លោកនាយករដ្ឋមន្ត្រី ហ៊ុន សែន បញ្ជាក់ឡើងវិញថា លោកគ្មានគម្រោងដាក់ប្រទេសទាំងមូល ឬផ្នែកណាមួយ ក្នុងភាពអាសន្នទេ។ លោកអំពាវនាវឲ្យពលរដ្ឋស្ងប់ស្ងាត់ កុំស្លន់ស្លោ ស្ដាប់តាមការណែនាំរបស់ក្រសួងសុខាភិបាល ដើម្បីរួមគ្នាទប់ស្កាត់ជងឺកូវីដ១៩ (Covid-19)។ ដោយឡែក ក្រសួងសុខាភិបាល នៅថ្ងៃទី៧ ធ្នូ រកឃើញ ពលរដ្ឋ ២នាក់ទៀត ឆ្លងជំងឺកូវីដ១៩ ជាករណីឆ្លងក្នុងសហគមន៍ ២៨ វិច្ឆិកា។
លោក ហ៊ុន សែន បញ្ជាក់ជាថ្មីនៅលើទំព័រហ្វេសប៊ុកថា គ្មានបំណងដាក់ប្រទេសក្នុងភាពអាសន្ន ដោយសារ វិបត្តិជំងឺកូវីដ១៩ នៅពេលនេះទេ ព្រោះនឹងមានផលប៉ះពាល់ធំពេកដល់សេដ្ឋកិច្ច និងជីវភាពប្រជាជន។
ប៉ុន្តែជំនួសឲ្យការដាក់ប្រទេសក្នុងភាពអាសន្ន លោក អំពាវនាវកុំឱ្យមានការភ័យស្លន់ស្លោ និងរួមគ្នា ដើម្បីប្រយុទ្ធប្រឆាំងជំងឺកូវីដ១៩ ទាំងអស់គ្នា។ លោក ហ៊ុន សែន បញ្ជាក់ថា ក្រោយលោកបង្ហើបថា លោកបានត្រៀមបម្រុងទុកនូវលិខិតនានា ដើម្បីនឹងសុំព្រះរាជក្រឹត្យដាក់ប្រទេសក្នុងគ្រាមានអាសន្ន នោះ ស្រាប់តែមានការបំផ្លើសនានា បានកើតឡើងថានឹងមានការបិទប្រទេស ឬបិទរាជធានីភ្នំពេញក្នុងពេលប៉ុន្មានថ្ងៃខាងមុខនេះ ហើយបំផុសឱ្យមនុស្សទិញទំនិញត្រៀមទុក។
អ្នកនាំពាក្យរដ្ឋាភិបាល លោក ផៃ ស៊ីផាន ប្រាប់អាស៊ីសេរី ថា មកដល់ពេលនេះ រដ្ឋាភិបាលអាចគ្រប់គ្រងស្ថានភាពបាន។ ដូច្នេះ រដ្ឋាភិបាលគ្មានបំណងបិទប្រទេស ឬបិទផ្នែកណាមួយទេ។ តែយ៉ាងណា លោកបញ្ជាក់ថា រដ្ឋាភិបាលបានដាក់បញ្ជាម៉ឺងម៉ាត់ ឲ្យជនដែលត្រូវធ្វើចត្តាឡីស័ក ត្រូវអនុវត្តវិធានការ របស់ក្រសួងសុខាភិបាលឲ្យបានត្រឹមត្រូវ និងត្រូវស្វែងរកដានអ្នកពាក់ព័ន្ធ កុំឲ្យបាត់ដានឲ្យសោះ៖ « ទម្ងន់នៃពាក្យរបស់សម្ដេចអគ្គមហាសេនាបតីតេជោ ហ៊ុន សែន គាត់បានបញ្ជាឲ្យចាត់វិធានការយ៉ាងម៉ឺងម៉ាត់ ចំពោះជន ដែលទទួលចត្តាឡីស័ក។ បញ្ជាយ៉ាងម៉ឺងម៉ាត់ នៅក្នុងការ តាមកុំឲ្យបាត់ដានរបស់អ្នកបន្តការផ្ទុកជំងឺហ្នឹង ហើយពាក្យសាថ្មីម្ដងទៀតហ្នឹង លោក បានប្រកាសថា មិនមានការប៉ុនប៉ងណា ទៅបិទអ្វីទៀតទេ។ មានន័យថា បង្ហាញពីស្ថានភាពនៅក្នុងការគ្រប់គ្រងរបស់រាជរដ្ឋាភិបាលរួចស្រេចហើយ។ រួមទាំងការចាត់វិធានការចែកម៉ាស់ ចែកអ្វី»។
