កម្មករ​រោងចក្រ​បារម្ភ​កាន់​តែ​ខ្លាំង​រឿង​អត់​ការ​ធ្វើ​ ស្រប​ពេល​ឱសានវាទ​ដក EBA កាន់​តែ​ខើច

ដោយ វ៉ែន សុមេធ
2019-08-19
អ៊ីម៉ែល
មតិ
Share
បោះពុម្ព
កម្មការិនី​នៅ​ក្នុង​រោងចក្រ​កាត់​ដេរ​មួយ​កន្លែង​ក្នុង​ទីក្រុង​ភ្នំពេញ។
កម្មការិនី​នៅ​ក្នុង​រោងចក្រ​កាត់​ដេរ​មួយ​កន្លែង​ក្នុង​ទីក្រុង​ភ្នំពេញ។
AFP File Photo

ក្រុម​កម្មករ​កាត់​ដេរ​ព្រួយ​បារម្ភ​កាន់​តែ​ខ្លាំង​អំពី​ស្ថានភាព​ការងារ​របស់​ពួក​គាត់ ស្រប​ពេល​ឱសានវាទ​នៃ​ការ​ដក​ហូត​ប្រព័ន្ធ​អនុគ្រោះ​ពន្ធ EBA កាន់​តែ​ខិត​ជិត​ចូល​មក​ដល់។ ក្រុម​កម្មករ​​បញ្ជាក់​ថា ប្រសិន​បើ​សហភាព​អឺរ៉ុប​ផ្ដាច់​ការ​អនុគ្រោះ​ពន្ធ​​នេះ​​មែន ពួកគាត់​នឹង​បាត់​បង់​ការងារ ហើយ​សេដ្ឋកិច្ច​គ្រួសារ​នឹង​ធ្លាក់​ចុះ​ដុន​ដាប​ទៅតាម​នោះ​ដែរ។

ក្រុម​កម្មករ​រោងចក្រ​អះអាង​ថា ស្ថានភាព​ប្រឈម​ផ្នែក​ការងារ​របស់​ពួក​គាត់​នៅ​ពេល​នេះ មាន​លក្ខណៈ​ធ្ងន់ធ្ងរ​ជាង​ពេល​ណាៗ ទាំង​អស់ ដែល​ទាម​ទារ​ឱ្យ​រដ្ឋាភិបាល​មាន​ដំណោះ​ស្រាយ​ឱ្យ​បា​ន​​ទាន់​ពេល​វេលា។

កញ្ញា ឃុន ស្រីពៅ គឺ​ជា​កម្មករ​រោងចក្រ​កាត់​ដេរ​មួយ​កន្លែង​នៅ​រាជធានី​ភ្នំពេញ ដែល​ផ្គត់​ផ្គង់​ផលិត​ផល​ឱ្យ​ក្រុមហ៊ុន​សំលៀកបំពាក់​ម៉ាក ហ្សារ៉ា (ZARA) និង មេងហ្គោ (MANGO)។ កញ្ញា​ឱ្យ​ដឹង​ថា រោងចក្រ​មិន​សូវ​មាន​ការងារ​ឱ្យ​កម្មករ​ធ្វើ​ច្រើន​ដូច​ពី​មុន​​ឡើយ ដោយ​សារ​ក្រុមហ៊ុន​បាន​កាត់​បន្ថយ​ការ​បញ្ជាទិញ។ កញ្ញា​បន្ត​ថា កាល​ពី​មុន​កញ្ញា​ធ្លាប់​ទទួល​បាន​ប្រាក់​ឈ្នួលចន្លោះពី ២៥០ ទៅ ៣០០​ដុល្លារ​ក្នុង​មួយ​ខែ ពី​ការងារ​ពេញ​ម៉ោង និង​ថែម​ម៉ោង ក៏​ប៉ុន្តែ​ពេល​នេះ​កញ្ញា​ទទួល​បាន​តែ​ប្រមាណ ២១៥​ដុល្លារ​​ប៉ុណ្ណោះ​ក្នុង​មួយ​ខែ ដោយ​ខ្វះ​ការងារ​ថែម​ម៉ោង។ កញ្ញា​បញ្ជាក់​ថា ដោយ​សារ​មិន​សូវ​សម្បូរ​ការងារ​ រោងចក្រ​របស់​កញ្ញា​បាន​បញ្ឈប់​កម្មករ​ជា​បន្ត​បន្ទាប់​អស់​​ប្រមាណ ៧០០នាក់​រួច​មក​ហើយ នៅ​ក្នុង​រយៈពេល ​៦ខែ​​ចុងក្រោយ​នេះ។

កញ្ញា​ព្រួយ​​បារម្ភ​ថា ថ្ងៃ​ណា​មួយ​កញ្ញា​ក៏​អាច​នឹង​ត្រូវ​គេ​បញ្ឈប់​ដែរ ប្រសិន​បើ​ស្ថានភាព​បែប​នេះ​នៅ​តែ​បន្ត។ កម្មករ​រូប​នេះ​ថ្លែង​ថា សព្វថ្ងៃ​កញ្ញា​ត្រូវ​ទទួល​បន្ទុក​ចិញ្ចឹម​ឪពុក​ម្ដាយ​ចាស់​ជរា និង​បង​ស្រី​ដែល​មាន​ជំងឺ​ប្រចាំ​កាយ ហើយ​បើ​កញ្ញា​​បាត់​បង់​ចំណូល​ នោះ​សេដ្ឋកិច្ច​គ្រួសារ​របស់​កញ្ញា​នឹង​ត្រូវ​ដួល​ទាំង​ជំហរ​តែ​ម្តង៖ «កាល​មុន​យើង​ឧស្សាហ៍​បាន​ថែម​ម៉ោង ដោយ​សារ​ទំនិញ​មាន​ច្រើន ហើយ​ពួក​យើង​សប្បាយ​ចិត្ត​ដែល​ទទួល​បាន​កម្រៃ​លើក​ទឹកចិត្ត​ក្រៅ​ម៉ោង​ច្រើន ប៉ុន្តែ​មក​​ដល់​ពេល​នេះ​អត់​​មាន​ការ​ងារ​ធ្វើ​ទេ​កម្មករ​ភាគ​ច្រើន។ ខ្ញុំ​មាន​ការ​បារម្ភ មិន​ចាំបាច់​តែ​ទៅ​មុខ​ទេ សូម្បី​តែ​ឥលូវ​កម្មករ​ទូទៅ ទាំង​គេ​ទាំង​ខ្ញុំ គឺ​ស្ថិត​ក្នុង​ការ​ប្រឈម​មុខ​ ព្រួយបារម្ភ​គ្រប់​គ្នា​ពី​មួយ​ខែ​ទៅ​មួយ​ខែ ពីព្រោះ​ចាប់​ផ្ដើម​ដក​កម្មករ​រឿយៗ ជា​រៀង​រាល់​ខែ​អ៊ីចឹង មិន​ដឹង​ថា ចំ​អ្នក​ណា​ទេ។ យើង​ខ្ញុំ​ព្រួយ​បារម្ភ​ខ្លាំង​ណាស់​ក្នុង​ការ​អត់​ការងារ​ធ្វើ​ហ្នឹង»

