លោក កឹម សុខា ទទួល​ស្គាល់​តែ​បាតុកម្ម​អហិង្សា និង​ស្រប​ច្បាប់​នៅ​ទីលាន​ប្រជាធិបតេយ្យ

ដោយ សេក បណ្ឌិត
2022.09.14
Share on WhatsApp
Share on WhatsApp
លោក កឹម សុខា ទទួល​ស្គាល់​តែ​បាតុកម្ម​អហិង្សា និង​ស្រប​ច្បាប់​នៅ​ទីលាន​ប្រជាធិបតេយ្យ ប្រធានគណបក្ស​សង្គ្រោះជាតិ លោក កឹម សុខា នៅ​ថ្ងៃ​សវនាការសាលាដំបូង​រាជធានី​ភ្នំពេញ​ ថ្ងៃទី១៤ ខែ​កញ្ញា ឆ្នាំ​២០២២។
រូប៖ ពលរដ្ឋផ្ដល់ឱ្យ

ប្រធាន​ក្រុម​ជំនុំជម្រះ លោក​ចៅក្រម កូយ សៅ ប្រកាស​បិទ​បញ្ចប់​អង្គហេតុ​ប្រទូស​រ៉ាយ​ករណី​ហិង្សា​នៅ​ផ្លូវ វេង ស្រេង ស្ពាន​អាកាស​ស្ទឹង​មាន​ជ័យ និង​នៅ​ស្ពាន​នាគ ហើយ​ក្នុង​សំណុំរឿង​របស់​ប្រធាន​គណបក្ស​ប្រឆាំង លោក កឹម សុខា នៅក្នុង​សវនាការ ថ្ងៃ​ទី១៤ ខែកញ្ញា​នេះ។ ទោះ​យ៉ាង​ណា​ក្ដី មន្ត្រី​សង្គម​ស៊ីវិល ដែល​តាម​ដំណើរ​រឿង​នេះ​លើក​ឡើង​ថា នេះ​គ្រាន់តែ​ជា​ការ​បិទ​បញ្ចប់​ចំណុច​តូច​មួយ​ក្នុង​ដំណើរ​រឿង​ដ៏​វែង​អន្លាយ​ប៉ុណ្ណោះ។

សំណុំរឿង​ក្បត់​ជាតិ​របស់​ប្រធាន​គណបក្ស​សង្គ្រោះ​ជាតិ លោក កឹម សុខា ដែល​អូស​បន្លាយ​ជាង ៥ឆ្នាំ និង​ឈាន​ដល់​សប្ដាហ៍​ទី៥៦ នេះ តុលាការ​បន្ត​សួរ​សំនួរ​ដាក់​បន្ទុក​ដដែល ប៉ុន្តែ​តុលាការ​មិន​សួរ​សំណួរ​ដោះ​បន្ទុក​លោក កឹម សុខា នោះ​ទេ។ មេធាវី និង​អ្នក​ឃ្លាំមើល រិះគន់​ថា នេះ​ជា​ការ​អនុវត្ត​ប្រាស​ចាក​ពី​នីតិវិធី​នៃ​ដំណើរ​ការ​ក្ដី។

