ក្រុមស្ត្រីថ្ងៃសុក្រ នាំគ្នាទៅវត្តបន់ព្រះ និងទេវតា ឱ្យជួយថែរក្សាគ្រួសារកំពុងជាប់ឃុំ
2021.10.05
ក្រុមស្ត្រីជាភរិយារបស់សកម្មជនគណបក្សសង្គ្រោះជាតិនាំគ្នាទៅវត្ត វត្តបទុមសាគរ ស្ថិតនៅស្រុកស្អាង ខេត្តកណ្ដាល នៅព្រឹកថ្ងៃទី៥ ខែតុលា ដើម្បីបន់ព្រះ និងទេវតា ឱ្យជួយថែរក្សាគ្រួសារកំពុងជាប់ឃុំ។
រូប៖ ពលរដ្ឋផ្ដល់ឱ្យ
ក្រុមស្ត្រីតវ៉ារាល់ថ្ងៃសុក្រដែលជាប្រពន្ធសកម្មជនបក្សប្រឆាំង នាំគ្នាទៅវត្តនៅថ្ងៃទី៥ តុលា ដើម្បីបែរបន់សុំឲ្យតុលាការទម្លាក់បទចោទ និងដោះលែងប្ដីរបស់ពួកគាត់ឲ្យមានសេរីភាពវិញ។ ទន្ទឹមគ្នានេះ ពួកគាត់ក៏ដាក់បណ្ដាសា ចំពោះអ្នកដែលធ្វើបាបប្ដីរបស់ពួកគាត់ឱ្យទទួលកម្មពារដូចពួកគាត់ដែរ។
សាច់ញាតិរបស់សកម្មជននយោបាយដែលកំពុងជាប់ឃុំ គឺក្រុមស្ត្រីតវ៉ារៀងរាល់ថ្ងៃសុក្រ បាននាំគ្នាធ្វើបុណ្យរួមគ្នា ដោយយកចង្ហាន់ប្រគេនព្រះសង្ឃនៅវត្តបទុមសាគរ ស្ថិតនៅស្រុកស្អាង ខេត្តកណ្ដាល នៅព្រឹកថ្ងៃទី៥ ខែតុលា។ ពួកគាត់រំពឹងថា អានិសង្សនៃមគ្គផលបុណ្យភ្ជុំបិណ្ឌ នឹងជំរុញតុលាការដោះលែងប្ដី និងឪពុករបស់ពួកគេឆាប់ៗ។
សមាជិកក្រុមស្ត្រីតវ៉ារាល់ថ្ងៃសុក្រ និងជាប្រពន្ធរបស់សមាជិកក្រុមប្រឹក្សាខេត្តកំពង់ធំ ជាប់ឆ្នោតគណបក្សសង្គ្រោះជាតិលោក ស៊ុន ធន់ គឺលោកស្រី សេង ចាន់ថន ឲ្យដឹងថា ពួកលោកស្រីបានបួងសួងសុំបារមីវត្ត និងវត្ថុស័ក្ដិសិទ្ធិជួយឃុំគ្រង និងថែរក្សាអ្នកនយោបាយកំពុងជាប់ក្នុងពន្ធនាគារឲ្យជួបតែសេចក្ដីសុខ និងសុំឲ្យអ្នកក្បត់ជាតិពិតប្រាកដវិនាសសាបសូន្យ៖ «បារមីព្រះអង្គ សូមឲ្យវត្ថុស័ក្ដិសិទ្ធិទាំងប៉ុន្មានហ្នឹងជួយធ្វើយ៉ាងណាដើម្បីផ្ដន្ទាទោសទៅលើជនអាក្រក់ ជនក្បត់ជាតិពិតប្រាកដហ្នឹង ឲ្យវារលាយវិនាសសាបសូន្យទៅតាមហ្នឹងទៅ ហើយសូមឲ្យអ្នកដែលស្រលាញ់ជាតិ ស្រលាញ់ទឹកដីហ្នឹងមានសិទ្ធិ មានសេរីភាពឡើងវិញ»។
ការយកចង្ហាន់ទៅវត្តរបស់ក្រុមស្ត្រីថ្ងៃសុក្រ នៅថ្ងៃទី៥ តុលា មិនរងការបង្ក្រាប ឬហាមឃាត់ពីប៉ូលិសដូចការតវ៉ា ឬការដាក់ញត្តិតាមស្ថានទូតកន្លងមកទេ។ ចំណែកស្ថានភាពអ្នកនយោបាយកំពុងជាប់ឃុំក្នុងពន្ធនាគារវិញ ពួកគាត់បានទូរស័ព្ទមកប្រាប់សាច់ញាតិថា ខាងពន្ធនាគារព្រៃស«ម១» បានអនុញ្ញាតឲ្យសាច់ញាតិជួបអ្នកជាប់ឃុំបានរយៈពេល ៣ថ្ងៃនៃពិធីបុណ្យភ្ជុំបិណ្ឌ ពីថ្ងៃទី៥ ដល់ថ្ងៃទី៧ តុលា។ ក្រុមស្ត្រីទាំងនោះក៏បានរ៉ៃអង្គាសលុយគ្នា ដើម្បីធ្វើនំបញ្ចុកយកទៅឲ្យជនជាប់ឃុំក្នុងពន្ធនាគារ នៅថ្ងៃទី៦ ខែតុលា។
ពាក់ព័ន្ធករណីនេះ វិទ្យុអាស៊ីសេរីមិនអាចសុំការបញ្ជាក់ពីអ្នកនាំពាក្យអគ្គនាយកដ្ឋានពន្ធនាគារ លោក នុត សវនា នៅថ្ងៃទី៥ តុលា បានទេ។ ប៉ុន្តែកាលពីថ្ងៃទី២ តុលា អគ្គនាយកពន្ធនាគារ លោក ឆែម សាវុធ បានចេញលិខិតសម្រេចអនុញ្ញាតឱ្យសាច់ញាតិអាចចូលជួបសួរសុខទុក្ខអ្នកជាប់ឃុំ និងអនុញ្ញាតឱ្យមានការ រៀបចំពិធីសាសនាក្នុងឱកាសបុណ្យកាន់បិណ្ឌ និងភ្ជុំបិណ្ឌ ចំពោះតំបន់ដែលមានហានិភ័យទាបនៃការឆ្លងរាលដាលនៃជំងឺកូវីដ-១៩ (Covid-19)។
ចំពោះមណ្ឌលអប់រំកែប្រែ និងពន្ធនាគារ ដែលស្ថិតក្នុងតំបន់ហានិភ័យនៃការរាតត្បាតជំងឺកូវីដ-១៩ គឺមិនអនុញ្ញាតឱ្យសាច់ញាតិជួបសួរសុខទុក្ខទេ តែសាច់ញាតិអាចផ្ញើម្ហូបអាហារ និងសម្ភារផ្សេងៗ បានតាមរយៈមន្ត្រីពន្ធនាគារ និងការអនុវត្តវិធានការសុខាភិបាលឱ្យខ្ជាប់ខ្ជួន។ ទោះជាយ៉ាងណាក្ដី ខាងអគ្គនាយកដ្ឋានពន្ធនាគារ មិនទាន់បង្ហាញថាពន្ធនាគារ ឬមណ្ឌលអប់រំកែប្រែណាខ្លះ ស្ថិតក្នុងតំបន់ហានិភ័យកម្រិតណាឡើយ។
មន្ត្រីសង្គមស៊ីវិលស្វាគមន៍ការអនុញ្ញាតឲ្យសាច់ញាតិជួបសួរសុខទុក្ខអ្នកជាប់ឃុំ និងហៅការបែរបន់របស់ក្រុមស្ត្រីទាំងនេះថា ជាសិទ្ធិនៃជំនឿសាសនារបស់ពលរដ្ឋ។
អ្នកនាំពាក្យសមាគមសិទ្ធិមនុស្សអាដហុក លោក ស៊ឹង សែនករុណា ព្រួយបារម្ភថា បើស្ថានភាពនយោបាយនៅតែគ្មានដំណោះស្រាយដូចសព្វថ្ងៃនេះ អាចជះឥទ្ធិពលមិនល្អ និងអាចបណ្ដាលឲ្យអ្នកនយោបាយបន្តជាប់ឃុំកាន់តែយូរទៀត៖ «បើសិនជាមិនមានការផ្ដល់នូវក្ដីអាណិតអាសូរ ឬក៏មេត្តារឿងទាំងអស់ហ្នឹងទេ។ ខ្ញុំគិតថាគ្មានការដោះលែងទេ ព្រោះស្ថានភាពទាំងឡាយហ្នឹងខ្ញុំយល់ថាមានតែរង់ចាំនូវស្ថានភាពធូរស្រាលតែប៉ុណ្ណឹង»។
នៅសប្ដាហ៍នេះដែរ ក្រុមស្ត្រីនឹងផ្អាកការចេញតវ៉ាសិន ព្រោះស្ថាប័នមួយចំនួនត្រូវឈប់សម្រាកថ្ងៃបុណ្យភ្ជុំបិណ្ឌ។ ប៉ុន្តែនៅថ្ងៃសុក្រសប្ដាហ៍ក្រោយពួកគាត់នឹងយកញត្តិទៅដាក់តាមស្ថានទូតនានាបន្តទៀត ដើម្បីជំរុញឲ្យមានការដោះលែងប្ដីរបស់ពួកគាត់ឲ្យមានសេរីភាពវិញ។
អាជ្ញាធររបបក្រុងភ្នំពេញ បានចាប់ខ្លួនសកម្មជននយោបាយ សកម្មជនសង្គម សកម្មជនសិទ្ធិមនុស្ស និងបរិស្ថានដាក់ពន្ធនាគារជិត ៩០នាក់ហើយ ដោយចោទបទញុះញង់ រួមគំនិតក្បត់ ជេរប្រមាថរដ្ឋាភិបាល និងបទប្រមាថព្រះមហាក្សត្រ។
សង្គមស៊ីវិលជាតិ អន្តរជាតិ និងក្រុមអ្នកជំនាញសិទ្ធិមនុស្សនៃអង្គការសហប្រជាជាតិ បានទាមទារឲ្យរបបក្រុងភ្នំពេញបញ្ឈប់ការធ្វើទុក្ខបុកម្នេញ ការចាប់ឃុំខ្លួនសកម្មជនតាមទំនើងចិត្តបន្តទៀត និងត្រូវដោះលែងពួកគេឲ្យមានសេរីភាពវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