គ្រួសារសកម្មជននយោបាយជាប់ឃុំ នៅតែទាមទាររកយុត្តិធម៌ពីតុលាការ
2022.06.18
គ្រួសារ និងសាច់ញាតិរបស់សកម្មជននយោបាយគណបក្សសង្គ្រោះជាតិ ដែលកំពុងជាប់ពន្ធនាគារ នៅតែស្រែកទទូចឲ្យតុលាការក្រុងភ្នំពេញ ជួយរកយុត្តិធម៌ ដល់អ្នកជាប់ឃុំទាំងអស់ផង។ ពួកគាត់នៅតែយល់ថា អ្នកជាប់ឃុំមិនទាន់ទទួល បានយុត្តិធម៌ពិតប្រាកដ ពីការជំនុំជម្រះពីតុលាការនៅឡើយទេ ហើយពួកគាត់បញ្ជាក់ថា នឹងប្ដឹងឧទ្ធរណ៍ទៅតុលាការជាន់ខ្ពស់បន្តទៀត។
ភរិយាលោក កាក់ កុម្ភារ គឺលោកស្រី ព្រំ ចន្ថា បន្តស្នើឲ្យតុលាការ ពិនិត្យមើលសំណុំរឿងរបស់ស្វាមីលោកស្រីឲ្យបានល្អិតល្អន់ថែមទៀត ព្រោះលោកស្រី នៅតែមិនទាន់អស់ចិត្ត ចំពោះការកាត់ក្ដីរបស់តុលាការ នាពេលកន្លងមក។
ភរិយារបស់លោក កាក់ កុម្ភារ ជាសកម្មជនគណបក្សសង្គ្រោះជាតិ គឺលោកស្រី ព្រំ ចន្ថា ប្រាប់អាស៊ីសេរីនៅល្ងាចថ្ងៃទី១៨ មិថុនាថា លោកស្រីនៅតែទទូចដល់តុលាការឲ្យដោះលែងស្វាមី ទោះដឹងថាពាក្យអង្វរកមិនមានឥទ្ធិពលយ៉ាងណាក៏ដោយ តែលោកស្រីនៅតែសង្ឃឹមទៅលើប្រព័ន្ធយុត្តិធម៌ របស់ក្រសួងយុត្តិធម៌ ថានឹងអាចលើកលែងទោស ដល់ស្វាមីលោកស្រី ជាពិសេសសម្ដេចនាយករដ្ឋមន្ត្រី ហ៊ុន សែន សូមជួយឲ្យកូនចៅបានជ្រកក្រោមដំបូលសន្តិភាពរបស់លោកផង។ លោកស្រីបញ្ជាក់ថា សព្វថ្ងៃរស់នៅដោយវេទនាខ្លាំងណាស់ ព្រោះបាត់បង្អែកបង្គោលគ្រួសារ កូនប្រុសច្បងក៏មានជំងឺប្រចាំកាយទៀត ត្រូវការឪពុកមើលថែ លោកស្រីថា លោកស្រីរ៉ាប់រងបន្ទុកគ្រួសារទាំងអស់ ធ្វើជាឪពុកផង ធ្វើជាម្ដាយផង មានភាពនឿយហត់ខ្លាំងណាស់ លោកស្រី សំណូមពរដល់លោក ហ៊ុន សែន ឲ្យជួយអន្តរាគមន៍រឿងក្ដីស្វាមីលោកស្រីផង៖ «កូនខ្ញុំគាត់ ឥឡូវគាត់ អារម្មណ៍គាត់អត់សូវល្អទេ ដូចមុនទេចាស គាត់ពីមុន។ ខ្ញុំមិនដឹងថាវាប៉ះពាល់ម៉េចខ្លះទេ ខ្ញុំអាណិតកូនខ្លាំងណាស់ មានអារម្មណ៍ថាគាត់រឹងជាងមុន កោងកាចជាងមុន ។ គាត់មិនដឹងថាគាត់ប៉ះពាល់អីខ្លះនៅក្នុងខួរក្បាលរបស់គាត់ហ្នឹងណា ។ វាពិបាកទទួលយកមែនទែនតែម្ដង ហើយខ្ញុំថ្ងៃណា ក៏ខ្ញុំមិនដែលសប្បាយចិត្តដែរ ដោយសារវាធម្មតាហើយអូន ការបែកបាក់អីចឹងហើយខ្ញុំគិតថា អត់មានធ្វើអីខុសសោះ ប្ដីរបស់ខ្ញុំ ។ដល់ពេល(អីចឹង) ខ្ញុំទទួលយកអត់បានទេ វាលំបាកមែនទែនតែម្ដងចាស មានតែតស៊ូទៅមុខទៀតតែប៉ុណ្ណឹងឯងចាស»។
លោក កាក់ កុម្ភារ ត្រូវតុលាការក្រុងភ្នំពេញ ដឹកនាំដោយរដ្ឋាភិបាលលោក ហ៊ុន សែន ចាប់ដាក់ពន្ធនាគារ ឲ្យជាប់ឃុំ ហើយតម្រូវឲ្យកំណត់រយៈពេលអនុវត្តទោសចំនួន៦ឆ្នាំ ពីបទរួមគំនិតក្បត់ និងបទញុះញង់មិនឲ្យយោធិនស្ដាប់បង្គាប់ ជាដើម។ លោក កាក់ កុម្ភារ ក៏ជាអ្នកគាំទ្រ កាលដែលលោក សម រង្ស៊ី មានគម្រោងនឹងធ្វើមាតុភូមិនិវត្តន៍ នាពេលកន្លងមក ក្នុងថ្ងៃទី៩ ខែវិច្ឆិកាឆ្នាំ២០១៩នោះដែរ ហើយលោកក៏ជាមន្ត្រីសកម្មក្នុងជួរគណបក្សសង្គ្រោះជាតិមួយរូបដែរ។
ជុំវិញសំណើនេះ អ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាលលោក កត្តា អ៊ន ប្រាប់អាស៊ីសេរីនៅល្ងាចថ្ងៃទី១៨ មិថុនាថា ចំពោះរឿងក្ដីរបស់លោក កាក់ កុម្ភារ បើសិនជា ភរិយារបស់គាត់មិនសុខចិត្ត ហើយស្រែកថារងភាពអយុត្តិធម៌លើស្វាមីរបស់លោកស្រី គាត់អាចដាក់ពាក្យប្ដឹងទៅតុលាការឧទ្ធរណ៍បាន ឲ្យសើរើរឿងក្ដីស្វាមីគាត់ឡើងវិញ។ លោកបន្តថា តុលាការលោកធ្វើទៅតាមនីតិវិធីច្បាប់ មិនអាចកាត់សេចក្ដីតម្រូវចិត្តទៅតាមបុគ្គលណាម្នាក់ទេ ភាគច្រើនអ្នកដែលចាញ់ក្ដីតែងតែស្រែកថា មិនមានយុត្តិធម៌សម្រាប់ពួកគេ នោះជារឿងធម្មតាហើយក្នុងសង្គមមួយនេះ លោកថា លោកជឿជាក់ទៅលើប្រព័ន្ធយុត្តិធម៌របស់មន្ត្រីតុលាការក្រសួងយុត្តិធម៌៖ «វាគ្មានអ្វីពាក់ព័ន្ធគ្នាទៅនឹងបញ្ហា អ៊ី ប៊ី អេ ទេ។ រឿងបញ្ហា អ៊ី ប៊ី អេ គឺជារឿងសហគមន៍អឺរ៉ុប ដែលគេពិនិត្យ គេសិទ្ធិរបស់គេ ចំពោះប្រទេសណាមួយ ។ ប៉ុន្តែរឿងរបស់គាត់ គឺគាត់ជាប្រជាជនកម្ពុជា ដែលមានជាប់ពាក់ព័ន្ធនឹងបទល្មើស យើងឃើញហើយថា មិនមែនមានតែគាត់ទេ ដែលពាក់ព័ន្ធទៅនឹងអំពើល្មើស ហើយថែមទាំងតុលាការផ្ដន្ទាទោស ។ ឃើញថា នៅកម្ពុជាសព្វថ្ងៃនេះមានអ្នកទោសជាប់ឃុំ មានជាងបីម៉ឺន(៣០.០០០)នាក់ឯនោះ នៅទូទាំងប្រទេស»។
លោកស្រី ព្រំ ចន្ថា លើកឡើងថា រដ្ឋាភិបាលកម្ពុជានឹងបាត់បង់ប្រព័ន្ធអនុគ្រោះពន្ធ គ្រប់មុខទំនិញទាំងអស់លើកលែងតែអាវុធ អ៊ី ប៊ី អេ (EBA Everythings But Arm) របស់សហភាពអឺរ៉ុបបន្ថែមពីលើនេះទៀត ដែលបានដាក់សម្ពាធមកលើរដ្ឋាភិបាល នាពេលកន្លងមកហើយនោះ។ ប្រសិនបើ រដ្ឋាភិបាលនៅតែទទឹងទទែងជាមួយបស្ចិមលោក ក្នុងការមិនគោរពសិទ្ធិមនុស្សឲ្យបានពេញលេញ និងផ្ដាច់ជីវិតលទ្ធិប្រជាធិបតេយ្យមិនឲ្យងើបឡើងនោះ រដ្ឋអំណាចរបស់លោក ហ៊ុន សែន នឹងអាចខូចខាតប្រយោជន៍ជាច្រើនទៀត ពីទំនាក់ទំនងរវាងប្រទេសលោកសេរី នៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។