្នាំ។ កូនប្រុសរបស់លោក អ៊ុក សៅសុធារ៉ា គឺលោក អ៊ុក សៅសុភារិន បានលើកឡើងថា លោកបាននាំប្រពន្ធ និងកូនទៅជួបជីតារបស់ពួកគេក្នុងពន្ធនាគារ។ លោក អ៊ុក សៅសុភារិន បន្តថា លោកសោកស្ដាយ នៅពេលឃើញគេដទៃយួរស្រាក់នាំគ្នាទៅវត្តធ្វើបុណ្យក្នុងពិធីបុណ្យចូលឆ្នាំ ប៉ុន្តែគ្រួសាររបស់លោកបែរជាយកម្ហូបអាហារទៅពន្ធនាគារ។
លោកបន្ថែមថា លោកត្រូវចំណាយលុយទិញសំបុត្រចូលសួរសុខទុក្ខឪពុកក្នុងពន្ធនាគារម្នាក់ចំនួន ២ម៉ឺនរៀល ហើយមន្ត្រីពន្ធនាគារ អនុញ្ញាតឱ្យលោកយកម្ហូបអាហារក្រៀមៗ ចូលពន្ធនាគារប៉ុណ្ណោះ ដូចជាត្រីងៀត សាច់លីង និងអង្ករ៥កំប៉ុង និងមិនអនុញ្ញាតឱ្យយកបាយចូល ឬអង្ករលើសពី៥កំប៉ុងឡើយ ដោយសារក្នុងពន្ធនាគារមានលក់អង្ករ។ លោក អ៊ុក សៅសុភារិន បានជួបសួរសុខទុក្ខឪពុកបានប្រហែលកន្លះម៉ោង និងបានជូនលុយឪពុក ២៥ម៉ឺនរៀលសម្រាប់ចាយវាយមួយខែនៅក្នុងពន្ធនាគារ។
លោក អ៊ុក សៅសុភារិន៖«ខ្ញុំអត់បានសន្ទនាជាមួយគាត់ច្រើនទេ ខ្ញុំនិយាយតែតិចតួចសួរគាត់រឿងខាងក្នុងពិបាកយ៉ាងម៉េចៗ អ៊ីចឹង ហើយក៏ទុកពេលឱ្យគាត់ជួបចៅ ព្រោះគាត់នឹងចៅទាំងពីរ។ គាត់បានលេង បានថើបចៅ កាន់ដៃអ៊ីចឹង។ ពុកខ្ញុំនៅខាងក្នុងចៅនៅខាងក្រៅ លូកដៃតាមចម្រឹងទ្វារ ដើម្បីចាប់ដើម្បីថើបចៅ»។
ក្រុមសាច់ញាតិអ្នកជាប់ឃុំទាំងនេះ បន្តទទូចឱ្យរដ្ឋាភិបាលដោះលែងសាច់ញាតិរបស់ពួកគាត់វិញ ខណៈពួកគាត់ចាត់ទុកថា វាជារឿងនយោបាយ ដែលកើតចេញពីការធ្វើទុក្ខបុកម្នេញដ៏អយុត្តិធម៌បំផុតលើអ្នកនយោបាយប្រឆាំង។ បច្ចុប្បន្ននេះ មានសកម្មជននយោបាយ និងអ្នកទោសមនសិការជាង ៧០នាក់ កំពុងជាប់ឃុំ ព្រោះការអនុវត្តសិទ្ធិសេរីភាពរបស់ខ្លួនស្របតាមច្បាប់។
ជុំវិញបញ្ហានេះ មន្ត្រីនាំពាក្យអគ្គនាយកដ្ឋានពន្ធនាគារលោក នុត សវនា បានលើកឡើងថា ក្នុងពិធីបុណ្យចូលឆ្នាំថ្មី គ្រប់ពន្ធនាគារ និងមណ្ឌលកែប្រែទាំងអស់បានរៀបចំកម្មវិធីតាមបែបសាសនាដូចជាសូត្រមន្ត ស្រង់ព្រះ និងកាលេងកម្សាន្តល្បែងប្រជាប្រិយខ្មែរ។ លោកក៏បញ្ជាក់ថា នៅតាមពន្ធនាគារ មិនអនុញ្ញាតឱ្យមន្ត្រីពន្ធនាគារទាមទារឱ្យបង់លុយសម្រាប់ពលរដ្ឋចូលទៅសួរសុខទុក្ខសាច់ញាតិក្នុងពន្ធនាគារឡើយ។
លោក នុត សវនា៖«មានការលេងល្បែងប្រជាប្រិយ មានការធ្វើពិធីស្រង់ព្រះ ធ្វើពិធីសូត្រមន្តតាមបែបសាសនា»។
មន្ត្រីនាំពាក្យសមាគមអាដហុក(Adhoc)លោក ស៊ឹង សែនករុណា សង្កេតឃើញថា អំឡុងពេលមានពិធីបុណ្យទានកម្សាន្តធំៗ ក្រុមគ្រួសារនៃសកម្មជននយោបាយ សកម្មជនសង្គម និងសកម្មជនបរិស្ថានជាដើម មិនបានសប្បាយរីករាយដូចពលរដ្ឋខ្មែរទូទៅឡើយ ដោយសារពួកគាត់ត្រូវប្រឈមនឹងការព្រាត់ប្រាសនិរាសសមាជិកគ្រួសារ ដោយសារការចាប់ចងយកទៅឃុំឃាំងពាក់ព័ន្ធនឹងរឿងនយោបាយយ៉ាងអយុត្តិធម៌។
លោក ស៊ឹង សែនករុណា៖«យើងឃើញជាក់ស្ដែង ឱ្យតែអ្នកចង់ធ្វើនយោបាយ តែងតែត្រៀមលក្ខណៈ និងទទួលរងទុក្ខទោសដូច្នេះឯង។ អ៊ីចឹងហើយ បានយើងឃើញថា ក្រុមគ្រួសាររបស់អ្នកទោសនយោបាយ គឺភាគច្រើន ឃើញថាមានការរងទុក្ខទោស ការបែកបាក់គ្រួសារ រស់នៅមិនមានភាពសប្បាយរីករាយ ដូចគ្រួសារគេផ្សេងៗទៀត»។
ក្រុមសាច់ញាតិបានលើកឡើងទៀតថា ឪពុកនិងប្ដីរបស់ពួកគាត់ ជាមនុស្សល្អស្លូតត្រង់ក្នុងសង្គម និងចូលរួមធ្វើនយោបាយ ដើម្បីជួយកែប្រែឱ្យពលរដ្ឋកម្ពុជាគ្រប់រូបមានសិទ្ធិសេរីភាពពេញលេញ និងរស់នៅមានសេចក្ដីសុខ និងមានការហូបចុកឱ្យបានគ្រប់គ្រាន់ ប៉ុន្តែបែរជាត្រូវចាប់ចងខុសប្លែកពីអ្នកប្រព្រឹត្តិបទឧក្រិដ្ឋសម្លាប់មនុស្សខ្លះ ត្រូវបានដោះលែងឱ្យមានសេរីភាពទៅវិញ។ រីឯមន្ត្រីសិទ្ធិមនុស្ស ចង់ឱ្យអ្នកនយោបាយនៅកម្ពុជា ដើរតាមគន្លងនៃរបបលទ្ធិប្រជាធិបតេយ្យឱ្យបានត្រឹមត្រូវ តាមរយៈការបញ្ឈប់ការធ្វើទុក្ខបុកម្នេញលើអ្នកនយោបាយ ដែលមាននិន្នាការផ្ទុយនឹងគណបក្សកាន់អំណាច ខណៈសង្គមប្រកាន់លទ្ធិប្រជាធិបតេយ្យពិតប្រាកដ ឱ្យតម្លៃខ្ពស់ទៅប្រជាពលរដ្ឋ ដើម្បីចូលរួមធ្វើសកម្មភាពនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។