ស្រដៀង​គ្នា​នេះ កម្មករ​មួយ​រូប​ទៀត​នៅ​រាជធានី​ភ្នំពេញ លោកស្រី ស៊្រុន សុខធី ឱ្យ​ដឹង​ថា កាល​ពី​មុន រោងចក្រ​លោក​ស្រី​ទទួល​ផលិត​សៀក​បំពាក់​ឱ្យ​ក្រុមហ៊ុន​ម៉ាក​យីហោ​ល្បីៗ ជា​ច្រើន ដូច​ជា លីវ៉ាយ (Levi) និង​អាឌីដាស (Addidas) ជាដើម ប៉ុន្តែ​​ពេល​នេះ ​រោងចក្រ​ផលិត​សម្រាប់​តែ​ក្រុមហ៊ុន​មួយ​នៅ​​​ប្រទេស​ជប៉ុន​ប៉ុណ្ណោះ ដោយ​ក្រុម​ហ៊ុន​ផ្សេង​ទៀត​ បាន​ផ្អាក​ការ​បញ្ជាទិញ​របស់​ខ្លួន​ហើយ។ លោក​ស្រី​បញ្ជាក់​ថា​រាល់​ថ្ងៃ ខាង​រោងចក្រ​មិន​​បាន​ថែម​ម៉ោង​ឱ្យ​កម្មករ​ទៀត​ឡើយ ពីព្រោះ​រោងចក្រ​​មិន​មាន​ឥវ៉ាន់​ឱ្យ​កម្មករ​ដេរ។ លោក​ស្រី​បន្ត​ថា បញ្ហា​​នេះ​បាន​ធ្វើ​ឱ្យ​កម្មករ​ថយ​ចុះ​​ប្រាក់​ចំណូល​ដែល​ធ្លាប់​ធ្វើ​បាន​ប្រមាណ ៣០០​ដុល្លារ​ក្នុង​​មួយ​ខែ មក​នៅ​ត្រឹម​ជិត ២០០​ដុល្លារ​ក្នុង​មួយ​ខែ។

លោក​ស្រី​បញ្ជាក់​ថា នេះ​ជា​ស្ថានភាព​ប្រឈម​ធ្ងន់ធ្ងរ​បំផុត​​ដែល​អ្នក​ស្រី​មិន​ធ្លាប់​ជួប​ប្រទះ​ឡើយ ក្នុង​រយៈពេល​ជាង២០ ឆ្នាំ​នៃ​ជីវិត​ជា​កម្មករ​រោងចក្រ។ លោក​​ស្រី​បន្ថែម​ថា សហភាព​អឺរ៉ុប​មិន​ទាន់​នឹង​បាន​ដក​ការ​អនុគ្រោះ​ពន្ធ​ផង ស្ថានភាព​ធ្លាក់​ដល់​កម្រិត​នេះ​ទៅ​ហើយ​ ទម្រាំដល់​បាត់​ EBA ទៀត លោក​​ស្រី​យល់​ថា លោក​ស្រី​​ និង​កម្មករ​ដទៃ​ទៀត​នៃ​វិស័យ​កាត់ដេរ ទំនង​ជា​គ្មាន​ការងារ​ធ្វើ​ទៀត​ឡើយ៖ «ពីមុន​មក​​ ពួក​ខ្ញុំ​ធ្វើ​​ការ​ថែម​​ម៉ោង ម៉ោង៦ រហូត​ដល់​មាន​ម៉ោង៨ កន្លះ​អ៊ីចឹង ប៉ុន្តែ​មក​ដល់​ពេល​នេះ ពួក​ខ្ញុំ​អត់​ដែល​​បាន​ថែម​ម៉ោង​ ហើយ​ក៏​អត់​មាន​​ទំនិញ​​ធ្វើ​បរិបូរ ពេល​ខ្លះ​​យើង​ឈប់​សម្រាក​ប្រចាំ​ឆ្នាំ​អ៊ីចឹង។ បើ​យើង​គិត​ប្រៀប​ធៀប​ពី​មុន​ មក​ដល់​ឥលូវ​ហ្នឹងជួប​បញ្ហាធ្ងន់ធ្ងរ​បំផុត​សម្រាប់​ពួក​ខ្ញុំ​ជា​កម្មករ»

សហភាព​អឺរ៉ុប​បាន​ទទួល​ឯកសារ​ផ្លូវការ​ពី​គ្រប់​ភាគី​រួចរាល់​អស់ហើយ ដើម្បី​​វាយ​តម្លៃ មុន​នឹង​​សម្រេច​​ព្យួរ​​ការ​​អនុគ្រោះ​​ពន្ធ EBA ពី​​កម្ពុជា។

សមាគម​រោងចក្រ​កាត់ដេរ​នៅ​កម្ពុជា (GMAC) បាន​ដាក់​ឯកសារ​​ទៅ​សហភាព​អឺរ៉ុប​ដែរ ដើម្បី​បង្ហាញ​ពី​ភាព​ប្រសើរ​ឡើង​នៃ​ការ​គោរព​​សិទ្ធិ​ការងារ និង​សិទ្ធិ​សហជីព​។ សមាគម​នេះ​បាន​ស្នើ​​ឱ្យ​សហភាព​អឺរ៉ុប​រក្សា​ការ​អនុគ្រោះ​ពន្ធ​ដល់​កម្ពុជា​បន្ត​ទៀត ពីព្រោះ​ការ​ដក​ EBA នឹង​ធ្វើ​ឱ្យ​កម្មករ ៧៥ម៉ឺន​នាក់ ព្រម​ទាំង​គ្រួសារ​របស់​ពួក​គេ ៣លាន​នាក់​ទៀត ត្រូវ​រង​គ្រោះ។

ប្រធាន​សហភាព​ការងារ​កម្ពុជា (CLC) លោក អាត់ ធន់ ថ្លែង​ថា ការ​លើក​ឡើង​ទាំងឡាយ​របស់​កម្មករ សុទ្ធ​សឹង​តែ​ជា​រឿង​ពិត​ដែល​ពួក​គាត់​បាន​ជួប​ប្រទះ និង​កំពុង​ប្រឈម។ លោក​បន្ត​ថា រដ្ឋាភិបាល​កម្ពុជា​ត្រូវ​តែ​រក​ដំណោះស្រាយ​សម​​ស្រប​ឆ្លើយ​តប​នឹង​កង្វល់​របស់​ក្រុម​កម្មករ។ លោក​បន្ថែម​ថា ក្នុង​ស្ថានភាព​បែបនេះ ខាង​ក្រុម​ថៅកែ​រោងចក្រ​ក៏​មាន​តួនាទី​សំខាន់​ក្នុង​ការ​ជួយ​ស្ដារ​ស្ថានការណ៍​ដែរ ដោយ​ត្រូវ​បញ្ឈប់​ការ​រើសអើង និង​ការ​ធ្វើ​ទុក្ខបុកម្នេញ​លើ​កម្មករ និង​សហជីព ព្រម​ទាំង​លើក​ស្ទួយ​ការ​គោរព​សិទ្ធិ​ការងារ និង​សិទ្ធិ​សហជីព៖ «ស្នើសុំ​ឱ្យ​គេ​ជួយ​ តែ​ខ្លួន​ឯង​មាន​លទ្ធភាព​​ មិន​ជួយ។ ដូច​ពាក្យ​បណ្ដឹង​ទាំង​អស់ ៩០% គឺ​និយោជក​ប្តឹង​ដោយសារ​តែ​គាត់​មាន​លុយ​ មាន​អំណាច មាន​​សិទ្ធិ​គ្រប់​យ៉ាង អ៊ីចឹង​ខ្ញុំ​គិត​ថា អា​ហ្នឹង​សុទ្ធ​តែ​ជា​រឿង​អត់​ត្រឹម​ត្រូវ​។ អ៊ីចឹង​និយោជក​អាច​ជួយ​បាន ទី​មួយ​ដូច​ជា​ដក​បណ្ដឹង សម្រួល​សិទ្ធិ និង​សេរីភាព ផ្ដល់​ផល​ប្រយោជន៍​ឱ្យ​កម្មករ និង​ជួយ​កែ​តម្រូវ​ច្បាប់​ដែល​ជា​ឧបសគ្គ​នៃ​សិទ្ធិ​កម្មករ​ថ្មីៗ ហ្នឹង ខ្ញុំ​គិត​ថា វា​កាន់​តែ​ល្អ​ឡើង​ ដែល​ធ្វើ​ឱ្យ​មាន​ការ​ចូល​រួម​ចំណែក​ក្នុង​​ការ​​ជួយ​បន្ត​ EBA ហ្នឹង​ដែរ»

