សាច់​ញាតិ​ និង​មេធាវី​ ស្នើសុំ​ឲ្យ​តុលាការជាន់ខ្ពស់​ដោះលែង​អ្នកស្រី​ កឹម តុលា

0:00 / 0:00

សាច់ញាតិ និង​មេធាវី​ស្នើសុំ​ឲ្យ​សាលា​ឧទ្ធរណ៍​ព្រះសីហនុ ច្រាន​ចោល​សាល​ក្រម​របស់​សាលា​ដំបូង​ខេត្ត​កំពង់ស្ពឺ ដែល​ផ្ដន្ទាទោស​កំបាំង​មុខ​សមាជិក​ប្រឆាំង​ អ្នកស្រី កឹម តុលា ឲ្យ​ជាប់​ពន្ធ​នា​គារ ១ឆ្នាំ​ពី​បទ "ញុះញង់"។ ការ​ស្នើសុំ​បែប​នេះ គឺ​បន្ទាប់​ពី​មេធាវី​បាន​ដាក់​បណ្ដឹង​ឧទ្ធរណ៍ កាល​ពី​ថ្ងៃ​ទី១០ ​សីហា ​ដោយ​យល់​ឃើញ​ថា ការ​ផ្ដន្ទាទោស​នេះ គឺ​ជា​រឿង​អយុត្តិធម៌​។

សាច់ញាតិ និង​មេធាវី ចង់​ឲ្យ​សាលា​ឧទ្ធរណ៍​ព្រះសីហនុ ពន្លឿន​សវនាការ និង​ដោះ​លែង​មេឃុំ​ជាប់​ឆ្នោត​របស់​គណបក្ស​សង្គ្រោះ​ជាតិ នៅ​ឃុំ​ត្រែង​ត្រយឹង ​ស្រុក​ភ្នំស្រួច ​អ្នកស្រី កឹម តុលា ឲ្យ​មាន​សេរីភាព​ឡើង​វិញ។

បងស្រី​បង្កើត​របស់​អ្នកស្រី កឹម តុលា គឺ​លោកស្រី កឹម សេដ្ឋា រៀបរាប់​ថា លោកស្រី រួម​ទាំង​ឪពុក​ម្ដាយ​ចាស់​ជរា កំពុង​ខ្វល់​ចិត្ត​ជា​ខ្លាំង ចំពោះ​ការ​ឃុំ​ខ្លួន​អ្នកស្រី កឹម តុលា ព្រោះ​គាត់ ​មាន​ជំងឺ​រលាក​ក្រពះ​ពោះវៀន និង​ដុះ​សាច់​បំពង់​ក​ដែល​ត្រូវ​ការ​ថ្នាំពេទ្យ​ជា​ប្រចាំ។ លោកស្រី​យល់​ថា ការ​ចាប់​ឃុំ​ខ្លួន​នេះ គឺ​ជា​រឿង​អយុត្តិធម៌ ព្រោះ​ប្អូន​របស់​លោក​ស្រី ជា​មនុស្ស​ស្អាតស្អំ និង​បាន​ឈប់​ពាក់​ព័ន្ធ​នឹង​រឿង​នយោបាយ​ជា​យូរ​មក​ហើយ៖ « អារម្មណ៍​នៅតែ​ចង់​ឲ្យ​មាន​ការ​ដោះ​លែង​គាត់​ឲ្យ​មាន​សេរីភាព​វិញ ព្រោះ​គាត់​ឈឺ។ ខ្ញុំ​ចេះ​តែ​យល់​ថា អយុត្តិធម៌​សម្រាប់​គាត់ ​ព្រោះ​គាត់​លា លែង​អី​អស់​ហើយ »

លោកស្រី​ កឹម សេដ្ឋា ឲ្យ​ដឹង​ថា ចាប់តាំង​ពី​ប្អូន​ស្រី​ជាប់​ឃុំ​នៅ​ក្នុង​ពន្ធនាគារ​ខេត្ត​កំពង់ស្ពឺ រយៈពេល​ជិត​មួយ​ខែ​មកនេះ ​អាជ្ញាធរ​ពន្ធនាគារ ​មិនទាន់​អនុញ្ញាត​ឲ្យ​សាច់ញាតិ​ចូល​ជួប​សួរ​សុខ​ទុក្ខ​នៅ​ឡើយ​ទេ គឺ​បាន​ត្រឹមតែ​ផ្ញើ​លុយ​កាក់ ​ថ្នាំពេទ្យ​ និង​ម្ហូបអាហារ​ខ្លះៗ ប៉ុណ្ណោះ។

ជាមួយ​គ្នា​នេះ​ មេធាវី​ការពារ​ក្ដី​ឲ្យ​អ្នកស្រី កឹម តុលា គឺ​លោក សំ សុគង់ ថ្លែង​ថា លោក​ទើប​ចូល​ជួប​កូន​ក្ដី​ក្នុង​ពន្ធនាគារ ​និង​បាន​ដាក់​បណ្ដឹង​ឧទ្ធរណ៍ តាម​សំណើ​របស់​គាត់​រួច​ហើយ កាល​ពី​ថ្ងៃ​ទី១០​ខែសីហា។ លោក​បញ្ជាក់​ថា ​ក្នុង​បណ្ដឹង​ឧទ្ធរណ៍​នោះ កូន​ក្ដី​របស់​លោក ​ស្នើសុំ​ឲ្យ​សាលា​ឧទ្ធរណ៍​ព្រះសីហនុ ​លើក​លែង​ការ​ចោទប្រកាន់​ និង​ដោះ​លែង​រូប​គាត់​ឲ្យ​មាន​សេរីភាព​ឡើង​វិញ​ ព្រោះ​អ្នកស្រី ​ចាត់ទុកថា ​សាលក្រម​ផ្ដន្ទាទោស​កំបាំង​មុខ និង​ការ​ចេញ​ដីកា​ចាប់​ឃុំខ្លួន​របស់​សាលា​ដំបូង​ខេត្ត​កំពង់ស្ពឺ​ ​គឺ​ជា​រឿង​អយុត្តិធម៌​បំផុត។ មេធាវី​ការពារ​ក្ដី​រូប​នេះ​បន្ត​ថា លោក​ក៏​មិន​អាច​ទទួល​យក​បាន​ដែរ​ចំពោះ​ការ​សម្រេច​ឃុំខ្លួន​ក្តី​របស់​លោក​ ព្រោះ​សំណុំ​រឿង​នេះ​ពាក់ព័ន្ធ​នឹង​ផែនការ​វិល​ចូល​ស្រុក​របស់​លោក​ សម រង្ស៊ី ​កាលពី​ចុងឆ្នាំ២០១៩ ​ដែល​លោក​នាយក​រដ្ឋមន្ត្រី ហ៊ុន សែន ​បាន​បញ្ជា​ឲ្យ​តុលាការ​ និង​អាជ្ញាធរ​ពាក់ព័ន្ធ ​ឈប់​យក​ទោស​ពៃរ៍​រួច​ទៅ​ហើយ៖ « ការ​វិល​មកវិញ​របស់​កូន​ក្ដី កឹម តុលា នេះ គឺ​អំឡុង​ឆ្នាំ២០២១ គឺ​ក្នុង​ខែ៤ ទៅ​ខែ៥ នេះ ក៏​គាត់​មិន​មាន​ធ្វើ​សកម្មភាព​នយោបាយ​អី​ដែរ។គាត់ វិល​មក​ក្នុង​ជីវភាព​មួយ​ជា​ប្រជាពលរដ្ឋ​ធម្មតា។ ខ្ញុំ​គិត​ថា ការ​ចាប់​ខ្លួន​នេះ​ផ្ទុយពី​ប្រសាសន៍​របស់​សម្ដេច​ផង ហើយ​កាត់​កំបាំងមុខ ​គួរតែ​ផ្តល់​សិទ្ធិ​ឲ្យ​កូន​ក្ដី​ខ្ញុំ​ប្ដឹង​តវ៉ា ឬ​ជំទាស់​ដើម្បី​តតាំង​ទាក់ទង​នឹង​សាលក្រម​កំបាំងមុខ​នេះ​ផង​ដែរ »

អាជ្ញាធរ​របប​លោក ហ៊ុន សែន បាន​ចាប់​ខ្លួន​អ្នកស្រី កឹម តុលា ​កាលពី​រសៀល​ថ្ងៃ​ទី២២ ខែកក្កដា ហើយ​បាន​បញ្ជូន​ទៅ​ឃុំខ្លួន​ក្នុង​ពន្ធនាគារ​ខេត្ត​កំពង់ស្ពឺ នៅ​ព្រឹក​ថ្ងៃ​ទី២៣ កក្កដា។ ការ​ចាប់​ឃុំ​ខ្លួន​នេះ​ គឺ​អនុវត្ត​តាម​សាលក្រម​ផ្ដន្ទាទោស​កំបាំងមុខ​របស់​​​​ចៅ​ក្រម​ជំនុំ​ជម្រះ​សាលាដំបូង​ខេត្ត​កំពង់ស្ពឺ ​លោក អ៊ី សាវិញ កាល​ពី​ខែ​មេសា ឆ្នាំ២០២១ ដែល​សម្រេច​ផ្ដន្ទាទោស​អ្នកស្រី កឹម តុលា និង​សកម្មជន​គណបក្ស​សង្គ្រោះ​ជាតិ ៦រូប​ទៀត ឲ្យ​ជាប់​​​ពន្ធនាគារ ១ឆ្នាំ និង​ពិន័យ​ជា​ប្រាក់ ២លាន​ (២.០០០.០០០) រៀល​ពី​បទ​ញុះ​ឲ្យ​ប្រព្រឹត្ត​បទ​ល្មើស​ឧក្រិដ្ឋ​ជាអាទិ៍ ពាក់ព័ន្ធ​នឹង​ការ​គាំទ្រ​ផែនការ​វិល​ចូល​ស្រុក​របស់​លោក​ សម រង្ស៊ី។ ការ​ចាប់​ខ្លួន​សមាជិក​បក្ស​ប្រឆាំង​រូប​នេះ ​កើតឡើង​ក្រោយ​ពេល​រូប គាត់ ​វិល​ត្រឡប់​ពី​ប្រទេស​ថៃ ទៅ​រស់​នៅ​ស្រុក​កំណើត​វិញ​មួយ​រយៈ ហើយ​បដិសេធ​ចុះ​ចូល​ជាមួយ​គណ​បក្ស​កាន់​អំណាច​តាម​ការ​បញ្ចុះបញ្ចូល​របស់​អាជ្ញាធរ​មូលដ្ឋាន។

ជុំវិញ​រឿង​នេះ ប្រធាន​សមាគម​ការពារ​សិទ្ធិមនុស្ស​អាដហុក លោក នី សុខា មាន​ប្រសាសន៍​ថា ករណី​ចាប់​ឃុំ​ខ្លួន​អ្នកស្រី កឹម តុលា នេះ មិន​ខុស​ពី​ករណី​សកម្មជន​គណបក្ស​សង្គ្រោះ​ជាតិ​ផ្សេងៗ​ទៀត​ឡើយ គឺ​សុទ្ធតែ​ពាក់ព័ន្ធ​នឹង​រឿង​នយោបាយ។ លោក ​យល់ថា ​យុត្តិធម៌​សម្រាប់​ជន​ជាប់​ឃុំ​ដោយ​មូលហេតុ​នយោបាយ​ទាំងនេះ​ នឹង​នៅ​តែ​ស្ថិត​ក្នុង​ទី​ឆ្ងាយ​ ប្រសិនបើ​ជម្លោះ​នយោបាយ​​នៅតែ​តានតឹង​ដូច​សព្វថ្ងៃ៖ « ប្រសិនបើ​រដ្ឋាភិបាល ​នៅតែ​ចង់​ដឹកនាំ​ប្រទេស​ឲ្យ​មាន ការ​អភិវឌ្ឍ​ស្របតាម​គោលការណ៍​ប្រជាធិបតេយ្យ​និង​គោលការណ៍​សិទ្ធិ មនុស្ស ​ខ្ញុំ​គិត​ថា រឿង​ដែល​ត្រូវ​ដោះ​ស្រាយ​បញ្ហា​ជាប់​គាំង​ខាង​នយោបាយ​នេះ គឺជា​រឿង​ចាំបាច់​បំផុត​នៅមុន​ដំណាក់កាល​បោះ​ឆ្នោត​នេះ។ ជំហ៊ានទី១​នៃ​ការ​ចាប់​ផ្តើម​នេះ គឺ​ការ​ដោះ​លែង​អ្នក​ដែល​ជាប់​ឃុំ​ដោយ​រឿង​កត្តា​នយោបាយ​ កត្តា​សង្គម ​កត្តា​សិទ្ធិមនុស្ស ​និង​បរិស្ថាន ​ដើម្បី​បង្ហាញ​ឲ្យ​សហគមន៍​ជាតិ និង​អន្តរជាតិ​ឃើញ​ពី ឥរិយាបថ​នៃ​ការ​ចាប់​ផ្ដើម​ស្ដារ​ប្រជាធិបតេយ្យ​និង​សិទ្ធិមនុស្ស​ឡើងវិញ។បើ​រដ្ឋាភិបាល ​មិន​ដោះ​ស្រាយ​ទេ ខ្ញុំ​គិត​ថា សម្ពាធ​នឹង​ចេះតែ​បន្ត​មាន​ពី​ប្រទេស​សេរី ​ដោយ​ជៀស​មិន​ផុត​ឡើយ »

ក្នុង​ពេល​អាជ្ញាធរ​របប​ក្រុងភ្នំពេញ​ កំពុង​បន្ត​ធ្វើទុក្ខ​បុក​ម្នេញ​លើ​សកម្មជន​នយោបាយ សកម្មជន​សង្គម ​សកម្មជន​សិទ្ធិមនុស្ស​ និង​អ្នក​ការពារ​បរិស្ថាន​ជា​បន្ត​បន្ទាប់​នេះ ប្រទេស​ប្រជាធិបតេយ្យ​ធំៗ រួមមាន​សហរដ្ឋអាមេរិក​ និង​អូស្ត្រាលី ​ជាដើម ​កំពុង​ពន្លឿន​អនុម័ត​ច្បាប់ ដាក់​ទណ្ឌកម្ម​លើ​ក្រុម​មេដឹកនាំ​របប​ក្រុង​ភ្នំពេញ ​ដោយសារ​ការ​បំផ្លាញ​ប្រជាធិបតេយ្យ និង​ការ​រំលោភ​សិទ្ធិមនុស្ស​ធ្ងន់ធ្ងរ​។អ្នកឃ្លាំមើល​បញ្ហា​សង្គម​ជឿថា ​ប្រសិន​បើ​របប​លោក​ ហ៊ុន សែន​ នៅតែ​មិនព្រម​ស្តារ​លទ្ធិ​ប្រជាធិបតេយ្យ និង​ការ​គោរព​សិទ្ធិមនុស្ស​ឡើង​វិញ​ទេ​នោះ​ របប​នេះ​នឹង​ជៀស​មិន​ផុត​ពី​ការ​ដាក់​ទណ្ឌកម្ម​របស់​ក្រុម​ប្រទេស​ប្រជាធិបតេយ្យ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។