គ្រួសារចាត់ទុកការចាប់ខ្លួនមន្ត្រីគណបក្សកម្លាំងជាតិខេត្តកំពង់ចាមលោក គា វិសាល ជាការបំបាក់ស្មារតី និងគំរាមកំហែងលើអ្នកមាននិន្នាការផ្ទុយរដ្ឋាភិបាល។ ពួកគេអំពាវនាវដល់អាជ្ញាធរដោះលែងមន្ត្រីគណបក្សប្រឆាំងរូបនេះឱ្យមានសេរីភាពដោយឥតលក្ខខណ្ឌ ។ ចំណែកអាជ្ញាធរក្រុងភ្នំពេញអះអាងថា ការចាប់ខ្លួននេះជាអនុវត្តច្បាប់ដោយមិនមែនជាការធ្វើទុក្ខបុកម្នេញនោះឡើយ។
គ្រួសារមន្ត្រីគណបក្សកម្លាំងជាតិនៅខេត្តកំពង់ចាម លោក គា វិសាល ទាមទារឱ្យអាជ្ញាធរពាក់ព័ន្ធដោះលែងប្តីឱ្យមានសេរីភាពឡើងវិញ ដើម្បីបានជួបជុំគ្រួសារ និងបន្តសកម្មភាពនយោបាយបន្តទៅទៀត។
ជំទប់ទី២នៃឃុំកោះមិត្ត មកពីបក្សភ្លើងទៀនដែលជាប្រពន្ធរបស់លោក គា វិសាល គឺអ្នកស្រី ញ៉ែ សុខឿន ប្រាប់វិទ្យុអាស៊ីសេរីនៅថ្ងៃទី១៦ ខែមីនា ថា លោកស្រីព្រួយបារម្ភខ្លាចអាជ្ញាធរធ្វើបាប ឬដាក់សម្ពាធលើប្ដីដែលជាឆ្អឹងទទឹងរបស់អាជ្ញាធរបក្សកាន់អំណាច ខណៈលោកស្រីមិនទាន់ទទួលដំណឹងអំពីសុខទុក្ខប្ដីយ៉ាងណានោះទេ មកដល់ពេលនេះ។ «»
អាជ្ញាធររដ្ឋាភិបាល លោក ហ៊ុន ម៉ាណែត បានចាប់ខ្លួនអនុប្រធានក្រុមការងារ បណ្ដោះអាសន្នរបស់គណបក្សកម្លាំងជាតិខេត្តកំពង់ចាម និងជាបេក្ខជនក្រុមប្រឹក្សាខេត្តលេខរៀងទី១ គឺលោក មឺ សេងហ៊ ហៅ គា វិសាល នៅភូមិកោះប៉ែន ឃុំកោះមិត ស្រុកកំពង់សៀម ហើយបានបញ្ជូនឃុំខ្លួនទៅរាជធានីភ្នំពេញ កាលពីរសៀលនៅថ្ងៃទី១៥ ខែមីនា។
ឆ្លើយតបរឿងនេះ អ្នកនាំពាក្យស្នងការដ្ឋានរាជធានីភ្នំពេញលោក សំ វិច្ឆិកា ប្រាប់វិទ្យុអាស៊ីសេរីថាសមត្ថកិច្ចបានចាប់ខ្លួនលោក មឺ សេងហ៊ ហៅ គា វិសាល តាមពាក្យបណ្តឹងឈ្មោះ ម៉ៃ ហុងស្រៀង និងអនុវត្តតាមដីកាបញ្ជារបស់តុលាការក្រុងភ្នំពេញពាក់ព័ន្ធរឿង ញុះញង់បង្កឱ្យមានការរើសអើង និងជេរប្រមាថជាសាធារណៈចំពោះដើមបណ្តឹងនៅលើបណ្ដាញសង្គម។ លោកឱ្យដឹងថា បច្ចុប្បន្នសមត្ថកិច្ចកំពុងសាកសួរលោក គា វិសាល តាមនីតិវិធីនៅស្នងការដ្ឋាននគរបាលរាជធានីភ្នំពេញដើម្បីកសាងសំណុំត្រៀមបញ្ជូនទៅតុលាការនៅថ្ងៃទី១៧ ខែមីនា។ លោក សំ វិច្ឆិកា អះអាងថា ការចាប់ខ្លួនមន្ត្រីបក្សកម្លាំងជាតិខេត្តកំពង់ចាមរូបនេះមិនទាក់ទងការធ្វើទុក្ខបុកម្នេញ បំភិតបំភ័យក្រោមហេតុផលនយោបាយនោះទេ។ «»
ប៉ុន្តែអ្នកស្រី ញ៉ែ សុខឿន អះអាងថា ប្តីអ្នកស្រីមិនបានធ្វើខុសដូចការចោទប្រកាន់ឡើយ។ អ្នកស្រីចាត់ទុកករណីចាប់នេះជាការរៀបឡើងជាប្រព័ន្ធក្នុងគោលបំណងគំរាមកំហែង ដាក់សម្ពាធផ្នែកនយោបាយលើប្តីដែលមានប្រជាប្រិយភាព និងតស៊ូជាមួយសកម្មជននៅតាមមូលដ្ឋាន ខណៈលោក ម៉ៃ ហុងស្រៀង ដែលជាដើមបណ្តឹងវិញគឺជាសកម្មជនបក្សប្រឆាំងប្រចាំខេត្តព្រះសីហនុដែលទើបចុះចូលជាមួយបក្សប្រជាជនកម្ពុជា កាលពីដើមឆ្នាំ២០២៣ទៀតផង។ អ្នកស្រីឱ្យដឹងថា ដើមហេតុដែលប្តីរបស់អ្នកស្រីបញ្ចេញមតិនៅលើបណ្ដាញសង្គមហ្វេសប៊ុកកន្លងមក ដើម្បីចង់បានសង្គមមានយុត្តិធម៌ ការពារភាពត្រឹមត្រូវ ជាពិសេសទប់ស្កាត់សកម្មភាពរបស់លោក ម៉ៃ ហុងស្រៀង តែងតែតាមអូសទាញអ្នកស្រី និងប្តីឱ្យចុះចូលជាមួយបក្សកាន់អំណាចដោយសន្យាផ្តល់តួនាទី និងលុយកាក់។
វិទ្យុអាស៊ីសេរីមិនអាចទាក់ទងសមាជិកគណបក្សប្រជាជនកម្ពុជាប្រចាំខេត្តព្រះសីហនុលោក ម៉ៃ ហុងស្រៀង ដើម្បីសាកសួរជុំវិញរឿងនេះបានទេ នៅល្ងាច ថ្ងៃទី១៦ ខែមីនា។
ជុំវិញរឿងនេះ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជាហៅកាត់ថា ច្រាក់ (CHRAC) លោក រស់ សុដ្ឋា មានប្រសាសន៍ថា សង្គមប្រជាធិបតេយ្យគឺពលរដ្ឋគ្រប់រូបមានសិទ្ធិពេញលេញក្នុងការចួលរួមសកម្មភាពនយោបាយ ការបញ្ចេញមតិដោយគ្មានការរារាំង ឬការគំរាមកំហែងនោះទេ។ ប៉ុន្តែលោកមើលឃើញថា ចាប់តាំងពីរំលាយគណបក្សសង្គ្រោះជាតិមកសកម្មជនបក្សប្រឆាំងត្រូវបានចាប់ខ្លួន និងចោទប្រកាន់ជាបន្តបន្ទាប់គួរឱ្យព្រួយបារម្ភ ហើយបញ្ហានេះលោកយល់ថាអ្នកនយោបាយគ្រប់និន្នាការគួរចូលតុជជែកគ្នាដោះស្រាយបញ្ហាដើម្បីបង្ហាញអំពីសាមគ្គីភាព និងឈរលើផលប្រយោជន៍ជាតិ។ «»
គណបក្សកម្លាំងជាតិកាលពីថ្ងៃទី១៥ ខែមីនា បានចេញសេចក្តីថ្លែងការណ៍ព្រួយបារម្ភករណីចាប់ខ្លួនលោក គា វិសាល និងចាត់ទុកថា នេះជារូបភាពបំភិតបំភ័យ និងបង្កឱ្យបរិយាកាសនយោបាយអាប់អួក្នុងដំណើរការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាស្រុក ក្រុង ខណ្ឌ អាណត្តិទី៤។ គណបក្សកម្លាំងជាតិអំពាវនាវដល់សមត្ថកិច្ចដោះលែងលោក គា វិសាល ឱ្យមានសេរីភាពឡើងវិញ ដើម្បីធានាបរិកាសនយោបាយល្អប្រសើរសម្រាប់ការបោះឆ្នោតក្រុមប្រឹក្សាខាងមុខនេះ។
អតីតសកម្មជនគណបក្សសង្គ្រោះជាតិលោក គា វិសាល ធ្លាប់ត្រូវបានតុលាការក្រុងភ្នំពេញកាត់ទោសជាប់ពន្ធនាគារម្ដងរួចមកហើយអំពីបទញុះញង់ និងបានចេញពីពន្ធនាគារវិញ កាលពីខែកញ្ញាឆ្នាំ២០២០ បន្ទាប់ពីលោកបានអនុវត្តទោសគ្រប់ចំនួនរយៈពេល ១ឆ្នាំពេញ នៅក្នុងពន្ធនាគារ។ លោក គា វិសាល បានប្រាប់វិទ្យុអាស៊ីសេរីក្រោយចេញពីពន្ធនាគារកន្លងទៅថាលោកមិនដែល តក់ស្លុត ភ័យខ្លាច ឬចុះញ៉មទៅនឹងការគំរាមកំហែង និងធ្វើទុក្ខបុកម្នេញពីរដ្ឋាភិបាលក្រុងភ្នំពេញ ហើយនៅតែហ៊ានបន្តតស៊ូមតិដដែល។
បន្ទាប់ពីរដ្ឋាភិបាលលោក ហ៊ុន សែន ផាត់បក្សភ្លើងទៀនមិនឱ្យចូលរួមបោះឆ្នោតជ្រើសរើសតំណាងរាស្ត្រអាណត្តិទី៧មក លោក គា វិសាល បានរត់ភៀសខ្លួនទៅជ្រកកោននយោបាយក្នុងប្រទេសថៃមួយរយៈ ដើម្បីគេចពីអាជ្ញាធរតាមធ្វើទុក្ខបុកម្នេញដោយសារតែលោកតែងប្រើប្រាស់បណ្ដាញសង្គមរិះគន់ភាពអសកម្មរបស់រដ្ឋាភិបាល ភាពអយុត្តិធម៌នៅក្នុងសង្គមជាដើម។ ទោះយ៉ាងណាលោកបានសម្រេចវិលត្រឡប់ទៅប្រទេសកម្ពុជាវិញកាលពី២៥ ខែកុម្ភៈ ដោយបន្តធ្វើសកម្មភាពជាមួយគណបក្សកម្លាំងជាតិ ដើម្បីចុះជួបអ្នកគាំទ្រនៅមូលដ្ឋាន និងរៀបចំបញ្ជីបេក្ខជនក្រុមប្រឹក្សាខេត្ត និងក្រុមប្រឹក្សាស្រុក ក្រុងសម្រាប់ខេត្តកំពង់ចាមរហូតសមត្ថកិច្ចបានចាប់ឃុំខ្លួនលោកជាលើកទី២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។