ទោះយ៉ាងណា នៅមុននេះមួយថ្ងៃ មេដឹកនាំរបបក្រុងភ្នំពេញ បានប្រកាស ដោយខ្លួនឯងថា លោកបានត្រៀមលិខិតនានារួចហើយ ដើម្បីថ្វាយព្រះមហាក្សត្រ និងដាក់ជូនប្រធានរដ្ឋសភា និងប្រធានព្រឹទ្ធសភា ក្នុងការដាក់ប្រទេសក្នុងគ្រាមានអាសន្ន ប្រសិនបើការឆ្លងរាតត្បាតជំងឺកូវីដកាន់តែធ្ងន់ធ្ងរ៖ «ខ្ញុំមិនចង់ឲ្យកម្ពុជាឈានដល់ការបិទប្រទេស ឬបិទផ្នែកណាមួយទេ ព្រោះបណ្ដាលឲ្យសេដ្ឋកិច្ចកម្ពុជា ជាប់គាំងទាំងស្រុង និងប៉ះពាល់ដល់ប្រជាពលរដ្ឋធ្ងន់ធ្ងរ»។
ប្រធានបណ្ដាញយុវជនកម្ពុជា (CYN) លោក អ៊ុល វ៉ាន់ ស្វាគមន៍បំណងរបស់រដ្ឋាភិបាល ក្នុងការមិនដាក់ប្រទេសក្នុងភាពអាសន្ន។ លោកយល់ថា រដ្ឋាភិបាល គួរតែបន្ថែមវិធានការទៀត ដូចជា ការបង្កើនការចែកសម្ភារៈសុវត្ថិភាពជូនពលរដ្ឋ និងវិធានការចត្តាឡីស័ក ជាដើម ជាជាងការបិទប្រទេស ឬដាក់ប្រទេស ក្នុងភាពអាសន្ន។
តំណាងសង្គមស៊ីវិលរូបនេះ សង្កេតឃើញថា ពលរដ្ឋចាប់ផ្ដើមភ័យខ្លាច និងចូលរួមការពារខ្លួនប្រសើរជាងមុន ក្នុងរយៈពេលចុងក្រោយនេះ។ តែយ៉ាងណា លោក អ៊ុល វ៉ាន់ ព្រួយបារម្ភថា ការចាត់វិធានការភ្លាមៗ ដូចជា ការបិទកន្លែងអាជីវកម្មមួយចំនួន នៅរយៈពេលចុងក្រោយនេះ នឹងបង្កផលប៉ះពាល់ផ្នែកសេដ្ឋកិច្ច ដល់ម្ចាស់ហាង និងកម្មករ៖ « រដ្ឋាភិបាលអាចព្យាយាមធ្វើការកំណត់អ្នកដែលគាត់ប៉ះពាល់ជាមួយព្រឹត្តិការណ៍ចម្លងទ្រង់ទ្រាយធំ ដូចជាការចម្លងនៅថ្ងៃ ២៨ វិច្ឆិកា ហ្នឹង ហើយធ្វើការទំនាក់ទំនង ក៏ដូចជាធ្វើការព្យាបាល ដល់អ្នកដែលប៉ះពាល់បញ្ហាកូវីដហ្នឹងណា អ្នកដែលចម្លងជំងឺកូវីដហ្នឹង ឲ្យបានប្រសិទ្ធិភាពខ្ពស់។ ផ្ដល់នូវការគាំទ្រ ដូចជា សម្ភារៈការពារសុវត្ថិភាពដល់ប្រជាពលរដ្ឋ។ ជាពិសេស នៅទីតាំងសាធារណៈ នៅអគារសាធារណៈអ្វីផ្សេងៗ ដើម្បីឲ្យប្រជាជនហ្នឹង គាត់អាចមានលទ្ធភាពប្រើប្រាស់សម្ភារៈទាំងអស់ហ្នឹង នៅក្នុងការការពារសុវត្ថិភាពរបស់ពួកគាត់ដែរ ដូចជា ម៉ាស់ ដូចជា អាល់កុល ទឹកលាងដៃ អ្វីជាដើមហ្នឹង»។
ដោយឡែក នៅថ្ងៃទី៧ ធ្នូ ក្រសួងសុខាភិបាល បានរកឃើញអ្នកឆ្លងជំងឺកូវីដ១៩ ចំនួន ២នាក់ទៀត ពាក់ព័ន្ធព្រឹត្តិការណ៍ឆ្លងចូលសហគមន៍។ អ្នកទាំង ២នាក់នេះ គឺម្នាក់ជាយុវជនវ័យ ២១ឆ្នាំ ស្នាក់នៅបន្ទប់ជួល ម្ដុំវត្តសន្សំកុសល ក្នុងសង្កាត់បឹងទំពុន ខណ្ឌមានជ័យ ហើយជាអ្នកស្នាក់នៅជាមួយអ្នកកើតជំងឺកូវីដ១៩ ធ្វើការនៅហាងលក់សំលៀកបំពាក់ប៉េត្រូ «Pedro» ផ្លូវព្រះមុនីវង្ស។ ម្នាក់ទៀត គឺជាមន្ត្រីក្រសួងមហាផ្ទៃ ភេទស្រី អាយុ២៩ឆ្នាំ ស្នាក់នៅសង្កាត់ចាក់អង្រែលើ ខណ្ឌមានជ័យ ធ្លាប់ចូលក្នុងហាងលក់ សំលៀកបំពាក់ ហ្សែនដូ «Zando» បឹងកេងកង កាលពីថ្ងៃទី២៧ ខែវិច្ឆិកា ដោយមិនពាក់ម៉ាស។ អ្នកជំងឺទាំង២នាក់ កំពុងដាក់ឲ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។
ក្រសួងឲ្យដឹងដែរថា ចាប់តាំងពីថ្ងៃផ្ទុះជំងឺកូវីដ១៩ ពីថ្ងៃទី២៩ វិច្ឆិកា ដល់ថ្ងៃទី៦ ធ្នូ ក្រសួង បានធ្វើតេស្តមនុស្សសរុប ជាងមួយម៉ឺន (១១.៣០៥) ហើយរកឃើញអ្នកកើតជំងឺកូវីដ១៩ ចំនួន ៣២នាក់។ អ្នកជំងឺទាំង ៣២នាក់ កំពុងសម្រាកព្យាបាល ក្នុងមន្ទីរពេទ្យមិត្តភាពខ្មែរសូវៀត និងមណ្ឌលសុខភាពចាក់អង្រែ។ ក្រសួងនៅតែបន្តអំពាវនាវឲ្យអ្នកពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកាទាំងអស់ និងអ្នកធ្វើតេស្តអវិជ្ជមានលើកទី១ ទៅធ្វើតេស្ត ជាបន្តបន្ទាប់ទៀត នៅក្នុងបរិវេណក្រសួងមហាផ្ទៃ បរិវេណពហុកីឡាដ្ឋានជាតិអូឡាំពិក និងនៅតាមមន្ទីរសុខាភិបាលខេត្តនានា។
ជាមួយគ្នានេះ រដ្ឋាភិបាល នៅតែបន្តបិទទីតាំងអាជីវកម្មមួយចំនួនបន្តទៀត ដូចជា អគារកាណាឌីយ៉ា ធនាគារកាថេយូណាធីត (Cathay United Bank) នៅផ្លូវសម្ដេចប៉ាន និងហាងលក់ទំនិញមួយចំនួន ដែលមានការរកឃើញឆ្លងជំងឺកូវីដ១៩ ដើម្បីទប់ស្កាត់ការចម្លងជំងឺនេះ។ រីឯរដ្ឋមន្ត្រីក្រសួងមហាផ្ទៃ លោក ស ខេង ក៏បានសម្រេចបិទបរិវេណក្រសួងមហាផ្ទៃ បណ្ដោះអាសន្នដែរ ដើម្បីទប់ស្កាត់ការរីករាលដាលជំងឺកូវីដ១៩។ ក្នុងបទបញ្ជា ចុះថ្ងៃទី៧ ធ្នូ លោក ស ខេង បញ្ជាឲ្យ មន្ត្រីធ្វើការ ក្នុងក្រសួងមហាផ្ទៃទាំងអស់ ត្រូវធ្វើចត្តាឡីស័ក តាមផ្ទះ រយៈពេល ១៤ថ្ងៃ និងត្រូវទៅធ្វើតេស្ត ឲ្យបានត្រឹមត្រូវ តាមវិធានការក្រសួងសុខាភិបាល។
គិតត្រឹមថ្ងៃទី៧ ខែធ្នូ កម្ពុជាបានរកឃើញ អ្នកឆ្លងជំងឺកូវីដ១៩ សរុប ៣៤៨នាក់។ ក្នុងនោះព្យាបាលជាសះស្បើយ ចំនួន ៣០៦នាក់ និងកំពុងសម្រាកព្យាបាល ៤២នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។