គណបក្ស​ប្រជាធិបតេយ្យ​មូលដ្ឋានចោទសួរ​ថា តើអំណោយ​ដាក់​ឈ្មោះ​លោក ហ៊ុន សែន​ ជា​ទង្វើ​កេងចំណេញ​នយោបាយ​ដែរ​ទេ​?​

ដោយ មាន ឫទ្ធិ
2021-05-09
Share
គណបក្ស​ប្រជាធិបតេយ្យ​មូលដ្ឋានចោទសួរ​ថា តើអំណោយ​ដាក់​ឈ្មោះ​លោក ហ៊ុន សែន​ ជា​ទង្វើ​កេងចំណេញ​នយោបាយ​ដែរ​ទេ​?​ (ឆ្វេង) រូបសញ្ញាគណបក្សប្រជាធិបតេយ្យមូលដ្ឋាន។ គណបក្ស​ប្រជាធិបតេយ្យ​មូលដ្ឋានចោទសួរ​ថា តើអំណោយ​ដាក់​ឈ្មោះ​លោក ហ៊ុន សែន​ ជា​ទង្វើ​កេងចំណេញ​នយោបាយ​ដែរ​ទេ​?​
រូប៖ ហ្វេសប៊ុក GDP

គណបក្ស​​ប្រជាជន​កម្ពុជា​​ដែល​​គ្រប់គ្រង​ប្រទេស​ដោយ​ឯកបក្ស​បន្តរង​ការ​រិះគន់​ថា​យក​បញ្ហា​កូវីដ១៩ ដើម្បី​កេង​ចំណេញ​នយោបាយ។ អ្នក​ឃ្លាំមើល​នយោបាយយល់ថា មេដឹក​នាំ​គណបក្ស​នេះ​គួរ​មាន​ភាព​ថ្លៃថ្នូរ​ គួរតែ​ហ៊ាន​ដាក់​ឈ្មោះ​ម្ចាស់​អំណោយ​ពិត​ប្រាកដ​ឱ្យ​ពលរដ្ឋ​បាន​ដឹង​មិន​មែន​ដាក់​ត្រឹម​ឈ្មោះ​លោក ហ៊ុន សែន ដូច​ពេល​នេះ​ទេ

គណបក្ស​ប្រជាធិបតេយ្យ​មូលដ្ឋាន​ហៅកាត់ (GDP) សរសេរ​លើ​ហ្វេសប៊ុក​ខ្លួន​ថា "ការ​យក​លុយ​រដ្ឋ​ដែល​ជា​លុយ​បង់ពន្ធ​របស់​ពលរដ្ឋ​និងលុយវិភាគទាន​របស់​ឧកញ៉ាទៅទិញ​អង្ករ មី ទឹកត្រី និង​ទឹក​ស៊ីអ៊ីវ ប៉ុន្តែ​ពេល​ចែក​ជូន​ពលរដ្ឋបែរ​ដាក់​ថា ជា​អំណោយ​របស់​លោក ហ៊ុន សែន តើ​ទង្វើបែបនេះ​មិន​កេង​ចំណេញ​នយោបាយ​ឬ​ទេ?" សំណួរ​របស់​គណបក្ស​ប្រជាធិបតេយ្យ​មូលដ្ឋាន​បែប​នេះ ក្រោយ ពេល​មាន​ការ​ចោទ​ប្រកាន់​ថា គណបក្ស​ប្រជាធិបតេយ្យ​មូលដ្ឋាន កេង​ចំណេញ​នយោបាយ​ ពាក់ព័ន្ធ​នឹង​ការ​រិះគន់​ជុំវិញ​រឿងចាត់ចែង​ដោះស្រាយ​បញ្ហាកូវីដ១៩ របស់​រដ្ឋាភិបាល​នា​ពេល​កន្លង​ទៅ។

ជុំវិញ​ការលើក​ឡើង​នេះ​ អាស៊ីសេរី​បាន​ព្យាយាម​សុំការ​បំភ្លឺ​បន្ថែម​ពី​ថ្នាក់​ដឹកនាំ​គណបក្ស​នេះ​រួមមាន​លោក យ៉ង សាំងកុមារ លោក សាម ​អ៊ីន និង​លោក ឡឹក សុធា​ ប៉ុន្តែទូរស័ព្ទ​ចូល​គ្មាន​អ្នក​ទទួល។

ឆ្លើយ​តប​ចម្ងល់​របស់​​គណបក្ស​ប្រជាធិបតេយ្យ​មូលដ្ឋាន​នេះ អ្នកនាំ​ពាក្យ​គណបក្ស​ប្រជាជន​កម្ពុជា​ លោក សុខ ឥសាន អះ​អាង​ថា បើ​សិន​អំណោយ​ដែល​បាន​ពី​ថវិកា​ជាតិគឺ​មិន​ដាក់​ឈ្មោះលោក ហ៊ុន សែន ទេ ប៉ុន្តែ​លោក​ថាបើ​សិន​មន្រ្តីរាជការ ឬ​ក្រុម​ឈ្មួញ​ផ្ដល់​ថវិកា​ឱ្យ​លោក ហ៊ុន សែន គឺ​អំណោយ​ដាក់​ឈ្មោះ​ថា ជា​អំណោយ​​របស់​​លោក ហ៊ុន សែន។ អ្នក​នាំពាក្យ​ដដែលអះអាង​ទៀត​ថា ប្រភព​អំណោយ​ដែល​ម្ចាស់​ថវិកា​ផ្ដល់​ជូន​លោក ហ៊ុន សែន ប៉ុន្តែដាក់​ឈ្មោះថា​ អំណោយ​របស់​លោក ហ៊ុន សែន គឺ​មិន​ខុស​ទាស់​អ្វី​ទេ ព្រោះ​លោក ហ៊ុន សែន មិន​បាន​យក​លុយ​ទាំង​នោះ​ទៅ​ទុក​ចាយ​ ឬ​ធ្វើ​ចង្ក្រាន​បាយ​របស់​លោក នោះទេ«​ទេ​សម្ដេច ហ៊ុន សែន គាត់​អ្នក​ចាត់ចែងដូចលោក (ព្រះសង្ឃ) លោកសូត្រមន្ត យើង​ទៅ​ប្រគេន​បច្ច័យ​លោក​លែង​ជា​បច្ច័យ​របស់​យើង​ហើយ​ជា​បច្ច័យ​របស់​លោក​តាស»

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ  ដែល​កំពុង​រស់​នៅ​ក្នុង​តំបន់​ក្រហម​សង្កេត​ឃើញ​ថា អំណោយ​មាន​ច្រើន​ប្រភេទ​ហើយ​ទន្ទឹម​គ្នា​នោះក៏មាន​អំណោយ​ខ្លះ​ដាក់​ថា ជា​អំណោយ​របស់​លោក ហ៊ុន សែន ដែរ។ ទោះយ៉ាង​ណា​មន្រ្តី​សង្គម​ស៊ីវិល​រូបនេះ​យល់​ថា រដ្ឋាភិបាល ឬ​អ្នក​ចែក​អំណោយ​ពេល​បាន​ថវិកា​ពីអ្នក​ណា​សម្រាប់​ធ្វើ​អំណោយ​ដល់​ពលរដ្ឋ គួរ​ដាក់​ឈ្មោះ​អ្នក​នោះជា​អ្នក​ផ្ដល់​ឱ្យ«អំណោយ​ប្រភេទ​នេះ​បើ​សិន​ជា​អំណោយ​ពី​សប្បុរស​ជន​ផ្សេងៗ​ខ្ញុំ​គិត​ថា ប្រើ​ពាក្យ​អំណោយ​របស់​សប្បុរសជន​ក៏​បាន»

ចាប់​តាំងពី​ផ្ទុះជំងឺកូវីដ-១៩​ក្នុង​សហគមន៍​ជាលើកទី៣​មក លោកនាយករដ្ឋមន្ត្រី ​ហ៊ុន សែន ​មិន​បាន​ចេញ​ពី​ផ្ទះចុះជួប​និង​ចែក​អំណោយ​ដោយផ្ទាល់​ដៃ​ដល់​ពលរដ្ឋ​​ដែល​​រង​ផល​ប៉ះពាល់​នោះទេ​។ ប៉ុន្តែ​អំណោយ​ដែល​ចែក​ជូន​ពលរដ្ឋ​ត្រូវ​បាន​អ្នក​ប្រើប្រាស់​បណ្ដាញ​សង្គម​ចែក​រំលែក​គឺ​តែង​ដាក់​ជា​អំណោយ​របស់​លោក ហ៊ុន សែន។ ជាង​នេះ​ទៅទៀត អាជ្ញាធរ​ក៏​តែង​រឹត​ត្បិត​ ឬ​រារាំង​ក្រុម​អង្គការ​សង្គម​ស៊ីវិល​ដែល​ធ្វើការ​ចែក​អំណោយ​ដល់​ពលរដ្ឋថែម​ទៀត​ផង។ 

ប្រធាន​ក្រុម​ប្រឹក្សា​​ឃ្លាំមើល​កម្ពុជា​លោក ម៉ែន ណាត នៅ​ ន័រវេស (Norway) សង្កេត​ឃើញ​ថា ​ក្រុម​ឈ្មួញ​បាន​ផ្ដល់​លុយ​រាប់លាន​ដុល្លារ​ដើម្បី​ដោះស្រាយ​វិបត្តិ​ជំងឺ​កូវីដ​ ដូច្នេះ​រដ្ឋាភិបាល​គួរ​ដាក់​ឈ្មោះ​អ្នក​ទាំង​នោះ​ក្នុង​អំណោយ​ឱ្យ​ពលរដ្ឋ​បាន​ដឹង។ អ្នក​ឃ្លាំមើល​រូបនេះ​សង្កេត​ឃើញ​ទៀត​ថា ​ក្នុង​វិបត្តិ​នៃ​ជំងឺកូវីដ​នេះ លោក ហ៊ុន សែន មិន​ត្រឹម​តែ​កេង​ចំណេញ​រឿង​អំណោយ​ប៉ុណ្ណោះ​ទេ ប៉ុន្តែ​លោក​ ហ៊ុន សែន​បាន​រំលោភ​អំណាច​និង​បំបិទ​សិទ្ធិ​មន្រ្តី​ជាន់​ខ្ពស់​ផ្សេង​ទៀត​មិន​ឲ្យ​បញ្ចេញ​ស្នាដៃ​ដោយ លោក ព្យាយាម​ផ្ដល់សិទ្ធិ​អំណាច​ស្ទើរ​ទាំង​ស្រុងទៅ​កូន​ប្រុស​របស់​ខ្លួន​គឺ​លោក ហ៊ុន ម៉ាណែត និង​ភរិយា​លោក ហ៊ុន ម៉ាណែត ដោះ​ស្រាយ​សឹង​គ្រប់​រឿង៖ «គួរ​ណាស់​តែ​លោក ហ៊ុន សែន លើកទឹក​ចិត្ត​ពួក​ឈ្មួញ​ទាំងអស់​ហ្នឹងថា ឥឡូវ​ឈ្មួញ​ឯង​ធ្វើវិភាគទាន​ជូន​រដ្ឋ​អីចឹង​ត្រូវ​មាន​ប័ណ្ណ​សរសើរ​ត្រូវ​មាន​ការ​ស្មោះត្រង់​ដាក់​ឈ្មោះ​អ្នក​ណឹង​ទៅ ហើយ​ទៅ​ដាក់​ឈ្មោះ​លោក ហ៊ុន សែន បាន​ការ​អី? លោក ហ៊ុន សែន គ្រាន់​ជា​ប្រមុខ​រដ្ឋាភិបាល បើ​ប្រមុខ​រដ្ឋាភិបាល​ចង់​បាន​ប្រយោជន៍ ចង់​បាន​គុណសម្បត្តិ​ស្អីពី​ពលរដ្ឋ​ខ្លួន​ឯង»

មេដឹកនាំ​ដែល​ធ្លាប់​មើល​ស្រាល​ជំងឺកូវីដ​រូបនេះ​​ផ្តល់​ឱកា​ស​ឲ្យកូន​ៗរបស់​លោក​ស្ទើរ​គ្រប់​គ្នា​ដើរ​តួនាទី​ជំនួស​លោក​និង​មន្ត្រី​កំពូលៗ​ដទៃទៀត។​ ជាក់ស្តែង​កូនប្រុស​ច្បង​របស់លោក​ គឺ​លោក ហ៊ុន ម៉ាណែត​ ត្រូវបាន​តែងតាំង​ជា​​ប្រ​ធាន​​អនុ​គណៈកម្មការ​​គ្រប់គ្រង​​សន្ដិសុខ​​​និង​​សណ្ដាប់​ធ្នាប់​​នៅ​​តាម​​គោលដៅ​​​និង​​តំបន់​​ច​ត្តាឡី​ស័ក​​​។   រីឯ​​ ភរិយា​​របស់​លោក ​​​ហ៊ុន ម៉ាណែត ​គឺអ្នកស្រី​ ពេជ្រ ច័ន្ទមុនី ​ដឹកនាំ​​ក្រុម​​គ្រូ​ពេទ្យ​​ស្ម័គ្រចិត្ត​សម្តេចតេជោ​ដើម្បី​ព្យាបាល​អ្នកកើត​ជំងឺកូវីដ។  ​ដោយឡែក​កូន​ចៅ​របស់​​មន្រ្តី​ជាន់ខ្ពស់​គណបក្ស​នេះផ្សេង​ទៀត ដូចជា កូនលោក ស ខេង លោក សាយ ឈុំ ឬ​លោក ទៀ បាញ់ ជា​ដើម ហាក់​មិន​ឃើញ​បាន​បញ្ចេញ​សកម្មភាព ឬ​ដោះស្រាយ​បញ្ហា​ជំងឺ​កូវីដ​បាន​ពេញ​លេញ​ដូច​កូន​លោក ហ៊ុន សែន នោះ​ទេ។

នេះមិនមែន​លើកទី​មួយ​ទេ​ដែល​រដ្ឋាភិបាល លោក ហ៊ុន សែន រង​ការ​រិះគន់​ថា បាន​យក​លុយ​ជាតិ ឡាន​រដ្ឋនិង​ឧបករណ៍​សម្ភារៈ​របស់​រដ្ឋផ្សេង​ទៀត​ទៅបម្រើ​ប្រយោជន៍បក្ស​ឬ​បុគ្គល​ក្នុង​បក្ស​នេះ។ កន្លង​មក​សូម្បី​តែ​ការ​សាង​សង់ផ្លូវ ស្ពាន ឬ​សាលា​ជាដើម​ សុទ្ធសឹង​តែដាក់​ឈ្មោះ​ថា អំណោយ​របស់​លោក ហ៊ុន សែន ទោះបី​ជា​ចំណាយ​ថវិកា​របស់​ជាតិ​ក្តី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល