លោកនាយករដ្ឋមន្ត្រីលោក ហ៊ុន ម៉ាណែត បានដឹកនាំគណៈប្រតិភូកម្ពុជាទៅទស្សនកិច្ចនៅប្រទេសវៀតណាមរយៈពេល ២ថ្ងៃ គឺចាប់ពីថ្ងៃទី១១ ដល់ថ្ងៃទី១២ ធ្នូ។ អ្នកឃ្លាំមើលលើកឡើងថា ដំណើរទស្សនកិច្ចនេះ ជាការផ្គាប់ចិត្តដល់វៀតណាម ដែលជាចៅហ្វាយនាយច្រើនជាង ដើម្បីប្រយោជន៍ជាតិ។
ដំណើរទស្សនកិច្ចនៅថ្ងៃដំបូងនេះ លោក ហ៊ុន ម៉ាណែត បានជួបពិភាក្សាការងារជាមួយនាយករដ្ឋមន្ត្រីវៀតណាម លោក ផាម មិញជិញ (Pham Minh Chinh) និងជួបសម្ដែងការគួរសម អគ្គលេខាធិការបក្សកុម្មុយនិស្តវៀតណាម លោក ង្វៀន ហ៊្វូចុង (Nguyen Phu Trong) នៅទីក្រុងហាណូយ (Han Noi)។ លោកនាយករដ្ឋមន្ត្រី ហ៊ុន ម៉ាណែត បានបង្ហោះសារនៅលើទំព័រហ្វេសប៊ុករបស់លោក នៅរសៀលថ្ងៃទី១១ ធ្នូថា មេដឹកនាំប្រទេសទាំងពីរ បានជម្រាបជូនគ្នាទៅវិញទៅមកអំពីស្ថានភាពនៃប្រទេសទាំងពីរ ពាក់ព័ន្ធនឹងទិដ្ឋភាពនយោបាយ សង្គម និងសេដ្ឋកិច្ច និងពង្រីកកិច្ចសហប្រតិបត្តិការលើគ្រប់វិស័យ ឱ្យទទួលបានលទ្ធផលជាផ្លែផ្កាបន្ថែមទៀត ដើម្បីផលប្រយោជន៍ទៅវិញទៅមក សម្រាប់ជាតិ និងប្រជាជនទាំងពីរ។ ទន្ទឹមគ្នានេះ ភាគីទាំងពីរ ក៏បានផ្លាស់ប្ដូរយោបល់អំពីកិច្ចការតំបន់ និងសាកល ដោយបានបង្ហាញនូវការពេញចិត្ត ចំពោះការគាំទ្រគ្នាទៅវិញទៅមកនៅលើវេទិកាអន្តរជាតិនានា ដូចជា ក្របខ័ណ្ឌអង្គការសហប្រជាជាតិ អាស៊ាន និងអនុតំបន់ទន្លេមេគង្គជាដើម។
ជាមួយគ្នានេះ មេដឹកនាំប្រទេសទាំងពីរ ក៏បានធ្វើជាអធិបតីភាពនៃការចុះហត្ថលេខាលើកិច្ចសហប្រតិបត្តិការចំនួន៣ រួមមាន អនុស្សរណៈយោគយល់គ្នា ស្ដីពីកិច្ចសហប្រតិបត្តិការ លើវិស័យវិទ្យាសាស្ត្របច្ចេកវិទ្យា និងនវានុវត្តន៍ រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងវិទ្យាសាស្ត្រ និងបច្ចេកវិទ្យាវៀតណាម។ ទី២ អនុស្សរណៈយោគយល់គ្នាអំពីកិច្ចសហប្រតិបត្តិការ រវាងវិទ្យាស្ថានជាតិការទូត និងទំនាក់ទំនង អន្តរជាតិ និងបណ្ឌិត្យសភាការទូតវៀតណាម និងទី៣ អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងសភាពាណិជ្ជកម្មវៀតណាម ។
