លោកនាយករដ្ឋមន្ត្រី ហ៊ុន សែន នឹងធ្វើដំណើរវិលត្រឡប់ទៅស្រុកខ្មែរវិញ ក្រោយបញ្ចប់កិច្ចប្រជុំនៅកូរ៉េខាងត្បូង ដោយលោកនឹងមិនទៅសួរសុខទុក្ខនិស្សិតខ្មែរ ដែលកំពុងជាប់ផុងនៅទីក្រុងវូហាន ប្រទេសចិននោះទេ។ លោកអះអាងថា ខាងភាគីចិនមិនអនុញ្ញាតឲ្យលោកទៅតំបន់ ដែលនិស្សិតខ្មែរកំពុងស្នាក់នៅនោះ ដោយសារតំបន់នោះ កំពុងរីករាលដាលមេរោគកូរ៉ូណា។
លោក ហ៊ុន សែន ប្រាប់ប្រព័ន្ធឃោសនារបស់លោក កាលពីរាត្រីថ្ងៃទី៤ ខែកុម្ភៈថា ការមិនអាចទៅសួរសុខទុក្ខនិស្សិតខ្មែរនៅចិនបាននេះ គឺដោយសារភាគីចិន មិនអាចរៀបចំដំណើរទៅកាន់ទីក្រុង វូហាន (Wuhan) បាន។
លោក ហ៊ុន សែន កាលពីថ្ងៃទី៣ ខែកុម្ភៈ ក្នុងពិធីជួបពលរដ្ឋខ្មែរនៅប្រទេសកូរ៉េខាងត្បូង បានអះអាង ដោយន័យឌឺដងឡកសម្ដីដល់អ្នករិះគន់លោក ជុំវិញការមិនព្រមជម្លៀសនិស្សិតខ្មែរ ២៣នាក់ ដែលកំពុងជាប់គាំងនៅក្រុងវូហាននោះថា លោកសឿងហ៊ានទៅសួរសុខទុក្ខអ្នកទាំងនោះ ដោយផ្ទាល់ មិនចាំបាច់ឲ្យអ្នកទាំងនោះមកខ្មែរវិញទេ៖ «ឥឡូវឆ្លើយត្រឡប់ទៅវិញ អញនឹងទៅ ! ឲ្យខាងរដ្ឋាភិបាលចិនផ្តល់ឱកាស។ ត្រឡប់ពីហ្នឹងទៅវិញ មិនទាន់ទៅប្រទេសក៏បានដែរ ចុះទៅវូហានតែម្ដង។ មើល៍ ! សាកល្បងទាក់ទងលមើល ! ព្រោះទៅពីនេះទៅ គង់តែហោះកាត់ប្រទេសចិនដដែល !»។
សាររបស់លោក ហ៊ុន សែន ក្នុងស្ថានភាពដែលប្រទេសចិន កំពុងតែដោះស្រាយបញ្ហាខ្លួនមិនឈ្នះ រហូតដល់បិទទីក្រុងវូហានទាំងស្រុង ដោយលែងឲ្យមនុស្សម្នាធ្វើដំណើរ ហើយពិភពលោកជ្រួលច្របល់រកវិធីដោះស្រាយ រឿងមេរោគកូរ៉ណា ដ៏កាចសាហាវ និងកំពុងរីករាលដាលពេញបន្ទុកនេះ រងការរិះគន់ថា ជាសារប្រជាភិថុតិ ដើម្បីកេងចំណេញនយោបាយតែប៉ុណ្ណោះ ព្រោះលោក ហ៊ុន សែន ដឹងច្បាស់ហើយថា លោកមិនអាចទៅទីនោះបានទេ ក្នុងស្ថានភាពបែបនេះ ហើយបើលោកពិតជាមានបំណងស្មោះស ចង់ទៅសួរសុខទុក្ខពលរដ្ឋខ្មែរ នៅទីក្រុងវូហាននោះពិតប្រាកដមែន ម្ល៉េះសមរបបក្រុងភ្នំពេញ រៀបចំសរសេរសំណើជាផ្លូវការ ដាក់ស្នើទៅភាគីចិន យ៉ាងហោចណាស់រាប់សប្ដាហ៍ មុនថ្ងៃដែលចង់ទៅនោះ មិនមែននឹកឃើញចង់ទៅភ្លាមៗ ស្រេចតែនឹងចិត្តទេ។
អាស៊ីសេរី បានព្យាយាមទាក់ទងសុំការបំភ្លឺពីភាគីចិន ទាំងស្ថានទូតចិនប្រចាំនៅកម្ពុជា និងក្រសួងការបរទេសចិនប្រចាំនៅទីក្រុងប៉េកាំង ប៉ុន្តែមិនទាន់បានការឆ្លើយតបយ៉ាងណានៅឡើយដែរ ដោយទូរស័ព្ទទូតចិន ដែលថា បើក ២៤ ម៉ោងនោះ ហៅចូលច្រើនដងគ្មានអ្នកទទួល។ ចំណែកអ្នកលើកទូរស័ព្ទ នៅឯក្រសួងការបរទេសចិន នៅទីក្រុងប៉េកាំង លើកទូរស័ព្ទដែរ តែផ្តាច់ទៅវិញភ្លាមៗ ពេលប្រាប់ថា អ្នកសារព័ត៌មានហៅទៅ។
របបក្រុងភ្នំពេញ រងការរិះគន់ជុំទិស ជុំវិញសាររបស់លោក ហ៊ុន សែន ដែលប្រកាសដាច់ខាតមិនជម្លៀសនិស្សិតខ្មែរពីទីក្រុងវូហាន ដែលកំពុងរាតត្បាតដោយមេរោគកូរ៉ូណាទេ ដោយបង្ខំឲ្យអ្នកទាំងនោះ នៅរួមសុខរួមទុក្ខជាមួយជនជាតិចិន ដែលកំពុងស្ថិតក្នុងគ្រាអាសន្នទាំងនោះ។
លោក ហ៊ុន សែន ថែមទាំងគំរាមនិស្សិតទាំងនោះទៀតថា ការដង្ហោយរកការជម្លៀសចេញពីទីនោះ គឺនឹងបាត់បង់អាហារូបករណ៍៖ «អត់មានតម្រូវការនៃការជម្លៀសនិស្សិតខ្មែរ មកកាន់កម្ពុជាទេ ដោយយើងទុកនៅទីនោះ ដែលជាការរួមសុខរួមទុក្ខជាមួយគ្នា ក្នុងការដោះស្រាយបញ្ហានេះ។ បើជម្លៀសនិស្សិត មិនចាំបាច់សុំអាហារូបករណ៍ចិនទៅទៀតទេ ច្បាស់ជាចិននឹងមិនឲ្យទេ។ បើស្រួលអ្នកឯងមករកខ្ញុំ ពេលលំបាកអ្នកឯងរត់ចោលខ្ញុំ»។
ជំហរនេះ ត្រូវបានពលរដ្ឋខ្មែរ ដែលប្រើបណ្ដាញសង្គមហ្វេសប៊ុកជាច្រើន រិះគន់ថា លោក ហ៊ុន សែន ជាមេដឹកនាំខ្វះការទទួលខុសត្រូវ ដោយផ្ដេកផ្ដួលខ្លាំងពេក ទៅលើប្រទេសចិនកុម្មុយនិស្ត ទើបសុខចិត្តផ្គាប់ផ្គុនចិន ជាជាងគិតគូរសុខទុក្ខពលរដ្ឋខ្លួនឯង។
រហូតមកដល់ម៉ោង ១១ យប់ ថ្ងៃទី៤ ខែកុម្ភៈ អ្នកស្លាប់ដោយសារមេរោគកូរ៉ូណា កើនដល់ ៤២៦នាក់ និងឆ្លងរោគជាង ២ម៉ឺននាក់ (២០,៦២២)។ ការរាតត្បាតនេះ បានឆ្លងដល់ប្រទេសជិត ៣០ ហើយ។
រដ្ឋាភិបាលជាច្រើន នៅលើពិភពលោក រួមទាំងអ្នកជិតខាងកម្ពុជា ដូចជា ថៃ ភូមា និងឥណ្ឌូនេស៊ីផង បានចាត់វិធានការការពារប្រជាពលរដ្ឋរបស់ខ្លួន ដោយបញ្ជូនជើងយន្តហោះ ទៅដឹកប្រជាពលរដ្ឋខ្លួនដែលនៅជាប់គាំងនៅទីក្រុងវូហាន (Wuhan) ត្រឡប់ទៅប្រទេសកំណើតវិញអស់ហើយ។ ប្រទេសជាច្រើនទៀត បានផ្អាកជើងយន្តហោះពីចិន និងបិទព្រំដែនមួយរយៈ ដើម្បីបង្ការការឆ្លងនេះ។ សូម្បីតែរដ្ឋបាលក្រុងហុងកុង ក៏បិទព្រំដែនហុងកុង និងចិនដែរ ដើម្បីទប់ស្កាត់បញ្ហានេះ។
អាស៊ីសេរី ក៏បានព្យាយាមសុំការបំភ្លឺពីមន្ត្រីនាំពាក្យរបបក្រុងភ្នំពេញ លោក ផៃ ស៊ីផាន ដែរ ប៉ុន្តែ ទូរស័ព្ទចូលច្រើនដង គ្មានអ្នកទទួល។
ទោះជាយ៉ាងនេះក្តី លោក ផៃ ស៊ីផាន បានសរសេរសារលើគណនីហ្វេសប៊ុករបស់លោក កាលពីថ្ងៃទី៤ ខែកុម្ភៈ ពោលគឺ ប៉ុន្មានម៉ោងក្រោយសារចុងក្រោយរបស់លោក ហ៊ុន សែន អំពីការមិនអាចទៅសួរសុខទុក្ខនិស្សិតចិនបាននេះ ដោយលោក ផៃ ស៊ីផាន សរសេរអួតសរសើរថា សាររបស់លោក ហ៊ុន សែន ដែលថា ចង់ទៅវូហាននោះ គឺជាការតាំងចិត្តយ៉ាងមុតមាំ របស់នាយករដ្ឋមន្ត្រីខ្មែររូបនេះ។ លោក ផៃ ស៊ីផាន ថា ការតាំងចិត្តនេះ គឺជាការបង្ហាញវីរភាពយ៉ាងក្លៀវក្លារបស់លោក ហ៊ុន សែន ដែលលោក ផៃ ស៊ីផាន លើកជ្រោងថា ជាវីរបុរសពិត។
សារនេះ ក៏រងការរិះគន់ដែរ ព្រោះគ្រាន់តែជាការតាំងចិត្ត ជាសារនយោបាយ ដែលមិនមែនទៅសួរសុខទុក្ខមែនទែននោះទេ។ អ្នកប្រើប្រាស់បណ្ដាញសង្គមហ្វេសប៊ុកខ្លះ សរសេរសារបែបចំអក ដោយដកស្រង់ខ្លឹមសារចម្រៀងលោក ស៊ីន ស៊ីសាមុត ត្រង់ឃ្លាថា ក្រពើក្នុងទឹកបងមិនសូវហ៊ានចាប់ បើក្រពើងាប់ស្រាប់ បងហ៊ានចាប់ឲ្យស្រីមើល។
សារនេះទំនងជាអ្នកប្រើបណ្ដាញសង្គមហ្វេសប៊ុកទាំងនោះ យល់ថារឿងនេះច្បាស់ណាស់ គឺពិតជាមិនអាចកើតទៅរួចទេ ដោយលោក ហ៊ុន សែន និយាយឲ្យពីរោះស្ដាប់តែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។