លោក ហ៊ុន សែន ព្រមាន​ចាប់​ខ្លួន​អ្នក​ទោស​នយោបាយ​វិញ បើ​ហ៊ាន​និយាយ​ថា ការ​ដោះលែង​ជា​សម្ពាធ​អន្តរជាតិ

ដោយ យន់ សាមៀន
2019.11.16
ហ៊ុន សែន ៦២២ លោក​នាយករដ្ឋមន្ត្រី ហ៊ុន សែន
Photo courtesy of SPM Page

មេដឹកនាំ​របប​ក្រុងភ្នំពេញ លោក ហ៊ុន សែន ព្រមាន​ថា លោក​នឹង​ឱ្យ​អាជ្ញាធរ​ចាប់ខ្លួន អ្នក​ទោស​នយោបាយ​ប្រមូល​យក​ទៅ​ដាក់​គុក​វិញ បើ​ហ៊ាន​និយាយ​ថា ការ​ដោះលែង​ពួកគេ កើតឡើង​ដោយសារ​សម្ពាធ​អន្តរជាតិ​។ អ្នកវិភាគ​ថា ការ​លើកឡើង​បែបនេះ បង្ហាញ​ថា សកម្មភាព​ចាប់ចង និង​ដោះលែង សកម្មជន​បក្ស​ប្រឆាំង​កន្លង​មក មិនមែន​ជា​គោលការណ៍​ច្បាប់​ទេ ជា​ការ​ធ្វើឡើង​តាម​មាត់​និង​អារម្មណ៍​របស់​លោក ហ៊ុន សែន តែ​ម្នាក់។

លោក ហ៊ុន សែន គំរាម​ថា លោក​អាច​ចាប់ខ្លួន អ្នក​ទោស​នយោបាយ​ទាំងអស់​ដែល​កំពុង​មាន​សេរីភាព​បណ្ដោះអាសន្ន ដាក់​ចូល​ក្នុង​ពន្ធនាគារ​តាម​កន្លែង​ដើម​ឡើងវិញ​តែ​ក្នុង​រយៈពេល​បី​ថ្ងៃ​ប៉ុណ្ណោះ។ លោក​បញ្ជាក់​ថា អ្នក​ដែល​ត្រូវ​បាន​តុលាការ ដោះលែង​រួច​មក​ហើយ​នោះ នៅតែ​ជាប់​បទ​ចោទ​ឡើយ។ លោក ហ៊ុន សែន ថា លោក​បញ្ជា​ឱ្យ​ដោះលែង​សកម្មជន​គណបក្ស​សង្គ្រោះ​ជាតិ​ចំនួន​៧២​នាក់​ប៉ុណ្ណោះ ចំណែក​អ្នក​ផ្សេងទៀត មិន​ត្រូវ​បាន​ដោះលែង​ទេ ហើយ​ក្រុម​មេដឹកនាំ​បក្ស​ប្រឆាំង ក៏​គ្មាន​ការ​លើកលែង​ទោស​ដែរ គឺ​បន្ត​ចាប់ខ្លួន​ដដែល។ លោក​ព្រមាន​ឱ្យ​មេដឹកនាំ​គណបក្សប្រឆាំង បញ្ចប់​គម្រោង​វិល​ចូល​ប្រទេស​កម្ពុជា បើ​លោក សម រង្ស៊ី នៅតែ​ជម្នះ​ធ្វើ​សកម្មភាព​វិល​ចូល​ប្រទេស​វិញ នោះ លោក នឹង​នៅតែ​បន្ត​ចាប់ខ្លួន​អ្នកគាំទ្រ​លោក សម រង្ស៊ី ត​ទៀត៖ «ថា អា​ក្រៅ អា​មេ​ក្លោង​វា​ចុះ ប៉ិន​តែ​អានេះ​ខាងក្នុង​ស្អី​គេ​ដែរ​! លោក ហ៊ុន សែន ត្រូវ​គេ​គាបសង្កត់​ហើយ​បាន​ដោះលែង ឥឡូវ​សាក​ឬ ចង់​សាក​ឬ ប្រមូល​យក​មកវិញ គឺ​ប្រមូល​បាន​។ ខ្ញុំ​ថា ត្រឹម​៣​ថ្ងៃ​ប្រមូល​បាន​មកវិញ​អស់ ត្រឹមតែ ៣​ថ្ងៃ​ទេ បើ ហ៊ុន សែន ចេញ​បញ្ជា ក្រោម​ហេតុផល​សន្តិសុខ​ជាតិ ប្រមូល​មកវិញ​ខ្ទេច ដាក់​ចូល​គុក​វិញ​។ រួចហើយ កាត់​(​ក្ដី​)​តែម្ដងទៅ កាត់​ឱ្យ​ស្រូត រួច​ហើយ បែងចែក អាណា​ទៅ គុក​ព្រះវិហារ អាណា​ទៅ​គុក​ពោធិ៍សាត់ អាណា​ទៅ​ត្រពាំង​ផ្លុង អាណា​នៅ​ព្រៃ​ស លេង​ហែង​អ៊ីចឹង​ទៅ​មើល​។ ប៉ុន្តែ នយោបាយ​សន្ដោស​ប្រណី​ដែល​ហ៊ុន សែន ធ្លាប់​ប្រើ​ពីមុន បន្ត​ប្រើប្រាស់ ដោយសារ​បងប្អូន​ចាញ់​បោក​គេ»

ចំណែក លោក សម រង្ស៊ី ប្រធាន​ស្ដីទី​គណបក្ស​សង្គ្រោះជាតិ អះអាង​ថា ការ​ដោះលែង​អ្នក​ទោស​នយោបាយ​ដោយសារ​សម្ពាធ​របស់​សហភាព​អឺរ៉ុប ទើប​លោក ហ៊ុន សែន ចាប់ផ្ដើម​ដោះលែង​អ្នក​ទោស​នយោបាយ​។ លោក​សរសេរ​លើ​បណ្ដាញ​សង្គម​ហ្វេសប៊ុក (Facebook) អំពាវនាវ​ឱ្យ​ពលរដ្ឋ​អត់ធ្មត់​បន្តិចទៀត ហើយ​លោក​កំពុង​ប្រើប្រាស់​មធ្យោបាយ​ការទូត ដើម្បី​បើកផ្លូវ​ឱ្យ​ថ្នាក់ដឹកនាំ​គណបក្ស​សង្គ្រោះ​ជាតិ បាន​ទៅដល់​ទឹកដី​ប្រទេស​កម្ពុជា ក្នុង​ពេល​ឆាប់ៗ​ខាងមុខនេះ ដោយ​អហិង្សា និង​សន្តិវិធី។

ប្រធាន​ក្រុម​អ្នកវិភាគ​វ័យក្មេង កញ្ញា លី ស្រីស្រស់ យល់ថា ការ​គំរាម​ចាប់ខ្លួន​អ្នក​ទោស​នយោបាយ​យក​ទៅ ដាក់​ពន្ធនាគារ​វិញ បង្ហាញ​ឱ្យ​គេ​ឃើញ​ថា អតីត​អ្នក​ជាប់ឃុំ​ទាំងនោះ ជា​មនុស្ស​ស្អាតស្អំ គ្មាន​ទោស។ កញ្ញា លី ស្រី​ស្រស់​បន្ត​ថា សំដី​របស់​លោក ហ៊ុន សែន មិន​សមជា​មេដឹកនាំ​ល្អ​ដោយសារតែ លោក​ដឹកនាំ​ប្រទេស​អាស្រ័យ​លើ​តាម​អារម្មណ៍ និង​គ្មាន​ឆន្ទៈ ដោះលែង​ពលរដ្ឋ​គ្មាន​កំហុស​ពិតប្រាកដ៖ «ការ​លើកឡើង​ថា ការ​ដោះលែង​ជា​សមិទ្ធផល វា​ជា​ទឹកចិត្ត​របស់​លោក​នាយក​រដ្ឋមន្ត្រី ខ្ញុំ​គិត​ថា វា​នៅ​មាន​កម្រិត​ទេ ពី​ព្រោះ​ថា បើសិនជា​យើង​ចង់​បង្ហាញ​អំពើ​ល្អ ម្ល៉េះ​អ្នក​ទាំងអស់​នោះ មិន​ត្រូវ​បាន​ចាប់​ឃុំ​ខ្លួន​។ អ៊ីចឹង ខ្ញុំ​គិត​ថា ការ​លើក​ឡើង​បែបនេះ វា​គឺជា​សញ្ញា​បញ្ជាក់​មួយ​ដែរ ថា​យើង​មិនទាន់​អនុវត្ត​តាម​គោលការណ៍​ច្បាប់ គោលការណ៍​អ្វី​ទេ គឺ​អ្នកដឹកនាំ​នៅតែ​ប្រើប្រាស់​អារម្មណ៍ នៅ​ក្នុង​ការសម្រេច​គោល​នយោបាយ ព្រោះ​ការសម្រេច​ទៅលើ​បញ្ហា​មួយ​ចំនួន​ហ្នឹង គឺ​ផ្ដោត ឬ​គេ​ហៅថា ផ្ដោត​ទៅ​​លើ​តែ​អារម្មណ៍​របស់​ខ្លួន​ដែរ»

សកម្មជន​គណបក្ស​សង្គ្រោះជាតិ​ចំនួន ចំនួន​៨៨​នាក់​ត្រូវ​អាជ្ញាធរ​លោក ហ៊ុន សែន ចាប់ខ្លួន​ចាប់​តាំង​ពី​ខែ​សីហា​។ នៅ​ថ្ងៃ​ទី១៦ វិច្ឆិកា គណបក្ស​នេះ ក៏​បាន​ចេញ​សេចក្ដីថ្លែងការណ៍ ស្វាគមន៍​ចំពោះ​ការ​ដោះលែង​អ្នក​ទោស​នយោបាយ ការ​ដក​ហូត​ដីកា ចាប់ខ្លួន និង​ការ​បន្ធូរបន្ថយ​លក្ខខណ្ឌ​តុលាការ​របស់​លោក កឹម សុខា ប្រធាន​គណបក្ស​សង្គ្រោះ​ជាតិ​ដែរ។ ប៉ុន្តែ​គណបក្ស​ប្រឆាំង បន្ត​ទាមទារ​ឱ្យ​បញ្ចប់​ការ​ចោទ​ប្រកាន់ លើ​អ្នក​ទោស​នយោបាយ​ទាំងអស់​ទៅ​តាម​សំណើ​របស់​សហគមន៍​អន្តរជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។