លោកនាយករដ្ឋមន្ត្រី ហ៊ុន ម៉ាណែត កំពុងដឹកនាំគណៈប្រតិភូធ្វើដំណើរទៅសហរដ្ឋអាមេរិក ដើម្បីចូលរួមថ្លែងសុន្ទរកថា នៅមហាសន្និបាតអង្គការសហប្រជាជាតិ (UN) ក្នុងបុរីញូវយ៉ក (New York) ចាប់ពីថ្ងៃទី២១ ដល់ថ្ងៃទី២៥ កញ្ញា។
ខ្លឹមសារនៃសុន្ទរកថា លោក ហ៊ុន ម៉ាណែត គ្រោងថ្លែងនៅអង្គការសហប្រជាជាតិពុំមានការរំលេចអំពីការលើកស្ទួយសិទ្ធិមនុស្ស និងប្រជាធិបតេយ្យនោះទេ ស្របពេលកម្ពុជានៅតែបន្តជាប់គាំងបញ្ហានយោបាយ និងស្ថានភាពរំលោភសិទ្ធិមនុស្សកាន់តែអាក្រក់។ សុន្ទរកថា លោក ហ៊ុន ម៉ាណែត ដែលគ្រោងថ្លែងនៅអង្គការសហប្រជាជាតិនោះផ្ដោតសំខាន់តែទៅលើបញ្ហាសង្គម សេដ្ឋកិច្ចកម្ពុជា បរិបទពិភពលោក និងជំហររបស់កម្ពុជាចំពោះគោលដៅអភិវឌ្ឍប្រកបដោយចីរភាព (SDGs) របស់អង្គការសហប្រជាជាតិ។
អ្នកតាមដានភូមិសាស្ត្រតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី ប្រាប់វិទ្យុអាស៊ីសេរីនៅថ្ងៃទី២១ ខែកញ្ញាថា សាររបស់លោក ហ៊ុន ម៉ាណែត គ្រោងថ្លែងនៅអង្គការសហប្រជាជាតិនោះនឹងគ្មានការចាប់អារម្មណ៍ពីបណ្ដាប្រទេសចូលរួមកិច្ចប្រជុំមហាសន្និបាតអង្គការសហប្រជាជាតិនោះទេ។ លោកបន្ថែមទៀតថា សុន្ទរកថាមេដឹកនាំកម្ពុជាក៏ពុំមែនជាក្ដីសង្ឃឹមសម្រាប់ប្រជាជាតិ ដែលជំរុញឱ្យមានលំហប្រជាធិបតេយ្យ និងការគោរពសិទ្ធិមនុស្សល្អប្រសើរឡើងវិញដែរ។
លោក សេង វណ្ណលី៖ «ខ្លឹមសារនៃការថ្លែងសុន្ទរកថា របស់នាយករដ្ឋមន្ត្រី ហ៊ុន ម៉ាណែត យ៉ាងហោចសារព័ត៌មានក្នុងស្រុកអាចលើកមុខមាត់ លើកកិត្យានុភាពរបស់លោកនាយករដ្ឋមន្ត្រីថ្មីថា អាចនឹងលោកមានមុខមាត់ទៅក្នុងឆាកអន្តរជាតិ ឬវេទិកាជាមួយគូគ្រប់ភាគី នឹងជាមួយប្រទេសដទៃដែរ តែសម្រាប់ខ្ញុំគិតថា វាជាកិច្ចប្រជុំប្រចាំឆ្នាំ មិនបានបង្ហាញអំពីកិត្យានុភាព ឬភាពជាមេដឹកនាំរបស់ប្រទេសតូចៗដូចជាកម្ពុជានោះទេ គ្រាន់ជាការកំដររោងរបស់មេដឹកនាំមកពីប្រទេសមហាអំណាចដែលមានសិទ្ធិក្នុងក្រុមប្រឹក្សាសន្តិសុខអង្គការសហប្រជាជាតិ»។
ស្របពេលលោក ហ៊ុន ម៉ាណែត កំពុងធ្វើដំណើរទៅសហរដ្ឋអាមេរិកចូលរួមមហាសន្និបាត អង្គការសហប្រជាជាតិលើកទី៧៨ មន្ត្រីគ្រាក់ៗរបស់គណបក្សប្រជាជនកម្ពុជាមួយចំនួនបានទៅដល់សហរដ្ឋអាមេរិកមុនលោក ហ៊ុន ម៉ាណែត ដើម្បីត្រៀមធ្វើពិធីស្វាគមន៍លោក។ ទោះជាយ៉ាងណា ពលរដ្ឋដើមកំណើតខ្មែរមកពីបណ្ដាប្រទេសនានាដូចជា អូស្ត្រាលី កាណាដា ជាដើម ចន្លោះពី ៣រយនាក់ (៣០០) ទៅ ៤រយនាក់ (៤០០) នឹងប្រមូលផ្ដុំគ្នាប្រឆាំងនឹងវត្តមានលោក ហ៊ុន ម៉ាណែត និងស្នើកុំឱ្យអង្គការសហប្រជាជាតិទទួលស្គាល់រដ្ឋាភិបាលលោក ហ៊ុន ម៉ាណែត ដែលកើតឡើងពីការផ្ទេរអំណាចពីឪពុកមកកូន ដើម្បីបន្តគាបសង្កត់អ្នកប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។