មេធាវី​ការពារ​ក្ដី​លោក កឹម សុខា ម្នាក់​គឺ​អ្នកស្រី ម៉េង សុភាវី ឲ្យ​ដឹង​ក្រោយ​ចប់​សវនាការ​ថា ស្ថានភាព​ក្នុង​សវនាការ​នៅតែ​មាន​ភាព​តានតឹង ព្រោះ​តំណាង​អយ្យកា​នៅតែ​ព្យាយាម​ដេញដោល​សួរ​សំណួរ​លោក កឹម សុខា ដដែល​តាម​ការ​ចង់​បាន​របស់​ខ្លួន ប៉ុន្តែ លោក កឹម សុខា មិន​បាន​ផ្ដល់​ចម្លើយ​តាម​ការ​ចង់​បាន​របស់​តំណាង​អយ្យការ​នោះ​ទេ។ អ្នកស្រី​ក៏​រិះគន់​ដែរ​ថា ប្រធាន​ក្រុម​ជំនុំជម្រះ លោក​ចៅក្រម កូយ សៅ លើក​យក​តែ​សំនួរ​ដាក់​បន្ទុក​មក​ចោទ​សួរ​កូន​ក្ដី​របស់​អ្នកស្រី។ អ្នកស្រី​មេធាវី ម៉េង សុភាវី ស្នើ​ទៅ​តុលាការ​កុំ​យក​រូបមន្ត​គណិតវិទ្យា​មក​អនុវត្ត​នៅ​តុលាការ ព្រោះ​ទ្រឹស្ដី​ច្បាប់​អ្នក​ណា​ធ្វើ​ខុស​អ្នក​នោះ​ទទួល មិនមែន​គ្រប់​រឿង​សុទ្ធតែ​ទម្លាក់​ឲ្យ​លោក កឹម សុខា ទទួល​ខុសត្រូវ​តែ​ឯង​នោះ​ទេ៖ «ថ្នាក់ដឹកនាំ​គណបក្ស​សង្គ្រោះ​ជាតិ​មួយ​ចំនួន​​បាន​ទៅ​ធ្វើ​បាតុកម្ម​ សកម្មជន​មួយ​ចំនួន​បាន​ទៅ​ធ្វើ​បាតុកម្ម ​ដូច្នេះ​ជា​ការ​ទទួល​ខុសត្រូវ​របស់​កូន​ក្ដី​ខ្ញុំ​ហើយ​ ទេ​មិនមែន​ទេ​ មិនមែន​ជា​ការ​ទទួល​ខុស​ត្រូវ​ ពី​ព្រោះ​ដូច​ខ្ញុំ​លើក​អញ្ចឹង​ អ្នកណា​ធ្វើ​អ្នក​នោះ​ទទួល​​ជា​គោលការណ៍​ព្រហ្មទណ្ឌ​ឈ្មោះ​ក៏​​ធ្វើ​គឺ​អ្នក​នោះ​ជា​អ្នក​ទទួល​ខុសត្រូវ យើង​អត់​អាច​យក​រូប​មន្ត​ធរណីមាត្រ​មក​និយាយ​ថា អា (A) ស្មើ​នឹង​បេ (B) បេ (B) ស្នើ​នឹង​សេ (C) អ៊ីចឹង​នាំ​ឲ្យ​អា (A) ហ្នឹង​ស្នើ (C) ដែរ វា​អត់​អាច​អញ្ចឹង​ អត់​អាច​យក​រូប​មន្ត​​ហ្នឹង​នៅ​ក្នុង​រឿង​ព្រហ្មទណ្ឌ​នៅ​តុលាការ​បាន​ទេ​​​​​​​»

នា​រយៈ​ពេល​ចុង​ក្រោយ​នេះ តុលាការ​នៅតែ​បន្ត​លើក​យក​ករណី​ហិង្សា នៅ​ផ្លូវ វេង ស្រេង ស្ពាន​អាកាស​ស្ទឹងមានជ័យ និង​នៅ​ស្ពាន​នាគ កាល​ពី​ឆ្នាំ២០១៣ មក​ទាមទារ ឲ្យ​លោក កឹម សុខា ទទួល​ខុសត្រូវ ទោះ​លោក កឹម សុខា បញ្ជាក់​ទៅ​ក្នុង​តុលាការ​ថា លោក​ទទួល​ខុសត្រូវ​តែ​បាតុកម្ម​នៅ​ទីលាន​ប្រជាធិបតេយ្យ ដែល​ជា​បាតុកម្ម​រៀបចំ​ដោយ​គណបក្ស​សង្គ្រោះ​ជាតិ​ក្ដី។

ជុំវិញ​រឿង​នេះ​វិទ្យុ​អាស៊ី​សេរី​មិន​អាច​បក​ស្រាយ​ពី​ប្រធាន​សាលាដំបូង​រាជធានី​ភ្នំពេញ លោក តាំង ស៊ុនឡាយ បាន​ទេ​នៅ​ថ្ងៃ​ទី១៤ ខែកញ្ញា។ ចំណែក​អ្នក​នាំ​ពាក្យ​គណបក្ស​ប្រជាជន​កម្ពុជា​លោក សុខ ឥសាន តែងតែ​លើក​ឡើង​ដដែលៗ ថា សំណុំរឿង លោក កឹម សុខា ជា​ករណី​ពិសេស​ដូច្នេះ​គឺ​ទាមទារ​ឲ្យ​មាន​ការ​សួរ​ដេញ​ដោល​ឲ្យ​បាន​ល្អិតល្អន់។

ទោះ​យ៉ាង​ណា​ក្ដី មេធាវី​ការពារ​ក្ដី​លោក កឹម ម្នាក់ទៀត គឺ​លោក​មេធាវី ចាន់ ចេន នៅតែ​ទាមទារ​ឲ្យ​តុលាការ​ដំណើរ​ការ​សវនាការ​ឲ្យ​ឆាប់​រហ័ស ហើយ​យ៉ាង​ហោច មួយ​សប្ដាហ៍​បើក​សវនាការ​ឲ្យ​បាន៣ថ្ងៃ​ដែរ។ លោក​មេធាវី​រិះគន់​ថា នេះជាប្រវត្តិសាស្ត្រដែលតុលាការប្រើពេលជាង៥ឆ្នាំទៅហើយ ប៉ុន្តែ​នៅតែ​មិន​ទាន់​ឃើញ​ការ​ពិត​នៅ​ឡើយ៖ «សវនាការ​ឲ្យ​ឆាប់​ ឆាប់​កាលណា​ល្អ​កាល​ហ្នឹង​ អញ្ចឹង​ទស្សន​​ដែល​លើកឡើង​ថា​ ឯកឧត្តម​ កឹម សុខា​ ឬ​ក៏​​សហ​មេធាវី​ការពារ​​សិទ្ធិ​ឯកឧត្ដម ពន្យារ​ពេល​ជា​ការ​លើកឡើង​​​ដោយ​បំផ្លើស​ ជា​ការ​លើកឡើង​មិន​ត្រឹមត្រូវ​ ​យើង​មិន​ទទួល​យក​ជា​ដាច់ខាត​បាទ»

នៅ​ពេល​មាន​ដេញដោល​ចោទ​សួរ​លើ​អង្គហេតុ​ដដែល ទាក់ទង​ករណី​ហិង្សា​កាល​ពី​ឆ្នាំ២០១៣ បែប​នេះ​នៅ​ចុង​ម៉ោង​នៃ​សវនាការ ប្រធាន​ក្រុម​ប្រឹក្សា​ជំនុំជម្រះ​លោក កូយ សៅ បាន​ប្រកាស​ថា ចាប់​ពី​សប្ដាហ៍​ក្រោយ ដែលជាសប្ដាហ៍លើកទី៥៧ ត​ទៅ​តុលាការ​លែង​លើក​យក​ករណី​បាតុកម្ម​ទាមទារ​ដំឡើង​ប្រាក់​ឈ្នួល​របស់​កម្មករ​រោងចក្រ​នៅ​ផ្លូវ វេង ស្រេង ស្ពាន​អាកាស​ស្ទឹងមានជ័យ និង​អំពើ​ហិង្សា នៅ​ស្ពាន​នាគ​មក​ចោទ​សួរ​ទៀតហើយ ដោយ​តុលាការ​ដេញ​ដេញដោល​លើ​អង្គហេតុ​ថ្មី។

ទោះ​យ៉ាង​ណា​ក្ដី នាយក​ទទួល​បន្ទុក​កិច្ចការ​ទូទៅ​នៃ​អង្គការ​លីកាដូ លោក អំ សំអាត សង្កេត​ឃើញ​ថា ដំណើរ​ការ​នៃ​សវនាការ​នេះ​គ្មាន​ភាព​ជឿនលឿន​ទេ ហើយ​ការ​សួរ​សំណួរ​ដដែលៗ របស់​តំណាង​អយ្យការ​ធ្វើ​ឲ្យ​មាន​ភាព​តានតឹង​ថែម​ទៀត​ផង។ លោក​បន្ត​ថា ទោះ​ពេល​នេះ តុលាការ​បិទ​បញ្ចប់​អង្គហេតុ​ប្រទូសរ៉ាយ​ករណី​ហិង្សា​នៃ​ទាមទារ​ដំឡើង​ប្រាក់ឈ្នួល​កម្មករ​ក្ដី ប៉ុន្តែ លោក​ថា នៅ​មាន​ករណី​ជា​ច្រើន​ទៀត ដែល​តុលាការ​នឹង​សួរ​ដេញដោល​បន្ត និង​រួម​ទាំង​ការ​កោះហៅ​សាក្សី​មក​ឆ្លើយ​បំភ្លឺ​បន្ថែម​ទៀត​ផង៖ «តុលាការ​នឹង​បន្ត​នីតិវិធី​ទៅ​ផ្សេង​​ទៀត ដូច​សប្ដាហ៍​ក្រោយ នឹង​មាន​ការ​សាកសួរ​បន្ថែម​ ហើយ​នៅ​ខែ១០ (ខែ​តុលា) នឹង​មាន​ការ​កោះហៅ​សាក្សី​ដើម្បី​ចូល​បំភ្លឺ​បន្ថែម​ទៀត អ៊ីចឹង​អាច​នឹង​ចំណុច​ច្រើន​ទៀត​ដែល​អាច​នឹង​ត្រូវ​សួរ​ជា​បន្តបន្ទាប់​ទៀត​ណា បាទ​អញ្ចឹង​យើង​មើល​ថា សវនាការ​នេះ​ក៏​មិន​ងាយ​បញ្ចប់​ឆាប់​ទៅ​បាន​ដែរ»

ដូច​សព្វដង​ដែរ សវនាការ​នេះ​មាន​ការ​ឃ្លាំមើល​ពី​តំណាង​ស្ថានទូត​បរទេស និង​តំណាង​អង្គការ​សហប្រជាជាតិ​ប្រចាំ​កម្ពុជា តំណាង​អង្គការ​សង្គម​ស៊ីវិល​ក្នុង​ស្រុក និង​អ្នក​សារ​ព័ត៌មាន​ផង​ដែរ។ ចំណែក​នៅ​ក្រៅ​របង​តុលាការ​មាន​អ្នក​គាំទ្រ​លោក កឹម សុខា ប្រមាណ ៤០នាក់ និង​មាន​ការ​រឹត​បន្តឹង​សន្តិសុខ របស់​ក្រុម​សមត្ថកិច្ច ជុំវិញ​បរិវេណ​តុលាការ។

អ្នកគាំទ្រ លោក កឹម សុខា ម្នាក់ គឺលោក ខុន ផល្លា ចង់​ឃើញ​រដ្ឋាភិបាល​សម្របសម្រួល​នយោបាយ​បញ្ចប់​ជម្លោះ​សំណុំរឿង​នេះ។ លោក​ថា វិបត្តិ​នយោបាយ​នេះ ធ្វើ​ឲ្យ​ប៉ះពាល់​ដល់​ជីវភាព​ពលរដ្ឋ និង​ប្រទេស​ជាតិ​រង​នូវ​ទណ្ឌកម្ម​ថែម​ទៀត​ផង៖ «​ខ្ញុំ​​ចង់​ឃើញ​ប្រជាពលរដ្ឋ​ខ្មែរ​យើង​គ្រប់​និន្នាការ​ទាំង​អស់​រួម​សាមគ្គី​សហការ​គ្នា​ដើម្បី​ដោះស្រាយ​វិបត្តិ​ជាតិ​ទាំង​មូល​ ដោះស្រាយ​ជីវភាព​ប្រជាពលរដ្ឋ ហើយ​ការ​អូស​បន្លាយ​នេះ​យើង​ដឹង​ស្រាប់​ហើយ​ ពួកគាត់​ រក​ទុក្ខ​លំបាក​យ៉ាង​ខ្លាំង​»

តុលាការ​នឹង​បន្ត​សវនាការ​សំណុំរឿង លោក កឹម សុខា នៅ​ថ្ងៃ​ទី២១ ខែកញ្ញា សប្ដាហ៍​ក្រោយ​បន្ត​ទៀត ទាក់ទង​អង្គហេតុ​ថ្មី រួមមាន យុទ្ធនាការ​ថ្ងៃ​ច័ន្ទ​ពណ៌ខ្មៅ យុទ្ធនាការ​ផ្កាឈូក អង្គហេតុ​នៅ​មុខ​សណ្ឋាគារ​សាន់វ៉េ និង​ការ​បណ្ដុះបណ្ដាល​សកម្មជន​គណបក្ស​សង្គ្រោះ​ជាតិ​នៅ​ប្រទេស​ឥណ្ឌូនេស៊ី (Indonesia) ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។