ប្រពន្ធ​សកម្មជន​បក្ស​ប្រឆាំង​ក្រុង​ប៉ោយប៉ែត​​លោក​ ចៅ វាសនា​ មាន​​ជីវភាព​​កាន់តែ​​លំបាក​​ក្រោយ​​ប្ដី​ជាប់​​ពន្ធនាគារ​​ជាង​៤​ឆ្នាំ​​

ដោយ ទីន ហ្សាការីយ៉ា
2021-05-25
Share
ប្រពន្ធ​សកម្មជន​បក្ស​ប្រឆាំង​ក្រុង​ប៉ោយប៉ែត​​លោក​ ចៅ វាសនា​ មាន​​ជីវភាព​​កាន់តែ​​លំបាក​​ក្រោយ​​ប្ដី​ជាប់​​ពន្ធនាគារ​​ជាង​៤​ឆ្នាំ​​ លោក ចៅ វាសនា ចៅសង្កាត់​ប៉ោយប៉ែត​ជាប់ឆ្នោត​គណបក្ស​សង្គ្រោះ​ជាតិ​​ ដែល​មាន​ដើម​កំណើត​ខ្មែរ​ក្រោម​។
រូប៖ គេ​ផ្ដល់​ឱ្យ

គ្រួសារ​សកម្មជន​បក្ស​ប្រឆាំង​នៅ​​​ក្រុង​ប៉ោយប៉ែតថ្លែង​ថា ​ពួកគាត់​មិន​បាន​សួរសុខទុក្ខ​លោក ចៅ វាសនា ជាង ​៣ ខែ​មក​ហើយ​ ដោយ​ពុំ​ដឹង​ថា លោក​មាន​​​សុខភាព​យ៉ាង​ណា​នោះ​ទេ។

ប្រពន្ធ​របស់​មន្ត្រី​បក្ស​សង្គ្រោះ​ជាតិ​កំពុង​ជាប់​ឃុំ​លោក ចៅ វាសនា គឺ​លោក​ស្រី វង្ស គិមហុង​ ប្រាប់​អាស៊ី​សេរី​នៅ​ព្រឹក​ថ្ងៃ​ទី​២៤ ខែ​ឧសភា​ថា ​ការ​ដែល​​អាជ្ញាធរ​បញ្ជូន​​ប្ដី​របស់​គាត់​ទៅ​ឃុំ​ខ្លួន​នៅ​​ពន្ធនាគារ​ត្រពាំង​ផ្លុង​ ក្នុង​ខេត្ត​ត្បូងឃ្មុំ​ ប្រៀប​ដូចជា​សម្លាប់​ពួក​លោក​ស្រី​ទាំង​រស់ និង​បង្កើត​ការ​ឈឺ​ចាប់​កាន់​តែ​ខ្លាំង។ លោក​ស្រី​និយាយ​​ថា​​​ មន្ទីរ​ឃុំឃាំង​នៅ​ឆ្ងាយ​បែប​នេះ ​គឺ​ប៉ះពាល់​យ៉ាង​ខ្លាំង​ដល់​​ជីវភាព​រស់​នៅ​របស់​​លោក​ស្រី​ ដោយ​ក្រុម​គ្រួសារ​ពិបាក​​ធ្វើ​ដំណើរ​ទៅ​សួរសុខទុក្ខ និង​ត្រូវ​ចំណាយ​​ប្រាក់​​ច្រើន​។ ​​​​​​សព្វ​ថ្ងៃនេះ ​ជីវភាព​​​របស់​លោក​ស្រី​រក​ព្រឹក​ខ្វះ​ល្ងាច​ ដោយ​​សារ​គាត់​ធ្វើ​ជា​មេគ្រួសារ​តែ​ម្នាក់ឯង​ រក​ប្រាក់​ផ្គត់ផ្គង់​ប្ដី​កំពុង​ជាប់​ឃុំ ព្រម​ទាំង​ចិញ្ចឹម​​កូន​និង​ចៅ​ ៤ ​នាក់​នៅ​ក្នុង​បន្ទុក​គ្រួសារ​ ខណៈ​ដែល​ជំងឺ​​កូវីដ​១៩ ​កំពុង​តែ​រាតត្បាត​ខ្លាំង​នៅ​ក្រុង​ប៉ោយប៉ែត​នោះ​​៖ «ខ្ញុំបានលុយ​កាក់​តិច​តួច​ខ្ញុំ​ត្រូវ​យក​ទៅ​ឱ្យ​គ្រួសារ​ខ្ញុំ ហើយ​ឈឺ​ជា​អី​ត្រូវ​ឱ្យ​ដឹង​តែ​នេះ​បាន​សូន្យ ហើយ​ឆ្ងាយ ពេល​ទៅ​ម្ដង​មិន​មែន​ចំណាយ​លុយ​តិច​ទេ។ ​រឿង​អី​ធ្វើ​បាប​គាត់​ដល់​ថ្នាក់​អីចឹង ខ្ញុំ​មិន​មែន​ស្នើ​ឱ្យ​ចេញ​ណា​ខ្ញុំ​គ្រាន់​តែ​ស្នើ​ឱ្យ​មក​ខេត្ត​បន្ទាយមានជ័យ គេ​ថា​កូវីដ​អីចេះ ​កូវីដ​អីចុះ ​គេ​ចេះ​តែ​ដោះសា​រហូត។ អីចឹង​ខ្ញុំ​មិន​ដឹង​ទៅ​ពឹង​អ្នក​ណា​បាន​ទេ ខ្ញុំ​អួល​ដើម​កខ្ញុំ​ខឹង​ណាស់ ​ខ្ញុំ​ប្រាប់​ដោយ​ស្មោះ ចង់​និយាយ​ថា តាម​កម្មផល​បោះ​យើង​បើ​សិន​ណា​គេ​ធ្វើ​អាក្រក់​មក​លើ​គ្រួសារ​យើង ថ្ងៃក្រោយ​គេ​នឹង​យក​វិញ​»

លោក ចៅ វាសនា គឺ​ជា​ចៅសង្កាត់​ប៉ោយប៉ែត​ជាប់ឆ្នោត​គណបក្ស​សង្គ្រោះ​ជាតិ​​ ដែល​មាន​ដើម​កំណើត​ខ្មែរ​ក្រោម​។ ​​លោក​ ចៅ វាសនា ​ជា​មន្ត្រី​បក្ស​ប្រឆាំង​ទី​១​ដែល​ជាប់​ពន្ធនាគារ​​យូរ​ជាង​គេ​ ដោយ​សាលាដំបូង​ខេត្ត​បន្ទាយមានជ័យ ​បាន​ផ្ដន្ទាទោស​លោក​​​​ឱ្យ​ជាប់​ពន្ធនាគារ​រយៈ​ពេល ​៥​ ឆ្នាំ​ ក្រោម​បទ​ចោទ​ប្រកាន់​ញុះញង់​ឲ្យ​ប្រើ​អំពើ​ហិង្សា​មាន​ស្ថាន​ទម្ងន់​ទោសពាក់​ព័ន្ធ​នឹង​រឿង​ចុះ​ឃ្លាំមើល​កម្មករ​អូស​រទេះ​តវ៉ា​នៅ​ក្រុង​ប៉ោយប៉ែត​។ លោក​បាន​ជាប់​ឃុំ​ក្នុង​ពន្ធនាគារ​ខេត្ត​បន្ទាយ​មានជ័យ​តាំង​ពី​ដើម​ឆ្នាំ​២០១៧ ប៉ុន្តែ​នៅ​​​ចុង​ខែ​វិច្ឆិកា​ឆ្នាំ​២០២០ ​​​​អាជ្ញាធរ​បាន​បញ្ជូន​ លោក​ ចៅ វាសនា ​ទៅ​ឃុំ​ខ្លួន​នៅ​ពន្ធនាគារ​ត្រពាំង​ផ្លុង​វិញ​​ ដោយសារ​ទឹក​ជំនន់​លិច​​ពន្ធនាគារ​ខេត្ត​បន្ទាយមានជ័យ។ ប៉ុន្តែ​​រហូត​មក​ទល់​ពេល​នេះ ​មន្ត្រី​ពន្ធនាគារ​មិន​ទាន់​បញ្ជូន​លោក​ត្រឡប់​ទៅ​ខេត្ត​បន្ទាយមានជ័យ​វិញ​នៅ​ឡើយ​ទេ។

​អាស៊ី​សេរី​មិន​អាច​ទាក់​ទង​ អ្នក​នាំ​ពាក្យ​អគ្គនាយកដ្ឋាន​ពន្ធនាគារ​នៃ​ក្រសួង​មហាផ្ទៃ​លោក នុត សវនា​ ​ដើម្បី​សុំ​អត្ថាធិប្បាយ​ជុំ​វិញ​បញ្ហា​នេះ​បាន​ទេ​នៅ​ថ្ងៃ​ទី​២៤​ ខែឧសភា​ ដោយ​លោក​ប្រាប់​ថា រវល់​ប្រជុំ​។​ ប៉ុន្តែ​លោក នុត សវនា​ ធ្លាប់​មាន​ប្រសាសន៍​ថា​ លោក ចៅ វាសនា ស្ថិត​ក្នុង​ចំណោម​​​អ្នក​ដែល​​តុលាការ​កាត់​ទោស​រួច​ជាង​៣០០​នាក់។ លោក​ថា អាជ្ញាធរ​មិន​បាន​បញ្ជូន​គាត់​​​ត្រឡប់ទៅ​ពន្ធនាគារ​ខេត្ត​បន្ទាយមានជ័យ​វិញ​នោះ​ទេ ដោយសារ​​​​មន្ទីរ​ឃុំឃាំង​​ខេត្ត​នេះ​ចង្អៀត​ណែន។ បន្ថែម​ពី​នេះ​​លោក​ថា ​មូលហេតុ​ដែល​អាជ្ញាធរ​មិន​អាច​បញ្ជូន​មន្ត្រី​បក្ស​ប្រឆាំង​រូប​នេះ​ទៅ​ខេត្ត​​ដើម​អំឡុង​ពេល​នេះ ដោយសារ​​កំពុង​ផ្ទុះ​ការ​រាតត្បាត​ជំងឺ​កូវីដ​១៩​នៅ​កម្ពុជា៖ «គាត់​ធ្វើ​សំណើ​មក​អគ្គនាយកដ្ឋាន​ពន្ធនាគារ​មក​ដើម្បី​ពិចារណា​សំណើ​ហ្នឹង​។ តែ​ឥឡូវ​នេះ​វា​ពិបាក​ណាស់​អា​រឿង​ផ្ទេរ​អ្នក​ទោស​»។

ទោះ​ជា​យ៉ាង​ណា​ ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក ​(Adhoc)​ លោក​ នី សុខា​ មាន​ប្រសាសន៍​ថា​ ​រឿង​នេះ​មន្ត្រី​ពន្ធនាគារ​​គួរតែ​បញ្ជូន​លោក​ ចៅ វាសនា​ ត្រឡប់​​ទៅ​ឃុំ​នៅ​ពន្ធនាគារ​នៅ​ក្បែរ​ផ្ទុះ​គាត់​វិញ​ ដើម្បី​​ជួយ​សម្រួល​ដល់​ក្រុម​គ្រួសារ​​ងាយ​ស្រួល​សួរសុខទុក្ខ​​ជន​ជាប់​ឃុំ​។ ​មន្ត្រី​សង្គម​ស៊ីវិល​រូប​នេះ ​ចាត់​ទុក​ការ​​បន្ត​ឃុំ​ខ្លួន​ចៅ​សង្កាត់​​ប៉ោយប៉ែត​ជាប់​ឆ្នោត​រូប​នេះ​​នៅ​ព្រំដែន​ប្រទេស​វៀតណាម​ ថាជា​ការ​ធ្វើ​ទុក្ខបុកម្នេញ​ផ្នែក​នយោបាយ ធ្វើ​ឱ្យ​លោក​និង​ក្រុម​គ្រួសារ​ឈឺ​ចាប់​៖ «វា​គ្រាន់​តែ​ជាការ​លើក​ឡើង​ដើម្បី​គេចវេះ​អំពី​ការទទួល​ខុស​ត្រូវ​ និង​គេច​វេះ​កុំ​ឱ្យ​សាធារណៈ​ជន​រិះគន់​តែ​ប៉ុណ្ណោះ​។ ពីព្រោះ​បញ្ហា​កូវីដ​មិន​មាន​ន័យ​ថា មិន​អាច​យក​អ្នក​ដែល​ជាប់​ឃុំ​ចល័ត​ពី​កន្លែង​មួយ​ទៅ​កន្លែង​មួយ​បាន​ទេ​ ពីព្រោះ​ថា​ យើង​មាន​វិធាន​ការ​ការពារ​ គ្រប់គ្រាន់​នៅ​ក្នុង​ការ​ដែល​ដឹក​អ្នក​ជាប់ឃុំ​ចល័ត​ពី​កន្លែង​មួយ​ទៅ​កន្លែង​មួយ​។ ​យើង​ឃើញ​ហើយ​មាន​ការ​ចល័ត​អ្នក​ជាប់​ឃុំ​ពី​ពន្ធនាគារ​មួយ​ទៅ​ពន្ធនាគារ​មួយ​ក្នុង​ស្ថានភាព​កូវីដ​នេះ​ ក៏​យើង​ឃើញ​មាន​ដែរ​។ អីចឹង​ហេតុ​អី​បាន​គ្រាន់​តែ​លោក​ចៅ វាសនា ​មួយ​យើង​មិន​អាច​ចល័ត​គាត់​បាន​»

កន្លង​ទៅ​មេធាវី​ការពារ​ក្ដី​ឱ្យ​លោក ចៅ វាសនា ​​បាន​ប្ដឹង​​​ទៅ​តុលាការ​​ឧទ្ធរណ៍​និង​កំពូល​​ប្រឆាំង​​នឹង​សេចក្ដី​សម្រេច​របស់​តុលាការ​ថ្នាក់​ក្រោម​ជា​បន្តបន្ទាប់​ ​ប៉ុន្តែ​មិន​ទទួល​បាន​លទ្ធផល​ដូច​ការ​រំពឹង​ទុក​នោះឡើយ។

មន្ត្រី​សិទ្ធិមនុស្ស លោក​ នី សុខា ​នៅ​តែ​យល់​ថា ​​ការ​ឃុំ​ខ្លួន​លោក​ ចៅ វាសនា ​រយៈ​ពេល​ជាង៤ ឆ្នាំ​មក​នេះ ​គឺ​ជា​ការ​ធ្វើ​ទុក្ខបុកម្នេញ​ផ្នែក​នយោបាយ​ ពី​ព្រោះ​លោក​មើល​ឃើញ​ថា​ សកម្មជន​រូប​នេះ​មិន​បាន​ប្រព្រឹត្ត​ខុស​ច្បាប់​ដូច​ការ​ចោទ​ប្រកាន់​របស់​តុលាការ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល