រដ្ឋមន្ត្រីការបរទេស និងអភិវឌ្ឍន៍ នៃចក្រភពអង់គ្លេស លោក ដូមីនិក រ៉ាអាប់ (Dominic Raab) នឹងមកបំពេញទស្សនកិច្ចផ្លូវការនៅកម្ពុជានៅថ្ងៃទី២៣ ខែមិថុនា។
សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចេញនៅថ្ងៃទី២១ ខែមិថុនា ឱ្យដឹងថាដំណើរទស្សនកិច្ចនេះគឺតបតាមការអញ្ជើញរបស់រដ្ឋមន្ត្រីការបរទេសកម្ពុជា លោក ប្រាក់ សុខុន។ ប្រភពដដែលឱ្យដឹងទៀតថា លោក ដូមីនិក រ៉ាអាប់ និងលោក ប្រាក់ សុខុន នឹងជួបពិភាក្សាពីទិដ្ឋភាពផ្សេងៗនៃកិច្ចសហប្រតិបត្តិការទ្វេភាគី ព្រមទាំងបញ្ហាតំបន់ និងអន្តរជាតិ ដែលជាប្រយោជន៍ និងកង្វល់រួម។
ជាមួយគ្នានោះ លោក ដូមីនិក រ៉ាអាប់ នឹងជួបជាមួយ រដ្ឋមន្ត្រីក្រសួងបរិស្ថាន លោក សាយ សំអាល់ ព្រមទាំងទៅទស្សនាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងមជ្ឈមណ្ឌលឯកសារកម្ពុជា។
ក្រសួងការបរទេសកម្ពុជារំពឹងថាដំណើរទស្សនកិច្ចនេះនឹងជួយរួមចំណែកជំរុញ និងពង្រឹងបន្ថែមទៀតនូវទំនាក់ទំនងទ្វេភាគីរវាងប្រទេសទាំងពីរ និងក្នុងក្របខ័ណ្ឌអាស៊ាន។
នៅប៉ុន្មានថ្ងៃមុនដំណើរទស្សនកិច្ចនេះ លោកនាយករដ្ឋមន្ត្រី ហ៊ុន សែន បានប្រកាសលុបចោលកម្មវិធីជួបជុំទាំងអស់ ទាំងការជួបផ្ទាល់ និងជួបតាមវីដេអូ ដោយសារត្រូវធ្វើចត្តាឡីស័កពីជំងឺកូវីដ១៩ រយៈពេល ១៤ថ្ងៃ។
លោកក៏បានសម្រេចលុបចោលជំនួបជាមួយលោក ដូមីនីក រ៉ាអាប់ ក្រោមហេតុផលដដែលនេះ។
សូមលោកអ្នកនាងស្ដាប់បទសម្ភាសន៍រវាងអ្នកស្រី សុជីវី ជាមួយលោក ឯម សុវណ្ណារ៉ា អ្នកជំនាញផ្នែកវិទ្យាសាស្ត្រនយោបាយ និងកិច្ចការអន្តរជាតិ ជុំវិញដំណើរទស្សនកិច្ចនេះ...