មេដឹកនាំរបបក្រុងភ្នំពេញលោក ហ៊ុន សែន អះអាងថា រដ្ឋាភិបាលហុងគ្រីនឹងជួយនិយាយជាមួយសហភាពអឺរ៉ុបឱ្យរក្សាប្រព័ន្ធអនុគ្រោះពន្ធ EBA ដល់កម្ពុជាបន្តទៅទៀត។ ក៏ប៉ុន្តែសកម្មជនសិទ្ធិការងារមើលឃើញថា កូនសោក្នុងការដោះស្រាយបញ្ហានេះ គឺស្ថិតនៅក្នុងដៃរបបលោក ហ៊ុន សែន មិនមែនរដ្ឋសមាជិករបស់សហភាពអឺរ៉ុបនោះឡើយ។
លោកនាយករដ្ឋមន្ត្រី ហ៊ុន សែន ប្រកាសម្នាក់ឯងថា ថ្នាក់ដឹកនាំប្រទេសហុងគ្រីបានបង្ហាញការគាំទ្រដល់របបរបស់លោក ក្នុងការតស៊ូមតិជាមួយសហភាពអឺរ៉ុបជុំវិញវិបត្តិ EBA។ លោកអះអាងថា នាយករដ្ឋមន្ត្រីហុងគ្រី លោក វិចទ័រ អរប៊ែន (Viktor Orbán) បានប្រាប់លោកថា បញ្ហា EBA នេះ គឺជារឿងខ្វែងគំនិតគ្នារវាងសហភាពអឺរ៉ុប និងកម្ពុជា ហើយថ្នាក់ដឹកនាំប្រទេសអឺរ៉ុបខាងកើតរូបនេះ មិនគាំទ្រការយកបញ្ហានយោបាយទៅលាយឡំគ្នាជាមួយរឿងពាណិជ្ជកម្ម និងសេដ្ឋកិច្ចបែបនេះឡើយ។ លោកបន្ថែមថា ថ្នាក់ដឹករដ្ឋាភិបាលហុងគ្រីបានសន្យាថា នឹងជួយរបបរបស់លោកតស៊ូមតិជាមួយសហភាពអឺរ៉ុបជុំវិញវិបត្តិ EBA នេះ។
លោក ហ៊ុន សែន បញ្ជាក់បែបនេះ នៅក្នុងហ្វេសប៊ុកនៅថ្ងៃទី១៤ មិថុនា មួយថ្ងៃបន្ទាប់ពីលោកបានជួបប្រជុំទ្វេភាគីជាមួយថ្នាក់ដឹកនាំរដ្ឋាភិបាលហុងគ្រី នៅទីក្រុងប៊ុយដាប៉េស (Budapest) ប្រទេសហុងគ្រី។ ក្នុងជំនួបនោះ ភាគីទាំងពីរក៏បានឯកភាពគ្នា បើកស្ថានទូតប្រទេសរៀងៗ ខ្លួន នៅឆ្នាំ២០២១ ខាងមុខផងដែរ។
សកម្មភាពរបស់មេដឹកនាំរបបក្រុងភ្នំពេញក្នុងការស្វែងរកការគាំទ្រពីបណ្ដារដ្ឋជាសមាជិកសហភាពអឺរ៉ុបក្នុងរឿង EBA នេះ ធ្វើឡើងបន្ទាប់ពីប្រតិភូអឺរ៉ុបទើបតែបានបិទបញ្ចប់បេសកកម្មស្វែងរកការពិតនៅកម្ពុជា នៅដើមខែមិថុនានេះ។
សហភាពអឺរ៉ុបនឹងបិទបញ្ចប់ដំណើរការតាមដាន និងវាយតម្លៃស្ថានការណ៍កម្ពុជា នៅពាក់កណ្តាលខែសីហាខាងមុខ។ បន្ទាប់ពីនេះ សហភាពអឺរ៉ុបនឹងចេញរបាយការណ៍ស្ដីពីរបកគំហើញ និងធ្វើសេចក្ដីសន្និដ្ឋាននៅខែវិច្ឆិកា។ ពេលនោះ សហភាពអឺរ៉ុបនឹងទុកពេល ១ខែ ឱ្យរបបលោក ហ៊ុន សែន ដើម្បីឆ្លើយតបនឹងរបាយការណ៍នេះ។ នៅខែកុម្ភៈ ឆ្នាំ២០២០ សហភាពអឺរ៉ុបនឹងសម្រេចចិត្តជាចុងក្រោយថា ត្រូវដក ឬរក្សាទុកប្រព័ន្ធអនុគ្រោះពន្ធនេះ ហើយបើអឺរ៉ុបសម្រេចដកហូតមែន នោះការយកពន្ធលើទំនិញកម្ពុជានឹងត្រូវចាប់ផ្តើមជាផ្លូវការនៅខែ សីហា ឆ្នាំ២០២០ ខាងមុខ។
បើត្រូវបង់ពន្ធមែន នោះកម្ពុជានឹងត្រូវខាតបង់ថវិកាជិត ៧រយលានដុល្លារអាមេរិក ក្នុងមួយឆ្នាំ ដែលធ្វើឱ្យវិស័យឯកជនរារែកចិត្តក្នុងការបន្តរកស៊ីនៅកម្ពុជាតទៅទៀត ហើយពេលនេះផលប៉ះពាល់ខាងសេដ្ឋកិច្ច និងសង្គម អាចមានទំហំធំធេងជាងនេះ។
ក្រោយបិទបញ្ចប់បេសកកម្មស្វែងរកការពិតលើកទី២ កាលពេលថ្មីៗនេះ គណៈប្រតិភូអឺរ៉ុបបានដាស់តឿនរបបក្រុងភ្នំពេញជាថ្មីម្តងទៀតថា ប្រសិនបើរបបនេះនៅចង់ទទួលបានការអនុគ្រោះពន្ធ EBA បន្តទៅទៀត របបនេះត្រូវតែកែលម្អកង្វល់ទាំងឡាយអំពីបញ្ហាសិទ្ធិមនុស្ស និងប្រជាធិបតេយ្យ ឱ្យបានពិតប្រាកដ និងគួរឱ្យទុកចិត្តបាន។
នាយកប្រតិបត្តិមជ្ឈមណ្ឌលសម្ពន្ធភាពការងារ និងសិទ្ធិមនុស្ស (CENTRAL) លោក មឿន តុលា ជឿជាក់ថា ប្រទេសហុងគ្រី នឹងមិនមានឥទ្ធិពលធ្វើឱ្យគណៈកម្មការអឺរ៉ុបផ្លាស់ប្ដូរជំហរក្នុងរឿង EBA នេះឡើយ ផ្ទុយទៅវិញ ការបាត់បង់ ឬរក្សាបាននូវប្រព័ន្ធអនុគ្រោះពន្ធ គឺស្ថិតនៅលើរដ្ឋាភិបាលកម្ពុជាខ្លួនឯង។ លោកយល់ឃើញថា សហភាពអឺរ៉ុបទំនងជាមិនចង់ដកហូតប្រព័ន្ធអនុគ្រោះពន្ធពីកម្ពុជាឡើយ ក៏ប៉ុន្តែប្រសិនបើគ្មានការវិវឌ្ឍជាវិជ្ជមានណាមួយរឿងសិទ្ធិមនុស្ស និងប្រជាធិបតេយ្យទេនោះ សហភាពអឺរ៉ុបអាចនឹងបង្ខំចិត្តកាត់ផ្ដាច់ការអនុគ្រោះពន្ធពីកម្ពុជា៖ «ឥលូវនេះកូនសោចាក់ឱ្យមានដំណោះស្រាយហ្នឹង គឺនៅក្នុងដៃរដ្ឋាភិបាលកម្ពុជាហ្នឹងឯង។ បើកម្ពុជាយើងដោះ ( ស្រាយ ) បញ្ហាទាំងប៉ុន្មានដែលសហភាពអឺរ៉ុបលើកឡើង ដូចជា រឿងសិទ្ធិពលរដ្ឋ សិទ្ធិនយោបាយ សិទ្ធិសេរីភាពសមាគម សិទ្ធិចងក្រងគ្នាជាសហជីព និងសិទ្ធិសេរីភាពបញ្ចេញមតិ រួមជាមួយនឹងការដោះស្រាយបញ្ហាដីធ្លី ជាដើម នោះប្រាកដជាកម្ពុជាមិនបាត់បង់ EBA ហ្នឹងទេ»។
ភ្លាមៗ ក្រោយការប្រតិភូអឺរ៉ុបចេញសេចក្ដីថ្លែងការណ៍នៅថ្ងៃទី១៣ មិថុនា មន្ត្រីនាំពាក្យបក្សកាន់អំណាចលោក សុខ ឥសាន បានប្រកាសមិនទទួលយកសំណើរបស់សហគមន៍អន្តរជាតិនេះឡើយ ជាពិសេស ការដោះលែងប្រធានគណបក្សសង្គ្រោះជាតិ លោក កឹម សុខា។ លោក សុខ ឥសាន បានប្រៀបធៀបករណីរំលាយគណបក្សប្រឆាំង ដែលសង្គមស៊ីវិលចាត់ទុកជាករណីរំលោភច្បាប់នោះ ទៅនឹងខ្មោចដែលស្លាប់ហើយ មិនអាចរស់ឡើងវិញបានឡើយ។
សារព័ត៌មានរបស់ប្រទេសហុងគ្រី ឈ្មោះ ហុងគ្រី ធូដេ (Hungary Today) ផ្សាយនៅថ្ងៃទី១៤ មិថុនាថា នាយករដ្ឋមន្ត្រី ហុងគ្រី លោក វិចទ័រ អរប៊ែន បានគាំទ្រទំនាក់ទំនងសេដ្ឋកិច្ចកម្ពុជា និងអឺរ៉ុប ហើយទំនាក់ទំនងនេះ មិនត្រូវយកបញ្ហានយោបាយមកដោះស្រាយនោះទេ។ កាសែតនេះ មិនបានបញ្ជាក់ដូចការអះអាងរបស់លោក ហ៊ុន សែន ដែលថា ហុងគ្រីនឹងជួយកម្ពុជាក្នុងករណី EBA នោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។