លោក ហ៊ុន សែន ដែលធ្លាប់ប្រកាសថា លោកនឹងមិនងាកមកប្រើប្រាស់ហ្វេសប៊ុកវិញ ដែលនាំឱ្យលោកចង្រៃខ្លួននោះ ឥឡូវនេះបានលេបសម្ដីរបស់លោកហើយ បន្ទាប់ពីក្រុមហ៊ុនមេតា (Meta) បានប្រកាសមិនព្យួរគណនីហ្វេសប៊ុក(Facebook) និងអ៊ីនស្ដាក្រាម (Instagram) របស់លោក ហ៊ុន សែន។
លោក ហ៊ុន សែន ប្រធានឧត្ដមក្រុមប្រឹក្សាព្រះមហាក្សត្រ នឹងវិលមកប្រើប្រាស់គណនីហ្វេសប៊ុកផ្លូវការរបស់លោកឡើងវិញ។ លោក ដួង តារា ជំនួយការផ្ទាល់លោក ហ៊ុន សែន និងជាអ្នកគ្រប់គ្រងគណនីហ្វេសប៊ុកឱ្យលោក ហ៊ុន សែន បានប្រាប់កាសែតភ្នំពេញប៉ុស្តិ៍ កាលពីថ្ងៃទី៣០សីហា ថា លោក ហ៊ុន សែន នឹងវិលមកប្រើប្រាស់គណនីហ្វេសប៊ុករបស់លោកឡើងវិញ ដើម្បីអាចចែករំលែកព័ត៌មាន និងទទួលបានព័ត៌មានពីពលរដ្ឋកាន់តែឆាប់រហ័ស។
ការវិលមកប្រើប្រាស់ហ្វេសប៊ុករបស់លោក ហ៊ុន សែន នេះ ធ្វើឡើងបន្ទាប់ពីក្រុមហ៊ុនមេតា ជាក្រុមហ៊ុនមេរបស់បណ្ដាញសង្គមហ្វេសប៊ុក បានប្រកាសកាលពីថ្ងៃទី២៨ សីហាថា នឹងមិនព្យួរគណនីហ្វេសប៊ុក(Facebook) និងអ៊ីនស្ដាក្រាម (Instagram) របស់លោក ហ៊ុន សែន ឡើយ។
កន្លងមក លោក ហ៊ុន សែន ធ្លាប់ប្រកាសថា លោកនឹងមិនងាកមកប្រើប្រាស់ហ្វេសប៊ុកវិញ ដែលនាំឱ្យលោកចង្រៃខ្លួននោះទេ និងបានអំពាវនាវឱ្យមន្ត្រីរាជការ និងពលរដ្ឋ ងាកទៅប្រើប្រាស់បណ្ដាញទំនាក់ទំនងសង្គមរបស់ប្រទេសចិនតិកតុក(Tiktok) និងបណ្ដាញទំនាក់ទំនងរបស់ប្រទេសរុស្ស៊ី តេឡេក្រាម (Telegram)។ លើសពីនេះ លោកក៏បានបញ្ជាឱ្យបណ្ដេញសមាជិកក្រុមប្រឹក្សាភិបាលត្រួតពិនិត្យក្រុមហ៊ុនហ្វេសប៊ុក២២នាក់ចេញពីកម្ពុជា និងមិនឱ្យមានតំណាងក្រុមហ៊ុនហ្វេសប៊ុកនៅកម្ពុជា ដើម្បីបញ្ឈប់រាល់សកម្មភាព ទំនាក់ទំនងជាមួយរដ្ឋាភិបាល និងកិច្ចសហការដៃគូក្នុងវិស័យឯកជននៅកម្ពុជា។
លោក ហ៊ុន សែន បានប្រកាសទាំងខឹងសម្បារនៅពេលនោះ ក្រោយក្រុមប្រឹក្សាភិបាលត្រួតពិនិត្យរបស់ក្រុមហ៊ុនហ្វេសប៊ុកប្រចាំកម្ពុជា កាលពីថ្ងៃទី២៨ មិថុនា បានសម្រេចឱ្យព្យួរគេហទំព័រហ្វេសប៊ុករបស់លោកចំនួន ៦ខែ ដោយសារមានពាក្យបណ្ដឹងថា គណនីហ្វេសប៊ុកលោក ហ៊ុន សែន បានផ្សព្វផ្សាយសារបែបញុះញង់ឱ្យប្រព្រឹត្តអំពើហិង្សា លើមន្ត្រីនិងសកម្មជនគណបក្សប្រឆាំង ដែលអាចរំលោភលើគោលការណ៍ក្រមសីលធម៌របស់ក្រុមហ៊ុនមួយនេះ។
ទោះជាពេលនេះ ក្រុមហ៊ុនមេតាសម្រេចមិនព្យួរគណនីហ្វេសប៊ុករបស់លោក ហ៊ុន សែន ក្តី កម្ពុជានៅតែបន្តមិនអនុញ្ញាតឱ្យសមាជិកក្រុមប្រឹក្សាភិបាលត្រួតពិនិត្យក្រុមហ៊ុនហ្វេសប៊ុក ២២នាក់ ជាន់ទឹកដីកម្ពុជាដដែល ប៉ុន្តែអនុញ្ញាតឱ្យតំណាងហ្វេសប៊ុកប្រតិបត្តិការនៅកម្ពុជាឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។