សេចក្ដីប្រកាសក្រសួងការបរទេស និងសហប្រតិបត្តិការ អន្តរជាតិ កាលពីថ្ងៃទី៧ ខែធ្នូ ឱ្យដឹងថា លោក ហ៊ុន ម៉ាណែត ទៅបំពេញទស្សនកិច្ចនៅសាធារណរដ្ឋសង្គមនិយមវៀតណាម តបតាមការអញ្ជើញរបស់មេដឹកនាំវៀតណាម និងក្នុងគោលបំណងបន្តពង្រឹង និងពង្រីកបន្ថែមទៀតនូវកិច្ចសហប្រតិបត្តិការលើវិស័យជាច្រើនរវាងប្រទេសទាំងពីរ រួមមាន អប់រំ ពាណិជ្ជកម្ម វិនិយោគ ការតភ្ជាប់ ទេសចរណ៍ វប្បធម៌ សន្តិសុខ ការពារជាតិ និងកិច្ចការព្រំដែនជាដើម។
ទោះជាយ៉ាងណា អ្នកឃ្លាំមើលស្ថានការណ៍សង្គមកម្ពុជា និងវៀតណាមលើកឡើងថា ដំណើរទស្សនកិច្ចនេះនឹងផ្ដល់ផលប្រយោជន៍ដល់វៀតណាមច្រើនជាងកម្ពុជា។
ប្រធានក្រុមប្រឹក្សាឃ្លាំមើលកម្ពុជាដែលកំពុងរស់នៅប្រទេសន័រវែស (Norway) លោក ម៉ែន ណាត យល់ឃើញថា ដំណើរទស្សនកិច្ចនេះ ជាការទៅបង្ហាញមុខក្នុងនាមជាមេដឹកនាំរដ្ឋាភិបាលថ្មី ក្រោមការដឹកនាំរបស់គណបក្សប្រជាជនកម្ពុជាផង និងរាយការណ៍ជូននាយករដ្ឋមន្ត្រី ប្រមុខរដ្ឋ និងអគ្គលេខាធិការបក្សកុម្មុយនិស្តវៀតណាម អំពីសមិទ្ធផលនានា ដែលបក្សប្រជាជនកម្ពុជាបានធ្វើមកផង។លោកជឿជាក់ថា មេដឹកនាំវៀតណាមនឹងស្នើជាថ្មីទៀតឱ្យមេដឹកនាំក្រុងភ្នំពេញយកចិត្តទុកដាក់មើលថែដល់ពលរដ្ឋរបស់ខ្លួននៅកម្ពុជា។
លោក ម៉ែន ណាត៖ «អានេះ ជាផែនការរបស់វៀតណាម។ អ៊ីចឹង អ្វីដែលលោក ហ៊ុន ម៉ាណែត ទៅហ្នឹង ដើម្បីរាយការណ៍អាហ្នឹង ហើយធម្មតា បើគាត់ទៅក្នុងនាមជានាយករដ្ឋមន្ត្រី ហើយគ្រាន់តែជាសមាជិកអចិន្ត្រៃយ៍របស់បក្សវាអត់គ្រប់គ្រាន់ អីចឹងបានជាឪពុកដំឡើងតំណែងគាត់មួយកម្រិតទៀតឱ្យបានដល់អនុប្រធានបក្សហ្នឹង ដើម្បីឱ្យគាត់ទៅនិយាយជាមួយវៀតណាមឱ្យវាស្មើមុខស្មើមាត់តាមប្រពៃណីពួកកុម្មុយនិស្តផ្ដាច់ការហ្នឹង គេត្រូវការមុខមាត់អ៊ីចឹង។ អ៊ីចឹង គេត្រូវដំឡើងតំណែងកូនគេឱ្យបានធំទៅ ដើម្បីវាស្រួលមានប្រតិកម្មពីវៀតណាម។ បើទៅមិនមានការតែងតាំងតំណែងថ្មីឱ្យ លោក ហ៊ុន ម៉ាណែត វាអាចមានប្រតិកម្មពីវៀតណាមច្រើន»។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេស លោក អាន សុខឿន និងប្រធានអង្គភាពអ្នកនាំពាក្យរដ្ឋាភិបាល ប៉ែន បូណា ដើម្បីសាកសួរបន្ថែមជុំវិញដំណើរទស្សនកិច្ចនេះបានទេ នៅថ្ងៃទី១១ ធ្នូ។
ជុំវិញរឿងនេះ អ្នកសិក្សាផ្នែកច្បាប់ និងជាអ្នកតាមដានស្ថានការណ៍នយោបាយកម្ពុជា និងវៀតណាម លោក វ៉ន ចាន់ឡូត កត់សំគាល់ថា ក្នុងជំនួបនេះ ក៏មិនខុសពីថ្នាក់ដឹកនាំខ្មែរកំពូលៗ មុនៗ ដែរ ដែលកម្ពុជាបានចាញ់ប្រៀបវៀតណាមលើគ្រប់វិស័យ។ លោកបញ្ជាក់ថា ក្នុងអំឡុងពេលឡើងកាន់តំណែងជាង ១០០ថ្ងៃមកនេះ លោក ហ៊ុន ម៉ាណែត ហាក់មិនទាន់បង្ហាញពីឯករាជភាព ដើម្បីធ្វើឱ្យប្រទេសមានឯករាជ្យពិតប្រាកដនៅឡើយទេ។
លោក វ៉ន ចាន់ឡូត៖ «កន្លងមក យើងឃើញថា រាល់ជំនួបជាផ្លូវការធំ ហើយវាមានពាក់ព័ន្ធទៅនឹងអាយុជីវិតជាតិផលប្រយោជន៍ជាតិ គឺមេដឹកនាំខ្មែរតែងតែធ្វើដំណើរទៅទីក្រុងហាណូយ ជួបមេដឹកនាំវៀតណាម ហើយការជួបនេះវៀតណាម គេមិនដែលឱ្យខ្លួនខ្មែរទទួលប្រយោជន៍ប៉ុន្មានទេ ឬយើងនិយាយមួយបែបទៀត ជំនួបនេះតែងតែធ្វើឱ្យចំណេញដល់ប្រយោជន៍នៃប្រទេសវៀតណាមច្រើនជាងកម្ពុជាទទួលប្រយោជន៍ពីជំនួប ឬក៏ការចុះហត្ថលេខាទទួលស្គាល់ណាមួយជាផ្លូវការក្នុងនាមជាប្រមុខរដ្ឋាភិបាល»។
ថ្មីៗ នេះ វៀតណាមបានស្នើភាគី កម្ពុជាចំនួន ២ដង ក្នុងរយៈពេលតែ ៤ថ្ងៃប៉ុណ្ណោះ ដើម្បីក្រើនរំលឹកឱ្យរដ្ឋាភិបាលក្រោមការដឹកនាំរបស់លោក ហ៊ុន ម៉ាណែត យកចិត្តទុកដាក់ចំពោះសមាគម និងជួយគាំទ្រពលរដ្ឋវៀតណាម ដែលរស់នៅកម្ពុជាបន្តទៀត។ ក្នុងនោះ លើកទី១ ស្នើនៅថ្ងៃទី១ ធ្នូ ក្នុងអំឡុងពេលប្រធានរដ្ឋសភាថ្មីកម្ពុជា អ្នកស្រី ឃួន សុដារី ទៅប្រជុំនៅទីក្រុងហាណូយ ប្រទេសវៀតណាម ខណៈលើកទី២ នៅពេលគណៈប្រតិភូ ក្រសួងការបរទេសវៀតណាម បំពេញទស្សនកិច្ចនៅកម្ពុជា កាលពីថ្ងៃទី៣០ វិច្ឆិកា ដល់ថ្ងៃទី៣ ធ្នូ។
ការស្នើម្ដងហើយម្ដងទៀតនេះ ស្របពេលជនជាតិវៀតណាមជាង ១០ម៉ឺន (១០០.០០០)នាក់ បានទទួលបានប័ណ្ណស្នាក់នៅស្របច្បាប់ក្នុងប្រទេសកម្ពុជា ហើយបច្ចុប្បន្នពួកគេកំពុងបំពេញលក្ខខណ្ឌរបស់ក្រសួងមហាផ្ទៃ ដើម្បីទទួលបានសញ្ជាតិខ្មែរ ខណៈជនជាតិវៀតណាមជិត ១០០នាក់ ទទួលបានសញ្ជាតិខ្មែរពេញលេញ។
អ្នកឃ្លាំមើលលើកឡើងថា ដើម្បីទទួលបានការគាំទ្រពីប្រជាពលរដ្ឋ លោក ហ៊ុន ម៉ាណែត គួរតែក្លាហានក្នុងការលើកពីផលប្រយោជន៍ជាតិស្នើដល់នាយករដ្ឋមន្ត្រីវៀតណាម ដើម្បីដោះស្រាយ ជាពិសេស ជំរុញដល់វៀតណាមឱ្យគោរព និងផ្ដល់តម្លៃអធិបតេយ្យ និងសេចក្ដីថ្លៃថ្នូររបស់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។