គ្រួសារ​មន្រ្ដី​បក្ស​ភ្លើងទៀន​ជាប់​ឃុំ​នៅ​ខេត្តបាត់ដំបង​ស្នើ​សុំនៅ​ក្រៅ​ឃុំ

ដោយ ម៉ៅ សុធានី
2022.07.05
Share on WhatsApp
Share on WhatsApp
គ្រួសារ​មន្រ្ដី​បក្ស​ភ្លើងទៀន​ជាប់​ឃុំ​នៅ​ខេត្តបាត់ដំបង​ស្នើ​សុំនៅ​ក្រៅ​ឃុំ លោក ឡី សុខុន សមាជិក​ក្រុម​ការងារ​គណបក្ស​ភ្លើង​ទៀន​ខេត្តបាត់ដំបង។
រូបពីពលរដ្ឋ

គ្រួសារ​មន្រ្ដី​បក្ស​ភ្លើង​ទៀន ដែល​កំពុង​ជាប់​ឃុំ​នៅ​ពន្ធនាគារ​ខេត្តបាត់ដំបង ស្នើ​តុលាការ​ដោះ​លែង​សមាជិក​គ្រួសារ​ខ្លួន​ឱ្យ​នៅ​ក្រៅ​ឃុំ ដោយសារ​ស្ថានភាព​រស់នៅ​ក្នុង​ពន្ធនាគារ​ជួប​ការ​លំបាក។ ចំណែក​មេធាវី​ការពារ​ក្ដី​ជំរុញ​ឱ្យ​តុលាការ​ពន្លឿន​ការ​បើក​សវនាការ​ជំនុំជម្រះ​ឱ្យ​បាន​ឆាប់​រហ័ស ចៀសវាង​ការ​ឃុំ​ខ្លួន​កូន​ក្ដី​រយៈ​ពេល​យូរ ដែល​ធ្វើ​ឱ្យ​ប៉ះពាល់​ដល់​សិទ្ធិ​សេរីភាព​បុគ្គល។

សមាជិក​ក្រុម​ការងារ​គណបក្ស​ភ្លើង​ទៀន​ខេត្តបាត់ដំបង លោក ឡី សុខុន ជួប​ការ​លំបាក​ក្នុង​រស់នៅ​ទីនោះ និង​មាន​បំណង​ស្នើ​តុលាការ​ដោះ​លែង​ឱ្យ​នៅ​ក្រៅ​ឃុំ ក្រោយ​លោក​ជាប់​ពន្ធនាគារ​ខេត្តបាត់ដំបង​ជិត​មួយ​ខែ​មក។

លោកឡី សុខុន ជា​សមាជិក​ក្រុម​ការងារ​គណបក្ស​ភ្លើង​ទៀន​នៅ​ស្រុកឯកភ្នំ ដែល​ត្រូវ​បាន​សមត្ថកិច្ច​ចាប់​ខ្លួន កាល​ពី​ថ្ងៃ​ទី៨ មិថុនា នៅ​ហាង​កាហ្វេ​មួយ​កន្លែង​ក្នុង​ក្រុងបាត់ដំបង​ដោយ​ចោទ​ពី​បទ​រំលោភ​លំនៅឋាន បន្ទាប់​ពី​លោក​ថត​វីដេអូ​ក្រុម​មន្ត្រី​បក្ស​កាន់​អំណាច​អង្គុយ​កត់​ឈ្មោះ​ពលរដ្ឋ​នៅ​ថ្ងៃ​បោះ​ឆ្នោត​ក្រុម​ប្រឹក្សា​ឃុំ-សង្កាត់។

ទោះ​បី​ដើម​ចោទ​បាន​ដក​ពាក្យ​បណ្ដឹង​វិញ​ក៏​ដោយ តុលាការ​ខេត្តបាត់​ដំបង​នៅ​តែ​បន្ត​ចោទ​ប្រកាន់​មក​លើ​រូប​លោក​ដដែល​ដោយ​អះអាង​ថា ជា​បណ្ដឹង​អាជ្ញា។

