លោកនាយករដ្ឋមន្ត្រី ហ៊ុន ម៉ាណែត ជំរុញទៅសិស្សតាមសាលានានាឬយុវជនគួរនាំគ្នាចូលរួមធ្វើការងារសង្គមឱ្យបានសកម្ម។ បើទោះជាលោកនាយករដ្ឋមន្ត្រី អះអាងបែបនេះ តែសកម្មជនសង្គមនិងបរិស្ថានដែលកំពុងបំពេញការងារសង្គម កំពុងរងការធ្វើទុក្ខម្នេញពីសមត្ថកិច្ច និងរងការចោទប្រកាន់តាមផ្លូវដោយសារតែការចូលរួមបំពេញការងារសង្គមរបស់យុវជនទាំងនោះ។
យុវជនធ្វើការងារបរិស្ថាន និងអ្នកធ្វើការងារសង្គម មិនសូវមានជំនឿថា លោកនាយករដ្ឋមន្ត្រី ហ៊ុន ម៉ាណែត ដែលជំរុញឱ្យសិស្សសាលាឬយុវជនធ្វើការងារសង្គមនោះគឺជាឆន្ទៈចេញពីចិត្តនោះទេ។ ពួកគេរិះគន់ថា ប្រសិនបើរដ្ឋាភិបាលយកចិត្តទុកដាក់ចង់ឱ្យយុវជនធ្វើការងារមែននោះមិនមែនយុវជនដែលកំពុងធ្វើការងារសង្គមត្រូវសមត្ថកិច្ចវាយធ្វើបាប និងត្រូវតុលាការចោទប្រកាន់នោះឡើយ។
យុវជនចលនាមាតាធម្មជាតិ កញ្ញា ភួង កែវរស្មី ប្រាប់ថា កញ្ញាត្រេកអរពេលឃើញនាយករដ្ឋមន្ត្រីជំរុញឱ្យសិស្សសាលា ឬយុវជនធ្វើការងារសង្គម។ ទោះយ៉ាងណាក្ដី កញ្ញាសង្កេតឃើញថា សព្វថ្ងៃនេះសិស្សនៅតាមសាលាចាប់ពីថ្នាក់ទី៧ ឡើងទៅ ត្រូវបានជំរុញឱ្យចូលជាសមាជិក របស់សហភាពសហព័ន្ធយុវជនកម្ពុជា ហៅកាត់ ស.ស.យ.ក របស់លោក ហ៊ុន ម៉ានី ដែលស្ថាប័ននេះ ភាគច្រើនមិនបានធ្វើការងារសង្គមឱ្យស៊ីជម្រៅទេ តែច្រើនសកម្មភាពបម្រើប្រយោជន៍គណបក្សប្រជាជនកម្ពុជា។
កញ្ញា ភួន កែវរស្មី៖«អាចជាការសំណូមពរទេដើម្បីឱ្យមានយុវជនគាត់ចូលរួមធ្វើកិច្ចការសង្គមច្រើនដូចឯកឧត្ដម(សម្ដេច)ហ៊ុន ម៉ាណែត គាត់ចង់ឃើញទី១យើងកំណត់និយមន័យនៃការធ្វើការងារសង្គមគឺមិនមែនធ្វើដើម្បីគាំទ្ររដ្ឋាភិបាល ឬក៏គោលនយោបាយរបស់គណបក្សណាមួយបានគេហៅថា ធ្វើការងារសង្គមទេ គួរតែបើកលំហសិទ្ធិសេរីភាពឱ្យប្រជាពលរដ្ឋគាត់មានការសម្រេចចិត្តពេញលេញមានសេរីភាពពេញលេញនៅក្នុងការចូលរួមការងារសង្គមរបស់គាត់»។
កញ្ញា ភួង កែវរស្មី ចង់ឃើញរដ្ឋាភិបាលលើកទឹកចិត្ត ដល់យុវជនធ្វើការងារសង្គមដោយយុត្តិធម៌ និងកុំប្រើប្រព័ន្ធតុលាការគាបសង្កត់ដល់យុវជនធ្វើការងារសង្គម និងបរិស្ថាន។
យុវជនធ្វើការងារបរិស្ថានលើកឡើងដូច្នេះ ក្រោយពេលលោកនាយករដ្ឋមន្ត្រី ហ៊ុន ម៉ាណែត ថ្លែងនៅចំពោះមុខមន្ត្រីរាជការលោកគ្រូ អ្នកគ្រូ និងសិស្សានុសិស្ស នៅថ្ងៃទី០៥ ខែតុលា លើកទឹកចិត្តឱ្យសិស្សសាលាគួរយកពេលទំនេរពីការសិក្សា មួយថ្ងៃឬពីរថ្ងៃក្នុងមួយសប្ដាហ៍ដើម្បីចូលរួមក្នុងកិច្ចការសង្គម។
លោក ហ៊ុន ម៉ាណែត៖«បណ្ដោះមនុស្សបណ្ដោះក្មេងឱ្យចេះជួយការងារសង្គម នៅសាលាមុនដំបូងដែលអត់មានថវិកាយើងឱ្យគាត់រើសទៅពីណាទៅជួយធ្វើអនាម័យនៅផ្សាយពីណាទៅជួយចាស់ជរាពីណាទៅជួយដាំដើមឈើបង្កើតផ្នត់គំនិតបង្កើតទម្លាប់ សួរថា យើងលើកទឹកចិត្តគាត់តាមណា ពិន្ទុរៀនកុំឱ្យតែពិន្ទុប្រឡងត្រូវឱ្យពិន្ទុឥរិយាបថផង»។
ទាក់ទងរឿងនេះដែរ ប្រធានសមាគមសម្ពន្ធនិស្សិតបញ្ញវន្តខ្មែរ លោក កើត សារ៉ាយ រំពឹងថា ការលើកឡើងរបស់លោក ហ៊ុន ម៉ាណែត នៅពេលនេះគឺជាការនិយាយពាក្យពិត។ ទោះបែបនេះក្ដី លោកសង្កេតឃើញថា កន្លងទៅនៅពេលយុវជនចូលរួមធ្វើការងារសង្គម បែរជាត្រូវសមត្ថកិច្ច ឬតុលាការធ្វើទុក្ខបុកម្នេញ និងចោទប្រកាន់ចាប់ចងលើយុវជនធ្វើការងារសង្គមទៅវិញ។
លោក កើត សារ៉ាយ៖«ពេលដែលនិស្សិតយុវជនគាត់ចាប់ផ្ដើមសកម្មនឹងការងារសង្គមបែរជាទទួលបានការរឹតត្បិតរហូតដល់មានការចោទជាលក្ខណៈច្បាប់ក្រមព្រហ្មទណ្ឌ រហូតដល់មានជាប់ក្ដីគុកច្រវាក់អីជាដើមយើងឃើញហើយទាំងសកម្មជនសិទ្ធិមនុស្សសកម្មជនបរិស្ថានអីជាដើមនេះហើយដែលយើងឃើញថា ការនិយាយនៅតែជាការនិយាយ ប៉ុន្តែមិនមានន័យអីទេ បើសិនមិនមានអនុវត្តដូចដែលការខ្លួនឯងនិយាយហ្នឹង»។
បើទោះជាលោក ហ៊ុន ម៉ាណែត ជំរុញទៅសិស្សតាមសាលានានាឬយុវជនគួរនាំគ្នាចូលរួមធ្វើការងារសង្គមឱ្យបានសកម្ម រដ្ឋាភិបាលឪពុករបស់លោក គឺលោក ហ៊ុន សែនបានចោទប្រកាន់ និងចាប់ខ្លួនសកម្មជនបរិស្ថាន និងសកម្មជនធ្វើការងារសង្គមជាច្រើននាក់ដាក់ពន្ធនាគារជាបន្តបន្ទាប់ ហើយសព្វថ្ងៃពួកគេទាំងនោះត្បិតនៅក្រៅឃុំបណ្ដោះអាសន្ន តែតុលាការមិនទាន់ទម្លាក់ចោលបទចោទលើពួកគេនោះទេ។ ចំណែករដ្ឋាភិបាលលោក ហ៊ុន ម៉ាណែត ក៏មិនទាន់បើកសិទ្ធិទូលំទូលាយឱ្យយុវជនចូលរួមធ្វើការងារសង្គមនោះដែរ។ ករណីជាក់ស្ដែងតុលាការក្រុងភ្នំពេញមិនអនុញ្ញាតឱ្យយុវជនចលនាមាតាធម្មជាតិបីនាក់ ដែលជាប់បម្រាមចាកចេញពីប្រទេសកម្ពុជាទៅទទួលពានរង្វាន់អ្នកការពារសិទ្ធិមនុស្ស និងបរិស្ថានកម្រិតអន្តរជាតិនៅប្រទេសស៊ុយអែត (Sweden) នៅក្នុងខែវិច្ឆិកា ខាងមុខនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។