សាច់ញាតិសកម្មជនបក្សប្រឆាំងចូលរួមពិធីបុណ្យចូលឆ្នាំថ្មីឆ្នាំនេះយ៉ាងសោះកក្រោះ ខណៈក្រុមគ្រួសារគេកំពុងជាប់ឃុំនៅពន្ធនាគារព្រោះរឿងនយោបាយ។ មេធាវីការពារក្ដីឲ្យសកម្មជនបក្សប្រឆាំងការលើកឡើងថា ការចោទប្រកាន់ និងបន្តឃុំសកម្មជនបក្សប្រឆាំងធ្វើឲ្យអ្នកទាំងនោះបាត់បង់សិទ្ធិសេរី។
ថ្មីដ្បិតតែរដ្ឋាភិបាល ហាមឃាត់មិនឲ្យប្រារព្ធពិធីបុណ្យចូលឆ្នាំថ្មីឆ្នាំជាផ្លូវការក៏ដោយ ពលរដ្ឋទូទៅអាចជួបជុំសាច់ញាតិរបស់ខ្លួនដោយផ្ទាល់ ឬតាមមធ្យោបាយផ្សេងៗ ទៀត ដោយរីករាយ ប៉ុន្តែប្លែកអីសាច់ញាតិសកម្មជនបក្សប្រឆាំង ដែលកំពុងជាប់ឃុំ មិនបានសប្បាយដូចពលរដ្ឋផ្សេងនោះទេ។
ភរិយាសកម្មជនគណបក្សសង្គ្រោះជាតិនៅខេត្តព្រៃវែង លោកស្រី ប៊ុត សាម៉ាក់ ដែលស្វាមីខ្លួនកំពុងជាប់ឃុំនៅពន្ធនាគារព្រៃស រៀបរាប់ទាំងអួលដើមកថា លោកស្រីឃើញគ្រួសារគេផ្សេងនៅក្បែរផ្ទះលោកស្រី មានការជួបជុំសប្បាយចិត្ត ប៉ុន្តែងាកមកផ្ទះលោកស្រីវិញ ប្តីជាជនបង្គោលគ្រួសារ ត្រូវជាប់ពន្ធនាគារទាំងអយុត្តិធម៌។ លោកស្រីបន្តថា ក្នុងឱកាសឆ្នាំថ្មី លោកស្រីអុជធូប បន់ស្រន់សូមឲ្យស្វាមីលោកស្រី រួចផុតការចោទប្រកាន់ និងទទួលបានយុត្តិធម៌ឡើងវិញ៖ « កណ្ដោចកណ្ដែងណាស់ពូ ! ធ្លាប់តែរាល់ឆ្នាំជួបគ្រួសារ តែដល់ពេលឥឡូវអត់ជួបជុំអ៊ីចឹង ខ្ញុំអត់សប្បាយចិត្តទេមានការពិបាកអ៊ីចឹង ព្រោះគាត់ ( ប្តី ) ជួយការងារជាបង្គោលមួយ ប៉ុន្តែឥឡូវសល់ខ្ញុំម្នាក់ឯងចិញ្ចឹមកូនបីនាក់ទៀត » ។
សកម្មជនគណបក្សប្រឆាំងនៅស្រុកព្រះស្ដេច ខេត្តព្រៃវែង លោក ឃុត ច្រឹក ត្រូវសមត្ថកិច្ចចាប់ខ្លួនកាលពីខែមីនា។ តុលាការក្រុងភ្នំពេញបានចោទប្រកាន់ករណីបង្ហោះសារនៅលើ ហ្វេសប៊ុក បំផុសព័ត៌មានក្លែងក្លាយធ្វើឲ្យមានការជ្រួលច្របល់ក្នុងសង្គម។
សាច់ញាតិសកម្មជនគណបក្សសង្គ្រោះជាតិម្នាក់ទៀត ដែលម្ដាយលោកជាសកម្មជនគណបក្សសង្គ្រោះជាតិ នៅខេត្តកំពង់ឆ្នាំង ឱ្យអាស៊ីសេរីដឹងថា ក្នុងទិដ្ឋភាពប្រារព្ធពិធីចូលឆ្នាំនេះ ក្រុមគ្រួសារលោករកស្នាមញញឹមមិនឃើញទេ ដោយម្ដាយ និងបងថ្លៃ កំពុងឃុំព្រោះរឿងនយោបាយ។ កូនប្រុសលោកស្រី ជុំ ស៊ីនឿន ស្នើទៅរដ្ឋាភិបាលគិតគូរឡើងវិញ ទម្លាក់ចោលការចោទប្រកាន់ម្តាយ និងបងថ្លៃរបស់លោក។ ពេលនេះលោកកំពុងព្យាយាមសម្របសម្រួល ដើម្បីស្នើសាច់ញាតិលោកអាចនៅក្រៅឃុំបាន៖ « ធម្មតាគ្រួសារយើងជុំគ្នាដល់ពេលបុណ្យអ៊ីចឹងជួបជុំតែដល់ពេលគាត់ ( ម្ដាយ និងបងថ្លៃ ) អ៊ីចឹងមានបានជួបជុំឯណា នៅផ្ទះរៀងខ្លួន មើលសោះកក្រោះអាណោចអាធ័មព្រោះក្នុងគ្រួសារជាប់ដល់ទៅមនុស្សពីរនាក់ » ។
សកម្មជនគណបក្សសង្គ្រោះជាតិនៅខេត្តកំពង់ឆ្នាំង លោកស្រី ជុំ ស៊ីនឿន ត្រូវបានសមត្ថកិច្ចចាប់ខ្លួនពេលជូនកូនទៅសម្រាលកូននៅមន្ទីរពេទ្យកាល់ម៉ែតក្នុងរាជធានីភ្នំពេញកាលពីថ្ងៃទី២២ ខែធ្នូ ដោយចោទប្រកាន់ថា លោកស្រីជាប់ពាក់ព័ន្ធនឹងបទល្មើសនេសាទ។
មេធាវីការពារក្តីឲ្យសកម្មជនបក្សសង្គ្រោះជាតិលោក សំ សុគង់ ឲ្យដឹងថា គិតមកដល់ថ្ងៃទី១៥ ខែមេសា សកម្មជនគណបក្សចំនួន០៨នាក់ ត្រូវសមត្ថកិច្ចចាប់ខ្លួន និងចោទប្រកាន់ ដែលការចាប់ខ្លួនគិតចាប់ពីខែមករា ឆ្នាំ២០២០។ លោកថា ពេលនេះក្រុមមេធាវី កំពុងស្វះស្វែងតាមផ្លូវច្បាប់ ដើម្បីឲ្យអ្នកជាប់ឃុំទាំងនោះ ទទួលបានសេរីភាពឡើងវិញ៖ « អ្នកដែលជាគាត់ជាអ្នកជាប់ឃុំចាស់មុននឹងក្រុមមេធាវីដាក់ពាក្យបណ្ដឹងឧទ្ធរណ៍សាលាមិនទាន់បានកំណត់ការជំនុំជម្រះ ហើយអ្នកដែលកំពុងជាប់ឃុំថ្មីៗ ក្រុមមេធាវីបានដាក់សុំឲ្យនៅក្រៅឃុំបណ្ដោះអាសន្ន » ។
លោក សំ សុគង់ ថ្លែងថា ខណៈជំងឺកូវីដ-១៩ កំពុងរាតត្បាត ទាំងសកម្មជន និងទាំងមេធាវីពិបាកជួបកូនក្ដីដោយសារខាងពន្ធនាគារមានការរឹតបន្តឹងការជួបជុំ។
សកម្មជនទាំង៨នាក់នោះ ត្រូវបានរបបក្រុងភ្នំពេញចាប់ខ្លួនជាបន្តបន្ទាប់ ចាប់តាំងពីជំងឺកូវីដ-១៩ កំពុងរាតត្បាតជុំវិញពិភពលោក។ តុលាការ បានចោទប្រកាន់ពួកគេដូចៗ គ្នា ពីបទរួមគំនិតក្បត់ ញុះញង់ឲ្យយោធាមិនស្ដាប់បញ្ជា និងញុះញង់ឲ្យប្រព្រឹត្តបទឧក្រិដ្ឋជាអាទិ ហើយបញ្ជូនពួកគេទៅឃុំខ្លួននៅក្នុងពន្ធនាគារព្រៃស (ម១-ព្រៃស)។ កាលពីថ្ងៃទី១៣ ខែមេសា សកម្មជនគណបក្សទី៨ ជាសមាជិកក្រុមប្រឹក្សាខេត្តព្រៃវែងជាប់ឆ្នោតគណបក្សសង្គ្រោះជាតិ លោក ជុំ ចាន់ ត្រូវប៉ូលិសចាប់ខ្លួន ពាក់ព័ន្ធនឹងបទល្មើស រួមគំនិតក្បត់ជាតិ ញុះញង់ឱ្យប្រព្រឹត្តអំពើហិង្សាបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់កុំឱ្យយោធាស្ដាប់បង្គាប់។
សង្គមស៊ីវិលយល់ថា ការចាប់ខ្លួនមន្ត្រីបក្សប្រឆាំងនៅពេលនេះ គឺជាការធ្វើទុក្ខបុកម្នេញផ្នែកនយោបាយច្រើនជាងការអនុវត្តច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។