កាល​ពី​ចុង​ខែ​កុម្ភៈ កន្លងទៅ ពោល​គឺ​បន្ទាប់​ពី​សហភាព​អឺរ៉ុប​ប្រកាស​ពី​នីតិវិធី​ពិចារណា​ព្យួរ​ប្រព័ន្ធ​អនុគ្រោះ​ពន្ធ EBA មេដឹកនាំ​របប​ក្រុង​ភ្នំពេញ​លោក ហ៊ុន សែន បាន​ប្រាប់​ឱ្យ​កម្មករ​រក្សា​ភាព​ស្ងៀម​ស្ងាត់​រឿង EBA ពីព្រោះ​លោក​ថា នេះ​ជា​សង្គ្រាម​ចិត្ត​សាស្ត្រ​វាយ​ប្រហារ​របប​របស់​លោក។ ក៏​ប៉ុន្តែ​ ជាច្រើន​ខែ​មក​នេះ របប​ក្រុង​ភ្នំពេញ​មិន​បាន​កែ​ប្រែ​ស្ថានការណ៍​ធ្លាក់​ចុះ​ដុន​ដាប​នៃ​ការ​គោរព​សិទ្ធិមនុស្ស និង​ប្រជាធិបតេយ្យ​នោះ​ឡើយ ធ្វើ​ឱ្យ​វិបត្តិ EBA នេះ កាន់​តែ​ទុំ​ជោរ​មក​​ដល់​ពេល​បច្ចុប្បន្ន។

ទោះ​ជា​យ៉ាង​ណា កម្មការិនី​រោងចក្រ​កាត់​ដេរ​មួយ​រូប​នៅ​ខេត្ត​កណ្ដាល លោកស្រី ដោក សាវ៉ាន់ ចង់​ឱ្យ​រដ្ឋាភិបាល​កម្ពុជា​បច្ចុប្បន្ន​ពិនិត្យ​ឱ្យ​បាន​ដិត​ដល់​ពី​កង្វល់​របស់​កម្មករ​រោងចក្រ​កាត់​ដេរ។ លោក​​ស្រី​បញ្ជាក់ថា លោក​ស្រី​មិន​ដែល​​ប្រទះ​ស្ថានភាព​​ការងារ​យ៉ាប់យ៉ឺន​ដូច​ពេល​បច្ចុប្បន្ន​នេះ​ទេ ក្នុង​រយៈពេល​ជាង ២៥ឆ្នាំនេះ។ លោក​ស្រី​បញ្ជាក់​ថា ពេល​នេះ​រោងចក្រ​មួយ​ចំនួន​ រួម​ទាំង​រោងចក្រ​ដែល​លោក​ស្រី​កំពុង​ធ្វើការ​ផង ​ចាប់​ផ្ដើម​រិះរក​វិធី​កេង​ប្រវ័ញ្ច​កម្មករ ដោយ​តម្រូវ​ឱ្យ​ពួក​គាត់​ធ្វើ​ការងារ​ច្រើន​ជាង​មុន​ជាមួយ​នឹង​អត្ថប្រយោជន៍​កាន់​តែ​តិច។ លោក​ស្រី​បារម្ភ​ថា ស្ថានភាព​​នឹង​កាន់​តែ​លំបាក​ជាង​នេះ​ទៀត បើ​សហភាព​អឺរ៉ុប​សម្រេច​ដក​ហូត​ការ​អនុគ្រោះ​ពន្ធ​ពី​កម្ពុជា៖ «សម្រាប់​ខ្ញុំ​ផ្ទាល់​ ខ្ញុំ​មាន​តែ​សំណូម​ពរ​ឱ្យ​ទៅ​ខាង​រាជ​រដ្ឋាភិបាល​នៃ​កម្ពុជា​របស់​យើង​ហ្នឹង សូម​ឱ្យ​មាន​ការ​ពិចារណា​ឡើង​វិញ​នូវ​អ្វី​​ដែល EU គេ​ស្នើ​​សុំ​ ដោយសារអ្វី​ដែល EU ស្នើសុំ​ ដូចជា​វា​មិន​ពិបាក​ធ្វើ​ទេ គ្រាន់​ថា គោរព​លទ្ធិ​​ប្រជាធិបតេយ្យ សិទ្ធិ​សេរីភាព​ក្នុង​ការ​បញ្ចេញ​មតិ​ និង​សិទ្ធិ​សេរីភាព​របស់​កម្មករ​ទៅ វា​រួច​ហើយ ​ជា​រឿង​ដែល​យើង​ត្រូវ​តែ​ធ្វើ»