ភរិយា​របស់​លោក ឡី សុខុន គឺ​អ្នកស្រី លីន លីដា ប្រាប់​វិទ្យុ​អាស៊ី​សេរី​ឱ្យ​ដឹង​ថា បន្ទាប់​ពី​ស្វាមី​ត្រូវ​ឃុំ​ខ្លួន​នៅ​ពន្ធនាគារ​ជិត​មួយ​ខែ​មក​នេះ លោកស្រី​សង្កេត​ឃើញ​ស្វាមី​មាន​សភាព​ស្គមស្គាំង និង​ចុះ​ខ្សោយ​ជាង​មុន។ លោកស្រីបន្តថា ស្ថានភាព​រស់នៅ​ក្នុង​ពន្ធនាគារ​ជួប​ការ​លំបាក​ខ្លាំង ព្រោះនៅទីនោះមានមូសច្រើន និង​គ្មាន​អនាម័យ។ លោកស្រី​ឱ្យ​ដឹង​បន្ត​ថា ចំណី​អាហារ និង​របស់​ប្រើប្រាស់​មួយ​ចំនួន​នៅ​ក្នុង​ពន្ធនាគារ​មាន​តម្លៃ​ថ្លៃ​ជាង​នៅ​ខាង​ក្រៅ ដែល​ធ្វើ​ឱ្យ​ការ​ចំណាយ​កាន់​តែ​កើន​ឡើង​មួយ​កម្រិត​ទៀត។ ទន្ទឹម​គ្នា​នេះ ម្ដាយលោកឡី សុខុន កំពុង​ធ្លាក់​ខ្លួន​ឈឺ ស្រប​ពេល​លោកស្រី​រក​ចំណូល​មិន​សូវ​បាន​ច្រើន។

បច្ចុប្បន្ន លោកស្រី លី ដា កំពុង​ដាក់​លិខិត​ស្នើសុំ​តុលាការ​ខេត្តបាត់ដំបង​ឱ្យ​ដោះ​លែង​លោក ឡី សុខុន នៅ​ក្រៅ​ឃុំ​បណ្ដោះអាសន្ន​សិន ដើម្បី​ឱ្យ​លោក​បាន​រស់នៅ​ជាមួយ​គ្រួសារ និង​មាន​សុខភាព​ល្អ​ជាង​នៅ​ក្នុង​ពន្ធនាគារ៖ «គាត់​គេង​អត់​សូវ​បាន​ឥឡូវ​ហ្នឹង គាត់​ស្គម​ខ្លាំង​មែនទែន។ គាត់​ថា ឥវ៉ាន់​ប្រើប្រាស់​នៅ​ក្នុង​ហ្នឹង​មួយ​ចំនួន​គឺ​ថ្លៃ គាត់​ទិញ​ទៅ​គាត់​ថា ថ្លៃ​នៅ​ក្នុង​ហ្នឹង។ ម្ដាយ​របស់​គាត់ (ឡី សុខុន) អាយុ​ច្រើន​ហើយ​គាត់​បារម្ភ គាត់​អង្គុយ​យំ​រហូត បាយ​ទឹក​ក៏​គាត់​មិន​ពិសារ ឥឡូវ​គាត់​ឈឺ​ទៀត។ សុំ​សំណូមពរ​ដល់​គាត់ (តុលាការ) ជួយ​ដោះ​លែង​គ្រួសារ​ខ្ញុំ​ត្រឡប់​មក​វិញ ព្រោះ​ពេល​ដែល​គាត់​ជាប់​ឃុំឃាំង​អ៊ីចឹង ខ្ញុំ​ពិបាក​មែនទែន ពិបាក​ទាំង​សេដ្ឋកិច្ច ពិបាក​ទាំង​អ្វីៗ គ្រប់​យ៉ាង គាត់​ជា​បង្គោល​គ្រួសារ»

ចំណែក​មេធាវី​ការពារ​ក្ដី​លោក សំ សុគង់ ជំរុញ​ឱ្យ​តុលាការ​បើក​សវនាការ​អង្គ​សេចក្ដី​ឱ្យ​បាន​ឆាប់​រហ័ស ជំនួស​ឱ្យ​ការ​ដោះ​លែង​នៅ​ក្រៅ​ឃុំ។ លោក​មាន​ប្រសាសន៍​ថា រឿង​កូន​ក្ដី​លោក​ជា​បទ​មជ្ឈិម ហើយ​ប្រសិន​បើ​ការ​មាន​ការ​ដោះ​លែង​ឱ្យ​នៅ​ក្រៅ​ឃុំ នោះ​រឿងក្ដី​នឹង​កាន់​តែ​ពន្យារ​ពេល ​ដែល​អាច​ធ្វើ​ឱ្យ​ប៉ះពាល់​ដល់​ការ​រស់នៅ និង​សិទ្ធិ​សេរីភាព​របស់​លោក ឡី សុខុន។

ជាមួយ​គ្នា​នេះ លោក​នៅ​តែ​អះអាង​ថា ការ​ចោទ​ប្រកាន់​របស់​តុលាការ​មក​លើ​កូនក្ដី​លោក​ជា​រឿង​មិន​ត្រឹមត្រូវ​ជាមួយ​អង្គហេតុ​នោះ​ទេ៖ «ដោយសាររឿងគាត់ហ្នឹង ជារឿងមជ្ឈិមមានកម្រិតទោសត្រឹមតែមួយខែ​ទៅមួយឆ្នាំ ហើយ​បើ​កាល​ណា​យើង​ប្ដឹង​សុំ​នៅ​ក្រៅ​ឃុំ​ទៅ ខ្ញុំ​គិត​ថា វា​នាំ​តែ​អូស​បន្លាយ​ពេល។ អ៊ីចឹង​ខ្ញុំ​មាន​បំណង​ជំរុញ​ឱ្យ​តុលាការ​ហ្នឹង​បើក​សវនាការ​អង្កសេចក្ដីវិញ វាប្រសើរជាង។ បើ​យើង​មើល​ពី​បទ​ចោទ​ថា ចូល​លំនៅឋាន​អ្នកដ​ទៃហ្នឹង យើង​មើល​ទៅ​អង្គហេតុ​អត់​ពាក់ព័ន្ធ​បទ​ចោទ​ទេ។ គាត់​អត់​បាន​ចូល​ទៅ​ផ្ទះ​គេ​ទេ គឺ​គាត់​ឈរ​នៅ​លើ​ថ្នល់​ទេ។ ប៉ុន្តែ​យើង​ឃើញ​ដែរ​សកម្មភាព​របស់​គាត់​ក៏​មិន​បាន​ចូល​ទៅ​ក្នុង​ផ្ទះ ហើយ​ក៏​មិន​បាន​ប្រើ​អំពើ​ហិង្សា​អី​ដែរ គ្រាន់តែ​សួរ​នាំ»

សមាជិក​ក្រុម​ការងារ​គណបក្ស​ភ្លើង​ទៀន​ខេត្តបាត់ដំបង លោក ឡី សុខុន ត្រូវ​បាន​ព្រះរាជ​អាជ្ញា​រង​អម​សាលាដំបូង​ខេត្តបាត់ដំបង​បញ្ជូន​ខ្លួន​ទៅ​ពន្ធនាគារ​ខេត្តបាត់ដំបង កាល​ពី​ថ្ងៃ​ទី៩ មិថុនា ក្រោយ​ការ​ចាប់​ខ្លួន​មួយ​ថ្ងៃ។ មក​ទល់​ពេល​នេះ លោក​ជាប់​ពន្ធនាគារ​រយៈ​ពេល​ជិត​មួយ​ខែ​មក​ហើយ ដោយ​មិន​ទាន់​មាន​ការ​ជំនុំជម្រះ​សម្រេច​ពី​តុលាការ​នៅ​ឡើយ ខណៈ​ការ​រស់នៅ​របស់​លោក​ក្នុង​ពន្ធនាគារ​កាន់​តែ​មាន​សភាព​យ៉ាប់យ៉ឺន​ពី​មួយ​ថ្ងៃ​ទៅ​មួយ​ថ្ងៃ។

ជុំវិញ​រឿង​នេះ ព្រះរាជអាជ្ញា​អម​សាលាដំបូង​ខេត្តបាត់ដំបង លោក កែវ សុជាតិ បដិសេធ​មិន​ធ្វើ​ការ​អត្ថាធិប្បាយ ដោយ​លោក​រុញ​ឱ្យ​ទៅ​សួរ​អ្នក​នាំ​ពាក្យ​សាលាដំបូង​ខេត្តបាត់ដំបង​ជំនួស​វិញ។

វិទ្យុអាស៊ីសេរី​មិន​អាច​ទាក់ទង​អ្នក​នាំ​ពាក្យ​សាលា​ដំបូង​ខេត្តបាត់ដំបង អ្នកស្រី ជា ច័ន្ទរស្មី បាន​នៅ​ឡើយ​នោះ​ទេ នៅ​ថ្ងៃ​ទី៥ កកដ្កា​នេះ។

អ្នក​សម្របសម្រួល​ផ្នែក​ឃ្លាំមើល​ការ​រំលោភ​សិទ្ធិ​នៃ​អង្គការ​លីកាដូ​មនុស្ស​ប្រចាំ​នៅ​ខេត្តបាត់ដំបង លោក អ៊ិន គង់ជិត មាន​ប្រសាសន៍​ថា ករណី​របស់​លោក ឡី​ សុខុន ជា​បទ​មជ្ឈិម​កម្រិត​ស្រាល ដែល​តុលាការ​គួរតែ​ពិចារណា​ជំនុំជម្រះ​ឱ្យ​បាន​ឆាប់​រហ័ស។ ទន្ទឹមគ្នានេះ លោក​ជំរុញ​តុលាការ​ឱ្យ​ដោះ​លែង​លោក ឡី សុខុន នៅ​ក្រៅឃុំជាបណ្ដោះអាសន្ន ដោយ​ហេតុ​ថា លោក​មាន​ទីលំនៅ​ច្បាស់លាស់ និង​ជា​អ្នក​ចេះ​ដឹង​ផ្នែក​ច្បាប់​ម្នាក់ ដែល​មិន​អាច​ល្មើស​នឹង​ច្បាប់​បាន​ឡើយ៖ «ខ្ញុំ​ជឿ​ថា គាត់​នឹង​អាច​គោរព​ទៅ​តាម​លក្ខខណ្ឌ ដែល​តុលាការ​គួរ​អនុគ្រោះ ដូចជា ដាក់​ឱ្យ​គាត់​នៅ​ក្រោម​ការ​ត្រួត​ពិនិត្យ​តាម​ផ្លូវ​តុលាការ។ ដោយសារ​គាត់​មាន​ទីលំនៅ​ច្បាស់លាស់ គាត់​មាន​មុខរបរ ហើយ​គាត់​ជា​អ្នក​ច្បាប់​ផង អ៊ីចឹង គាត់​នឹង​គោរព​ទៅ​តាម​នីតិវិធី​របស់​តុលាការ គាត់​នឹង​មិន​គេច​ខ្លួន​ទៅ​ណា​ទេ។ អ៊ីចឹង ការ​ស្នើសុំ​របស់​ភរិយា​គាត់​ហ្នឹង គួរតែ​តុលាការ​ពិចារណា​ចៅក្រម​ស៊ើបសួរ​គួរ​តែ​ពិចារណា អនុគ្រោះ​ឱ្យ​គាត់»

មន្ត្រី​សង្គម​ស៊ីវិល អ្នក​វិភាគ និង​មន្ត្រី​បក្ស​ភ្លើង​ទៀន ចាត់​ទុក​ថា ករណី លោក ឡី សុខុន ពាក់ព័ន្ធ​នឹង​រឿង​នយោបាយ​ជា​ជាង​រឿង​ច្បាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។