លោក ហ៊ុន សែន ស្នើ​ជួប​មេដឹកនាំ​រដ្ឋប្រហារ​យោធា​ភូមា​ភ្លាមៗ​ក្រោយ​ឡើង​តំណែង​ជា​ប្រធាន​ព្រឹទ្ធសភា

ដោយ មាន ឫទ្ធិ
2024.04.09
លោក ហ៊ុន សែន ស្នើ​ជួប​មេដឹកនាំ​រដ្ឋប្រហារ​យោធា​ភូមា​ភ្លាមៗ​ក្រោយ​ឡើង​តំណែង​ជា​ប្រធាន​ព្រឹទ្ធសភា អតីតនាយករដ្ឋមន្ត្រីកម្ពុជា និងបច្ចុប្បន្ន​ជា​ប្រធានព្រឹទ្ធសភា លោក ហ៊ុន សែន (ស្ដាំ) និង​មេដឹកនាំ​របប​សឹក​ភូមា លោក មីន អុងឡាំង (Min Aung Hlaing)​។
Photo Courtesy

ភ្លាមៗ​ក្រោយ​ពី​ឡើង​តំណែង​ជា​ប្រធាន​ព្រឹទ្ធសភា និង​ប្រមុខ​រដ្ឋ​ស្តីទី លោក ហ៊ុន សែន បង្ហាញ​ចេតនា​ចង់​ជួប​ប្អូនធម៌​របស់​លោក​ដែល​ជំនាញ​ខាង​ធ្វើ​រដ្ឋប្រហារ​ដណ្តើម​អំណាច​ដូច​លោក​ដែរ។ នោះ​គឺ​មេដឹកនាំ​រដ្ឋប្រហារ​យោធា​មីយ៉ាន់ម៉ា (Myanmar) ឬ​ភូមា (Burma) គឺ​លោក មីង អ៊ុងឡាំង (Min Aung Hlaing)។ លោក ហ៊ុន សែន បាន​បង្ហាញ​ចេតនា​យ៉ាង​ដូច្នេះ ក្នុង​ពេល​លោក​ទទួល​ជួប​ជាមួយ​ឯកអគ្គរដ្ឋទូត​នៃ​របប​ដឹកនាំ​រដ្ឋប្រហារ​យោធា​ភូមា គឺ​លោក ខ្យហ៍ ស៊ូមីន (Kyaw Soe Min) កាល​ពី​ថ្ងៃទី០៨ ខែមេសា នៅ​វិមាន​ព្រឹទ្ធសភា។ ក្នុង​ជំនួប​នោះ លោក ហ៊ុន សែន បាន​សំណូមពរ​ចង់​ជួប​លោក មីង អ៊ុងឡាំង តាមរយៈ​វីដេអូ Conference ដែល​លោក​អះអាង​ថា​ដើម្បី​សួរ​សុខទុក្ខ និង​ពិគ្រោះ​យោបល់​ស្វែងរក​ដំណោះស្រាយ​វិបត្តិ​នៅ​មីយ៉ាន់ម៉ា។

កន្លងទៅ ក្នុង​ពេល​ដែល​កម្ពុជា​ធ្វើ​ជា​ប្រធាន​ប្តូរ​វេន​អាស៊ាន​កាល​ពី​ឆ្នាំ២០២២ លោក ហ៊ុន សែន បាន​ធ្វើ​ឱ្យ​កម្ពុជា​​រង​នូវ​ការ​រិះគន់ និង​ថ្កោលទោស​ស្ទើរ​ជុំ​ទិស​ពី​អន្តរជាតិ​ជុំវិញ​ការ​បង្ហាញ​ជំហរ​អាស៊ាន​បែប​ទន់ភ្លន់ និង​ចង់​ផ្តល់​ភាព​ស្របច្បាប់​ឱ្យ​របប​ដឹកនាំ​យោធា​ភូមា។ លើស​ពី​នេះ​ទៀត លោក ហ៊ុន សែន តែង​ចែក​រំលែក​បទពិសោធន៍​នៃ​ការដឹកនាំ​បែប​ផ្ដាច់ការ និង​ការ​បង្ក្រាប​លើ​ប្រព័ន្ធ​ប្រជាធិបតេយ្យ​នៅ​កម្ពុជា​ដល់​ក្រុម​មេដឹកនាំ​ភូមា។ លោក ហ៊ុន សែន អួត​ថា កម្ពុជា​ធ្លាប់​មាន​វិបត្តិ​ស្ទើរ​ធ្ងន់ធ្ងរ​ជាង​ភូមា​ទៅ​ទៀត តែ​ដោយសារ​នយោបាយ​ឈ្នះៗ​របស់​លោក លោក​បាន​បង្រួបបង្រួម​ជាតិ​ និង​នាំ​ឱ្យ​មាន​សុខ​សន្តិភាព។ ផ្ទុយ​ពី​ការ​អះអាង​នេះ ក្រុម​អ្នក​តាម​ដាន​ស្ថានការណ៍​នយោបាយ​នៅ​កម្ពុជា រិះគន់​ថា លោក ហ៊ុន សែន មិន​អាច​ដោះស្រាយ​វិបត្តិ​នយោបាយ​ក្នុង​ស្រុក​ខ្លួន​ឯង​ផង ដូច្នេះ​លោក​គ្មាន​សមត្ថភាព​ទៅ​ដោះស្រាយ​វិបត្តិ​នយោបាយ​នៅ​ប្រទេស​ដទៃ​នោះ​ទេ។

លោក ហ៊ុន សែន ប្រើ​ឱកាស​ជា​ប្រមុខ​រដ្ឋ​ស្តីទី​ស្នើ​ជួប​មេដឹកនាំ​រដ្ឋប្រហារ​យោធា​នៅ​ភូមា​នា​ពេល​នេះ ទំនង​ជា​លោក​ចង់​ទាក់ទាញ​ចំណាប់អារម្មណ៍​ពី​អន្តរជាតិ​ក្នុង​ពេល​លោក​ឡើង​តំណែង​ធ្វើ​ជា​ប្រធាន​ព្រឹទ្ធសភា​ក្តៅៗ។

បច្ចុប្បន្ន ប្រទេស​ភូមា​កំពុង​ស្ថិត​ក្នុង​ស្ថានភាព​សង្គ្រាម​ស៊ីវិល ក្រោយ​លោក មីង អ៊ុងឡាំង ដឹកនាំ​ធ្វើ​រដ្ឋប្រហារ​ដណ្តើម​អំណាច​ខុសច្បាប់​កាលពី​ដើម​ឆ្នាំ​២០២១ បន្ទាប់​ពី​ចាញ់​ឆ្នោត។ យ៉ាងហោចណាស់​មាន​មនុស្ស​ប្រមាណ ៥ម៉ឺន​នាក់​បាន​ស្លាប់​ ក្នុង​នោះ​៨ពាន់​នាក់​ជា​ជនស៊ីវិល ចាប់​តាំង​ពី​មាន​អំពើ​រដ្ឋប្រហារ​យោធា​នេះ​មក៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។