របប​លោក ហ៊ុន សែន បាន​ដាក់​​ចេញ​នូវ​វិធានការ​មួយ​ចំនួន​ដើម្បី​ត្រៀម​ទប់​ទល់​នឹង​ស្ថានភាព​បាត់បង់​ការ​អនុគ្រោះ​ពន្ធ EBA។ វិធានការ​ទាំងនោះ​មាន​ជាអាទិ៍ ការ​បញ្ចុះ​តម្លៃ​អគ្គិសនី កាត់​បន្ថយ​ថ្លៃ​ដឹក​ជញ្ជូន និង​លើក​ដាក់​កុងតឺន័រ លុប​បំបាត់​ស្ថាប័ន​មួយ​ចំនួន​នៅ​កន្លែង​នាំចេញ​ ហើយ​នៅ​ចុង​ក្រោយ​នេះ គឺ​ការ​លុបចោល​ថ្ងៃឈប់​សម្រាក ៦ថ្ងៃ​បន្ថែម​ទៀត ដែល​ជា​វិធានការ​ធ្វើ​ឱ្យ​បាត់​ប្រយោជន៍​​កម្មករ និង​ចំណេញ​ដល់​ថៅកែ​រោងចក្រ។

ទោះ​ជា​យ៉ាងណា សហជីព​ឯករាជ្យ​មើល​ឃើញ​ថា វិធានការ​ទាំងនេះ​មិន​អាច​រំលត់​ក្តី​បារម្ភ និង​ស្អំ​ចិត្ត​ក្រុម​ថៅកែ​រោងចក្រ​ឱ្យ​បន្ត​រកស៊ី​នៅ​កម្ពុជា​បាន​ឡើយ ពីព្រោះ​វា​មិន​អាច​ប៉ះប៉ូវ​ការ​ខាត​បង់​របស់​ក្រុម​អ្នក​រកស៊ី​បាន។ ការ​ខាតបង់​របស់​ក្រុម​អ្នក​វិនិយោគ មិន​មែន​ត្រឹម​ការ​​បង់​ពន្ធ​ជិត ៧០០លាន​ដុល្លារ​អាមេរិក​ក្នុង​មួយ​ឆ្នាំ​តែ​មួយ​មុខ​នោះ​ឡើយ ក៏​ប៉ុន្តែ​ក្រុមហ៊ុន​ម៉ាក​យីហោ​ល្បីៗ នឹង​កាត់​បន្ថយ​ ឬ​បញ្ឈប់​ការ​បញ្ជា​ទិញ​ទំនិញ​ពី​កម្ពុជា​ថែម​ទៀត។

ក្រុម​សង្គម​ស៊ីវិល និង​កម្មករ​រោងចក្រ​ ស្នើ​យ៉ាង​ទទូច​ឱ្យ​របប​ក្រុង​ភ្នំពេញ​អនុវត្ត​តាម​លក្ខខណ្ឌ​ស្ការ​សិទ្ធិ​មនុស្ស និង​ប្រជាធិបតេយ្យ​ឡើងវិញ ដើម្បី​បញ្ចៀស​គ្រោះកាច​នេះ ស្រប​ពេល​ឱសានវាទ​របស់​សហភាព​អឺរ៉ុប​នឹង​មក​ដល់​នៅ​ដើម​ឆ្នាំ២០២០ ខាងមុខ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល