លោក ហ៊ុន សែន ហាម​ឃាត់​មន្ត្រី​បក្ស​ប្រឆាំង ២​រូប​ធ្វើ​នយោបាយ​ឡើងវិញ

ដោយ យន់ សាមៀន
2021-07-24
Share
លោក ហ៊ុន សែន ហាម​ឃាត់​មន្ត្រី​បក្ស​ប្រឆាំង ២​រូប​ធ្វើ​នយោបាយ​ឡើងវិញ មេធាវី​និង​អតីតមន្ត្រី​ជាន់ខ្ពស់​គណ​បក្ស​សង្គ្រោះ​ជាតិ ជូង ជូងី (ឆ្វេង) និង​លោក​នាយករដ្ឋមន្ត្រី ហ៊ុន សែន។
RFA and Courtesy

មេធាវី​និង​ជា​មន្ត្រីជាន់ខ្ពស់​គណបក្ស​សង្គ្រោះ​ជាតិ​សោកស្ដាយ​ដែល​ខ្លួន​មិន​អាច​បម្រើ​ពលរដ្ឋ​តាមរយៈ​ការធ្វើ​នយោបាយ​ឡើងវិញ​។ ប្រតិកម្ម​នេះ ក្រោយ​មេដឹកនាំ​រដ្ឋាភិបាល​ក្រុងភ្នំពេញ​មិន​ព្រម​ផ្ដល់​នីតិសម្បទា​ឱ្យ សមាជិក​គណៈកម្មាធិការ​នាយក​គណបក្ស​សង្គ្រោះ​ជាតិ​​ពីររូប គឺ​លោ​មេធាវី លោក ជូង ជូងី និង​លោ ញឹម គឹមញ៉ុល។ អ្នកវិភាគ​រិះគន់​ថា របៀប​ផ្ដល់​នីតិសម្បទា ឬ​ការផ្ដល់​សិទ្ធិ​ធ្វើ​នយោបាយ​ឡើង​ឱ្យ​អតីតមន្ត្រី​បក្ស​ប្រឆាំង រដ្ឋាភិបាល​ហាក់​ធ្វើឡើង​មិន​ច្បាស់លាស់ ឬក៏​ជាការ​ធ្វើការ​តាម​អារម្មណ៍​របស់​លោក ហ៊ុន សែន។

មេធាវី​និង​អតីតមន្ត្រី​ជាន់ខ្ពស់​គណ​បក្ស​សង្គ្រោះ​ជាតិ ជូង ជូងី ថា ការ​មិន​ផ្ដល់​សិទ្ធិ​ឱ្យ​លោក​បាន​ធ្វើ​នយោបាយ​គឺជា​ការ​ខាតបង់​ដល់​សង្គម និង​ពលរដ្ឋ៖ «មានការ​សោកស្ដាយ​ត្រង់​ថា បើ​ខ្ញុំ​មាន​សិទ្ធិ​ធ្វើ​នយោបាយ ខ្ញុំ​ចូលរួម​ធ្វើ​សកម្មភាព​នយោបាយ​ទៅ​ដើម្បី​បម្រើ​ប្រយោជន៍​ពលរដ្ឋ ប៉ុន្តែ​បើ​ខ្ញុំ​អត់​មាន​សិទ្ធិ​ធ្វើ​នយោបាយ​ខ្ញុំ​អត់​អាច​ចូលរួម​សកម្មភាព​នយោបាយ​ដើម្បី​បម្រើ​ប្រយោជន៍​ពលរដ្ឋ»

ប្រតិកម្ម​របស់លោក ជូង ជូងី បែប​នេះ ក្រោយ​ពេល​មេដឹកនាំ​រដ្ឋាភិបាល​ក្រុងភ្នំពេញ លោក ហ៊ុន សែន បាន​ប្រាប់​ប្រព័ន្ធ​ឃោសនា​លោក​នៅ​ថ្ងៃទី​២៤ កក្កដា ថា លោក​មេធាវី លោក ជូង ជូងី និង​លោក ញឹម គឹមញ៉ុល បាន​ធ្វើ​សកម្មភាព​ខុស​ធ្ងន់ធ្ងរ ដូច្នេះ​លោក​មិន​អនុញ្ញាត​ឱ្យ​អ្នក​ទាំងពីរ​មាន​សិទ្ធិ​ធ្វើ​នយោបាយ​បាន​ឡើយ​។ លោក​ចោទ​ប្រកាន់​ថា លោក ញឹម គឹមញ៉ុល បាន​ធ្វើ​សកម្មភាព​ប៉ះពាល់​ដល់​សន្តិសុខ​ជាតិ បង្ក​ភាព​ចលាចល​ក្នុង​សង្គម កៀរគរ​កម្លាំង និង​ដឹកនាំ​សកម្មជន​សង្គ្រោះ​ជាតិ​នៅ​ប្រទេស​ថៃ កាល​ពី​ឆ្នាំ​២០១៩ ក្នុង​ផែនការ​វិល​ចូល​ស្រុក​របស់​លោក សម រង្ស៊ី។ ក្រៅ​ពី​នេះ លោក ញឹម គឹមញ៉ុល ត្រូវ​បាន​តុលាការ​ខេត្ត​ព្រះសីហនុ បង្គាប់​ឲ្យ​ចាប់ខ្លួន ក្នុង​សំណុំរឿង «រួមគំនិត​ក្បត់»

ចំពោះ​ករណី​លោក​មេធាវី ជូង ជូងី លោក ហ៊ុន សែន ចោទ​ប្រកាន់​ថា មេធាវី​រូបនេះ បានធ្វើ​សកម្មភាព​ញុះញង់​ក្នុង​ចេតនា​ទុច្ចរិត រារាំង និង​បំពាន​សិទ្ធិ​នយោបាយ​របស់​ពលរដ្ឋ ដោយបាន​ប្រើប្រាស់​បណ្តាញ​សង្គម ក្នុង​គោលបំណង​រារាំង​ប្រជាពលរដ្ឋ មិន​ឱ្យទៅ​បោះឆ្នោត​កាល​ឆ្នាំ​២០១៨​។ លោក​ឱ្យ​ដឹង​ទៀត​ថា សំណុំ​រឿង​នេះ​កំពុង​ស្ថិត​ក្នុង​ដៃ​សាលាដំបូង​រាជធានី​ភ្នំពេញ។

ជុំវិញ​ការ​ចោទប្រកាន់​ពី​លោក ហ៊ុន សែន បែប​នេះ អាស៊ីសេរី​មិនអាច​សុំ​ការ​បកស្រាយ​ពី លោក ញឹម គឹមញ៉ុល បានទេ​នៅ​ថ្ងៃទី​២៤ ខែកក្កដា​។ ប៉ុន្តែ មេធាវី ជូង ជូងី ឱ្យ​អាស៊ីសេរី​ដឹង​ថា កាលពី​ការ​បោះឆ្នោត​២០១៨ មនុស្ស​មាន​អំណាច​មួយ​ចំនួន​បាន​គំរាម​ពលរដ្ឋ​ថា បើ​មិន​ទៅ​បោះឆ្នោត​មាន​ទោស ប៉ុន្តែ​លោក​ថា គ្មាន​ច្បាប់​ណាមួយ​ដាក់ទោស​ពលរដ្ឋ​ដែល​មិន​ទៅ​បោះឆ្នោត​ឡើយ។ លោក​បញ្ជាក់​ថា ការ​បញ្ចេញមតិ​របស់​តាម​បណ្ដាញ​សង្គម​ហ្វេសប៊ុក​នៅ​ពេល​នោះ​មិនមែន​ជា​ការរារាំង​ពលរដ្ឋ​មិន​ឱ្យ​ទៅ​បោះឆ្នោត​ឡើយ៖ «រដ្ឋធម្មនុញ្ញ​ក្ដី ច្បាប់​គណបក្ស​នយោបាយ​ក្ដី ច្បាប់​បោះឆ្នោត​ក្ដី ក្រុម​ព្រហ្មទណ្ឌ​ក្ដី អត់​មាន​មាត្រា​ណា​ដាក់ទោស​អ្នក​អត់​ទៅ​បោះឆ្នោត​ទេ អ៊ីចឹង​បើ​ប្រជាពលរដ្ឋ​មាន​គណបក្ស​នយោបាយ​ណា​ពេញចិត្ត​ទៅ​បោះឆ្នោត​គណបក្ស​ហ្នឹង​ទៅ ប៉ុន្តែ បើ​ប្រជាពលរដ្ឋ​អត់​មាន​គណបក្ស​ពេញចិត្ត​ទេ អត់​ទៅ​បោះឆ្នោត​ក៏​អត់​មានទោស​ដែរ ខ្ញុំ​ថា​អ៊ីចឹង​ថា ខ្ញុំ​អត់​មាន​អំពាវនាវ​កុំឱ្យ​គេ​ទៅ​បោះឆ្នោត​ឯណា​ហើយ​ខ្ញុំ​ក៏​អត់​មាន​ទៅ​រា​រាំ​គេ​ដែរ រារាំង​លុះត្រាតែ​ពេល​គេ​ធ្វើដំណើរ​ទៅ​បោះឆ្នោត ខ្ញុំ​ទៅ​ចាត់ការ​យ៉ាងម៉េច​កុំឱ្យ​គេ​ទៅ​បោះឆ្នោត​បាន​អាណឹង​ទើប​ហៅថា​រារាំង»

ក្នុង​រយៈពេល​ចុង​ក្រោយ​នេះ អតីតមន្ត្រី​បក្ស​ប្រឆាំង​ដែល​សុំ​សិទ្ធិ​ធ្វើ​នយោបាយ ឬ​បើក​បក្ស​ថ្មី បាន​រិះគន់ថា បក្ស​កាន់អំណាច​បាន​រឹតត្បិត​សិទ្ធិ​សេរី​នៃ​ការ​ធ្វើ​នយោបាយ​របស់​ពួកគេ។ គណបក្ស​នយោបាយ​ថ្មី​មួយ ឈ្មោះ​បេះដូង​ជាតិ ត្រូវ​បាន​ក្រសួង​មហាផ្ទៃ ស្នើ​ទៅ​ស្ថាបនិក​គណបក្ស​នេះ​គឺ លោក សៀម ភ្លុក ត្រូវ​បង្ហាញ​អត្តសញ្ញាណ ឬ​ប្រវត្តិ​ស្ថាបនិក​គណបក្ស​ចំនួន​៣​នាក់​ឱ្យ​បាន​ច្បាស់លាស់ ឯកសារ​សេចក្តី​សម្រេច​បង្កើត​គណៈកម្មាធិការ​បណ្ដោះអាសន្ន គោល​នយោបាយ និង​កម្មវិធី​នយោបាយ មក​ក្រសួងមហាផ្ទៃ​ត្រឹម​រយៈ​១៥​ថ្ងៃជា​កំហិត គិត​ចាប់ពី​ថ្ងៃទី​២៣ ខែ​កក្កដា​តទៅ ដើម្បី​ក្រសួង​អាច​ទទួល​ស្គាល់​គណបក្ស​នេះ​បាន។

ជុំវិញ​ការ​មិន​ផ្ដល់​សិទ្ធិ​នយោបាយ​ដល់​អតីត​មន្ត្រី​បក្ស​ប្រឆាំង​នេះ​ដែរ អ្នក​វិភាគ​នយោបាយ​លោក​បណ្ឌិត សេង សារី ចាត់ទុក របៀប​ធ្វើ​ការងារ​របស់​រដ្ឋាភិបាល​លោក ហ៊ុន សែន គ្មាន​ស្តង់ដារ​ត្រឹមត្រូវ​នោះ​ទេ។ លោក​ថា ការ​សម្រេច​នេះ​ហាក់​ធ្វើឡើង​តាម​អារម្មណ៍​លោក ហ៊ុន សែន។ លោក​សង្ស័យ​ថា ក្រសួង​មហាផ្ទៃ​បង្ក​ការ​លំបាក​ដល់​គណបក្ស​ថ្មី​ក្នុង​ការ​ចុះបញ្ជី​គណបក្ស​នយោបាយ អាច​មក​ពី​គណបក្ស​កាន់អំណាច​ព្រួយបារម្ភ​ថា គណបក្ស​ថ្មី​នោះ​ជា គណបក្ស​បន្តវេន​ពី​គណបក្ស​សង្គ្រោះជាតិ៖ «ការ​ផ្ដល់​នីតិសម្បទា​មិន​មាន​ស្តង់ដារ​ច្បាស់លាស់​ទេ​អាស្រ័យ​លើ​អារម្មណ៍​លើ​អ្នកនយោបាយ​ជាពិសេស​គឺ​គណបក្សកាន់អំណាច​ក្នុង​ការ​ផ្ដល់ ឬ​មិន​ផ្ដល់​អីចឹង​ទៅ»

ទោះ​មាន​កា​រឹត​បន្ដឹង​ខ្លះ​លើ​អតីតមន្ត្រី​បក្ស​ប្រឆាំង​ក្ដី ប៉ុន្តែ នៅ​ថ្ងៃទី​២៤ ខែកក្កដា ក្រសួង​មហាផ្ទៃ ទទួលស្គាល់​គណបក្ស​ថ្មី​មួយ​ទៀត​ឈ្មោះ គណបក្ស​កម្ពុជា​និយម។

គិត​មក​ដល់​ពេល​នេះ អតីតមន្ត្រី​បក្ស​ប្រឆាំង​បាន​ចេញ​ទៅ​បង្កើត​បក្ស​ថ្មី​យ៉ាងហោចណាស់​មាន​ចំនួន​៥​គណបក្ស។ មេធាវី​លោក កឹម សុខា គឺ​លោក ផែង ហេង ហៅ​ការបង្កើត​បក្ស​ថ្មី​របស់​អតីត​មន្ត្រី​បក្ស​ប្រឆាំង​ថា ជា​ការ​បែកបាក់​។ លោក​ថា ការ​បែកបាក់​គ្រួសារ បក្ស ឬ​ជាតិ មិនមែន​បណ្តាល​មក​ពី​កក្តា​ខាងក្រៅ​ទេ សំខាន់​បំផុត​គឺ​ខាងក្នុង​ខ្លួនឯង​ផង​ដែរ។ លោក​បន្ត​ថា ពាក្យ​ខ្មែរ​ពោល​ថា «​ខ្មោច​ក្នុង​ឲ្យ​ដៃ ទើប​ខ្មោច​ក្រៅ​ធ្វើ​ត្រូវ»

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល